Overblog Suivre ce blog
Editer l'article Administration Créer mon blog
30 juin 2014 1 30 /06 /juin /2014 17:11

MAU TAIORAA.

Itaia 55:1-3.

Tei hiaai i te maa a te Atua.

Ia faufaa te àrio.

E haapao i te mea e mauruuru ai.

Ia fariu te tarià i te parau a te Atua.

Taramo 142.

Te aniraa tauturu i te Atua.

Te haapuraa o te taata faaroo.

Ia ora te varua i te Atua.

Te hamani maitai a te Atua

Roma 8:31-39.

Te aroha o te Atua tei òre i taaê.

Te upootiàraa o te Etaretia.

O vai te märô i te Atua.

Mataio 14:13-21.

Te faaàmuraa maere a Ietu.

Ietu tei haamaitaì i te maa.

Na pane e pae, e i na ià e piti.

Te paiä o te mau taata.

Ei manao hio àmui.

Te tahi manao tumu e vai nei i roto i na taioraa e maha nei, tei nià ia i te tumu parau no te ore-raa te mau maitai a te Atua e pau,tei vai ra e amuri noa atu. Na teie tumu parau e faaite i te taata faaroo i te aroha o te Atua tei ore i taaê, i nià i ta na mau òpuaraa. Ma te faaite atoà i to na hamani maitai i te mau taata, tei titau i te ora i roto i ta na mau faanahoraa .E faanahoraa ia noaa te tauturu no o mai i te Atua ra. E taua tauturu ra to te Atua horoàraa i te maa na to na nunaa i te vahi maa ore, riro äe nei taua vahi ra,ei vahi tamaaraa na te feia e rave rahi.Ta Mataio ia faaiteraa i te pene 14 i te irava 20, AMU ANAE IHO RA RATOU E PAIA AE RA,HAAPUTU IHO RA I TE TOEA MAA E I AE RA NA ETE RARAHI AHURU MA PITI.

Ei manao tatara.

Ta tatou parau no teie mahana,Mataio 14:13-21.

Te omua nei ia ta tatou taioraa i te irava 13,E ITE AE RA O IETU I TAUA PARAU RA,HAERE ATU RA I NIA I TE PAHI.E parau àpi peàpeà tei faaroohia e te Fatu,i te mea te reo tei varovaro e tei haaparare i te piiraa e tatarahapa i te metepara, ua haamamuhia e te ati pohe tano ore.Na roto ia i to Ioane Papetito faaiteraa i te parau mau no te ture no te faaipoiporaa,e ore e tano ia Herota e faaipoipo,i te vahine a to na taeaè o Firipa.I ruuruuhia ai te tavini o te Atua i roto i te fare tapeàraa,no te parautià,tei faahapa i te mea tià ore.Ua mamu o Ioane,ua pohe,ua riro to na upoo e ohipa hautiraa,àreà ra ta te Atua opuaraa eita ia e mou,i tupu ai te mau parau ta Ietu e faaite nei i roto i teie taioraa ta tatou e farerei nei.

Aita o Ietu e hinaaro nei e tute ê i te taata,aita ätoà O ia e mataù nei,te haamoè nei ra O ia no te hoê taime i roto i te pure,no te pohe o Ioane-Papetito.Eita ra teie opuaraa e manuia,e àpee teie mau taata i te Fatu, i te vahi tipaeraa o te pahi no te fariiraa.I ù nei tatou e ite ai,te tauiraa te manao o Ietu ua aroha O ia i teie mau taata,e ua faaora i to ratou feia mai.Te itehia nei ia te hoê ao tei ora,e tei tiai i te hoê rahuraa àpi,i roto i te mau tamarii a te Atua.E mau taata teie e àpee nei ia Ietu eita atu ra na Ietu e haere i roto i tera oire.Aita e ore teie àpeeraa na ratou i te Fatu,ua mau ààu ia ratou te mau parapore tei faatiàhia,i roto i te pene 13 te parau no te taata ueue huero,e te patireia o te Atua.E aore ra no te tiai e aha ra te hopeà no teie mau parau,no te vahi ite-ore-hia no te mau ohipa a te Atua.

Te mau pipi i to ratou pae te ahoaho nei,i teie rahiraa taata e pae tauatini paha ia au ta te irava 21 faaiteraa.No te ravai ore te maa,e ua tape te mahana oia hoi, ua toihoiho,tei te mau vahi maa ore to ratou faearaa.E nahea ia i teie rahiraa taata te manao o te mau pîpî e faahoi i te oire no te tii i te maa na ratou.E faahoi i te nunaa e to ratou poia,e to ratou poiha.To Ietu manao aita e tuàti ra e to te mau pîpî te parau nei ia O ia,EIAHA RATOU E HAERE,NA OUTOU E HOPOI ATU I TE MAA NA RATOU.Eita e navai ta ratou maa,e pae noa faraoa e piti ià,i faanaho ai o Ietu i ta na e faatupu na roto i te maere rahi,hio atu ra i nià i te vahi Teitei,haamaitai iho ra,vavahi iho ra i te mau faraoa,tuu atu ra i te mau pîpî e opere na te mau taata e rave rahi.Aita teie maa rahi i pau e ua toe mai,e 12 ète î maitai.

Teie o Ietu e horoà nei i te hoê tapao ite matahia,ia hio,eita i te hoê parau parapore tei faatiàhia,e ohipa ra te tano i te rima ia tapeà.I mua i teie ohipa maere e tià ia i te mau pîpî, te mau taata,te Etaretia ia faî i to ratou iteraa i te ohipa ta Ietu i faatupu.Te tià nei o Ietu i roto i te puairaa no te faarahi i na faraoa e pae,e i na ià e piti,te pii nei o Ietu na roto i te haamaitairaa ia faanavaihia i teie mau maa.Mai roto i te aore,riro atu ra te vahi maa ore,e vahi maa eita e pau ia àmu.E àiraa maa moà teie ta te Fatu i faanaho i te mea o te Atua iho teie e faaàmu nei, ma te tiàturi i te mau pîpî no te opereraa.E parau tohu teie,no te airaa maa a te Metia i roto i te utuafare o to na Metua.Teie mau hioraa,eiaha ia moèhia ia tatou te manao tumu o Ietu.NA OUTOU E HOPOI ATU I TE MAA.Aita te Fatu o te oroà,e hinaaro nei e faahoi te mau taata tei farii ia na i te vahi tipaeraa,na roto i te poia e te poiha.I farii ätoà ai o Ietu i teie mau taata ma te faaàmu i te maa mau a te Atua,no te faaitoito i te tino.I te mea e feia teie tei hiaai i te maa horoà noa a te Atua.A haamanao atu ai tatou i teie irava i roto i te Itaia pene 55 i te irava 1

E TE FEIA ATOA I HIAAI RA E,E HAERE MAI I TE PAPE NEI,E TE FEIA ARIO ORE RA,A HAERE MAI, E HOO E E AMU OIA IA ,E HAERE NOA MAI,E HOO NOA EIAHA E ARIO,E EIAHA EI HOO, I TE UAINA HOI E TE U.

Te paia ia o te mau taata,tei titau i te maitai a te Atua.Ua paia te mau taata ätoà,i te maa faaàpihia ia au i te rahuraa a te Metia o tei horoàhia no te opere,ia tupu te ohipa maere a te Atua,oia hoi,te temeio,te maa tei operehia na te nunaa.Eiaha ra tatou ia ui e,mea nahea ra te tupuraa teie ohipa,e vaiiho ra ia tatou ia arataihia e te Varua tei faaàpi.Ma te pure i te Atua ia haapii a ia tatou i te pure e,HO MAI I TE MAA E AU IA MATOU I TEIE NEI MAHANA,E A ORE RA,HO MAI TE ITOITO IA FAAPU MATOU I TE MAA E AU IA MATOU NO TE MAU MAHANA ATOA.

Ua toe te maa,eiaha ra tatou e manao e, e haamauàhia aita roa ia ua ohihia ua haaputu-

hia i roto i te ète ia ore ia purara haere noa, 12 ète tei î maitai e ohipa maere mau,teie e faaitehia nei i te mau pîpî e ohipa perofeta no te patireia o te Atua.Aita e tatararaa no teie ohipa.Na te aroha o te Atua tei ore i taaê,e faaite.Oia mau,no te mea tei roto te Atua i te Metia.

E hoa here ma e,i roto i ta tatou taioraa,no teie mahana te itehia nei ia te tahi tumu parau tei faufaahia,e teie nunaa tei àpee,tei farii i te Fatu,e tae noa atu i te mau pîpî.Te iteraahia ia te parau no te AROHA O TE ATUA TEI ORE I TAAÊ. I nià i te àmuiraa taata tei tiàturi i te Metia i to na tau.E teie mahana tei nià i te Etaretia.Na teie tumu parau e faaite ia tatou,te hau no te parautià tei haamahanahana i te ààu no te feia tei poia e tei poiha i te taviniraa i te Atua.Ua haere mai teie mau taata e rave rahi ia Ietu ra ia tià,ia ratou ia ite i te hanahana o te Atua.Tei faatupuhia na roto i te maa,e pae faraoa e,e piti ià tei faarahihia e te puai no te tiàraa Metua o te Atua.E pae tauatini taata tei àmu teie maa,aita i pau.Te ite nei ia tatou te hohora nei te Atua i te àiraa maa na ta na mau tamarii i te vahi maa ore,riro iho nei ra taua vahi ra,ei vahi maa tei ore i pau i te àmuhia.Teie maa tei faaite papu i te aroha o te Atua tei parahi fatata noa i pihaiiho i te mau taata ätoà tei titau i te ora i roto i te Atua.E tapao faaite teie,to te Atua hinaaro rahi,eiaha te poia e te poiha o ta na mau tamarii,te paia ra o ta na mau tamarii.

Eiaha ra tatou ia manao i to Ietu faarahiraa i te faraoa e te ià,no te faaiteraa e, te iti ra te feia poia e te feia poiha e vai nei i teie mahana.Eita roa tei reira te tumu no teie temeio,mauti ra ia te iteraahia ia i roto i te ohipa ta Ietu e rave nei i to te Atua faaiteraa i to na tiàraa Metua i mua i ta na mau tamarii,tei apee na muri i ta na Tamaiti.Oia hoi o te Atua teie ta Ietu e faaite nei i roto i teie faraoa e teie ià,no te mea mai reira mai te tumu no teie rahiraa maa.Ia tià ia tatou i teie mahana ia ite i te Atua na roto i te ohipa ta Ietu e faatupu nei.Te Atua eita O ia e faaiti mai ta na horoà i te ao nei e faarahi ra O ia.Mai ta na i horoà i to na nunaa i te fenua o te tapu,mai ta na i horoà i te metepara,e ta na atoà horoà ia Eria i te taime ani ai o ia i te pohe,horoàhia mai nei i te ora,itoito aè ra o ia i te ora a te Atua.Oia atoa ia tatou i teie mahana ia itoito atoà tatou i te ora a te Atua na roto i te maa ta na e horoà nei ia tatou i te mau taime atoà.

Ho mai te maa e au ia matou i teie mahana.

IA ORA NA.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens