Overblog Suivre ce blog
Editer l'article Administration Créer mon blog
30 juin 2014 1 30 /06 /juin /2014 19:54

MAU TAIORAA.

I Mau Arii 19:9-11.

Ta te Atua faaitoitoraa ia Eria.

Te mataì maru a te Atua.

Te itoito o Eria i te Atua.

Ta te Atua faatahinuraa.

Taramo 141.

Te pure a Tavita.

Te paruparu o Tavita.

Te Atua te haapuraa.

Te ora a te Atua.

Roma 9:1-5.

Te Varua Maitai e te faaiteraa a te ààu.

Te mauiui o Pauro.

Te nunaa o te Atua tei faatavaihia.

Te haamaitaì mure ore a te Atua.

Mataio 14:22-33.

Te mau pîpî i nià i te poti.

Ietu i nià i te àre.

Ietu tei faaauhia i te tupapaù.

Ietu tei faatoro i ta na rima.

Ei hioraa àmui.

Te tahi manao tumu e vai nei i roto i na taioraa e maha nei teie ia e vai nei ia au te faaiteraa a Mataio i te pene 14 i te irava 27.Te nao nei te reo o Ietu A FAAITOITO O VAU EIAHA E MATAU.E tumu parau teie e itehia nei i roto i na taioraa e maha nei,to te Atua faaitoitoraa i to na mau tavini tei mataù,i te mau haafifiraa rau a te mau enemi.Tei roto i teie mau fifi to te Atua horoàraa i te puai i to na mau tavini.O ta tatou ia e hio i teie nei i to Ietu faaitoitoraa i ta na mau pîpî i te taime a fifi ai ratou i nià i te poti.

Ei manao tatara.

I muri äè i to Ietu faaàmu temeioraa i na taata e 5 000 i reira to na haapapuraa i te auraa mau no te mäna i àmuhia e Iteraera i te metepara,ua faaue o ia i ta na mau pîpî ia haere i nià i te pahi no te fano i te tahi pae.Eita e ore e,ua na reira o ia no te faatearaa ia ratou,i te tahi manao tei tupu i roto i teie nei nahoà rahi tei hinaaro i te faariro ia na ei arii ia au i te faaiteraa a Ioane 6:15,faatea ia ratou ia ore ia ô i roto i taua manao ra. E aita e ore e,o te tahi ätoà ia tumu i haere ai o ia i nià i te mouà e pure,faatearaa i taua tamataraa ra,te riroraa ei arii ia au i te hinaaro o te taata o te tuu ia na i mua,o te tuu ia na i nià äe i te taata.Ua haere mai o ia no te taata i rotopu i te taata,no te tauturu ia na i to na mau àti,no reira e haere o ia na nià i te miti eiaha ra na nià i te manao o te taata.

Te mau pipi tei tere na nià i te pahi,aita i maoro atu te tereraa i û ai i te fifi,te matai puai tei na mua mai e te puai hoi o te miti.Te faahaamanao ätoà ra ia tatou i te tahi àti tei farereihia e ratou,i reira o Ietu i te faaueraa i te matai e te miti ia faaea,e ua faaea iho ra.E mea fifi atu ra teie tere ia hiohia,no te mea aita pai o Ietu ia ratou ra,o ratou änaè ra.Ua tuu änei Ietu ia ratou änaè no te tahi haapiiraa no te tupuraa o to ratou faaroo? E aore ra e haamatauraa e faaiteraa ia ratou e,o ratou o ta na i faariro ei mau ravaai taata,no teie nei ao i reira ratou e ohipa ai e mea fifi ia e te rave àta,e ere ra i te mea hau noa.Ei faaite ätoà-raa ia ratou e,te vai ra te mahana aita o ia i rotopu ia ratou,i roto ra i te tahi huru atu hioraa,ia tae i te reira taime ia ohipa ia ratou,e na ratou hoi e faatere i te pahi,e ere ra no to na hinaaro e faarue ia ratou,no to na ra here i na reira ai o ia,o te poroira ia no to na revaraa.Ua hinaaro ätoà o ia ia riro te feia ta na i here e tei here ia na ei mau taata paari.Aita to ratou tere i ätea roa atu i haamata ai te mau fifi e vahi rahi a te toe ra e tapae ai,ei faaiteraa e,aita te pahi no te Etaretia i nuu rahi i mua i te taime o Ietu i vaiiho ai ia na änaè;aita änei hoi te reira e faaite ätoà maira i to tatou mau taupupuraa.Ua vaiiho Ietu ia ratou ia hoe noa i tera pô e tae noa atu ra i te ààhiata,i haere mai ai o ia ia ratou ra na nià i te miti no te faaiteraa e ua upootià o ia i nià i te miti,ua upootià o ia i nià i te pouri,o te Tamaiti o ia a te Atua tei mana i nià i te mau mea hamanihia e tei mau hoi ia ratou,mai te ohipa tei tupu i te miti ùteùte tei paruru i te faaoraraa ta te Atua i hinaaro no to na nunaa,i tapu ai o ia ia na.Ia tià ia Iteraera ia haere ma te fifi ore,e i reira Iteraera i te himeneraa i te upootiàraa no te Atua i te taime no te hamaniraa ra e no to na ratereraa na roto i te miti ùteùte.Te faaàpi nei o Ietu i te reira i to na haereraa i nià i te miti,te miti o tei riro ei tapao no te mana o te ino no te pohe o tei haafifi i ta na opuaraa faaora eita te reira e mau ia ratou noa atu te huru no te mana.Te parau ra Pauro i to Torota i te pene 2 irava 15 E PAU AE RA IA NA TE FEIA HAU E TE MANA RA,FAARIRO ATU RA IA RATOU EI HIORAA I TE VAHI,I TE VAHI ATEA MA TE UMERE I NIA IHO IA RATOU I TE TATAURO NO NA RA.Te parau ra Pauro i te upootiàraa tei tupu i Toratota,e o te reira mau ätoà ta teie parau e faaite mai ra ia ratou.

Ua haere mai o Ietu ia ratou ra na nià i te miti,aita roa ra ratou i taa e,

o Ietu teie,ua rahi atu ra to ratou huehue e te mataù,mai to ratou manao e tupapaù.Inaha hoi ua àfai mai o ia i te hau.A FAAITOITO O VAU EIAHA E MATAU.E àhiri o ia e haere mai ia tatou ra i teie mahana,i teie po,hoê- a to tatou huru e to tatou manao e to te mau pîpî.Eita tatou e ite,o o ia teie no te mea,ua huna tatou ia na i roto i ta tatou mau feruriraa e ta tatou mau faanahoraa e au ra e aita o ia i tiàfaahou e aore ra no te maoro aita atu ra tatou i tiai mau ia na i to na haereraa mai.Inaha te haere mai nei o ia no to na here ia ratou,no to na here i ta na Etaretia.

Te haapapu ätoà nei teie parau e,ua hinaaro te Fatu ia tatou ia ohipa no na.Ia ore roa ia moè ia tatou e,e mea iti to tatou faaroo e ua riro tatou ei taata tei mataù i te taime no te matai puai,e ia riro tatou ei mau taata haehaa tei tiàturi mau ia na e tei ite mau ia Ietu ei Tamaiti na te Atua.

Ietu tei na nià mai i te miti te haere e i to na taeraa mai i nià i te pahi,ua faaea te matai e te miti,ua hau.E ere roa ra to na na reiraraa no te faaiteite noa,no te faahioraa ra ia ratou i nià i te ohipa rahi no to na tiàfaahouraa,te matai puai e te miti puai ua faaau mai o ia i te reira i roto i to na oraraa rahi ta na i àro na roto i te mauiui e tae noa atu ra i nià i te tatauro,e ua faatià mai te Atua ia na mai roto mai i te pohe,ei Fatu ora,no te horoà i te ora e te hau.

Ia riro ta tatou mau àroraa,ei mau vahi no to tatou tiàturiraa ia na,te mau àroraa no te aroha e no te parautià ta tatou e aro nei,e upootia tatou eiaha na roto ia tatou iho,na roto ra ia na tei tiàfaahou e tei here roa ia tatou.tei nià tatou i te pahi no te Etaretia e teie mai nei te matai,e te miti o tei haafifi i te tere,tei faatupu i te mataù e te peàpeà.E aha mau te auraa no te reira no tatou i teie mahana? Te faainoraa e te haaviiviiraa na te taata i te mau ohipa ora ätoà ta te Atua i rahu;te faatupu ätoà nei te reira i to tatou peàpeà.E ere ra o te reira änaè i te mea e,aita te matai puai i tupu noa i roto i te natura tei roto ätoà ra i te parau no te oraraa e no te aratairaa o te mau nunaa,te parau no te tamai e no te mau mauhaa tamai;te parau no to te tahi pupu riroraa i nià äè i te tahi,te parau no te faaereraahia te taata i to na tiàraa.I roto i teie nei ao te vai ra te tahi mau vahi matai puai na roto i te tuàti-ore-raa te tahi nunaa i te tahi,te farii-ore-raa i te tahi i te tahi.Te matai puai tei roto ätoà ia i te tahi mau ùtuafare te farararaa tei faaaueue e tei haaparari,e tei roto ätoà i te taata iho,ia tatou to tatou mau mataùtaùraa no te mea,te ere ra tatou i te tahi mau mea tumu no te oraraa e tae noa atu hoi i teie parau fifi rahi e te peàpeà no te àva

e te àvaàva taero.Te farara ätoà nei te matai i roto i te àmuiraa faaroo,to tatou mau tuàtiàtiraa tei ore papu,te iti no to tatou oraraa faaroo,te iti no te taime ta tatou i faataa no te haafatataraa hoi i te Atua i roto i te muhu-ore e te pure.Ua na reira Ietu te Tamaiti iho a te Atua e aha atu ia tatou?

Te fifi no te huru o te totaiete ta tatou e ora nei,o te tià e faaore i te manao aroha,te manao tauturu haapao noa atu ai te taata ia na änaè,o te faaore i te tiàturiraa o te taata i te Atua ei ora mau,te faatupu ätoà nei te reira i to tatou peàpeà.

Ia au i teie mau manaonaoraa,te haapapu mai nei o Ietu e tei roto ia na te tiaitururaa mau,to tatou ora mau,tei parau mai,A FAAITOITO O VAU EIAHA E MATAU.

Tei nià tatou i te pahi no te Etaretia,tei reira te feia ruhiruhiâ,te feia paari,te feia àpi,te mau tamarii,te tane,te vahine.I roto i te matai puai e te miti,ia tauturuhia tei paruparu,ia ore ra te tahi ia haapao noa ia na änaè,e ia ore te tahi ia hio noa,ia àmui ra no te raveraa i te ohipa.

I roto i teie nei ao àrepurepu,ua titauhia tatou ia faaite i te Fatu tei tiàfaahou,ia faatupu i to na hau e i ta na parautià,e no te ora i to na aroha.Tatou e to te hui-faaroo,tei horoàhia te ohipa faaiteraa i te hanahana o te Atua,a mau e a rohi,te parau ätoà mai ra o Ietu ia tatou, A FAAITOITO O VAU EIAHA E MATAU.

Te tiàturi mau ra nei tatou i teie reo?

ia ora na

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens