Overblog Suivre ce blog
Editer l'article Administration Créer mon blog
20 mai 2014 2 20 /05 /mai /2014 22:57

Mataio 10:26-33.

Eiaha e mataù.

Te parau tià i te vahi maramarama.

E haapaò te Atua i te mau taata atoà.

Te Fäîraa parau tià.

Ei hiòraa àmui.

Te tahi tumu parau e tià ia riro ei hio àmuiraa no na taiòraa e maha nei mauti ra ia teie reo no Ietu i roto i te èvaneria papaìhia e Mataio i te pene 10 i te irava 26 i te vahi matamua, i te naò – raa - e EIAHA RÂ E MATAU ATU IA RATOU. O te òhipa ia i tupu i roto i na taiòraa e maha, to te nunaa mataùraa i te pohe e fatata nei ia rätou. Teie huru no te nunaa ua vai ia rätou i roto i te tiàturi òre i te mau òhipa ta te Atua e rave no rätou. I roto i to rätou mataù ua faanaho te Atua i te hoê òhipa naeà – òre - hia e to rätou mau maramarama. I to te Atua vahiraa i te miti ùteùte i riro mai nei ei èà no te faaora i to na nunaa i te pohe e fatata mai ra ia rätou. Àreà ra no te nuu o Faraò riro iho nei ra ei menema no rätou. Eita ra te Atua e faaea i reira e faaìte - a O ia i to na puai no roto i te parau tei riro mai te hoê ahi ra te huru te àmaraa i roto i te ààu o te taata. Ei faaìteraa i te mana te òhipa ta na e faatupu ra na roto i to na Aroha tei titau i te taata ia ora i ta na e faatupu nei. Ia au i teie mau poroìraa aita te Atua e haamataù mai nei ia tatou, te faaìte mai nei ra e, e Atua hinaaro rahi O ia e tauturu i te taata tei tiàturi i ta na i faaoraraa.

Ei manaò tatara.

Te reo o Ietu i roto i ta tatou taiòraa nei tei te irava 26 ia i te vahi matamua, te naò ra EIAHA RA E MATAU ATU IA RATOU.

E toru taime to Ietu faahitiraa teie parau i roto i ta tatou taiòraa, i te irava 26,28,e te irava 31.E tapaò faaìte te reira i te faufaa no te òhipa ta Ietu e hinaaro nei e faaìte i ta na mau pipi e tae noa atu i te mau taata e faaroo nei ia na. Te hinaaro nei o Ietu ia noaa i ta na mau pipi i te hoê puai taaê, ia tià ia rätou ia na nià aè i to rätou mau mataù. I te mea na te reira e faaitoito ia rätou i te haaparareraa i te parau tià no te patireia o te Atua i te mau vahi atoà tei reira te oraraa te taata. Tei teie vahi atoà te mau enemi o te Atua i te rahiraa, o rätou teie e ìmi nei i te tapoìraa i te mau maitai a te Atua, tei faaea noa i roto i te faatîtîraa o te pouri, ma te parahi tamau i raro aè i te mato o te hara. O rätou ta Ietu e parau nei i roto i ta tatou nei taiòraa, e tae atoà rätou i te hamani ìno i ta na mau pipi, ma te taparahi haapohe roa ia rätou. Teie ra e tià ia rätou ia taparahi i te tino àreà te Varua eita e tià ia rätou ia haamou i te reira, o te Atua te fatu i teie faufaa. E tia i te taata ia haamou i teie ora, i nià ra i te parau no te

ORA MURE ORE, aita ia to te taata mana i reira no te tinai, no te mea o te Atua anaè te mana ra i nià iho.

Te parau ta Ietu e parau nei e, Eiaha e mataù, no na iho teie parau ta na e fahiti nei, e tupu teie parau na na i roto i te ô no Tetemane, ua mataù o Ietu i te àuà e fatata mai ra ia na ,i to na ìteraa eita e tià ia na ia àpe, parau atu ra e ta ù Metua ia tià to oè hinaaro, inu iho ra o Ietu i taua àuà maramara ra. E i nià i te tatauro tuu atu ra O ia i to na Varua i te Atua. To na auraa teie òhipa i tupu ua upootià tei hamani – ìno - hia, ua fifi ra tei hamani ìno. Ua mau ia rätou i te tapeà te tino o Ietu i nià i te tatauro, àreà ra te Varua aita roa ia. Tei teie vahi tatou e ìte ai te puai o Ietu, oia hoi, eita na te mataù e faaâpiâpi i te mau òhipa ta na e faatupu nei, e, e faaìte nei.

Ia faaroo anaè tatou i te mau manaò o Ietu, aita ia e haaparuparu nei i te mau pipi i te raveraa i te òhipa a te Atua. Te parau nei o Ietu e, eiaha e mataù i te taata, te mau òhipa e tapoìhia e faaìtehia ia, te mau parau e faahitihia i te vahi pouri, e haapurorohia ia i te vahi maramarama. E te mau parau e topa i roto i te hohonuraa o te tarià, ia poro haerehia ia te reira i te vahi maitai o te ààu o te taata. Eiaha e mataù e mea faufaa aè te taata i te manu rii e hoohia hoê moni veo, e ua taiò – atoà - hia to òutou iò rouru. Te haapäpu nei teie parau te huru no to te Atua haapaòraa i te taata ia au i ta na faanahoraa. No reira eita e tià i te mau pipi ia mataù i te faaìteraa i te mau hinaaro o te Atua, i te mea e Atua hinaaro rahi teie te ora o te mau taata atoà. To na maitai eita e tià i te taiò, e ao ra to te feia i haapaò i te parau a te Atua tei tamau maite i te parau tià, eita e faaea. Te parau a te Atua ia vai i roto i te ààu o te tavini, e riro ia mai te hoê àveià, tei turai i te tiàturiraa i nià i te tumu mau no te ora.

O ta Ietu ia e parau nei e eiaha e mataù, oia hoi eiaha e mataù i te ora a te Atua teie ora, to na utuà e ORA MURE ORE. Te ora ra aita i niuhia i nià i te Atua, to na utuà ra te pohe mure òre ia. No reira eita ia e tià i te mau tavini ia mataù, i te mau faaìnoraa e faanahohia no rätou, ia tià ra ia rätou ia faaìte i te puai o te Atua ia farerei rätou i teie mau òhipa. Ia haamanaò ia rätou e o te Fatu iho teie e na reira – hia - ra, to na ia reo i nià i ta na mau pipi ia au i te faaìteraa a Mataio i te 5 i te irava 11,i te naò - raa e, e ao to òutou ia faaìno mai, e ia hamani ìno mai, e ia pari haavare noa mai te taata ia òutou i te mau ìno atoà, no ù. E manaò faaitoito teie no Ietu i to na mau tavini, ma te ìte atoà e tupu teie mau òhipa i nià ia rätou. I muri aè i to Ietu revaraa i nià i te rai, e i muri aè i te mahana penetetote, e i te taime te mau apotetoro a tere ai, i to rätou mau tere mitionare ua farerei rätou, i teie mau fifi, e te vai nei tei pohe roa i te taparihia i te iòa o Ietu. Na te mau òhipa tià òre i tupu i nià i te mau apotetoro, i horoà faahou i te puai i te mau taata tei papetitohia ia tapeà tamau i to rätou tiàturiraa i te Metia tei mana i nià i te pohe. Eita i te mea òhie te parau no te haamoriraa i te tau no te mau apotetoro, ta vetahi i roto i te ana pure ai e aore ra i roto i te mau menema ia òre rätou ia noaa - hia i te mau enemi o te Atua.

Te tumu ia o Ietu i parau ai e, Eiaha ra e mataù atu ia rätou, ia tià ra i te mau taata faaroo atoà ia fäì i to rätou faaroo i mua i te Atua. I te mea, eita e tià ia hunahia te faaroo parau tià e mahuti – iho ra te reira i te mau vahi atoà. Na teie mau òhipa e faaìte te upootiàraa te Atua i roto i ta tatou fäìraa parau e to tatou manuia ra, to te Atua ia òaòaraa. Eiaha e mataù, to na auraa, eiaha tatou ia a ueue i mua i te mau òhipa tià òre e àua haaàti nei ia tatou. Ia papu maite ra i te faaìteraa i te faaroo i mua i teie mau òhipa, e tià e faaturori te mau manaò. Te aniraa ia ta Ietu e faaitoito nei i ta na mau pipi, e tae noa atu i te mau taata i faaroo i teie mau parau. Te faaroo teie ta Ietu e faaitoito nei ia òre ia mau i roto i te here pata no te paruparu, noa atu e tupu te mau faahaparaa e te mau hamani – ìno – raa E tià ra i te faaroo ia faaòre te reira mau faaìteraa tià òre. Ia òre anaè e tupu mai teie te huru, e tapaò faaìte e, aita te parau no te èvaneria ia aahia i roto i te ààu. Ua topa ia te huero o te èvaneria i nià i te èà tià taataahihia iho ra e te àvae taata, e haere mai ra te mau manu o te reva àmu iho ra, e aita aè ra i tupu. Topa iho ra vetahi i nià i te mau mato, paapaa aè ra i te mahana pohe atu ra, e ta tahi mau huero rii topa iho ra i roto i te mau àihere hoène noa iho ra to na tupuraa, àreà ra te tahi mau huero topa iho ra i nià i te repo maitai, to rätou tupu, e te hotu ua horoà i te mau maa nehenehe mau. O te hohoà mau teie ta Ietu e faahiti nei i roto i ta tätou nei taiòraa. E farerei te mau taata faaroo i te mau fifi rau, eita ra na te reira e haamataù ia rätou i te fäìraa i to rätou faaroo i mua i te taata e te Atua. Eihea taata tei ère e aore ra tei paruparu to rätou faaroo i teie mahana, i te mea aita rätou e fäì faahou nei i to rätou faaroo. Te fäìraa faaroo, o to te taata ia haapapuraa i to na tiàturiraa i mua i te mau hinaaro o te Atua. Ma te heheu i te hohonuraa o to na ààu i te parau tià tei faatià faahou ia na i te itoito ta te Atua i faataa no na. Ei haapotoraa i te parau mau a te Atua e horoà nei i te mau taata atoà, o ta te mau teretetiano ia e faaìte nei e tae roa mai i teie nei mahana. Na te tapaò o te fäìraa faaroo e faataa ê i te taata paieti i te paieti òre. Te manaò tumu ia ta Ietu e parau nei e, eiaha e mataù, aita o Ioane Papetito i mataù i te fäìraa i to na faaroo i te naò - raa e, e ère au te Metia, à hio na i te àrenio a te Atua tei hopoi ê atu i te hara a to te ao, Ioane pene 1 irava 20 e te irava 29.Mai ia Aneterea ua ìte - a ia maua te Metia Ioane pene 1 irava 40 e te irava 41; Mai ia Natanaera e Rapi, o te Tamaiti oe a te Atua, o te Arii o oe no Iteraera Ioane pene 1 i te irava 49; Mai ia Toma e ta ù Fatu, e ta ù Atua Ioane pene 20 i te irava 28;Mai ia Petero, o te Metia oe, te Tamaiti a te Atua ora ra Mataio pene 16 i te irava 16.O te òhipa ia e tià e rave i teie mahana ia fäì te mau taata atoà e, o Ietu Metia te Fatu, e hanahana ai te Atua Metua ra.

E na roto i to tatou fäìraa i to tatou faaroo, e riro ai tatou ei hoa rave òhipa no Ietu, no ta na mau raveà perofeta. Ua noaa hoi i to tatou Fatu taua toroà ra, no te haamaramarama i te feia atoà e tiàturi nei, i te ìte mauraa i te Metua, no te haapii ia tatou i teie mahana, i te parau mau, e no te faariro ia tatou, ei mau tavini haapaò maitai no te Atua, e ia Fäì i te faaroo i te Faaora ta na i horoà mai. Te faufaahia nei tatou na roto i teie reo no Ietu eiaha e mataù, no te mea te faaara nei O ia ia tatou ma te Arai i te mau fifi atoà e tupu. Na te Metia hoi i faaìte ia tatou i te Atua, to na Metua, tei riro ei Metua atoà no tatou. Na roto ia Ietu, e tae ai tatou i pihaiiho i te Metua, no te faaìte ia tatou i mua i to na aro ,no te pupu ia tatou e te mau mea atoà na tatou, ei tutia no te haamaitai i te Atua. I tià atoà ai ia tatou ia pure i te Atua no to tatou mau taeaè. Te riro nei tatou i reira, ei hoa no te faaìteraa i to te Atua mau hinaaro i to tatou mau taeaè atoà Ta te Hepera ia e faaìte nei i te pene 9 i te irava 24,e te pene 10 i te irava 10 e te irava 14 i te naò - raa e, aita aè nei hoi te Metia i tomo i roto i na vahi moà i hamanihia e te rima ra, i te hohoà no te vahi moà mau ra, tei te rai mau ra O ia ia faaìte Ia na iho i mua i te aro o te Atua no tatou i teie nei. No taua hinaaro ra i moà ai tatou nei, i te pupuraa hoê i te tino o Ietu Metia ra. Ua maitai roa hoi e a muri noa atu te feia haamoàhia e ana ra.

Te faatiàma nei O ia i to tatou ture ààu, e te horoà nei ia tatou i te mau taoà varua a te Metia, ia tià ia tatou ia ora mai teie atu nei, i roto i te mataù òre. Te horoà nei ia tatou i te mana no te haaviraa i te mau òhipa tià òre e hara ai tatou nei, i te hinaaro o te tino e no teie nei ao tei riro ei mau enemi no to tatou mau varua hema haere noa. Te haapäpu nei O ia ia tatou, e mana tatou e te Metia atoà i nià i te mau mea atoà i hamanihia. Te riro nei tatou na roto i taua òhipa ra, ei mau tavini no te Hau Arii, na roto i te àpitiraa atu tatou i te Metia. Ia mau papu ia tatou i te tiàma ta te Metia i faatiàma ia tatou e òre ia e tià ia tatou ia mataù. O te raveà hoê roa ia no te fäìraa i te faaroo i mua i te Atua Metua.

Ei faaotiraa, e reo ia no Pauro i te Etaretia no Firipi i te pene 2 irava 11,

E ia fäì te mau vaha atoà, e o Ietu te Fatu, e hanahana atu ai te Atua Metua ra.

ia ora na .

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens