Overblog Suivre ce blog
Editer l'article Administration Créer mon blog
3 septembre 2014 3 03 /09 /septembre /2014 10:09

Täiòraa: Mataio 22/1-14

Ìrava Tumu : Ir. 14 : ‘E rave rahi hoi tei parau hia, e ïti rä tei mäìtihia.

E hoa here mä e, Ia ora na

I teie mahana, te tuuhia nei tätou i mua i te hoê parau e aore ia òhipa e ère i te mea âpï no tätou e te reira na roto ia i te parau no te tähi ôroà òia hoi te ôroà faaïpoïporaa. I roto i ta tätou täiòraa, te mea e faatiàhia ra no teie ôroà eita tätou e hinaaro ia tupu atoà i nià i ta tätou iho ôroà i faanaho no te mea, e rave rahi mau mea tei faaineinehia e te taime hoì ta tätou i horoà no te tupu maitaìraa no taua ôroà ra, te fäufaa tei faataahia, te mau manihini tei tïtauhia, te parau hoi no te maa e no te ïnu e ia tae i te mahana tei tiaì maorohia e tupu ai taua ôroà ra e inaha, aita te mau manihini i tae mai, eiaha ia tätou e maere tera huru o te fatu o te ôroà e ìnaha hoì e Arii tei faanaho i täua ôroà ra, e taata faaturahia teie ia te auraa, e tïtauraa o te ore roa te hoê e pätoì, e ìmi rä òia i te mau räveà ia tae ihoä no te mea e tïtauraa no roto mai i te ùtuafare Huiarii. Aita rä i tupu mai ta teie Arii i manaò e ìnaha, ua faaìte òia i to na maìnoìno e te riri atoà aita ia e faaäuraa, A tae hoi e.

Ia ìte ra hoì tätou e, ua tupu i nià i te ôroà faaïpoïporaa a teie Arii mai teie e faatiàhia ra e ta tätou parau no teie nei mahana. Auë ia ôroà i te peàpeà e, O te fifi rahi tei färereihia e teie nei fatu no te ôroà òia hoì te tae òreraa mai te mau manihini i tïtauhia no te mau tumu ta te täiòraa atoà e faataa ra. E nahea ra hoi. Terä tae òreraa mai te mau manihini te faaìte mai ra te reira a tähi, to rätou haafäufaa-òre-raa i tera tïtauraa a te Arii e te haafäufaa-ore-raa i te rohirohi o te feiä tei faanaho i täua ôroà ra. A piti, to rätou atoà faahuru-ê-raa tera òaòa o na tino faaïpoïpo no roto mai i tera ôpu fëtii Huiarii. Èita e òre e, ua o mai te manaò tähoo i roto i teie Arii no tera feiä tei òre i tae mai. Aita ra täua ôpuaraa ra i tupu, no te mea ua faaue òia i to na mau tävini ia haere na roto i te mau aroä e rave mai te feiä tei òre roa atu i manaòhia no te haere mai i nià i te ôroà faaïpoïporaa e ìnaha, o te òhipa ia i tupu . Èita e òre e, to tera fatu no te ôroà na reira raa, ua rahi atu ia to na òaòa tei haamoè i to na ìnoìno rahi na roto i te tae-òre-raa te mau manihini i tïtauhia. Teie ra hoì, te faatià atoà nei ta tätou täiòraa i te tähi atu fifi ê atu ta te fatu no te ôroà i färerei mäori ra to te tähi ia tino haere-roa-raa i te vahi èita òia e täno e pärahi no to na ia àhu. E nahea ra hoì te faatià ra ta tätou täiòraa ua faaue te Arii ia âfaìhia teie taata i räpae no te mea, èita òia e au e pärahi i te vähi ta na i pärahi. I mua i te faatiàraa no ta tätou parau, te ôpani nei te Èvaneria na roto i tera reo ïti, E rave rahi tei parauhia, e ïti rä tei tïtauhia.

Ia hiò hoì tätou i teie parau nehenehe roa, te mea e tano atoà e hiò mäori ra e mata na ia tätou i te hiò te tähi mau äuraa, te tähi mau haapiiraa no teie parau i mua i teie mahana haamoriraa ta tätou e ora nei. A tähi, te mea ta teie parau e haapii mai ra mäori ra, ua âmuihia te parau no te òaòa e te parau no te fifi. I te haamataraa no teie nei ôroà, e òaòa rahi tei tupu. E òaòaraa mai roto mai i te fatu no te ôroà mai te mau taime atoà e faatupuhia ai te tähi ôroà mai teie te huru. A piti, mea varavara roa e tupu ai te tahi mau faatäfifiraa mai tei ìtehia i roto i ta tätou täiòraa. A toru, te taata e tïtauhia, e ìmi ihoä òia i te räveà ia tae. Mea hiòraa ìno roa rä mai te peu e maìri te feiä i tïtauhia no täua ôroà ra.

Ia faaäu-anaè-hia i nia i te parau o te Fatu, to na täeraa mai i roto i teie nei ao, ua riro ia mai te tähi parau âpï òaòa e te reira no te feiä tei tiàturi i te Tämaïti a te Atua. Ua haere mai òia mai te hoê Arii te huru, noa atu ia e àita òia i färii i täua tiàraa ra. Ua tïtau atoà òia i te feiä e rave rahi no te âmui e rave rahi taime i nià i te tähi ôroà ta na i faatupu òia hoì te ôroà a te Fatu no to na hinaaro i ta na mau tamarii ia pärahi i roto i te ora, i roto i te òaòa mai tei ìtehia i roto i teie ôroà faaïpoïporaa. E ôroà no te òaòaraa, e tïtauraa o te òre roa atu te hoê e täno e pätoì. Te mea i ìtehia, e rave rähi tei maìri no te mau tumu rau. Te mea peàpeà roa atu, àita te feiä i tïtauhia i hiò noa aè i te òhipa rähi i rävehia e ìnaha hoì, hoê noa mea e hinaarohia mäori rä, ia pähono e ia tae i terä tïtauraa, tirara atu ai.

Te haapii mai ra teie parau ia tätou e, e tïtauraa atoà ta te Atua i te taata no teie tau no te âmui i nia i te ôroà no te òaòaraa ta na iho i faatupu e ta na i faaìte na roto i te mau haapiiraa a te Fatu iho no nià i te parau no te Pätireia o to na Metua i te Ao ra, te Pätireia no te Ora e na roto atoà i te mau faaoraraa maì, na roto i te mau temeio. Ìnaha, i mua i te maitaì rahi no te Atua tei òre i faaea i te tïtau i te taata no te àpiti atu i nià i ta na ôroà, te ìte-noa-hia nei ä to te taata täupupuraa i te pähono i tera tïtauraa a te Atua. Mai tei ìtehia i roto i ta tätou täiòraa mai te mea ra ia e, ua haafäufaa te feiä i tïtauhia i te mea ta rätou iho i faanaho e tei reira to rätou turuìraa i te tumu rätou i òre ai i tae. Teie ia te äuraa, ua rähi aè to rätou nounou i te mea ta to rätou iho puai i faanaho e i faaineine e ua moèhia ia rätou i te ìteraa e, te tïtauraa tei faataehia mai ia rätou no roto mai ia i te hoê e tiàraa Arii to na. E aha ia te faaäuraa no tätou no teie mahana haamoriraa.

E taime ia e ìte e faaroo faahou ai tätou to te huifaaroo i te mau òhipa teimaha e te ìno atoà tei tupu i nià i to tätou Fatu ra ia Ietu. Mai te taime no to na haereraa mai i roto i teie ao, aita Ietu i faaea i te tïtau ia tätou te taata nei no te tähi tumu päpü maitaì òia hoì te tïtauraa ia tätou i nià i te èà no te Ora Mure Ore e te Òaòa Mure Ore. E tïtauraa tei tuu ia tätou i roto i te faahaehaaraa. Te haapii atoà mai ra te reira ia tätou e, i mua i te rähi no te tïtauraa a te Fatu, eiaha atoà ra tätou ia maere e mea ïti te feiä e pähono mäori ra, o te feiä ia tei ora päpü i to rätou tiàturiraa e to rätou faaroo i roto i te Metia, tei vaiiho mä te uiui òre te mea tei faataupupu ia rätou ia haere i te Fatu ra no te mea ua ìte rätou i to rätou fäufaa òre i mua i te ora ta te Fatu i faataa no rätou. Te mau mäuiui e te mau hämani ìnoraa atoà tei rävehia i nià i to tätou Fatu te faaìte faahou mai ra te reira ia tätou e, àita te Fatu i nounou i te faatupu i te hoê ôroà no tätou te taata nei e te mea e uiui mäori ra, ua täno änei to te Fatu na reiraraa e aore ia, no teihea tumu i täuà mai ai te Fatu ia tätou te taata nei.

E parau rähi te reira i roto i te puta Taramo 8 te faateitei-raa-hia te parau no te Atua o te Rähu e te tuu-raa-hia te taata i raro ïti noa aè i te mana Atua. Teie ia te äuraa, e fäufaa rahi to tätou te taata nei i mua i te aro o te Atua no te mea, e na roto ia tätou te taata, e tupu ai te ôpuaraa faaora a te Atua no to te ao nei. E no reira, te mea e rave mäori ra o te faatäuiraa ia i terä parau no ta tätou ìrava, ia naò ia tätou ia parau e, E ïti tei parauhia, e rave rähi tei mäìtihia.

Èi ôpaniraa, e reo no te hoê taeaè tei parau atu i to na hoa here i to na na ôraa e, ‘E hoa ïti, e aha te mea e roaa ai ia ù te mau mea maitaì atoà o teie ao. Te pähono atu ra to na hoa, E rave i te mea haìhaì i reira noa òe e tupu ai i te rahi. Ua rave te Atua i te mea haìhaì na roto i te tïtauraa ia tätou i nià i ta na ôroà no te òaòa, te mea noa e toe ra ia tätou o te färiiraa ia i täua tïtauraa na na ra, ia òre hoì tätou ia tätarahapa a naò atu ai tätou i te parauraa, Ìnaha, ua täere roa e àita e räveà faahou.’ Aita â i täere roa, e taime ä tera e vai ra i mua ia tätou tei horoàhia mai ia tätou ia hiò faahou na roto i te mau parau ta tätou i faaroo i te roaraa no teie mahana haamoriraa. Ia täuturu mai te Atua ia tätou i te pähonoraa i to na mau hinaaro ia tätou te taata nei no te âmui i nià i te ôroà no te òaòaraa ta na e hinaaro noa nei ia ora tätou e tae noa atu te hopeà no teie nei ao. Ia maitaì òutou i roto i te faahanahanaraa i to tätou Fatu i teie nei mahana.

Gaston, Maräma a TAUIRA òrometua

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens