Overblog Suivre ce blog
Editer l'article Administration Créer mon blog
20 mai 2014 2 20 /05 /mai /2014 22:49

Ioane 20 : 19 - 31. Te ora o tei faaroo.

Te parau tei àtutu.

Aita te òhipa a te Atua i faaea noa i te ùtu no te menema o te tiàfaahouraa. Ua riro ra teie vahi, ei òmuaraa i te hoê tau àpi no ta na mau òhipa, i te mea ua haafaufaa – òre - hia, te mau mea rii tei haafifi i te tupu maitaìraa, ta te Atua faaìteraa i to na puai e to na mana faaòreraa hara. No reira ua î te Atua i te aroha ,ua haapunihia e ana ta na Tamaiti i te marei o te pohe, no te arataì ia na i nia i te fenua no te feia ora, i reira O ia e faatupu ai i te eufe no te ORA MURE ORE. Ia tià ia Ietu tei tiàfaahou mai ia faateitei te àuà no te ora, o ta te Atua e tiai nei na roto i te Fäîraa to te ao e o Ietu - Metia e Tamaiti ia na te Atua ora.

Te faanahoraa o te taiòraa.

Ta tatou ra taiòraa, e tià ia parauhia e maha tuhaa ra rahi teie e vai nei.

1) To Ietu hinaaroraa e heheu ia na iho i ta na mau pipi (Ir.19-23).

2) Na pipi 10, e te faaroo òre o Toma. (Ir. 24-25).

3) Te to Ietu faraa mai, e o Toma. (Ir. 26-29).

4) Te òpaniraa e te fa o teie Èvaneria. (Ir. 30-31).

Tuatapaparaa.

Ua tupu teie parau i te mahana iho - a no to Ietu tiàraa mai, mai te pohe. Te haere nei O ia

e farerei i to na mau taeaè tei täpu i to rätou tuàtiraa e te mau taata, e au ra e, ua faatea rätou i to te ao.

I roto i tera taime to Ietu heheuraa ia na iho i ta na mau pipi, e farereiraa matamua roa teie no na i muri aè i to na tiàfaahouraa. Te haafaufaahia nei te parau no te taime, e aore ra te parau no te mahana, e ère atu ra i te täpati Ati - Iuta, te mahana matamua ra no te hepetoma te täpati teretetiano. Oia hoi e faaea te täpati tahito, no te faatura i teie tau àpi e matara nei.

I te mahana matamua no te hepetoma to Ietu haereraa i to na mau taeaè ra. Ia hiòhia e ère teie Ietu e haere nei mai tera Ietu matamua. E Ietu ra teie tei o roa i roto i te huru Atua inaha aita e paruru no te tapeà ia na. Aita to te taata e mana faahou i nià ia na. Noa atu ua tapirihia te òpani fare aita te reira i riro ei fifi no na no te haere e hiò i te mau pipi. Mai te pohe tei òre i tapeà i to na tino tahuti, aita atoà te òpani fare i riro e tapeà ia Ietu i roto i ta na òpuaraa.

Aita anei ra teie hiòraa e turai nei i te manaò i nià i te tahi atu manaò, oia hoi mai te mea

aita e òhipa e tià ia tapeà ia Ietu ia haere i te vahi ta na i òpua e roaa anei i te taata ia paruru, ia

tapeà ia Ietu ia tomo mai i roto i te ààu o te taata ta na i hinaaro i te tomo.

I roto i teie farereiraa matamua no Ietu e ta na mau pipi ia hiòhia te faaòhipa nei Ietu i te reo e te parau no te tiàfaahouraa, IA ORA NA OUTOU... o ta na ia parau matamua. E peu mätauhia teie òhipa e te Ati - Iuta, ei faaìteraa i te tapaò no te HAU, i te mau taime atoà e farerei ai te tahi i te tahi taata, eita ra te tahi taata pohe e aroha i te taata ora. Teie ra ia faaauhia te reira òhiparaa mätauhia e teie ta Ietu e horoà nei e taa – ê - raa rahi roa to na òhiparaa no te mea te hinaaro mau ra te mau pipi i te hau e no te mea atoà hoi te hau ta Ietu e manaò ra e horoà, ua roaa ia te reira ia na na roto i to na tiàfaahouraa. No reira i to na faraa mai i teie nei e ère ia no te vai iho noa i te mau pipi i roto i te huru ta rätou noa i matau noa, te mataù anei, te feà anei, te peàpeà anei, te paruparu anei, te haere mai nei ra o Ietu no te ùme atoà i te mau pipi i roto i to na tiàfaahouraa e te mau hotu atoà e manii mai na roto i taua parau ra .IA ORA NA OUTOU, e aore ra ei IA OUTOU TE HAU, o te tahi parau àpi teie e faahuruê i te oraraa o te mau pipi. e toru taime to Ietu faahitiraa i teie parau IA ORA NA.

No te horoà faahou i te hoê tiàturiraa papu maitai i roto i te mau pipi e o Ietu mau teie i roto ia

rätou ia hiòhia, aita te parau i ravai noa. Ua àpeehia ra te parau no te hau e te mau tapaò hiòhia e te mata oia hoi, te rima e te àoào o te Fatu .Te rima e te àoào o ta Ietu e faaìte nei i te mau pipi o na tapaò ia tei faaiho faahou mai i te mau òhipa atoà i tupu i nià i te Fatu. Teie rima e teie àoào e ère i te mea puta noa i te faufaa òre, ua puta ra no te òhipa. Ahiri paha aita te rima e te àoào o Ietu i puta e tiàturi anei te mau pipi e o Ietu iho - a teie i roto ia rätou.

I teie taime no te paruparu no te tiàturiraa o te mau pipi e O ia iho - a ua tiàfaahou mai o Ietu, te riro nei te tapaò ei mea faufaa, te riro nei hoi ei turu ia ratou.Te auraa o teie mau tapaò ei faaìteraa ia e, ua matara te ùputa no te patireia o te Atua, i te feia atoà tei tiàturi i te tiàfaahouraa o Ietu - Metia.

I te taime e papu ai i te mau pipi e o Ietu teie tei manaòhia e ua pohe - roa, te riro nei to rätou ìte faahouraa ia Ietu mai te hoê maramarama rahi tei hiti mai no te turama i te hoê pupu taata tei parahi i raro aè i te maru pohe. Teie maramarama tei hiti mai te faahoì faahou mai nei te reira i te tahi mea e hiaai – noa - hia ra e rätou, oia hoi te òaòa i to rätou ààu. Mai te òpani tei òre i tapeà ia Ietu oia atoà te mataù e vai ra i roto i te ààu o te mau pipi aita te reira i riro ei tapeà i te òaòa ta Ietu e horoà nei i te mau pipi ra tano atu ai tera reo e: òaòa aè ra te mau pipi i te ìteraa atu i to rätou Fatu, e tano ia parauhia na Ietu taua òaòa ra e hopoi mai nei. Te òaòa tei hoi faahou mai o te hiòraa faufaa rahi te reira o te riro ei tapaò no te tauiraa

e roaa nei i te mau pipi na roto ia Ietu. Tera tauiraa àpi te faaineine nei te reira i to rätou tonoraa e to rätou färiiraa i te horoà a te Atua.

Te faufaa o te parau.

Ua haapuaì mai ra o Ietu te aho ora i nià ia rätou ma te parau e a färii mai i te Varua maitai. Mai te Metua i tono mai ia Ietu te na reira atoà nei O ia i te mau pipi. E au atu ra e, e tonoraa na te Atua iho teie; e ère mai te mau tonoraa i ìtehia hou te tiàfaahouraa mea huruê rii teie inaha teie Ietu e tono nei e Ietu ia tei upootià i nià i te pohe o tei riro ei ùputa tei faatiàma i te mau haaviraa atoà e te mau ìno atoà. Te tonohia nei te mau pipi no te faaìte i te tahi parau ta rätou i ìte e ua tupu, no te rave atoà i te parau no te faatiàmaraa i te taata i te mana faatîtî o te hara ta Ietu e parau nei e, ta òutou e faaòre ua faaòrehia ia ....ta òutou i vai iho....ua vaiihohia ia .Teie ra ia hiòhia ua àpeehia teie parau e te aho o te Atua oia hoi te Varua Maitai o te turu i te mau pipi i roto i ta rätou faaotiraa òhipa. Mea faufaa teie parau eita e maoro roa te tuuhia nei te mau pipi i mua, i te hoê taeaè tei faarue i te mau

haaputuputuraa. Ua haere teie taeaè i hea.....aita tätou i ìte. Tatou ra e ìte nei ua

tuuhia na pipi hoê àhuru i mua ia Toma tei vai noa o ia anaè iho i to na pae. I nià ia Toma ua haamata te parau no te faaìteraa. Te faaìteraa i o nei ua niuhia i nià i te parau no te Fatu ta te tahi pae pipi i ìte e ua tiàfaahou. Te parau tumu e hinaarohia nei ia faaroo o Toma. Teie ra aita teie taeaè i färii i taua faaìteraa ra. Te vahi maere o Toma anaè i to na pae hoê àhuru pipi i to rätou pae aita iho - a o Toma i taui mea maere roa. O Toma anei tera e fifi ra aore ra, te feia faaìte tei paruparu. Teie huru e ìtehia nei i roto ia Toma e to na mau taeaè pipi o te tahi iho - a ia huru tei ìte pinepinehia i roto i te àài o te tupuraa o te Etaretia oia hoi, te faatauiraa i te hoê taata e ère te òhipa òhie no te mea i te rahiraa o te taime te titau nei te taata i te tahi tapaò aore ra i te tahi mau òhipa e àpee i te parau e te faaìteraa. No Toma eita o ia e tiàturi mai te mea eita o ia e ìte i te tapaò.

I teie vahi, e i mua hoi i teie huru titauraa e hope ai te òhipa a te taata e tano atu ai ia parau e, o Ietu anaè iho te tano ia pahono ia Toma.

Ia tae ra i te piti no te täpati, oia hoi te vaù o te mahana, ua hoifaahou mai o Ietu i ropu i ta na mau pipi, e i te reira taime te tuuhia nei o Toma i mua i to na Fatu. Eita paha e òre e ua hoi mai o Ietu no teie mamoe ua hoi mai ia tupu to Toma tiàturiraa papu ia Ietu tei tiàfaahou. Mai ta Ietu i faaìte i to na rima e to na aoao i te tahi pae o te mau pipi te na reira atoà nei o ia i nià ia Toma.

Ia Toma ra ua parau roa ia o Ietu ia faatoro o Toma i to na rima no te fafa i to Ietu mau puta. E fafa o Toma i te vahi i niuhia te ùputa no te patireia o te Atua, ma te faaìte atoà e te hinaaro nei te Atua i fafahia to na ààu e Toma. Teie te raveà i manii mai ai na roto i te vaha o Toma te hoê fäìraa faaroo nehenehe roa E TA U FATU E TA U ATUA.

I muri aè i teie Fäîraa faaroo e tano anei ia parau e, e au o Toma i te feia atoà tei atea i te èà tei hinaaro ra ia turuhia rätou ia amohia to rätou paruparu ia ìte faahou rätou i te faaroo. Nahea i te turu i te feia tei feà no teie tau inaha hoi aita faahou o Ietu mai ta Toma tapeàpeà i tera tau. Te horoà nei o Ietu i te pahonoraa i teie uiraa, E AO TO TE FEIA AORE I ITE IA U A FAAROOO AI.

Teie te parau faufaa ta Ietu i tiàfaahou e horoà nei no tatou tei òre i fanaò i te fafa ia na e to na mau puta, e roaa atoà te ora ia tatou. I o nei te faaìte nei te Fatu e eita te ora àpi ta te tiàfaahouraa e horoà nei i taotià – noa - hia no te feia tei hiò mata roa, tei fafa roa, ia Ietu ua faanaho- atoà - hia te ora àpi no te feia tei faaroo noa aita ra i ìte. E parau hohonu teie, mea faaroo noa ua tiàturi. Ia hiòhia e mea iti roa te feia tei ìte ia Ietu tei Tiàfaahou, e nunaa rahi ra tei faaroo e ua tiàturi. A hiò na i te mau Etaretia ta Pauro i haamau i to na tau e tei tupu noa i muri mai, te taatoàraa mea faaroo noa ua tiàturi ra. E tano ia parau e te tauiraa ta te tiàfaahouraa i faaìte e haere roa te reira i roto i te parau e ìtehia to na mana i nià noa i te parau, e farerei atoà ai ia Ietu.

No reira te mea e titauhia nei te färiiraa te taata i te parau ora a te Atua tei faaìte mai e ua tiàfaahou Ietu, te hinaaro nei O ia e ùme i te taata i roto i te òaòa no tera Parau Api. E ère anei o te tumu ia i papai ai o Ioane i ta na Èvaneria ia faaroo to te ao e o Ietu te Metia te tamaiti a te Atua.

Te faaìte atoà nei teie parau e ua matara te ùputa o te rai na roto i te tiàfaahouraa o Ietu eiaha ra tatou e òpani te mau ùputa o te fenua.
.

Terai or

Partager cet article

Repost 0
Published by Mapuanga terai - dans Aòraa
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens