Overblog Suivre ce blog
Editer l'article Administration Créer mon blog
30 juin 2014 1 30 /06 /juin /2014 19:59

MAU TAIORAA.

Itaia 56:1-8. Taramo 140.

Tei haapaò i te mahana o te Atua. Tei ani i te ora a te Atua

Te fare o te Atua. Te enemi o te tavini

Te faufaa a te Atua. Te haèhaa o te tavini.

Ta te Atua färiiraa i te tutia. Te tauturu e te parautià.

Te Atua tei haaputuputu i to na nunaa.

Roma 11:13-15 ;29-32. Mataio 15:21-28.

Te mau Etene tei haapaòhia. Te reo pii a te vahine ati Tanaana.

Te nunaa tei poihia. Ta Ietu haafatataraa.

Te faaora nui. Ietu tei tahopuhia.

Ta te Atua i faaora no te aroha. Te faaroo o teie vahine.

Te ora i roto i te mai.

Heheuraa taò.

Roma 11:14 faatipaupau

Roma 11:17 poihia

Ei manaò hiò àmui.

Te manaò tumu tei tapeàhia mai i roto i na taiòraa e maha teie ia e faaìtehia nei e te Evaneria o Ietu ia au i te papaìraa a Mataio i te pene 15 ma te ìrava 21 e faaea i te ìrava 28.Te ìrava ra i reira te manaò i te haamauraahia tei te ìrava 22 e te ìrava 28 vr; i te naò - raa e,

E TE FATU, E TE TAMAITI A TAVITA, E AROHA MAI OE IA Ù.

E TEIE NEI VAHINE E, E FAAROO RAHI TO OE.

Ei manaò tatara.

Te parau ta tatou e hiò nei i teie mahana paieti, ua tupu ia i Turia i Titona, e mau pae fenua teie, no te mau taata aita e tiàturi nei i te Atua ora, tei roto noa ra rätou i te mau haamoriraa Etene.

Te na reira nei o Ietu i te ärataìraa i ta na mau pîpî, e ia tätou ätoà i teie poìpoì âpï, èi hiòraa na tätou e aha te poroìraa ta te Atua e faatupu i nià i teie fenua no te hoê nunaa te tià ia parauhia aita e tiàturiraa. Ua topa i muri ia Ietu te fenua moà no Iteraera, tei nià o Ietu i te tahi tuhaa fenua ê, oia hoì, te mau àua e te òtià fenua ua ìritihia, aita e òtià faahou èi faaìteraa e, e fenua Etene tera, e, e fenua moà tera. Teie o Ietu i ropu i te hoê nunaa no te taime mätamua roa to na ìteraa, e no teie nunaa ätoà. E rave rahi te mau taata i taua mahana ra, i roto i te òire, te vai nei te paraparau ra, te tuo ra, te pii ra, ua àmui – änaè - hia teie mau rahiraa reo ai – ta - è i te àoaraa ùri. Mai roto mai i teie maniania rahi i òto ai te reo o te hoê vahine Tanaana, i te piiraa e, E TE FATU E TE TAMAITI A TAVITA E AROHA MAI OE IA U. A tahi roa ra o Ietu i piihia ai i teie tiàraa iòa te tamaiti a Tavita, na teie atu ra ia vahine e haapäpü nei e, e tupuna mau to Ietu i te fenua nei. E teie vahine tei roto ia o ia i te peàpeà, no ta na tamahine i roto i te mai rahi. O Ietu e tià ia parauhia e, ua faaea o ia i te tahi taime no te faaroo maitaì i teie piiraa tei varovaro i roto i te rahiraa maniania ta na e faaroo nei. I te mea te vai nei te hoê reo mea taaê roa i te mau reo ätoà ta na e faaroo ra. Ua faaea mamu noa o Ietu i teie pii no te aha ?

No te haapäpü änei e aha mau te huru o teie vahine, e aore ra no te vaiiho i teie vahine ia pii noa na i teie tiàraa e Tamaiti na Tavita, ia faaroo te mau taata ätoà. Te mau pîpî te ìteraa i te huru o te mau fifi te peàpeà nei, ani atu ra ia Ietu ia òre ia haapaò i te pii a teie vahine. Te pahono nei o Ietu i te hoê parau tei faahita i te mau pîpî, i te ìrava 24 AITA VAU I TONOHIA MAI I O NA,MAORI RA I TE MAU MAMOE I MOE I TE UTUAFARE RA O ITERAERA. Areà ra teie vahine tei faaroo ätoà i teie parau, ua tähopu mai ra ia Ietu, ma te parau e, e te fatu e, e turu mai oe ia ù. Aita teie vahine e hinaaro nei e vaiiho i te ora a te Atua ia haere noa na, na pihaiiho ia na, ma te ore e haapaò mai ia na, te hinaaro nei o ia e faariro i taua mahana ra, èi mahana no te Atua, èi tapaò na na, i haere mai nei te Tamaiti a te Atua i o rätou. E te manaò o Ietu, e manaò teimaha mau i te parauraa ätu i teie vahine, e mea au ore i te maa a te tamarii ra ia titiri atu na te ùri. Mea teimaha mau teie manaò to Ietu, ia manaò vau àhiri o tatou äè tei parauhia i teie hohoà parau eita paha tätou e àmui faahou i roto i te mau òhipa i reira o Ietu i te titauraa ia tätou. Teie ra vahine te pahono nei ma te färii i teie parau aita roa e ìtehia nei te hoê manaò te tià ia faatupu teie vahine i te hoê manaò e riri ai o ia. Te ìte nei tätou i ù nei te huru no te taata tei î i te maitaì e te märamarama, tei òre e hinaaro ia fifi te hoê äè taeaè. Te pahono nei teie vahine ia Ietu ma te haèhaa, OIA MAU E TE FATU TE AMU NEI RA TE URI I TE HUA RII MAA I MAÌRI MAI NO NIA I TE ÀMURAA A TO RÄTOU FATU. Te vai ra nei te hoê manaò o teie vahine tei faatupu i to na riri ia Ietu, aita roa, e manaò faatura ra teie èi ìritiraa te hoê ora àpi i roto ia na e ta na tamahine. Te riro nei teie tuhaa fenua na roto i teie vahine, èi fenua tei tiàturi i te faufaa no te parau ora a te Atua. Te reo o Ietu i teie vahine, E TEIE NEI VAHINE E E FAAROO RAHI TO OE, ORA ROA ATU RA TA NA TAMAHINE I REIRA RA.

E faaroo rahi to òe, e reo teie no Ietu i nià i teie vahine tei òre i aueue to na tiàturiraa, i te mau parau tei parauhia ia na. E reo ätoà tei faateitei i teie vahine i te ìteraa i te faufaa e vai ra i roto ia Ietu ei faaora. Ta Ietu e ìte nei i roto i teie vahine to na maru, to na haehaa, e to na ìriä òre. O te hohoà mau teie no te taata tei î i te Varua Maitaì. Ta te Varua Maitaì e faatupu, mauti ra ia, te hinaaro, te òaòa, te hau, te faaòromaì, te maru, te maitaì, te faaroo, te mamahu, e te hitahita òre. (Taratia5 : 22-23. Ua parauhia teie mau tumu parau e iva, na haamaitaìraa a te Atua i nià i te taata tei òre i àueue te faaroo. Tei tapeà tamau ra i te tiàturiraa i nià i te Atua ora. Te vahi faufaa te îraa teie vahine i teie mau maitaì, ua faarue o ia i to na oraraa tahito, ua rave i to na tiàraa faaìte i te mau maitaì o te Atua. O vai teie vahine, tei noaa ia na teie faaroo? E parau noa ia tatou e, e vahine no roto i te faanahoraa a te Atua tei î i te mau maitai ätoà a te Varua Maitai. E aore ra te Ètärëtia, tei ìte i te ora a te Atua, e i to na upoo faatere.

I teie mahana te haapii mai nei teie vahine ia tätou te huru no te taata ta Ietu e färii e, e faaora. Ma te faaìte ätoà mai e, ua haamau o ia i to na faaroo i nià i te aroha horoà noa a te Atua, ta Ietu i faatupu i nia i ta na tamahine, e ora roa atu ra teie tamarii i reira.

E o tätou i hea tätou i te haamuaraa i to tatou faaroo ?

ia ora na.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens