Overblog Suivre ce blog
Editer l'article Administration Créer mon blog
3 septembre 2014 3 03 /09 /septembre /2014 10:02

Mataio 21 : 28 - 32

Na tamaroa e piti

Te tatarahapa a te mätahiapo

Te haavare a te teina.

Te parau tià tei òre i faaroohia.

Te hinaaro o te Atua.

Ei tatararaa.

Te tahi ìrava, e tià e horoà ia tätou te tupuraa teie tumu te FAATURA, te reo faaue ia o te Metua i na tamarii, tei faahitihia i te ìrava 28 vh. E TA U TAMAITI, E HAERE OE E RAVE I TE ÒHIPA I ROTO I TA U O VINE AAUANEI.

I te ìrava 23 no ta tätou pene parau te haapäpuhia nei e, te faatià ra o Ietu i teie pärapore i nià i te mau tahuà, e i nià i te feiä paari tei haere mai e faaroo i ta na mau haapiiraa o ta na e horoà nei i mua i te mau taata e rave rahi i putuptu mai ai rätou i roto i te hiero. Te uihia nei o Ietu e te mau tià o te nunaa, O VAI TE TUMU I TEIE NEI MAU MEA TA OE E RAVE NEI ? E NA VAI I HOROA I TEIE NEI MANA IA OE ?

Ua tià roa ta rätou äniraa, no te mea o rätou te faatere i te nunaa i te pae no te oraraa faaroo, e i te pae no te oraraa tivira, na roto i te mana i horoàhia ia rätou e te hau Roma. Aita o Ietu i pahono i ta rätou uiraa, ua tuu ätoà ra O ia ia rätou i te uiraa i muri nei, NOHEA TE PAPETITO A IOANE ? NO TE RAI MAI ANEI, E NA TE TAATA ANEI ? I teie uiraa ta Ietu ua tupu te hoê feruriraa rahi i roto i te mau tahuà e te feiä paari. Mai te peu e, e pahono rätou e, no te rai mai, e riro o Ietu i te parau mai e, e aha iho ra òutou i òre i faaroo atu ai ia na? Mai te peu e, e parau tatou e na te taata, te mataù nei ia rätou i te taata. Ua pahono atu ra rätou ia Ietu ,AORE MATOU I ITE. No teie ìte òre to rätou i faatià ai o Ietu i teie pärapore no teie na tamarii i faauehia e to raua na Metua ia haere e òhipa i roto i te ô vine.

Te reo o te Metua i nià i teie na tämaiti ia haere raua i roto i te ô vine. Ua faaroo teie na tamarii i te reo faaue o te Metua, teie ra èita hoê ä huru to raua manaò. E ìtehia teie taa – ê - raa to raua i nià i ta raua färiiraa i te faaueraa a te Metua.

Te tämaiti mätamua oia hoì te mätahiapo, e tämaiti ìte e te märamarama, tei haapiihia i te peu maitaì, tei auraro i te äniraa a to na metua no te rave i te òhipa i roto i te ô vine, noa atu ä ia ta na parauraa e, e òre au e tae, inaha i muri äè ua haere o ia, mai te aàu tatarahapa. Te òhipa ta teie tämaiti i rave èi faaìteraa ia i te hape o ta na pahonoraa i mua i te tïtauraa a to na metua. Te vahi i faauehia ia na ia haere i reira e rave ai i te òhipa, e vahi ia no te ora. Ia òre ia òhipahia i roto i te ô vine e pohe te ô vine. O teie te vahi i märamaramahia e te tämaiti mätahiapo i to na patoìraa i te faaueraa a to na metua, i tupu ai to na tatarahapa mai roto mai i te hohonuraa o ta na àau. Riro atu ra ta na patoìraa èi färiiraa, ta na aita èi, E päpü èi faatupuraa i te hinaaro o to na Metua ia haere i roto i te ô vine òhipa ai. Teie tämaiti ta te pärapore e faaìte nei o te hohoà mau ia no te mau patereareha e te mau perofeta ta te Atua i tïtau èi faatupuraa i to na mau hinaaro i roto i to na nunaa. Te haamanaò nei tätou i ù nei ia Mote, tei ìmi i te mau raveà ätoà, no te patoìraa i te tïtauraa a te Atua ia haere i te fenua Àifiti e ìriti mai i te nunaa maìtihia e te Atua. Ta na mau patoìraa, e taata reo maromaroä o ia, noa ätu ä ia teie mau manaò to na, ua tià roa ra ia na i te haere i te vahi ta te Atua i tono ia na. Oia ätoà ia te mau perofeta, te haamanaò ätoà nei tätou i ù nei ia Ieremia, tei patoì ätoà i te tïtauraa a te Atua, èita e tià ia ù e tamarii ä hoì au nei. E te pähonoraa a te Atua, ua maìtihia hoì òe e au mai roto mai ä i te òpu o to metua vahine. Te òhipa i ravehia e teie mau tavini no te Atua mau ti ra ia te faatià faahouraa ia i te mana o te Atua i roto i to na nunaa. I tià ai i te nunaa ia hoì i nià i te èà no te parau tià e te parau mau no te mau hinaaro o te Atua. Ua tonohia mai e te Atua i to na mau tavini i roto i to na nunaa, ia tià i te mau tavini i te faaìte i te mau hinaaro o te Atua, i te mau vahi i reira rätou i te oraraa. I te mea ua faatupu te Atua i te hoê ùtuafare no na, i roto i te taata. Tei tiàhia mai e to na nunaa ta na i maìti. Tei reira te Atua i te tuuraa i ta na mau parau fäfau, ia haapaòhia, to na hinaaro. Na roto i teie parau fäfau aita i tupu i nià i te hinaaro o te Atua, ua rave noa te taata i te mea o ta na e ìte ra e maitaì no na. Àreà ra te hinaaro o te Atua ua vai noa ia te reira i pihaiiho i te manaò taata, mai te hoê parau pohe. E inaha hoì te parau tià a te Atua, o te ora ia o te taata. Ia färiu ra te taata i nià i te Atua, e noaa ia na te tiàturiraa âpï tei faatupuhia na roto i te haamaitaìraa a te Atua. Te mauruururaa o te Atua te ora ia o te taata. Na teie manaò to te Atua, e faaineine i te taata ia haapaò i te mau faaueraa e horoàhia nei ia na e te Atua na roto i te ture. Ia ìte änaè te taata faaroo i teie faufaa, e tupu ta na äniraa, no te faaitoitoraa ia na, i te tauturu a te Atua. E ìtehia te tauturu na roto i te hinaaro hoê, tei faitohia e te Atua. I mua i teie mau manaò, te faaìtehia nei ia te tiàraa o te Metua tane ta te pärapore e faatià nei. Te mätahiapo ua tatarahapa i ta na aita, e ua faatupu i te hinaaro o te Metua. Te teina ra ua E aita ra ,i faatupu i ta na E i te hinaaro o te Metua, ua topa o ia i roto i te parau tià òre. Te teina ta te pärapore e faaìte nei, mau ti ra ia te mau tahuà e te feiä paari, o rätou tei faaroo i te mau haapiiraa a Ietu, aita ra rätou i färii. E na rätou ätoà i pari haavare ia Ietu e, e faainaina Atua, i tupu ai te faautuàraa pohe i nià i te Tämaiti a te Atua. Aita ra i ìtehia te parau no te tatarahapa i roto ia rätou i te òhipa ta rätou i rave i nià i te Tämaiti a te Atua. Ta rätou pahonoraa ia Ietu i te uiraa e, O VAI TEI HAAPAO I TE HINAARO O TE METUA ? Te naò nei ia rätou e, o te tämaiti mätahiapo, oia hoì te mau patereareha e te mau perofeta. Ia òre ra rätou ia tatarahapa. Te faaìte nei ia o Ietu i to na peàpeà, e na mua ia te mau terona e te mau vahine faaturi ia rätou i te Patirea o te Atua. I te mea o rätou ätoà tei färii i te päpetitoraa tatarahapa tei ravehia e Ioane i te metepara. Ua ìte hoì te mau tahuà e te feiä paari i te òhipa i ravehia i te metepara, aita ra rätou i tatarahapa.

Te naò nei ta tätou ìrava, E TA U TAMAITI HAERE OE E RAVE I TE OHIPA I ROTO I TA U O VINE.

Te ô vine ta te ìrava e parau nei mau ti ra ia te nunaa o te Atua, tei roto i teie vahi te tonoraahia na tamarii e piti nei. E aha atu ra ia tei noaa i te tämaiti mätahiapo na roto i to na tatarahaparaa ?

1) Ua noaa ia na te àau âpï e te varua âpï, o ta Etetiera ia e faaìte nei i te pene 18 i te ìrava 31,32 E FAARUE Ê ATU ÒUTOU I TO ÒUTOU MAU ÌNO ATOA RA I HARA AI ÒUTOU NA E FAAAAU ÂPÏ E TE VARUA ÂPÏ E AHA HOÌ ÒUTOU I HINAARO AI I TE POHE E TE ÙTUAFARE O ITERAERA. AORE ROA HOÌ O Ù E MAURUURURAA I TE POHE O TE TAATA E POHE RA TE PARAU MAI RA TE FATU RA O IEHOVA E TE NA NA E FARIU MAI IA ORA.

2) Ua noaa ia na te itoito, te mahanahana, te aroha e te hamani maitaì. Te parau ia ta Pauro i faaìte i to Firipi i te pene 2 i te ìrava 1, E TEIE NEI E MAA ITOITO TEI TE METIA NEI E MAA MAHANAHANA TO TE AROHA E MAA AURAA TO TE VARUA E MAA AROHA AAU E TE HAMANI MAITAI.

Terai or.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens