Overblog Suivre ce blog
Editer l'article Administration Créer mon blog
4 septembre 2014 4 04 /09 /septembre /2014 00:44

Ioane 1,6-8;19-28

Ei manaò tatara.

Ia haamaitaìhia te Atua no teie horoà ta na ia tätou e na roto i ta na Tamaiti e fanaò ai tätou i te ora.

Ia haamaitaìhia te Atua no teie ätoà horoà ta na ia tätou to tatou fenua to tatou metua vahine horoà ora.

Ia haamaitaìhia te Atua no teie parau ta na i horoà mai no tätou i teie mahana.

Ta tätou parau no teie Täpati, tei roto i te Evaneria a Ioane i te pene 1 i te ìrava 7 i te naòraa e, I HAERE MAI TAUA TAATA RA EI ITE,E FAAITE I TAUA MARAMARAMA RA, IA FAAROO TE TAATA ATOA IA NA.

Ua papu ia tatou e teie ìte e parauhia ra e te papaì Evaneria e Ioane, o Ioane Papetito ia. Eita e òre teie huru ìte i te faatupu i te au - òre i roto ia tätou, ia hiò tätou i to na faito. Teie ta te papaì Evaneria a Mataio faaìteraa i te pene 3 i te ìrava 4 e huruhuru tamera to Ioane àhu, i tatuahia to na tauupu i te ìri puaa, atarite e te meri o te fenua ta na maa. Teie huru taata, e taata ia tei ora i roto i te ururaau à ore ra i nià i te mouà. Eita e òre i nià i tera huru faito to na eita roa ätu o ia e färiihia i roto i ta tatou mau fare pure. E inaha teie te huru taata ta te Atua i maìti no te faaineine i te taata i te haereraa mai o ta na Tamaiti here. Ioane Papetito è ère noa ia i te tahi huru taata i te faito huru ê, e taata maìtihia teie e te Atua. Te auraa, ia faaea noa änaè tatou i nià i to na faito e to na huru oraraa, eita tätou e ìte i te faufaa o teie taata. Mai ta te papaì Evaneria a Ioane e parau ra. ’’I HAERE MAI TAUA TAATA RA EI ITE, NO TE MARAMARAMA’’ ua riro o Ioane Papetito ei ìte no te Atua no te faatupu ia i ta te Atua òpuaraa. Te vai ra te tahi mau òhipa tei fanaòhia e Ioane Papetito, i riro ai o ia ei ìte no te Atua. Ia hiò änaè tätou i ta te papaì Evaneria a Ioane i faaìte mai nei e 2 tapura o te òhipa ta te Atua i horoà i roto ia na,

1) E faaìte i taua maramarama ra.

2) Ia faaroo te taata ätoà ia na.

I roto i teie tau no te Tiaìraa, te riro nei o Ioane Papetito ei raveà faufaa roa na te Atua no te tautururaa ia tätou i te ìteraa i ta na òpuaraa faaora. Te tauturu a Ioane Papetito ia tätou, tei nià i te faaìteraa ia tätou teie Tama no Noera ta tatou e tiaì nei o O ia te Maramarama. Te auraa, te vai ra te tahi mea hau ätu ä ta tätou e fanaò i roto i te tama no te Maramarama. Te tapaò teie no te aroha e te here o te Atua i te taata tei faauehia ia Ioane Papetito e faaìte i te taata. Teie Maramarama ta te Atua i tono mai, e raveà ia teie ta te Atua e faanaho no te tauturu ia tätou i te ìteraa i te rahi o to na here ia tätou.

1)E faaìte i taua maramarama ra, ua òhipa o Ioane Papetito i nià i teie tapura òhipa e ua ìte tätou e aha to na hopeà, ua tuuhia o ia i roto i te fare tapeàraa e ua täpu – roa -hia to na àrapoa, i te faaìteraa o ia i te MARAMARAMA no o mai i te Atua ra. Te Maramarama, i faaìtehia e Ioane Papetito, eita ia i te mea hinaaro – rahi -hia e te mau taata. Ua rahi ra to te taata haafifiraa i teie Maramarama. I te mea, e faaìte mai teie Maramarama i te parau tià, tei òre -roa te taata e färii. E Maramarama tei ìte -roa i roto i te hohonuraa no te ààu o te taata, no te reira tumu i ore ai te taata e färii i teie Maramarama.Te auraa o teie Maramarama, no te ìriti mai ia i te taata i rapae äè i to na àpu, ia ora i roto i te faanahoraa a te Atua. Te faaìteraa ia ta Marati e horoà nei i te pene 3 i te ìrava 5 E HAAFATATA ATU VAU I TE PARAU FAAAU NA U IA OUTOU; E RIRO IA VAU EI ITE OIOI I TE FEIA TAHUTAHU, E TE FEIA FAATURI, E TE FEIA TAPU HAAVARE, E TE FEIA FAAERE I TEI TARAHUHIA RA I TA NA UTUA, E TE VAHINE IVI, E TE OTARE, E TE RURI Ê ATU I TE TAATA Ê I TA NA, E AORE I MATAU MAI IA U, TE PARAU MAI RA IEHOVA TAPAOTA RA.

Te Maramarama ta te ìrava e faaìte nei, e Maramarama ia tei hau ätu i te mau maramarama ta tätou e faanaò noa nei. Ua hau ätu o ia i te ànaàna mahana, e te puai no te mau mori o te ao nei. E Maramarama teie i faarereihia e Tauro i nià i te èà no Tamateto, tei puta roa i roto i te vahi hohonu no to na huru, topa iho ra o ia mai nià mai i ta na puahorofenua, e vai noa iho ra o ia e toru mahana ma te ìte òre te òhipa i tupu i nià ia na iho. Riro roa ätu ra o ia mai te hoê tamarii ra te huru, tiihia mai ra o ai e Anania ia au te tonoraa a te Varua Maitaì, no te ìriti faahouraa i te hoê èà àpi i mua ia na. Te òpuaraa tià òre ta Tauro i faaoti i roto ia na no te hamani – ìno -raa i te Etaretia a Ietu -Metia. Ua mou ia i mua i teie Maramarama, ua rave te Atua e faataui i teie òhipa ei faaìteraa i te mana no to na Maramarama. Oia mau e Maramarama taa ê mau teie e faaìtehia nei e Ioane Papetito, e Maramarama tei arataì i te taata mai roto i te tîtîraa no te hara i roto i te faatiàmaraa i mua i te hara. Te vahi faufaa i roto i te faaìteraa a Ioane Papetito, i teie Maramarama, te haapäpu nei o ia e, E ERE AU TE METIA, E ERE AU O ERIA, E ERE ATOA I TE PEROFETA.Oia hoì eita o ia taua Maramarama, e mauhaa noa ra o ia i roto i te rima no te Atua, no te faaìteraa. No Ioane Papetito eita i te mea faufaa roa ia ìtehia o ia, ta na ätoà ia e hinaaro nei e faaìte i te mau taata ätoà. E ère tätou i te maramarama o teie nei ao o te Metia ra. Oia mau, i te mau taime ätoà tätou e tiàturi ai e, e matara ia tätou te mau fifi ätoà, e i te mau taime ätoà tätou e manaò ai e, e tei ia tätou ra te faaotiraa e aha ta te taata e tià ia manaò e ia tiàturi, e riro te faaroo Teretetiano ei faaroo tei haavi e tei faatîtî. O te Metia änaè te Maramarama, e ua titauhia tätou te hui -faaroo ia parahi i roto i te pure ma te haehaa e ma te äni ia arataìhia tätou e taua Maramarama ra. E tià i te Etaretia, na roto i te aroha o te Atua, ia riro ei faaìteraa i te Maramarama o te Atua tirara ätu ai. Mai te mea noa ätu ra e faariro tätou ia tätou iho e o taua ia Maramarama ra, ei reira mau tätou e äteä ai e e tapu roa ai i to tätou tuàtiàtiraa i te Puna mau o te Maramarama. O ta Ioane Papetito ia e faaìte nei, ia faaroo te taata ätoà ia na.

2) Ia faaroo te taata ätoà ia na, eita e ore teie ätoà te tahi tapura òhipa fifi tei òhipahia e Ioane Papetito oia hoì te ìmiraa i te mau raveà ia faaroo te taata i te Tama no te Maramarama. Ia hiò änaè tätou i ta te papaì Evaneria faaìteraa i te mau tapura òhipa tei ravehia e Ioane Papetito, e ìte- iho -a tätou i te tuàtiraa i roto i te FAAITERAA E TE FAAROORAA. No te mea i faite ai o Ioane Papetito i te taata i te haereraa mai o te Maramarama, ia roaa –iho -a i te taata i te tiàturiraa i taua Maramarama ra. Te auraa, te fa o te faaìteraa a Ioane Papetito, ia faaroo te taata, i te Metia.

I mua i te òhipa i ravehia e Ioane Papetito, te ìte noa ra tätou e tuhaa rahi ta na i nià i te haereraa mai o te Fatu. E te riro nei o ia ei hiòraa na tätou i teie mahana. Ua päpu ätoà ia tätou, e na tätou te mau maru metia no teie tau e rave i te òhipa i haamatahia mai e Ioane Papetito. Mai te peu te faito o Ioane Papetito è ère te mea au – roa -hia e tätou, ta na ra faaìteraa aore ra ta na taviniraa ua riro mau te reira ei hiòraa na tätou. Te roo o te Metia teie ta Ioane Papetito e faaìte nei ia faaroo te mau taata ätoà.

I roto i teie tau no te Tiaìraa, aita ätu e parau faufaa roa ta tätou e faahiti oia hoì o te faaararaa i to te ao, na roto i te pure, na roto i te àrueraa e te haere mai nei te Faaora o te ao, te Maramarama mure òre o tei faaìte mai i te hinaaro o te Atua e faaora i to na nunaa i roto i teie mau tau àrepurepu e te hepohepo mau. Ia tauturu mai ia te Maramarama Nui ia tatou i roto i teie tau Tiaìraa.

Terai or.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens