Overblog Suivre ce blog
Editer l'article Administration Créer mon blog
20 mai 2014 2 20 /05 /mai /2014 23:14

MATAIO 11:25-30.

Te parau a te Atua i faaìtehia i te tamarii.

Ta te Tamaiti faaiteraa i te Metua.

Ta Ietu haamamaraa i te hopoià.

Te maru o te tuto.

Mataio 25:30.Te maru nei hoi ta ù tuto e te mama nei ta ù hopoià.

Ia faaroo tatou i teie reo to Ietu, e haamanaò tatou i te parau tohu a te perofeta ra a Tetaria i te pene 9 i te irava 9 i te parauraa A òaòa hua na òe e te tamahine a Tiona e, a pii na, e te tamahine a Ierutarema e, inaha te haere mai ra to Arii ia òe ra, e parautià ta na, e o te ora hoi o ia, haehaa to na, i te parahiraa i nià i te àtini e te pinia te fanauà o te àtini.E teie te reo no Ioane Papetito i te naòraa e à hio na i te Arenio a te Atua tei hopoi è atu i te hara o te ao.

E tià ia tatou i te parau e, teie na irava e taipe ia no ta tatou parau no teie mahana. I te mea te àtini e ànimara amo tuto ia, ei haamamaraa i te hopoià a te taata, o te fauraò ia te reira o Ietu, ei faaiteraa i to na maru, e te haehaa. Areà ra te Arenio e tutia maitai ia ei haamamaraa i te hopoià o te hara.

Ta tatou ra pene parau Mataio 11:25-30,e himene àià ia tei Iupiri i te parau a te Atua i rotopu i te taata. Tei faaite i te tahi mau parau tei hunahia i te feia paari. Oia hoi teie feia, e feia àravihi ia i nià i te parau no te Ture. Te haamaitairaa ia a te Tamaiti i te Metua, no te titauraa i te mau taata atoà tei teimaha i te hopoià ia tiàturi i te mau ohipa maere a te Atua tei faatupuhia e Ietu i te mau vahi atoà tei ère i te ora. I hunahia ai te mau parau no te iteraa i te Atua, i te feia mata î oia hoi i te feia paari, te mau haapii ture, e te tohu. Eita ra teie i te parapore ta Ietu e faatià nei, te hinaaro nei ra O ia ia fariu te feia e titau nei i te iteraa i te Atua, i nià i te tiàturiraa o te Ture a te Atua, ei haamaruraa te tuto, eiaha ia riro mai te hoê faautuàraa, ia riro ra mai te hoê arataìraa, haapiiraa e aore faaàpiraa i te reni no te èà e tae ai i te Atua ra. No reira o Ietu i haapapu maitai ai e, ua hope te mau mea atoà i te pupuhia i roto ia na, o tei faatupuhia na roto i te faaoraraa e te upootiàraa i nià i te pohe. Oia hoi, ua ite o Ietu i te Atua, to te ao nei ra aita ia i ite o Ietu e, e tamaiti na te Atua, ua ite te Atua ia Ietu, to te ao nei ra, aita ia i ite i te Atua e Metua ia no Ietu. Teie te tahi o te mau parau i hunahia i te feia paari o ta tatou nei taiòraa. Ta Ietu ra e ani nei, ia ite – a - hia, te aroha mau no te patireia parautià o te Atua. Na roto te haereraa i mua ia na noa atu te huru o te teimaha te hopoià, e tià ia na ia faaora. Ma te haapao i te teimaha no te mau haapiiraa a te Evaneria, ia noaa te ora i te Varua. O teie noa ia ta Ietu e hinaaro nei e faaite i te feia e rave rahi, e tiàturi nei i ta te Atua haamaitairaa. No te iteraa e, te Ture a te Atua, mai te hoê ia taura tavaha, te aratai i te puaahorofenua i te vahi e au ia tapae. O te huru atoà ia te iteraa i te Atua, ia mau te taura tavaha o te Evaneria, i reira e maru ai te mau tuto teimaha, i reira atoà e mama ai te mau hopoià, mai te vavai ra te huru i roto i te reva. TE MARU NEI HOI TA U TUTO,E TE MAMA NEI TA U HOPOIA.

Aita o Ietu e faaite nei i ù nei i to na paruparu, te haapapu nei ra O ia i to na puai ei faaiteraa i te mau taata e rave rahi, o te tahi teie raveà. E ara atoà ra te vai nei te maru e faatupu nei i te faatau. Te maru ra ta Ietu e parau nei, te haamaharaa rohirohi ia, i te teimaha o te mau ohipa. Oia mau tei roto i te maru e itehia ai te puai o te Atua, e mama ai te mau hopoià atoà. Ua faaòhipa anei te Atua i to na puai tahoo i nià i te mau enemi o to na nunaa aita roa, ua here O ia ia rätou no te mea tei roto rätou i ta na òpuaraa. E aha ia ta Ietu e titau nei na roto i teie reo?

Ia haamorihia ia, ia haamaitaìhia ia, ia faahanahanahia ia, ia te Atua, na roto i te mau pureraa e te mau ohipa o te faaroo, ia riro ia ei haamaitairaa i te Atua no to na mau maitai, e noaa nei ia tatou i te mau mahana ta taìtahi ma te faahanahana i to na Ioa. I reira e itehia ai te huru mau o te Atua tei haapii e tei titau i to na nunaa. Ia tupu teie mau faaueraa e itehia ai te rima aroha o te Atua, tei faatià, tei paruru, e tei faaora, tei mairi i raro aè i te tuto o ta Ietu ia titauraa i te mau taata paieti atoà ia faaitoito i te pure tei reira te maruraa te mau tuto, tei roto i te Metia tei tiàfaahou, e no te mau hopoià eita ia e riro faahou ei mea teimaha, e riro ra ei mea mama. Te maru nei hoi ta ù tuto e te mama nei ta ù hopoià.

E reo titau a teie no Ietu ia tatou ia haapao i te mau ohipa ta te Atua e faaue nei ia aroha, i te mea O ia tei aroha mai ia tatou na mua roa. I hau ai O ia, i maru ai no te faataui i te taata hara ei taata tiàma, te taata paieti òre, ei taata paieti, te taata paruparu, ei taata puai, te ohipa teimaha, ei ohipa mama, te hopoià ei upootiàraa no te ohipa, e te vai atu ra....

O te huru ia teie, no te reo titau o Ietu, tei tamahanahana i te feia rave òhipa a te Atua, tei ite i te maru, e te mama te ohipa ia tiàturi papu i te Atua.

Te tuto, e raau teie tei taraihia haamenemene a tuuhia atu ai i nià i te arapoà o te atini e aore i nià i to te puaahorofenua. I nià teie raau e taamuhia ai te mau taura no te hutiraa i te arote.

O ta Ietu e faaau nei i te mau tapura ohipa e tià i te mau taata faaroo ia haapao, i te àroteraa i te mau vahi i reira e ueuehia te mau huero o te Evaneria. I te tuuraa tatou i to tatou tiàturiraa i roto i te Metia i reira te tupuraa teie reo, te maru nei hoi ta ù tuto, no te mea ua rave atoà tatou i ta tatou tuhaa ohipa ei faaiteraa i to tatou taamuraa i nià i to na mau hinaaro; e te mama nei ta ù hopoià, no te mea te haapao atoà ra tatou i ta tatou tuhaa, na roto ia i te haamoriraa, e te haamaitairaa i te Metua tei aroha mai i to te ao nei. E na roto i teie mau ohipa e ravehia nei e tatou e mama ai te mau hopoià.

Te mama nei ta tatou mau hopoià, i te mea o te Fatu teie i pihaiiho ia tatou ei faaitoito - raa ia tatou. O ta Ietu e hinaaro nei ia mama te tuto a te feia e tiàturi nei i ta na mau òpuaraa.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens