Overblog Suivre ce blog
Editer l'article Administration Créer mon blog
4 septembre 2014 4 04 /09 /septembre /2014 00:33

Mau taioraa.

Itaia 40:1-11 Te hamahanahana.

Taramo 84 Ia haamaitaihia te Atua.

II Petero 3:8-14 Te rai e te fenua àpi.

Mareto 1:1-8 Te Mana o te Varua Maitai.

Parau faaitoito.

Irava tumu Mareto 1:7-8.

E poro haere ätu ra o ia,na o ätu ra,te haere mai nei te hoê i muri iho ia ù,e mana rahi to na i to ù,o te ore ia e au ia pio i raro,a tatara ai i te tamaa no na ra.I papetito noa na hoi au ia outou i te pape,e papetito ra o ia ia outou i te Varua Maitai.

Ei manao tatara.

I roto i teie taioraa tei faataahia na tatou no teie mahana faaineineraa na tatou i roto i te tiairaa i te haereraa mai o to tatou Fatu,te haamanao-noa-hia mai ra i reira,e ua haamata o Mareto i te faahiti i te parau no Ietu i roto roa i te tahi tau ätea.Inaha hoi,aita te Papai Evaneria i omua mai i te àài o te Metia,i nià i te parau no to na fanauraahia i roto i teie nei ao,e aore ia,i nià i te parau no Ioane Papetito e ta na ohipa i roto i te metepara,ua hoi roa o ia i roto i te mau moëmoëâ a te mau perofeta.Te äuraa,i roto roa i te parau no to te Atua faaineineraa i ta na Tamaiti no ta na opuaraa ora teie nei ao.

Te reira te fä,i reira to te Atua faaineineraa ia Ioane Papetito no te haamaitai i te èà o te Fatu,ia au i te parau i tohu-äteä-hia e te perofeta ra e Marati i te pene 3 i te irava 1. ’’INAHA E TONO VAU I TA U VEA, E NA NA E HAAMAITAI I TE EA I MUA IA U RA E TE FATU TA OUTOU E IMI NA,O TE TAE VAVE MAI IA I TO NA RA HIERO,TE VEA A TE FAUFAA TA OUTOU I OAOA NA,INAHA,O TE TAE MAI IA,TE PARAU MAI RA IEHOVA TAPAOTA RA.’’

I te tau o Marati,ua itehia i reira te tahi vahi paruparu,i te mea e,aita te mau tahuà i rave papu i te mau tapura ohipa i pupuhia i roto i to ratou rima,i nià i te parau no te pupuraa tutia e tae noa ätu i te parau no te haamoriraa i roto i te hiero.O te tumu rahi mau te reira i titauhia ai te veà a te Atua ia tama i te reira hou tei faatahinuhia e te Atua e tae mai ai.Ia hiohia,e au ra e,te tere o te Metia i roto i teie nei ao,e tere tama ia i te oraraa o te taata,haamanina i te mau vahi puupuu,faaîî i te mau vahi àpoopoo e te vai ätu ra.........e te titauhia nei te taatoà no teie nei ao ia fanao i te reira tamaraa.O te tuhaa rahi mau ia e änihia nei i roto i te mau faaiteraa evaneria,no te tama i te taero e te viivii e haafifi noa nei i te oraraa o te taata,tei tarai hoi i te tahi huru taata tei ore i au i te hohoà e te huru o te taata ta te Atua iho hoi i hamani i te repo fenua,i to na hohoà e to na huru.

E taua tapura ohipa ra,ia ravehia ia, na roto i te papetitoraa tatarahapa.I mua i teie parau,ua maramarama maitai te àti Iuta e,è ère teie parau no ratou,o ratou hoi e haapao tamau noa nei i taua mau peu ra,no te feia ra tei ore a i farii i te hinaaro o te Atua,oia hoi,no te mau ètene.No ratou,no te tomo i roto i te faaroo àti Iuta,e änihia ia ratou ia farii i na titauraa e 3 no te haapapuraa i to ratou parahiraa i roto pü i te mau taata no te Atua.

A tahi,te parau no te peritome,tei riro ei tapao no te riro ei mero no te nunaa maitihia e te Atua.

A piti,te parau no te püpüraa tutia,tei riro ei tapao no fariiraa i te faaoreraa hara a te Atua.

A toru,te parau no te papetitoraa,tei riro ei tapao no te tamaraa i te mau mea tei haaviivii noa na i roto i to na oraraa.O te tumu rahi mau ia te taata e papetitohia ra e täumi-roa-hia i raro i te pape,no te tahi fanauraa àpi e no te àmui ätoà i roto i te pohe e te tiàfaahouraa o te Metia.

I mua i teie mau manao tatou i faahiti iho nei,ua maramarama maitai te àti Iuta i te reira,e aita hoi e faufaa ia haamanao-noa ia ratou i te reira.Te haapapu faahou nei ra o Ioane e,te riroraa ei mau tamarii na te Atua,è ère i te riro-noa-raa ei àti Iuta,te farii ätoà ra i te tämäraa hara a te Atua.Te auraa,mea tià roa i te àti Iuta i teie nei ia papetito faahouhia,e ia faî faahou i to ratou faaroo i te Atua,oia hoi,ia àpitihia te papetitoraa i te parau no faîraa hara e te faîraa faaroo. A tahi,te faîraa faaroo ia na iho na mua roa.Ia täpo te taata i to na mata i mua i te mau mea ta na e ore e hinaaroo e hio,te parau iho-ä ra no ta na mau hara,mai te taata te hio ia na i roto i te hio hipa,e tei parau ätu i to na äta e,mea reporepo mau oe i teie poipoi.O te huru parau ätoà ia i faaroohia i roto i te vaha no tera tamaiti tei haere i te fenua äteä e pühara i te faufaa metua.Ua ite o ia i te fifi rahi i farereihia e äna i taua fenua ra,no te öè rahi i tupu i taua fenua ra,tei ore i tuàti e hoê iti i te maitai rahi e vai ra i te ùtuafare metua.Ua faanaho iho ra o ia i te tahi faîraa hara e te tahi faîraa faaroo na na,ei raveà no te tatara faahou i te ùputa no te here e te aroha o te ùtuafare metua.E te raveà matamua roa hoi no te faatupu i te parau no te tatarahapa,o te faîraa ia ta tatou mau hara i mua i te Atua e i mua ätoà i te taata i hara ai tatou.

A piti,te faîraa ätoà i te ino i ravehia e te tahi taata,i nià i te tahi ätu taata.E ère i te mea faufaa,mai te mea e,e rave noa i te faîraa hara,e aore ia,te faîraa faaroo i mua i te Atua,mai te mea e,e aita te reira i faatupu hope-rao-hia i roto i te oraraa o te taata.E ère i te mea faufaa te reni noa i te tahi èà i te Atua ra,mai te peu e,eita te patu faataaê i roto pü i te taata e te taata e vavahihia.Oia mau,mea ohië roa te faanaho i te tahi faîraa hara,e aore ia ,te tahi faîraa faaroo i mua i te äro o te Atua,i te faatupu i te reira na mua roa i mua i te äro o te taata.Teie ra,aita e faaoreraa hara,mai te peu e,aita e faahaèhaaraa,e aore ia,aita e faîraa hara.

A toru,mea tia roa i te taata ia faaite i ta na faîraa hara,e aore ia,ta na faîraa faaroo i mua i te äro o te Atua.Te pohe o te manao faateitei,o te fanauraa ia no te faaoreraa hara.Te auraa,i te taime e noaa i te taata te puai no te faî i ta na hara,i reiea ätoà ia te Atua e parau mai e,ua faaorehia ta oë hara,mai te ààmu no te taata hara tei pure ätu i te Atua e,Aroha mai ia ù te taata hara nei.Areà te tahi ra te haava ra ia i to na taeaè,i roto i ta na pure,ma te parau haapuai,ia faaroo te mau taata ätoà.

Teie te papa no te faaiteraa evaneria a Ioane Papetito,e ta na poroi è ère ia tei te ùtu noa te päpairaahia,te papa ätoà ra te reira no to na oraraa taatoà.A hio noa na tatou i te huru vahi ta na i mäiti ei tahuä faaineineraa na na i te tonoraa i titauhia ai o ia e te Atua.Te vahi mau ra te reira tei au maitai no te faaroo i te reo o te Atua ia faanaho mai i ta na opuaraa ora no teie nei ao.

A hio ätoà na tatou i te fäito no to na àhu,e huruhuru tamera noa e tahi maa hatua iti.Te hohoà mau teie no te mau orero i te parau a te Atua e te mau perofeta no tera ra tau,mai te ite-ätoà-hia i te tau o Eria ia au i te faaiteraa a te mau Arii II i te pene 1 irava 8 ‘’UA PARAU MAI RA RATOU IA NA,E AHU HURUHURU TO NA,E UA TATUAHIA TO NA TAUUPU I TE TAURA IRI PUAA.Te àhu nei o Ioane Papetito i te àhu tei au maitai i ta na ra ohipa.

A hio ätoà na tatou i te huru no ta na maa,è ère i te mea faahiahia roa ia au i te hioraa a te taata i teie mahana.E matara mai iho-ä te hohoà o te feia rii i roto i teie huru faanahoraa,e ua na reira ra hoi te Atua i te haamaamaa i te mau puai ätoà o teie nei ao.No roto mai i teie huru oraraaa to na,i noaa ai ia Ioane te puai i roto i ta na faaiteraa,e ta na Evaneria e faaite nei,o te huru oraraa ia ta na e ora ra,tei puta roa i nià i te rai e i nià ätoà i te tino o te fenua nei.O te tumu mau ia te taata i faaroo ai i ta na parau,no te mea,na to na huru e horoà mai ra i ta na parau.Eita ra te reira huru e faahoi mai i te hohoà o Ioane Papetito,e hihi maramarama noa te reira no te türama i te parau no te haerera mai o te Metia,te tahi taata tei hau ätu ia na,o te ore e tià ia Ioane ia tätara i te tamaa i ta na âvaë.

Auaa ätoà to na haehaa i roto i ta na ohipa,i faufaa-ätoà-hia ai te hioraa a te taata e te Atua ia na.Te titauraa rahi roa ra i roto ia Ioane,ia faatoro ia o ia i to na rima e ta na faaiteraa,eiaha i nià iho ia na,i nià ra i tera e haere mai ,oia hoi,o te Metia ra o Ietu.Te reira ätoà ta tatou faatororaa i teie tau ta tatou e haere ätu nei.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens