Overblog Suivre ce blog
Editer l'article Administration Créer mon blog
3 septembre 2014 3 03 /09 /septembre /2014 11:50

TAIORAA.

Mataio 22:15-22 Ta te Atua i te Atua ra.

Ei ìrava tumu, Mataio 22 ìrava 21 vh. E HOPOI MÄORI I TA TAITARA IA TAITARA RA, E TA TE ATUA RA, E HOPOI A IA I TE ATUA RA.

Tätararaa.

Ua tupu teie parau i roto i te hoê pariraa a te mau Faritea ia Ietu. Ia fifi O ia i roto i ta na mau òhipa faaìteraa i te mau hinaaro o te Atua. E aha te mau räveà ìno i òhipahia e te mau Faritea ? Ua tono rätou te hoê pupu taata tei parauhia te mau herotiani. Teie pupu taata, e mau taata ia no Herota, o rätou ätoà teie e turu nei i te faateraa a te hau Roma e vai ra i taua tau ra. I roto i teie faanahoraa te tuuhia nei o Ietu i mua i te hoê òè mata piti, oia ia, ia faahapa o Ietu ia Taitara, e ririhia ai o Ietu e te mau Roma, ia faahapa hoì o Ietu i te Ati - Iuta ra e riri ia to na nunaa ia na. Te manaò tumu ra o te mau Herotiani, ia mutu o Ietu i teie òè. No te ore - raa e noaa ia rätou te faahapa te faaìte nei rätou i te hoê moni veo, e i nià i teie moni e hohoà ia no te hoê o te emepera roma, e i muri i teie moni e hohoà ia no te hoê arii vahine no te hau, i ta na rima atau te vai ra ia te hoê àmaa raau. Te faaìte nei o Ietu i to na manaò i nià i teie moni, ta Taitara ra, na Taitara ia, ta te Atua, i te Atua ra ia. Te auraa no teie parau maori ra ia eiaha ia faatuàtihia te hinaaro o te taata i to te Atua. E ore roa hoì e tià ia ravehia teie mau òhipa. Te faanahoraa a Taitara, e faanahoraa ia no te faatîtî, no te hamani – ìno, no te aroha òre, àreà ra te faanahoraa a te Atua no te aroha ia, no te here, no te hau, e te haamaitaìraa.

I roto i te taatoàraa no teie taiòraa ta tätou Mataio 22:15-22 mea ïti roa to Ietu mau manaò, ua rahi äè te mau manaò o teie àmaa faaroo Herotiani i te ìmiraa i te mau raveà ätoà ia topa o Ietu i roto i ta rätou mau òpape no te haavare.

No te mea na roto i te parapore ta te Fatu i faatià i te mau täpati i mairi, ua päpu maitaì i te mau arataì o te nunaa e, o rätou ta te Fatu e parau ra.

No reira no to rätou ìte päpuraa e, o rätou tera feia ta te mau parapore e faahapa ra, ua hinaaro teie feia e haru e e tapeà i te Fatu, e aore e haamamu, eiaha O ia ia turepu faahou i te nunaa. Na roto i taua mau huru ra, te riro nei te reira ei mau tapaò tei faaära mai e, ua riro te Fatu i teie nei mai te tahi tumu raau o te tano ia iriti tumuhia ia ore O ia ia faaäpiäpi faahou i te àua i reira to te mau faatere o te nunaa tanu –noa - raa i te raau taèro no te hara, e no te patoì i te Atua. Te tupu nei teie mau patoìraa na te faatere o te nunaa, ia ore te mau faanahoraa a te Atua ia haere i te rahi, a fifi hoì rätou i te parau tià a te Atua. Te faatupu nei rätou i te mea, i haamata i te pihaahaa i roto i to rätou òpu mea titauhia ia ìmi e ia feruri rätou i te tahi raveà papu maitaì e roaa ai te Fatu ia rätou i te taparahi.

Teie nei, ua vai rätou i mua i te parau a te Fatu, TA TAITARA E HOPOI IA TAITARA RA,TA TE ATUA, E HOPOI I TE ATUA RA.

Ia au i te òmuaraa no ta tatou parau, te faaära nei te tupuna no te Evaneria oia hoì, o Mataio ia tatou e, ua haaputuputu te mau faatere no te tahi àmaa faaroo Ati - Iuta, no te feruri i te parau e roaa ai te Fatu i te faahapa.

Na roto i teie arataìraa parau ta teie tupuna no te Evaneria te ìte nei tatou e, te òhipa e ravehia nei e teie àmaa faaroo i teie taime e ère ia i te òhipa maitaì. I roto i ta tatou tereraa òhipa, i roto i te Etaretia, i roto i te mau haapiiraa faaroo, te mau feruriraa pipiria, aita tatou e ìmi ra i te mau raveà ia pohe o Ietu ia tatou, te ìmi nei ra tatou nahea to tatou huru taata tahito e pohe ai i te Fatu e i ta na mau raveà

E i roto i ta tatou parau, te putuputu nei teie àmaa faaroo no te feruri e, Nahea o Ietu e pohe ai ia rätou ? Aita ra teie àmaa faaroo, i putuputu, no te ìmi i te mau raveà, e nahea rätou e maramarama ai i te mau manaò ta Ietu e faaìte nei no te Patireia o te Atua. Ua hau ätu ra to rätou feruriraa e e fifi rätou i te parau tià a Ietu.

No te faatupu i te òpuaraa mai teie te huru, mea titauhia ia àmuimui te mau puai ätoà. Eita ätu ra ia e ravaì noa i te mau pîpî a te àmaa faaroo faritea, te àpiti ätoà mai nei ra, i roto i teie òpuaraa ìno te mau pîpî a te mau herotiani.

I roto i te parauraa a Mataio, e ère te feia faatere iho o na àmaa faaroo tei haere e farerei ia Ietu, ua tono ätu ra, teie mau faatere faaroo i te tahi feia ê ê. Ia hiòhia, e tuàti roa teie huru faanahoraa i ta te <<Mafia>> na te mau upoo e rave i te mau òpuaraa ììno, e na te tahi pupu taata e ätu e òhipa i te mau faaotiraa, hoê a huru ätoà i o nei. Te täpuni nei te mau upoo rarahi tei faaoti i to Ietu parau, i muri mai i ta rätou mau pîpî i tono ätu ia Ietu ra.

<<Teie feia i tonohia no te òhipa i te òpuaraa ìno, te hinaaro nei o Mataio e faaìte mai i te àravihi o teie pupu taata. Te àraaraa maitaì nei teie huru to rätou, na roto i ta rätou mau parau rii òmuaraa i faauta i nià i te Fatu. Ia haapaò maitaìhia ta rätou parau, mai te mea ra e, te na mua nei rätou i te peipei i te Fatu.<<E mea taaê iho - a oe, i nià i ta oe parau i nià i ta oe haapiiraa, i nià i to oe huru i mua i te taata e i mua i te Atua.>>

I te tau o Atamu raua o Eva, tera rii ätoà te huru o te faahema, i roto i to te Fatu tamataraahia i te metepara mai teie rii ätoà te peu ta te faahema i rave. E peu tumu iho - a teie na te tiàporo na mua iho - a o ia i te peipei e te ämoämo, e i muri mai ei reira o ia e faaìte mai ai i ta na òpuaraa e to na hinaaro.

I roto i te parauraa a Mataio, ua riro te mau parau rii faahiahia i nià i te Fatu, ei ùputa na reira teie mau tiàporo i te tuu i ta rätou òpuaraa ìno i faaineine no te Fatu. E mea äu änei i te ture ia hopoi i te moni aufau na Taitara e aore änei ? Hohoà maitaì teie uiraa i te tahi òmere tei ìritihia mai roto mai i to na vairaa e tei faatorohia mai e teie mau taeaè no te patiä i te Fatu.

I teie taime, ua vai noa mai ra i te vahi maramarama te òpuaraa ìno i pihaahaa noa i roto i te ààu no te mau enemi o te Fatu. No reira, te manaò ìno e vai ra i roto i te taata, ua paheru te Fatu i te reira, ua ìte o ia i te manaò o te taata i te äteä e ra, to na ìte eita ia e noaa Taramo 139:1-6 Hau roa ätu ai, e hiò te taata i rapae àu äè, àreà te Fatu e hiò o ia i te ààu. I Tamuera 16:7vh.

Ia hiò te Fatu i te ààu o to na mau enemi, ua papu ia na te mea ta rätou e titau ra. Ia haamanaò maitaì änaèhia tera uiraa ta rätou, E MEA AU ÄNEI I TE TURE IA HOPOI I TE MONI AUFAU NA TAITARA E AORE ÄNEI ? Eita e ore e, te hinaaro nei rätou e faatito i te mana fenua e te mana Atua, e faatito i te puai nuu, e te haèhaa o te Fatu, te hinaaro nei rätou e faatito i te patireia e faaterehia ra e Tiperio te Emepera no te hau Roma, e tera patireia ta te Fatu e parau pinepine ra i roto i ta na mau parapore, oia hoì te Patireia o te Atua. Teie huru arataìraa manaò e matara mai oia na roto mai i te parau no teie moni aufau na Taitara. I roto i ta Mataio parauraa, te faaìte nei o ia e, teie moni aufau e parauhia nei, hoê ia moni veo. Teie to na auraa, i nia i te àpi matamua o teie moni, ua tupaihia te hohoà e te parau o te Emepera Roma ra o <<Vespasien>>.Areà ra i muri mai i te aro o taua moni ra, te vai ra ia te hohoà no te arii vahine no te hau o te tapeà noa ra i te hoê àmaa raau i roto i to na rima àtau. I hiòhia teie moni veo, aita ätu e hohoà e ätu i nià , aita ätoà ätu e papaìraa e i nià ia na maori ra to te Emepera no Roma, e to tera arii vahine no te hau. I te taime o Ietu a ui ätu ai i ta na mau enemi, o vai te hohoà e te papaìraa i nià i te moni te haapäpu mai ra iho - a e no te Emepera no Roma, teie to na auraa i roto i teie moni, te matara mai nei to rätou parau, oia hoì te parau no te äratai, o te nunaa, e te parau ätoà o te taatoàraa o te nunaa maitihia.

<<Ia rave mai tatou i te tahi hiòraa i nià i ta tatou iho moni, mai te 20 tara änei, aore ra te 4 tara, te vai noa ätu ra, te ìtehia nei e, i tera vahi tei reira te upoo taata ua papaìhia e, Repupirita Farani, e i tera vahi e tumu haari to reira e te mouà, ua papaìhia e, Porinetia Farani. Te parau haamana o teie moni, tei roto ia i tera papaìraa e, Repupirita Farani, eita ätoà ia e hape e tei raro äè tatou i te mana Repupirita i te oraraa i teie mahana.>>

No reira te puòhu nei te parau no teie moni, tei manaòhia ei moihaa no te hoo i te Fatu, te puòhu nei te reira, i te fifi o te nunaa, e to na mau Faatere. E piti fifi e ìtehia nei.

1)E tîtî rätou i o rätou iho, na te tahi Hau ê roa e faatere nei ia rätou.

2)E ère änei, no to rätou iho - a ètaèta e no to rätou patoì – noa - raa mai i te Atua e tae roa mai i teie nei, te patoì ätoà nei a rätou i te Tamaiti àià. E ère änei no reira rätou i ère ai i to rätou tiàraa nunaa tiàma. No reira ia parau änaè te Fatu e, e hopoi i ta Taitara i Taitara ra eita e ore e, te vai ra tera manaò e, a faaòromaì i te faatura i to òutou tiàraa nunaa faatîtîhia, a auraro i to òutou tiàraa nunaa tei faaèrehia i to na tiàmaraa.

Ia parau änaè o Ietu e, ta te Atua e hopoi ia i te Atua ra, eita ore e, te hinaarohia nei, e haamanaò i te mau Ati - Iuta e e nunaa maitihia rätou, e te Atua, e to te Atua hohoà e ta na papaìraa, aita to nià i te auro e te àrio, ua tupaihia ra te reira i nià ia rätou, tei nià iho te hohoà o te Atua ia rätou, e ia tätou. Aita ra te Atua i tuu i to na hohoà i nià i te hoê taoà pohe, ua tuu ra te Atua i to na hohoà i nia i vahi ora, i te taime O ia a hamani ai i te taata, TE PARAU NEI O IA E E HAMANI TATOU I TE TAATA IA AU I TO TATOU HOHOA, IA AU I TO TATOU HURU,E UA HAAPUAÌ IHO RA I TE ORA I ROTO.

Na roto ia Ietu te faahaamanao nei te Atua i to na nunaa i to na tiàraa, e ui maitaìhia e nunaa moà, e autahuà, Te mea tano ia rätou ia rave o te ìteraa ia e, te tiaì ätoà mai ra te Atua i te mau hotu e au i to rätou tiàraa nunaa maitihia.

No reira, ei òpaniraa, e parau fifi roa tei tuuhia i mua i te Fatu ia hape ta na parauraa e fanau mai ia te hoê fifi rahi roa i te mau Faatere fenua e o Ietu e te patireia o te ao.

Teie ra, i te pae hopeà te na o nei Mataio e, ITE ÄE RA RATOU I TE REIRA PARAU, MAERE IHO RA,FAARUE IHO RA I TE FATU HAERE ÄTU RA.

ia ora na.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens