Overblog Suivre ce blog
Editer l'article Administration Créer mon blog
4 septembre 2014 4 04 /09 /septembre /2014 00:28

Taiòraa, Mareto 13, 33 – 37.

33 E haapaò maitaì, e faaitoito, e pure, aita hoì òutou i ìte i taua tau ra.

34 E au hoì te Tamaiti a te taata nei i te hoê taata i haere i te fenua ê, o tei vaiiho i to na fare, e poroì iho ra i to na mau tavini, tuu iho ra i te taata atoà i ta na ôhipa, e poroì iho ra hoì i te tiaì òpani ra e faaitoito.

35 E te na na, e faaitoito atoà òutou ; aore hoì òutou i ìte i te hora e tae mai ai te taata fare, èi te ahiahi ra, èi te tuiraa pö, èi te àaoaraa moa ra, èi te poìpoì :

36 o te puòoi noa mai o ia, e roohia mai ua taòto òutou.

37 E ta ù e parau atu ia òutou na, o ta ù ia parau i te taata atoà, E faaitoito.

Ta tätou parau tei roto i te ìrava 33, e reo no te Fatu i te nä – ò – raa e, E haapaò maitaì, e faaitoito, e pure, aita hoì òutou i ìte i taua tau ra.

Hiò noa ai te Fatu e nä pipi toomaha o Petero, Iatopo, Ioane, e o Aneterea mai nià mai i te mouà Òriveta i te fare pure no Ierutarema, ua tauàparau rätou i te parariraa o teie fare pure. Te parariraa te fare pure no Ierutarema, èere änei te pü no te tiàturiraa âti Iuta terä e parari atoà ra. Mai te peu te reira, èere ia i te tahi parau naìnaì ta te Fatu e faaära ra. E parau rahi roa teie e tià i te nunaa âti Iuta ia faaroo e ia haapaò.

Na roto i te parau no te parariraa o te fare pure o Ierutarema, te faaära atoà ra te Fatu i te mau täpaò no te tupuraa o te tahi mau òhipa fifi i nià i te fenua na roto i te haereraa mai te mau metia haavare e te tupuraa te mau àueueraa fenua, te mau tämaì, te mau hämani – ìno – raa e te mau haavaraa o te mau pipi a te Fatu.

Te faaära atoà ra te Fatu i te haereraa mai o te Tamaïti a te taata no te tähoê i te feiä i maìtihia. Te faaära atoà ra te Fatu aita te taata i ìte i te mahana e te hora e tae mai ai te Tamaïti a te taata. Aita te mau àrere (merahi) i ìte. Aita te Tamaïti i ìte. Aita hoê taata i ìte. Te Metua anaè tei ìte I te mahana e te hora e tae mai ai te Tamaïti a te taata.

I nià I te parau no te parariraa o te fare pure no Ierutarema ta te Fatu e faaära ra i ta na mau pipi, ua türaì roa o ia I ta rätou parauparauraa I nià I te parau o te Tamaiti a te taata tei haere mai e tähoê I te mau taata tei mäìtihia. O vai te mau taata I mäìtihia ta te Fatu e parau ra. Te mau taata i mäìtihia, e mau taata tei faatupu i te hinaaro o te Atua. Te auraa, e mau taata tei haapäpü i to rätou faaroo i te Atua o te Metia tei faaära mai i teie parau ta tätou e hiò ra.

Te reira haereraa mai to te Tamaïti a te taata, aita hoê aè taata i ìte. Aita atoà te mau taata fätata roa i te Atua i ìte. Te auraa, aita te ìte i te reira parau i horoàhia i te taata ra noa atu e taata mäìtihia e te Atua. Aita atoà i horoàhia i te Tamaïti ra tei horoàhia te mana o te raì e te ao atoà nei. Te Atua anaè te Fatu o te raì e te fenua tei ìte i te mahana e te hora no te haereraa mai o te Tamaïti a te taata. Te auraa, e òhipa te reira tei ìtehia e te Atua no te mea na na te reira e faaoti e e faanaho, e faatura ia tätou i te reira. Tei roto te reira faaotiraa e te reira faanahoraa i te tiàmäraa o te Atua. Ta tätou o te färii i te reira tiàmäraa to te Atua i te faaotiraa e te faanahoraa o te reira parau. Mai te peu te faaära mai ra te Tamaïti i te reira parau, e täpaò faaìte e te faatura ra te Tamaïti i te reira faaotiraa a te Atua, no reira O ia i haapäpü mai ai : aita atoà te Tamaïti i ìte.

I mua i te faaäraraa a te Fatu i nià i teie parau, e tià ia tätou ia haamäuruuru i te Fatu o ia i faaära mai i teie parau. Aita teie faaäraraa i faataa – noa – hia no te mau pipi anaè. Te taata tei färii ia Ietu èi Fatu, e hiò atoà o na i teie faaäraraa no na atoà. Ia färii tätou i teie faaäraraa, èita tätou e tämata i te tohu e te tatara i te parau o terä mahana. Te faahua ra ia tätou.

Te auraa, ua päpü anaè ia tätou èere na tätou e faanaho i terä mahana, e vaiiho ia tätou ta te Atua i te Atua rä. E haere ia tätou i te vähi e tano tätou e hiò mai terä faaäraraa no te haereraa mai o te Tamaiti a te taata no te tähoê i te mau taata tei faatupu i to te Atua hinaaro. Te märamarama ra tätou teie haereraa mai o te Tamaïti a te taata no te haere mai ia e farerei i te mau taata tei faatupu i te hinaaro o te Atua. Te auraa, te faaitoito mai ra te Fatu ia tätou e faatupu i to te Atua hinaaro no te mea te reira te mau taata ta te Tamaïti a te taata e haere mai e färerei ia tae i to na mahana.

Te na ô ra te reo o te Fatu : E haapaò maitaì, e faaitoito, e pure, aita hoì òutou i ìte i taua tau ra.

Ua päpü atoà ia tätou i te tumu te Fatu i parau ai i teie parau no teie ihoa mau òhipa fifi ta na e faaära ra èita e òre i te tupu i roto i te oraraa o ta na mau pipi. Te auraa, te faaineine ätea ra te Fatu i ta na mau pipi i te äraraa i nià i te mau òhipa te haafifi ia rätou. Mai te peu e mau òhipa fifi ta rätou e farerei, ia faaineine ia rätou ia rätou. No te mea e riro terä mau òhipa fifi i te haaparuparu ia rätou i roto i ta rätou faaìteraa e to rätou e to rätou tiàturiraa i te Atua. Te riro ra ia te mau faaäraraa a te Fatu èi tautururaa ia rätou i te äraraa i mua i terä òhipa.

E haapaò maitaì, te tahi parau teie tei faaìte i to te Fatu here i ta na mau pipi tei mänaònaò i te rahiraa àti ta rätou e faaruru atu. Èita e òre ia tae i taua mau taime ra aita o ia to pihaì iho ia rätou. Mea rahi te mau òhipa ta rätou e hiò maitaì, ta rätou e ära ; ta rätou e faanaho, e ta rätou e feruri. Ua päpü ra ia rätou ua faaìte te Fatu ia râtou i ta na tauturu òia hoì ta te Atua parau ta na i faaìte ia rätou na roto i ta na mau haapiiraa. Te mau òhipa faaora ta na i faaìte ia rätou. Te mau tiàvaruraa värua ìno i ravehia. Te mau faatiàraa taata mai te pohe mai e te mau faaàmuraa i ravehia. Te reira te mau òhipa e tauturu ia rätou i te mau taime fifi ia haapaò maitaì.

e faaitoito, Te tahi atoà parau ta te Fatu i horoà i te mau pipi. Te huru ta te Fatu i faaìte i roto i to na oraraa, mai te peu na na te Parau, èere te Parau noa ta na e horoà ra. O na atoà i roto i te Parau ta na e faaìte ra. Te auraa, èita e tià ia tätou ia faataa ê i t Fatu e ta na Parau. E Parau ihoa ta na e horoà ra, tei roto atoà rä o na i ta na Parau.

Te Parau ta te Fatu e horoà ra e òhipa taua Parau i roto i te taata tei färii i taua Parau ra. No te mea te Parau e horoà na te Atua ta te Fatu e faaìte ra ta na mau pipi. Aore te Fatu i haere mai e faaìte i to na hinaaro i te hinaaro o tei tono mai ia na.

E faaitoito no te mea ua horoà te Fatu i te mea e itoito ai rätou noa atu te huru o te fifi e te huru o te àti ta rätou e färerei. Te Fatu tei vi te arii o te ìno terä e parau ra ia rätou. Te auraa, ua haamau rätou i to rätou tiàturiraa i nià i te Fatu e òre ai te mau ôpuaraa a te ìno i nià ia rätou e manuia.

e pure, te Fatu ta te Atua i püpü i te mana o te raì e te ao atoà nei terä e parau ra ia rätou. Te auraa, e anj i te tauturu i te Atua eiaha e faaea. Te pure, te mea e haapäpü i to rätou ère e to rätou faufaa òre. Te pure te mea e itoito I to rätou faaroo e ta rätou täviniraa. Na roto i te pure te faaìte ra rätou i to rätou tiàturi i te Atua te tumu o te òhipa no reira te Fatu i faaineine ai ia rätou. E pure i te Atua, te tumu o te ora, na na e faaìte mai i te mea e au ia rave e ia parau i te mau taime ahoaho. Teie faaitoitoraa a te Fatu i te mau pipi e pure, e räveà e vai fätata noa ai rätou i pihaì iho i te Atua. I roto i te mau taime fifi, te vai ra to rätou tiàturiraa tei pihaì iho te Atua ia rätou no te tauturu ia rätou. Te pure, te mauhaa faufaa roa a te taata tei färii i te mau haapiiraa a te Fatu no te faaitoito ia na i roto i ta na faaìteraa e ta na täviniraa.

E haapaò maitaì, e faaitoito, e pure, aita hoì òutou i ìte i taua tau ra.

Teie te parau a te Fatu i täpeàhia mai no tätou no teie täpati mätamua no te tiaìraa i te haereraa mai o ta na Tamaïti here. I mua i te rahiraa òhipa e haahia ra e tätou e te rahiraa fifi e àuahaati ra ia tätou, te faaroo ra tätou i teie reo to te Fatu tei faaära i ta na mau pipi no te mau òhipa fifi ta rätou e farerei. Mai te peu ua tauturu teie parau i te mau pipi, te tiàturi atoà ra vau e tauturu atoà teie parau ia tätou i te äraraa i nià i te mau òhipa ta tätou e rave ra no te tupuraa o te hau o te Atua i nià i to tätou fenua.

Te auraa, te vai ra te faufaa o teie parau ta te Fatu i horoà mai : E haapaò maitaì, e faaitoito, e pure, no te faaitoito ia tätou i te hiòraa i ta tätou faaìteraa, ta tätou täviniraa e te tupuraa o te maitaì i nià i to tätou fenua. E hiò tätou e aha te mau mea e orahia ra e tätou e e ôpuaraahia ra i nià i to tätou fenua tei tuàti e tei òre e tuàti i nià i to te Atua hinaaro.

Na tätou e färii e e faaòhipa i taua parau i te vahi te reira tâtou. E faaäraraa e e faaitoitoraa teie ta te Fatu e horoà mai ra. Èita te taata e ìno i te faaäraraa e te faaitoitoraa ia haapaòhia e tià ai. Te vahi faufaa, ua parauhia mai.

Ia haamaitaìhia te Atua no ta na Parau tei faaìtehia mai e ta na Tamaïti no te faaära e no te faaitoito. Ia ora na.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens