Overblog Suivre ce blog
Editer l'article Administration Créer mon blog
4 septembre 2014 4 04 /09 /septembre /2014 00:54

Taiòraa Ioane 1, 1 – 18

I VAI na te Roto i te mätamua ra, i te Atua ra hoì te Roto, e o te Atua hoì te Roto.

2 I te Atua ra hoi o ia i te mätamua ra.

3 Na na i hämani te mau mea atoà nei, aore roa e, e ère o ia i te hoê mea i hämanihia.

4 Tei roto ia na te ora, e taua ora ra to te taata ia märamarama.

5 I ànaana mai na te märamarama i te pouri, aita râ te pouri i färii atu.

6 I tonohia mai te hoê taata mai ô mai i te Atua ra, o Ioane te iòa.

7 I haere mai taua taata ra èi ìte, e faaìte i taua märamarama ra, ia faaroo te taata atoà ia na.

8 E ère râ o ia iho i taua märamarama ra, i haere mai rä e faaìte i taua märamarama ra.

9 O ia te märamarama mau, o te haamäramarama mai i te taata atoà i to na haereà mai i te ao nei.

10 I te ao nei o ia, e na na i hämani teie nei ao ; e àita to te ao i ìte atu ia na.

11 I haere mai nei o ia i ó na iho ra, e aore to na iho ra taata i ìte atu ia na.

12 Te feiä atoà rä i ìte atu ia na i te faarooraa i to na ra iòa, homai ra o ia i te mana ra ia rätou èi tamarii na te Atua.

13 Te feiä e ère i to te toto i fänau ai ra, e ère hoì i to te hinaaro o te tino, e ère hoì i to te hinaaro o te taata, no te Atua rä.

14 I riro mai nei te Roto èi taata e ua tià hapa mai i ó tätou nei, (e ua ìte mätou i to na hanahana, mai te hanahana e au i te Tamaiti fänau tahi a te Metua ra,) ua î i te maitaì e te parau mau.

15 No na ta Ioane i faaìte mai, ia na i pii ra, i te na òraa e, O ia teie ta ù i parau ra e, O te haere mai i muri iho ia ù nei, ua riro ia i muä ia ù, o mua ä hoì o ia ia ù.

16 Ua noaa ia tätou atoà nei te maitaì e au atoà i to na ra maitaì, no to na ra î.

17 Na Mote hoì i tuu mai i te ture, areà te maitaì e te parau mau, na Ietu Metia ia.

18 Aore e taata i ìte i te Atua ; o te Tamaiti fänau tahi ra i nià i te òuma o te Metua ra, o ia te faaìte mai ia na.

Te parau tei haamanaòhia èi faaitoitoraa na tätou, I teie faahanahanaraa na tätou I te Tamaïti a te Atua ta na I faafänau mai roto mai I te taata tei te ìrava 14 ia tei naò mai e, I riro mai nei te Roto èi taata e ua tià hapa mai i ó tätou nei, (e ua ìte mätou i to na hanahana, mai te hanahana e au i te Tamaiti fänau tahi a te Metua ra,) ua î i te maitaì e te parau mau.

Ia ora na tätou atoà I teie mahana haamanaòraa na tätou I te fänauraa o Ietu Metia, to tätou Fatu, e to tätou Faaora.

I mua I teie mau reo faateniteni, teie mau reo ârue I te parau no te Tamaïti a te Atua ta tätou e faahanahana nei na roto i teie ôroà Fänau, te hiti rä te tahi mau manaò faufaa roa o te tià roa ia tätou ia feruri e ia haapaò.

Te manaò mätamua, tei nià ia I te ìteraa e, aita te ôpuaraa ora a te Atua i täòtiàhia I roto noa I te hoê ärea tau e I te tahi noa vahi. Èita atoà e roaa ia tätou ia òpanipani I te òhipa faaoraraa a te Atua I roto I te hoê noa mahana, mä te parau e, I teie ôroà Noera, e tano ai tätou e parau , I aroha mai te Atua I to te ao e ua tae roa I te tono mai I ta na Tamaïti fänau tahi………., e o tätou ia e faahanhana nei I teie mahana.

Mai te tau o te mau hui tupuna mai ä to te Atua faaìteraa i to na Aroha e to na here I te taata e te rahuraa. I te mau vahi atoà, I te mau mahana atoà, I te mau taime atoà e I te mau tau atoà, to te Atua òhipa – noa – raa no te ärataì, no te päruru, no te faaora i te taata. Aita e òtià to te aroha e te here o te Atua, ia au te faaìteraa a Ioane, I vai na O ia I te mätamua, e vai ä O ia e tae noa atu I te hopeà, O ia te Matamehaì e te Faahopeà no te mau mea atoà, e no te mau taata atoà.

No reira, I mua I teie manaò mätamua ta tätou I hiò mai, mai te peu e, te faahanahana nei tätou I te parau no te Fänauraa o te Tamaïti a te Atua, tei hopoi mai te hau e te ora I te taata e te rahuraa, eiaha ia ta tätou faahanahanaraa ia faaroohia I teie noa mahana, ia parauhia rä, ia faaìtehia rä te reira ânanahi, I te mau mahana atoà e tae noa atu I to tätou hopeàraa. Ia tävevo ä te reo faateniteni e ia rahi atu ä te mau pehepehe, te mau reo himene o te Atua I roto I teie tau âpï ta tätou e fatata nei I te tomo.

Te piti o te manaò e tano e täpeà mai I mua I te ìrava tei manaòhia èi parau no tätou, I riro mai nei te Roto èi taata e ua tià hapa mai i ö tätou nei, (e ua ìte mätou i to na hanahana, mai te hanahana e au i te Tamaiti fänau tahi a te Metua ra,) ua î i te maitaì e te parau mau.

O tätou e ìte nei, e mea taa – ê, e mea maere mau ta te Atua huru faaìteraaa na roto I to na tävini, I to na hanahana e to na aroha I te taata e te rahuraa. Ua tiaì e ua ìmi te taata, e te tiaì noa nei ä, te ìmi noa nei ä te taata I te Atua I te tahi vahi e I roto I te hoê huru ta na e manaò rä e, e tano te Atua I roto I te huru arii, te Fatu mana, te Atua puai, te Metua o te mau mea atoà. Àreà te Atua o Noera, ua rave ia I te paruparu o te hoê àiü fänau âpï no te òha mai to na aro, I nià taata tei tatarahapa e te rahuraa. Ua rave te Atua Manahope I te huru haehaa o te taata no te faaìte mai I te rahi o to na hanahana. Te ìte mai ra änei hoì, e aore ia te färii ra änei hoì te taata I te rahi no teie òhipa ta te Atua I faaineine no na.

No tätou I teie mahana, I roto I te mau faaineineraa rau ta tätou e faanaho nei, e aore ia, I roto I te mau faatianianiraa rarahi e âpapahia ra I mua I to tätou mau aro, e o te poro – haere – hia ra na roto I te mau räveà taa – ê o teie tau, te î nei to tätou mau mata e to tätou mau àpoo tarià I te mau reo faateniteni e faahanahana ra I te parau no te Noera e no te tau âpï ta tätou e fatata roa ra I te tomo atu. I mua I taua mau faatianianiraa rä, I rotopü I taua mau taoà ànaana rä e te maniania, te haamanaò mai ra ta tätou ìrava, I riro mai nei te Roto èi taata e ua tià hapa mai i ó tätou nei, (e ua ìte mätou i to na hanahana, mai te hanahana e au i te Tamaiti fänau tahi a te Metua ra,) ua î i te maitaì e te parau mau.

E hinaaro rahi atoà to te Atua te farerei ia tätou, I te vahi tei reira tätou i te tatarahaparaa. Ua ôpua na e te ôpua noa nei ä te Atua I te faaora Ia tätou I roto I te mau ârepurepuraa rau e âuahaaati noa ra ia tätou. E te vahi mäere e te taa – ê hoì I roto I te faanahoraa a te Atua, aita atu e räveà tä na I mäìti, mäoti rä, te haehaa e te märu, e faahohoàhia ra I roto I te parau no te hoê àiü fänau âpï.

Terai òr

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens