Overblog Suivre ce blog
Editer l'article Administration Créer mon blog
20 mai 2014 2 20 /05 /mai /2014 23:26

Itaia 44, 6 – 8

Taramo 144

Roma 8, 24 – 27

Mataio 13, 24 – 43

O Iehova te òmua e tei faahope

O vai te taata nei

Te tiaìraa

Te titania te enemi o te Atua.

O Iehova te Atua

Te himene âpï

Te turu a te Varua

Te hohoà o te patireia

Te ora o Iehova Tapaota

Te tiaìtururaa ora

Te hinaaro o te Atua

Tei tupu àpitipiti

Eiaha e mataù

O Iehova te Atua

Te feiä pärautià tei ànaana.

Te taiòraa tei tapeàhia mai, mauti ra ia te Èvaneria, i te mea te faaìte nei o ia i to Ietu faatià paraporeraa i te pärau no te patireia o te ao. Ma te faaäu i nià i te pärau no te huero maitaì i ueuehia, tupu mai nei te titona e te titania. Te titona e maa maitaì, àreà te titania e maa ìno ia. Te huero tinapi tei faaäuhia i te patireia o te ao, e tae noa atu i te faahopue. E aha tei ìtehia ia au teie mau parapore ta Ietu e faatià nei, oia ia te tupu àpitipiti – noa – raa te pärau no te maitaì e te ìno. Te reo o Ietu i te ìrava 30 vm, i te naò- raa e, E VAIIHO NOA IA TUPU ÀPITIPITI NOA NA E IA ÀUHUNE NA Ù E PÄRAU ATU I TE FEIÄ ÒOTI. Te pärau ia i haapaòhia no tätou, i teie hora paieti.

Èi manaò tatara.

E VAIIHO NOA IA TUPU ÀPITIPITI NOA NA E IA ÀUHUNE NA Ù E PÄRAU ATU I TE FEIÄ ÒOTI.

Ietu i roto i ta tätou taiòraa no teie mahana, Mataio pene 13, te ìrava 24 e tae i te 43, tei mua faahou O ia i te rahiraa taata tei hinaaro i te mau haapiiraa, tei faatià paraporehia. Ma te puòi i te pärau no te taata ueue huero, na roto i na parapore e toru nei.

  1. Te pärau no te huero maitaì.
  2. Te pärau no te huero tinapi.
  3. Te pärau no te faahopue.
Teie mau faahitiraa pärau ua faaäuhia ia i nià i te patireia o te ao. Tei tuuhia i
mua i teie nahoà taata, ia ìte o tei òre i ìtehia e te mata ia hiò. Oia hoì, te taata
faaapu ia ueue te haìhaì o te huero tinapi, te faahopue e ìtehia ia te reira, àreà ra te patireia o te ao o ta Ietu ia e tutava nei ia ìte to te ao i to na heùri. I faatià ai o Ietu i teie parau a te perofeta i te ìrava 35 e pärau parapore ta ù e pärau, e pärau vau i tei òre i pärauhia mai tahito mai ä.

Te pärau nei o Ietu i teie mau parapore ia färiu te mau taata atoà i nià i te òhipa ta te Atua i rave no teie nei ao. Ia vaiiho i te titona e te titania ia tupu àpitipiti noa, i te mea tei roto i te faaapu a te Atua te tupuraa, na te àuhune te o te maa e faaìte, e titona tera, e titania tera. Teie haapiiraa ta Ietu te ärataì nei ia i te feiä faaroo, ia haamanaò i te huero tinapi, te huero haìhaì äè i roto i te mau huero atoà, to na tupu mea òhie, e te rahi o te tumu e tauraa no te mau manu o te reva. E tumu raau rahi to na ra àuhune aita areà ia, rahi noa te rahi, e te hotu òre, e mea faufaa òre ia i mua i te Atua.

Ta Ietu ra e faaau nei i te patireia, eita ia i te rahi o te tumu, mauti ra te haìhaì o te huero o teie maa, fatata roa e òre e ìtehia e te mata ia hiò. O ta Ietu e parau nei ë, e au i te patireia o te Atua, e to na rahi eita ia e tià ia taiòhia. Oia atoà te parau no te faahopue ta Ietu e parau nei. Teie ra te faaara nei o Ietu i te tahi mau taime, e ara i te faahopue a te mau Faritea e te Tatutea, Mataio i te pene 16, ìrava 6. Oia ia atoà ia i te Mataio pene 8 i te ìrava 15. E ara i te faahopue a te mau Faritea, e te faahopue a Herota. Teie faahopue no te faaìno i te oraraa o te taata, eiaha ra no te haamaitaì. E hopue teie e òru, eita ra e mahaha, e purehu ra, maite mea eita e purehu e pee ia i nià mai te pauma ra te huru. Te hopue ra ta Ietu e faaau nei i te patireia o te Atua, no te faaìte ia i te maitaì no te mau òhipa ta te Atua e faatupu nei no te oraraa faanaò o te mau taata teretetiano. Teie mau faaauraa pärau ta Ietu e òrero nei, ua tupu ia i roto i te ao ta te Atua i tuu te maitaì, no te taata. O te faanahoraa ia ta te Atua i òpua, no te ora o te taata. Te vai nei ra ta te ennemi ànoiraa i roto i te maitaì a te Atua i òpua no ta na faaapu. I pärau ai o Ietu i ta na mau pipi e, E VAIIHO NOA IA TUPU ÀPITIPITI NOA NA E IA ÀUHUNE NA Ù E PÄRAU ATU I TE FEIÄ ÒOTI.

E peàpeà i te rahi to te mau pipi i teie pärau, aita e òre te uiui ra rätou e mea nahea te enemi i te oraa i roto i te faaapu a te Atua, e aore ra no te aha eita e tano e huhuti i te titania e faataa – ê.

Te haapäpü nei o Ietu i teie pärau no te titania i mua i ta na mau pipi, ua ueuehia te huero maitaì e te Tamaiti a te taata, oia hoì i roto i te faaapu a te Atua, taua faaapu rä o te ao nei ia. I tonohia mai ai te mau veà no teie òhipa. E faaapu teie, aita to na e òtià, aita e parururaa eiaha e tomo i roto, aita hoê pätoìraa no te taata, oia hoì, e faaapu tiàma teie ta te Atua. Noa atu e mau enemi no te Atua, i ö ai te ueueraa titania. I àno ai te ìno, i roto i te maitaì. Eita ra e tano ia faataa – vave – hia te titona e te titania e vaiiho ra i te tau òotiraa. Ia tae i teie tau e tià ai te Atua no te haava, ia vai te hoê äreä i roto i te maitaì e te ìno, ia ua te faaìteraa a te ìrava 40, 41, 42. Te titania e haaputuhia e tuuhia i roto i te auahi, na te merahi e haaputu, o te hohoà ia teie no te paieti òre, no te feiä tei faatupu i te hapa, te ìno mai roto mai i te patireia o te ao. A tuu atu ai i roto i te auahi mure òre, tei reira te òto e te aùaùraa niho e te pohe. Areà ra te feiä parautià e ànaana ia mai te mahana ra i roto i te patireia o te Metua. A riro atu ai èi mau tamarii no te patireia, no te faatupu i te parau fafau a te Atua no te ao nei. I te mea o rätou tei ueuehia i te parau tei hamani faahou i te tiàturiraa, na roto i te Varua Moà paheruraa i te àau parautià no te maitaì.

E hoa here ma e,

Te ìte nei tätou i ù nei, aita hoê faahaparaa ta te Fatu i te mau enemi o te Atua. Te faaararaa rä te vai ra ia, no te faafariu i nià i te maitaì ta te Atua i vaiiho i te tiàmaraa i roto i tera taata, tera nunaa e tera Ètärëtia. Te mea ra e tïtauhia nei, ia ìtehia o te Atua te òmuaraa o te òhipa, e O ia atoà te faahopeà no te haava, e no te horoà i te faahaparaa e au. I pii ai te Taramo 82 i te ìrava 8, a tià, e te Atua e, e haava i to te ao, tei ia òe hoì te mana i te fenua atoà nei.

Oia mau, te òhipa ia e tupu nei i roto i ta tätou pärau no teie mahana, Vaiiho ia tupu àpitipiti noa na, no te mea na te Atua te pärau hopeà, no te faataa, no te auahi anei, no te pohe mure òre anei, e aore ra no te auahi o te mahana penetetote tei faaâpï, no te ora mure òre.

Vaiiho ia tupu àpitipiti noa na, ia noaa te haapäpüraa, te ora mau rä te Atua na roto i te tururaa a te Varua Moà. Te äniraa ia a te feiä Moà, ia tupu te paheruraa i te maitaì a te Atua.

No reira o tätou, tei roto i teie tupu àpitipitiraa, no te ìno e te maitaì, eita rä tei ia tätou i te faataaraa, tei a tätou rä i te faaäraraa. E te ora àmui nei tätou i te ao nei, no te tiaìraa, e ao no te aroha o te Atua, a taë atu ai i te tau òotiraa, ia rahi äè te hotu o te huero maitaì i nià i te titania, na roto i te tiàmaraa o te tiàturiraa na te reira e taui ta tätou hiòraa, te mau pärau e te mau òhipa i fafauhia ia tätou.

Vaiiho ia tupu àpitipiti noa na, te tano te pärau a Ietu i teie tau ta tätou e ora nei. I te mea te ora àpitipiti noa nei tätou i te tahi taime, i tïtauhia ai tätou ai tätou ia haafatata i pihaiiho i te terono pärautià no te aroha o te Atua.

Te tumu o Ietu i pahono ai mai teie te huru, eihea aè nei taime to te Atua huhutiraa i te titania. I te tau o Noa e vaù anaè taata pärautià tei ìtehia, tiruvihia – iho – ra fenua, eihea tei pohepohe i teie faataaraa ta te Atua i rave. E te tau no Aperahama, a tahi tumuhia ai o Totoma e o Tomora, ua taparu o Aperahama i te Atua, tei faaorahia te ùtuafare noa o Rota e ua nina – roa – hia teie na òire e to na nunaa. Ia tae mai ra i te tau no te mau perofeta, e i te tau no Ietu aita roa teie mau òhipa riàrià i tupu faahou. Ua vaiiho – noa – hia ia tupu àpitipiti noa na, i roto i te manaò e ia riro mai te titania èi titona.

Teie te manaò o Ietu i te pärauraa i teie manaò e vaiiho ia tupu àpitipiti noa, o te riro mai te mea ìno èi faufaa no te maitaì. Mai ia Pauro tei pärauhia te aito no te mau veà tono a te Metia i Atia e i Atia ïti. O ia tei tuè i te tara i nià i te èà no Tamateto, ma te manaò e, e tara pohe teie. Puta – iho – ra o ia i taua tara ra, riro mai nei o ia èi veà tono èi faariroraa i te titania èi titona.

Oia atoà tätou e tià atoà ia rave i te òhipa ma te tiàturi päpü i te Atua. No te mea te Atua i te òmuaraa i ta tätou mau òhipa, e O ia atoà i te faahopeàraa. O ta te Atua ia e faaära nei ia tätou i teie mahana, i te naòraa e, O vau te mätamua, e Ò vau hoì te faahopeà, e aita atu e Atua maori ra Ò vau. Eiaha òutou e mataù, eiaha òutou e taia, e ère au tei faaìte ia òutou mai te mätamua mai ia ( Itaia 44, 6vh e te 8 vm).

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens