Overblog Suivre ce blog
Editer l'article Administration Créer mon blog
20 mai 2014 2 20 /05 /mai /2014 22:52

Mau taiòraa.

Etoto 34 : 4 – 9 Te ture no te Aroha.

Taramo 145 Te mana e te aroha.

II Torinetia 13 : 11 – 13 Te aroha tei tamahanahana.

Ioane 3 : 16 – 18 Te faarooraa.

Mau tuhaa o te taiòraa.

E tià ia tuhahia teie pene parau e maha aè tuhaa, no te faufaa o te mau parau e faahitihia ra e Ietu i nià i te parau no te FAAROORAA,TE AROHA, e te ORA MURE ORE. Ia hiò maitaì anaè tätou i teie mau tumu parau, te faaìte mai nei ia, ia tätou te puai no te manaò ta Ietu e hinaaro nei e faaìte. No te faatupuraa te Atua i ta na e horoà nei i to te ao, na roto i te aroha, ia noaa te faufaa no te ora mure òre i te mau taata atoà o te ao nei. Teie taua mau tuhaa ra,

1) ei òmuaraa ir 13 Te vahi o te Tamaiti a te taata.

2) ei tuatapaparaa ir 14 - 15 Ia faateiteihia.

3) ei haafaufaaraa ir 16 Te taviri no te ora mure òre.

4) ei faaìteraa ir 17 Te hopoià a te taata faaroo.

Teie te huru no te mau tuhaa e vai nei i roto i teie taiòraa, te mau manaò e faahitihia nei e Ietu, te faaìte nei ia i te faufaa e noaa i te mau taata atoà ia Faaroo na roto i te auëuë òre, i te Aroha o te Atua tei horoàhia no te ao nei. Na vai te reira e haapäpu mai nei ia tätou na teie na reo e piti, tei önoöno i te parauraahia i te ìrava 15 Ia òre ia pohe te faaroo ia na ra, ia roaa rä te ora mure òre ,oia atoà ia te ìrava 16 vh Ia òre ia pohe te faaroo ia na ra, ia roaa rä, te ora mure òre.

Te horoà nei teie na parau e piti ia tätou, no te manaò e haapäpuhia ra e Ietu i nià i te FAAROO. Oia hoì, eiaha te FAAROO ia mou, e na te FAAROO ra e horoà i te ORA MURE ORE.

Te huru o te taiòraa.

E taiòraa ia tei titau i te FAAROO o te taata, e àore ra tei titau i te TIÀTURIRAA o te taata e taiò nei i teie pene parau. Te manaò ia o Ietu, i te parauraa atu ia Nitotemo, ia riro o Nitotemo ei taata tei faafanau faahouhia e te Varua o te Atua. Eiaha no te hoì i roto i te òpu o to na metua vahine, no te haere ra i roto i te òpu no te FAAROO, ia tupu te haafanauraa no te ORA MURE ORE. Teie ia te huru no ta tätou taiòraa. TE FAAROORAA I TE AROHA O TE ATUA.

Te tupuraa o te taiòraa.

Te vahi i : Ierutarema.

Te taime : i te ruì ir 2vm.

Te tumu : farereiraa na Nitotemo ia Ietu.

Te tumu parau : e Òrometua o Ietu no o mai i te Atua ra ir2vr.

Te haapiiraa : te fanau faahouraa no ìteraa i te Patireia o te Atua.

Te pene parau : e haamata mai te ìrava 1 e moti i te ìrava 21,no te mea e taui o Ietu i te vahi i muri mai teie àparauraa na Ietu e o Nitotemo, ia au te faaìteraa a te ìrava 22 E muri aè ra haere atu ra o Ietu e ta na mau pîpî i te hoê fenua i Iutea.

Te taiòraa : ua tupu ia i roto i teie farereiraa no Ietu e o Nitotemo, i te faaìteraa a te ìrava 13 e tae i te ìrava 18.E tapaò faaìte e o Nitotemo te tumu no teie mau parau ta Ietu e faahiti nei.

Te heheuraa Ioane 3 :13 - 18.

i te rai faateitei oia atoà Aroha

i te òfi. te Tamaiti mai te

a te taata i to te

e faateitei- ao

atoà - hia.

Ia òre ia pohe te

faaroo ia na ia noaa

te ora mure òre.

area e vai i ropu i te fenua e te rai.

Te tahi manaò puai e vai nei i roto i teie heheuraa, mauti ra ia teie parau ia òre ia pohe te faaroo ia na ia noaa ra te ora mure òre. E aha te auraa teie parau ?

E aha ta na e hinaaro nei e faatupu ?

No te aha i faahitihia ai e piti taime i roto i teie taiòraa ?

Ei manaò hopeà.

Te manaònaòraa e vai ra i roto ia Ietu ia au i teie mau parau, ia tià ia i te Atua i te faanaho faahouraa i te fenua, ia fanaò te mau taata faaroo atoà i te parau no te ORA MURE ORE.I te mea te òhipa ia a te FAAROO e haafanau faahou i te taata no te ORA MURE ORE.

te ao i mua ra te ao i teie mahana.

Atua taata

tamaiti tamaiti

taata Atua

Ei tuatapaparaa i te PARAU MAITAI a IETU i ta Ioane papaìraa.

a) TE TAATA PAPAI.

Aita teie Evaneria i faaìte papu mai ia tätou, o vai mau te aito tei papaì i te 4 o ta tätou Evaneria e tuatapapa nei.

Teie ra, ua tuàti te manaò o te mau metua o te Etaretia i nià i te hoê taata tei maìrihia to na iòa o Ioane Apotetoro, te aito tei papaì i te 4 o te Evaneria.

Mea tano ia haapäpuhia i o nei, e piti Ioane tei manaòhia e te tahi pae .

1) Ioane päpetito te matahiapo.

2) Ioane Apotetoro te pîpî herehia e te Fatu.

Te parau nei ra te mau metua i te tau Irene, na Ioane te tamaiti a Tepetaio i papaì i teie Evaneria. Te manaò ra o te mau taata tuatapapa, no teie mahana aita ia rätou e tuàti faahou nei i nià i te reira parau. Òre noa atu ai ra te tahi mau manaò e tu, te mea maitai ua oti te puta i te papaìhia, e o te reira te mea faufaa ia tapeà mai.

e) TE VAHI I PAPAIHIA AI TEIE EVANERIA.

Ua parauhia e, tei Efetia te papaìraahia te 4 o te Evaneria, tei reira atoà te papaìraahia na rata e toru a Ioane e te puta Apotarupo,.

f) TE MATAHITI I PAPAIHIA AI.

Te mea päpu, ua papaìhia teie Evaneria, i muri noa mai i na Evaneria e toru hiò àmui, oia hoì, MATAIO, MARETO, e o RUTA EV.E tano ia parau, tei roto noa i te area matahiti 90 e 100 i muri mai i te Fatu te papaìraahia teie Ev.

h)TE FA NO TEIE EVANERIA.

Ia taiòhia te pene 20 : 30 - 31 no teie èvaneria, te ìtehia nei teie parau, IA FAAROO OUTOU E, O IETU TE METIA TE TAMAITI A TE ATUA? E IA NOAA HOI TO OUTOU ORA I TO NA IOA I TE FAAROORAA.

I o nei, te faaìte nei o Ioane i te tumu no ta na Evaneria. Te mau parau ta na i papaì, ua tuu mai o ia i te mau parau tumu e te faufaa e ora ai tätou. Te mau mea ta na i tuu, e hinaaro nei o ia, e na taua mau parau ra, e patoto i te ààu o te taata ia fariu i nià i te Atua ta Ietu i haere mai e faaìte.

i) UA PAPAIHIA TEIE EVANERIA I TEIHEA HURU TAATA

Aita o Ioane, i papaì noa i teie Evaneria i roto i te aore, ua papaì ra o ia i te nunaa o te Atua, oia hoì i te Etaretia. Teie Etaretia, tei roto o ia i teie ao. E ao fifi, tei î i te mau tamataraa rau atoà. Mai te mea ra e, tei roto i te hoê vahi ìno to te Etaretia parauraahia e ora i to na faaroo.

Te hapono nei o Ioane i ta na parau i te feia tei roto rätou i te Etaretia, te auraa te feia ta na e parau ra, e feia ia ua haapiihia, e ua taa i te tahi mau parau matamua no roto i te faaauraa matamua.

Aita o Ioane i papaì no te mau taata, aita hoê aè haapiiraa faaroo i roto ia rätou, no te mea eita ta na mau parau hohonu e tano no te mau huru faito taata atoà. Teie Evaneria te turaì nei o ia i te feia atoà tei haapiihia i te parau no te Atua e, no Ietu Metia e no te Varua Moà, ia faahohonu rii atu i to rätou faaroo. No reira, te mau Ati - Iuta atoà tei färii ia Ietu, aore ra, te mau nunaa èè atoà tei haapiihia i te Evaneria, tei hinaaro e faaravaì faahou atu â i to rätou faaroo, e tano maitaì teie Evaneria, no rätou.

m)TE TÄTUHAARAA O TE EVANERIA.

1) 1 : 1 -18 TE TAHI MAU PARAU FAAARA.

2) 1 : 19 – 51 OMUARAA NO TE EVANERIA,TE FAAITERAA A IOANE

PAPETITO, TE MAU PÎPÎ MATAMUA

3) 2 - 11 TE TAERAA MAI TE ORA ÀPÏ I TE AO NEI

a) te tapaò no te pape (2-5)

e) te tapaò no te faraoa (6)

f) àimaroraa i nià i te Fatu e te täpaò no te tiai mamoe (7-10) h) te tiàfaahouraa o Rataro (11)

4) 12 - 17 IETU TE ORA O TEIE NEI AO.

a) te faaararaa a te Metia (12).

e) te àmuraa maa hopeà (13)

f) te mau parau hopeà na te Metia (14 - 17)

5) 18 - 20 TE MAU ÀTI E TE POHE,E TE TIÀFAAHOURAA O TE METIA. 6) 21 TO IETU FÄRAA MAI IA PETERO E O IOANE

EI MANAÒ HIO AMUI.

Ia hiò maitai tätou i teie Ev, te riro nei o ia mai te hoê parau tei àpi noa, noa atu te ravaì o to rätou òhiparaahia, te àpi noa nei teie mau parau ta Ioane. Ua riro ta Ioane faaìteraa ei mau parau na Ietu tei tiàfaahou i te taata tei ìmi i te ora. I teie mahana o tätou o Nitotemo o tätou te vahine Tamaria, o tätou ta Ioane e parau nei e, ua aroha mai te Atua i to te ao, e ua tae roa i te horoà mai i ta na tamaiti fanau tahi ia òre ia pohe te faaroo ia na ia noaa – raa te ORA MURE ÒRE.

HEHEURAA TAÒ.

Irava 13 : antropu e reo hereni teie to na huriraa e taata - TE TAMAITI A TE ATUA I ROTO I TE RAÌ. Te parau ra te tahi pae mau taata huri pipiria e teie vahi hopeà no teie ìrava i roto i te rai e faaravaìraa teie. Aita teie parau i roto i te papaìraa matamua.

Te TAMAITI A TE TAATA.

Ua faaòhipa matamuahia teie parau i roto i te faufaa Tahito Taniera 7 : 14.Te faaauhia ra te Atua tei haere mai e haava i teie nei ao mai te tahi taata ra te huru o tei tere mai na nià i te ata. Ua haere atoà mai o ia no te faaora i te taata tei tiàturi ia na. I o nei te ìtehia ra ia e piti huru no teie TAMAITI A TE TAATA oia hoì ei faaora e ei haava ia tae i te tau hopeà. Ua matau noa te taata no te tau o Ietu i te faaroo i teie parau. Eita e òre e ua parau o Ietu i teie parau no te faaìte i te mau taata e e taata noa o ia Taramo 8 : 4 E AHA TE TAATA NEI I MANAO MAI AI OE IA NA ? E TA TE TAATA NEI TAMAITI I HAAPAO MAI AI OE IA NA.I roto ra i te manaò i faaravaìhia atu e Ioane te hoì faahou mai ra ia tätou i roto i te auraa o te Faufaa Tahito.

Ia hiòhia teie huru parau a Ietu mai te huru ra ia e e taata ê atu teie ta na e faahiti ra mai te taata ê atu te haere mai i muri mai ia Ietu. Ia tae roa ra i te taime a tiàfaahou ai Ietu i reira i te papu – roa - raa e, te TAMAITI A TE TAATA ta Ietu e parau noa ra o na iho ia.

No Ietu, aita o ia i na nià mai i te ata i te haereraa mai ua haere mai o ia mai te huru o te taata na roto i te fanauraahia mai, ua riro atoà o ia i teie taime ei taata tei färii i te pohe.

ir.4 ÔFI E ànimara teie e nee haere na raro.

I te tau no te mau Patereareha ua ìtehia e piti huru to te taata i mua i te òfi.

1) E mea faaturahia te òfi, oia hoì eita e haùtihia no te mea e ànimara haìriiri roa teie ia hiò.

2) E ànimara mataù – atoà - hia no te mea e pohe te taata ia patiahia o ia.

Ua ìte – atoà - hia ra e piti huru to te òfi, te ìno e te maitaì.

1) I te tahi mau pae fenua mai Papuronia ma, ua riro te òfi ei atua tei haamorihia, e ua taraihia te tahi mau àfai ei haamanaòraa i teie mau atua tei tiaì i te hoê oire. Ia patia – anaè - hia te hoê taata, e parauhia o ia i te taata rave hara, ua riro te òfi mai te tahi haava ra te huru.

2) I roto ra i te mau fenua Hereni, ua riro te òfi ei atua no te òhipa faaoraraa maì. E ua tuuhia te reira hohoà ei tapaò no te taata ia hiò i te òfi ra mai te tahi reva tei taamuhia i nià i te hoê pou.

I roto i te faufaa tahito, ua faatuàtihia te òfi i nià i te ìno, te faahema, ia Tatani mai tei ìtehia i roto i te Tenete pene 2.Ua riro o ia ei enemi no te Atua.

Ua faaau – atoà - hia te tahi mau taata i te òfi Mataio 3 : 7;23 : 33.

E rave rahi mau parau i roto i te Pipiria ei reira e ìtehia ai te upootiàraa te Atua e te nunaa o te Atua i nià i te ìno Ruta Ev pene 10 ìrava 19;Apotaurupo pene 20 ìrava 2 e tae i te ìrava 10.Eiaha ra e haapaò noa i te papaìraa teie mau parau no te mea e faahohoàraa noa teie.

Ua ìte – atoà - hia ra te tahi vahi faufaa o te òfi no te mea e paari rahi to na. Ua faaòhipa atoà o Mote i te òfi i roto i te metepara no te mea te mau ra oia i te mana faaora Numera pene 2 ìrava 4 e tae i te ìrava 9.Ioane pene 3 ìrava 13 e tae i te ìrava 15.

Te faufaa o te mau parau.

Hoê noa àroraa teie e faaìtehia nei i roto i te mau parau e faahitihia ra, mauti ra ia te FAAROO, te AROHA, e te ORA MURE ÒRE. I mua i teie mau manaò, te titauraa e piihia nei e Ietu, ia ìte te taata i to na faufaa i te tiàturiraa, i te ORA e horoàhia nei. I te mea e piti taime to Ietu faahitiraa i roto i te Ioane pene 3 teie parau e, IA ÒRE IA POHE IA NA TE FAAROO IA NOAA RA TE ORA MURE ÒRE, ìrava 15, e te ìrava 16 vh IA ÒRE IA POHE IA NA TE FAAROO IA NOAA RA TE ORA MURE ÒRE. Te ìtehia nei i roto i na manaò e piti te faufaa o te parau, e tupu nei to na auraa ra te FAAROO E TE ORA MURE ÒRE teie e hinaarohia nei ia faanaò te mau taata atoà o te Atua to rätou haapuraa. Inaha te aroha mai nei te Atua i to te ao nei, e ua tae roa i te horoà mai i ta na Tamaiti here i roto i te mau taata atoà. Na roto i teie mau manaò te tuuhia nei tätou i mua i te hoê tapura òhipa, e te tià e faatupu i te AROHA tei faaòre i te hara te tahi i te tahi. Ia ìte tätou i teie huru faanahoraa, te firihia nei ia tätou i te nape mutu òre no te AROHA, TE FAAROO, E TE ORA MURE ÒRE.

Terai or

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens