Overblog Suivre ce blog
Editer l'article Administration Créer mon blog
20 mai 2014 2 20 /05 /mai /2014 23:01

Mataio 10:34-42.

Tei tapeà i te ora.

Te hau e te oè.

Te fifi e tupu i roto i te ùtuafare.

Tei ite i te tavini o te Atua.

Te àuà o te hau.

Ei hioraa àmui.

Na taioraa e maha nei te faaite nei ia i te huru no te Atua aratairaa i to na tavini ma te faarue ore.Tei parahi fatata noa ra i pihaiiho ia na,i te mau vahi atoà ta na e haere nei ei faatupuraa i te titauaraa ta te Atua e tuu nei i roto ia na.Na teie mau ohipa e ravehia nei e te tavini o te Atua te ite nei te mau taata e,e taata teie no te Atua,te farii poupouhia nei o ia e te mau taata,ta na e farerei atu.O te itehia mai i roto ia i te mau tavini o te Atua mauti ra ia te ora no o mai i te Atua ra.Te ohipa ra e tupu nei te ere nei te nunaa o te Atua i te reira mau faanahoraa.Ô atu ra i roto i te mau peu tià ore,tei ore roa e au i te mau hinaaro o te Atua.

Na teie mau peu,e faatupu i te riri o te Atua,no te âoraa i to na nunaa.I te mea te ite nei te Atua,aita to na nunaa e faatupu nei i te ora,te pohe ra teie e faatupuhia nei.Te hinaaro mau ra o te Atua mauti ra ia te ora,tei horoàhia mai na roto i te papetitoraa ta te Metia i faanaho no te mau taata ia noaa te aroha faaoreraa hara.Tei tapea i teie faufaa e ere ia o ia i te ora,area ra tei tuu i te parau no te faaoreraa hara,e noaa ia,ia na te ora.O ta Mataio ia e faaite nei ia tatou i te pene 10 i te irava 34 e tae atu i te irava 42.

Ei manao tatara.

Te irava 39 e tià ia parauhia e,te manao tumu ia ta Ietu e hinaaro nei e faaite ia tatou i teie mahana ta tatou e putuputu nei. Teie to na reo, O TEI TAPEA I TO NA ORA

E ERE IA OIA I TE ORA, AREA TE TUU NOA I TO NA ORA NO U NEI, E ORA IA TO NA.

Te tuu nei o Ietu i te taata tei tiàturi ia na i mua i te hoê maitiraa,ua iti anaè i te maitiraa ia na ra,aita ia, ia au i ta na faanahoraa,oia hoi,eiaha ia rahi i te au i te metua tane,e i te metua vahine,eiaha atoà i te tamahine,e te tamaiti.E maitiraa fifi roa teie ta Ietu e tuu nei i mua i te taata,ia faaohipa.E ma te parau atoà e,eiaha e manao e i haere mai au e hopoi mai i te hau i te fenua nei te ôe ra,oia hoi,te tamai,te àmahamaharaa.Teie mau ra anei te Evaneria a te Atua? Teie mau anei ra te maitiraa e au i te hoê tià no te Atua ia faatupu? Ua moèhia anei ia Ietu i te parau i tohuhia e te perofeta Itaia no to na haereraa mai? Te nao nei teie parau i te pene 9 i te irava 6 UA FANAU MAI HOI TE HOÊ TAMA NA TATOU, UA HOROAHIA MAI TE HOÊ TAMAITI NA TATOU EI NIA I TO NA RA TAPONO TE HAU VAI AI E MAIRIHIA TO NA IOA IA HAU Ê E AO TE ATUA PUAI TE METUA NO TE UI A MURI ATU,TE ARII NO TE HAU.

Aita roa ia i moèhia ia Ietu teie mau parau i tohuhia e Itaia,ta na ra e faatupu nei mauti ra ia te pohehae.Mai te Atua atoà e pohehae atoà nei i to na nunaa ia haamori i te hoê atua ê atu Ia na,ia au te faaiteraa a te Etoto pene 20 i te irava 4 e te 5.

Ta Ietu nei ra e haapapu nei,eiaha roa ia,ia haafifihia te tereraa ohipa no te faaiteraa i te mau hinaaro o te Atua,e te oraraa ùtuafare iho,ia riro ra te ùtuafare ei tururaa ia tupu te ohipa a te Atua i te rahiraa,eiaha ia iti mai.Aita atoà o Ietu e faahapa nei i te hoê metua

tane,te metua vahine,e aore ra te tamahine,te tamaroa,i roto i teie parau.Ta Ietu noa ra e hinaaro nei,eiaha te aroha,te here o te Atua ia faaitihia mai,ia faarahihia ra.E tapao faaite teie i te tau o Ietu,te tupu nei teie mau ùmeùmeraa i roto i te mau ùtuafare,te oreraa e hoê faahou i nià i te mau faufaa fetii.Ua haapao noa te reira i ta na mau faanahoraa,ma te ore faahou e faatupu i te hinaaro no te hau.

Eita iho-a ra i te mea ohie i te peeraa ia Ietu,oia hoi i te raveraa i to na tatauro.Eiaha te mau pipi ia hamani i to ratou iho tatauro a pee atu ai ia na.Ua oti ê na ra to ratou tatauro i te hamanihia i roto i te taviniraa,ua tia ia Ietu i te faaau i te tatauro i nià i te mauiui,te rohirohi,te faainoraa,te feiiraa e te vai atu ra.Teie te mau tatauro o te mau pipi ta Ietu e faaite ia maraa i te faaoromai na roto i te haehaa.Te tatauro ta Ietu e parau nei o te hohoà hoê roa ia no te puai o te ora e vai i roto i te taviniraa ia tupu te hanahana o te Atua.Eiaha ra te tatauro ia riro ei hopoià na te mau Maru-Metia,ia riro ra ei upootiàraa no te hohoà o te tiaitururaa no te mau taata atoà tei tiai i te hoiraa mai te Fatu no te ora mure ore.I ore ai i te taata e tià i te tapeà i to na ora ,i te mea eita o ia i te fatu no te ora,e tià ra ia na ia nounou,te tià roa ra ia na i te rave te parururaa ia ,ia ore te ora a te Atua ia hamani-ino-hia,aita atoà ra o Ietu e horoà nei i te hoê ture varua,ta na e faaite nei te hoê ia ora tei vai tutonu-noa i nià i te Atua,e tae noa atu i te hopeà i te taviniraa;Oia ia ,tei horoà i te ora no te ohipa a te Atua ua roaa ia tei utuà maitai.

Ia hio maitai anaè tatou i te mau manao rii hopeà o Ietu i roto i to na mau manao,te hinaaro nei o ia ia itehia o ia na roto i te mau ohipa ta te mau pipi i rave,ei ia ite-atoà-hia te mau ohipa a te mau perofeta,e o te Atua te tumu mau no te faatupuraa i te utuà e au i te tavini,te utuà ta Ietu e faahiti nei eita ia te hopoià,te upootiàraa ra e noaa i te tavini haapao maitai.Tei faatupu i te mau mea riirii,te mau mea haihai roa,ua faatupu ia i te mau mea rahi,oia hoi tei horoà i te hoê àuà pape toètoè na tei ere,tei rohirohi,ua riro ia ei hohoà no te tavini ia au i te Metia.E aha te manao ta Ietu e faaite nei i roto i ta tatou nei taioraa?Te manao tumu mauti ra ia TE TAVINI TEI HERE I TE OHIPA A TE ATUA.Te hereraa i te ohipa a te Atua mea na roto ia i te puai no te faaoromai,e te tiàturiraa,maite mea noa atu e aita te tiàturiraa i roto i te faaoromai,e paruparu te faaoromai.Te faaoromai e te tiàturiraa o te hoê ia mana te reira no te upootiàraa e noaa i te tavini,i roto i to na tere,e to na oraraa faaroo ei àroraa i te mau puai o te faahema te tià e faatoàruàru i te ààu i te raveraa i te mau ohipa a te Atua.O ta Ietu ia e faahiti nei e,O TEI TAPEA I TO NA ORA, E ERE IA O IA I TE ORA,AREA TEI TUU I TO NA ORA NO U NEI E ORA IA TO NA.

Teie reo no Ietu eita ia no te haaparuparuraa i te tiàturiraa o te taata,o te hoê ra reo,te horoà faahou i te oaoaraa i te ora ta te Atua e faatupu noa nei.E taua ora o ta Ietu ia i hopoi mai,ta na e haapapu nei e, I HAERE MAI NEI AU IA NOAA TO RATOU ORA, E IA RAHI ATU A TE ORA.Ioane pene 10 irava 10 i te vahi hopeà.E aha ta teie ora e faatupu? Te manao tumu ta Ietu e hinaaro nei,ia tià ia i ta na mau pipi,e i te mau taata atoà ia HOÊ i roto teie ORA.Te pure ia ta Ietu i tuu na i mua i to na Metua,Ia riro atoà ratou ei HOÊ,mai ia taua nei e HOÊ nei.

ia ora na.

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens