Overblog Suivre ce blog
Editer l'article Administration Créer mon blog
20 mai 2014 2 20 /05 /mai /2014 16:32

Ioane 14 : 15 – 21

15 Ua hinaaro òutou ia ù ra, e haapaò i ta ù parau.

16 Na ù hoì e äni atu i te Metua ra, e na na e horoà mai i te tahi Faaaò ia òutou, ia parahi mau òia e a muri noa atu i ö òutou nei.

17 O te Värua parau mau ra, o te òre e färiihia mai e te ao nei ra, no te mea aore i hiò ia na, aore hoì i ìte ia na, e ìte rä òutou ia na, e parahi mau hoì ò ia i ö òutou nei, e ei roto hoì ia òutou.

18 Eita vau e vaiiho òtare noa ia òutou, e hoì mai ä vau ia òutou nei.

19 E ia roovaù ïti aè, e òre to te ao e hiò faahou mai ia ù ; e hiò mai rä òutou ia ù ; no te mea e ora vau, e ora atoà hoì òutou.

20 Ia tae i te reira mahana e ìte ai òutou e, tei roto hoì au i ta ù Metua, e tei roto hoì òutou ia ù e tei roto vau ia òutou.

21 Tei ia na ta ù ra parau e ua haapaò o ia i ta ù parau ra, ò ia tei hinaaro mai ia ù ; e tei hinaaro mai ia ù ra, e herehia mai ò ia e ta ù Metua ra ; e here hoì au ia na, e faaìte atu hoì au ia na iho.

Ioane 14 : 15 – 21 Te Faaaò o te Ètärëtia.

Te huru no te taiòraa.

Te värua o te taiòraa, te faaìte nei ia i te òhipa e ravehia nei e te feiä paieti, ia hanahana te Atua, i ta na haapäpüraa i te mau òpuaraa no te mau taata atoà. Te feiä atoà tei färii päpu i te parau mau a te Atua, tei roto ia i to na àau te Värua Maitaì te tiàrepuraa ia upootià te maitaì i nià i te ìno. Na teie e faahaùti nei te tiàturiraa o te taata i nià i ta te Värua Maitaì e arataì. Teie ra mea varavara roa to te taata ìteraa i te reira, i te mea aita to rätou àau e riro nei ei ùmete färii no te mau hinaaro o te Atua. Ua äpiäpi hoì te ùmete i te mau peu tià òre, aita atu ra i riro faahou èi pärahiraa no te Värua Maitaì, ua riro ra èi pärahiraa no te mau manaò taata. I reira te ìte, e ìte òre ai, te parau mau ei parau haavare. Ua poì te mata i te väre o te faahema, i òre ai e ìte faahou i ta te Värua Maitaì e faaìte nei.

Taiòraa hinere.

Mauti rä te Èvaneria ia, tei papaìhia e Ioane i te pene 14 mai te ìrava 15 e faaea i te 21. I te mea te faaìte nei teie taiòraa e maha tumu òhipa o ta te taata faaroo e haapaò

  1. Ia tiàturi te mau pipi ia Ietu.
  2. E hoì mai te Fatu ei haapäpüraa e, e färii mai Ò ia i te mau Pure i faataehia ma to na iòa.
  3. Eita te Fatu e faaruè i to na mau taata, e tono mai ra ò ia i te hoê Faaaò o te parahi mai e amuri noa atu.
  4. Eita o Ietu e vaiiho òtare noa i to na mau tävini.

Te faufaa o te taiòraa.

To te Ietu ia haamarämaramaraa i te mau pipi i te mau òhipa e tià ia haapaòhia.

  1. Te parau nei o Ietu, a haapaò i ta ù mau parau, òia ia, te mau haapiiraa, te mau aòraa, te mau ture, i reira e ìte maitaìhia ai te huru mau no te tävini.
  2. Te ani Ò ia i te Metua, i te Faaaò, òia te Paruru Parau tià, ia parahi i roto ia rätou, e faaäuraa tià teie e au i te hoê Metua tei here i ta na mau tämarii.
  3. E ara ra i te Värua Parau mau, e òre to te ao nei e färii, o òutou ra tei ìte e parahi Ò ia i roto ia òutou, a tià atu ai ia faaìtehia.
  4. Na te reira e haapäpü e, èita vau e faaruè òtare noa ia òutou, a tae atu ai te taime e hoì mai ai Ò ia ra, i te tau mau ra.
  5. Ia tià ra i te mau pipi ia hiò i te Metia, i te mea èita to te ao nei e hiò faahou ia na, ia ìte ra te hiò päpu i nià i te ora, i te mea e ora Te Metia, e ora atoà ia te mau pipi.
  6. E mahana parau rahi to taua taime ra, te hora e ìte ai te mau pipi tei roto te Tamaiti i te Metua, te Metua i roto i te Tamaiti, ei faaìteraa i to raua hoêraa i roto i te òhipa no te ora o te taata.
  7. Ia haapaò ia te taata i ta na mau parau Moà i reira te parau no te here e tupu ai, te here i te Metua ra, ua herehia ia e te Tamaiti Fänau tahi a te Atua, i reira te mata e matara ai, no te ìteraa i te mau òhipa taa ê a te Atua.

E aha te auraa o tei mau parau ?

To Ietu ia horoàraa i ta na mau pipi, e i te mau taata atoà e tiàturi nei, te hoê parau TUTUU ia haapaòhia i te mau taime atoà, e tae noa atu i to na hoìraa mai. Oia hoì, te faariro nei o Ietu i te taata èi feiä tuhaa i roto i ta na faufaa. Teie te parau maere, e te faahiahia to te taata faataaraahia e Ietu èi puòiraa i ta na òhipa i te fenua nei, i te mea haere nei Ò ia i te Metua ra.

Te parau TUTUU, te faaineineraa ia a te taata ia na no te horoàraa, i te parau faturaa i te faufaa i nià i ta na mau tämarii, e aore i nià i te tahi taata ê mai te peu e aita ta na e huaai. E ravehia teie òhipa i mua i te notera, e i mua i na ìte e piti tei maìtihia e te fatu faufaa, eiaha ra èi taata no roto i te òpu fetii. Teie huru parau TUTUU, e parauhia te faaìteraa faufaa te taata e faafatuhia e ìte òia te parau atoà i faanahohia. Te vai atoà nei te parau TUTUU moè, na ìte noa te faaärahia, o vai ra te fatu, àreà te taata òia te faafatuhia èita roa e ìte, ia tae roa i te taime pohe te fatu o te faufaa. Te tahi ia faanahoraa teie e ravehia nei e te taata i teie mahana.

Teie ra ta Ietu, te faafanaò nei Ò ia i te huru taata atoà, e taiò nei i teie parau, ma te faaìte atoà i te òhipa e rave, e ma te tuu atoà mai te hoê Paruru, ia òre te mau fatu no teie faufaa ia vai òtare noa. Ia riro mau ra èi mau ìte àueue òre no teie mau faufaa e hitu e faaìtehia nei i roto i ta tätou nei taiòraa.

Te tïtauraa.

Te hinaaro nei o Ietu, ia aahia to tätou faaroo i roto i te tahi faanahoraa, tei òre roa e mure e e mou. Oia hoì e ia hotu i roto i te autaeaèraa e te hau, na te reira e faariro ia tätou ei matamehaì no te aroha o te Atua. Ei reira tätou e ìte ai ia tätou iho, i roto i te mata o te taata tupu, mai te hiò hipa ra te huru. E èi reira atoà te Atua, tei òre e ìtehia e te mata taata, e tauturu ai ia tätou i te ìteraa i te tahi, to tätou taeaè, to tätou tuahine e i te feiä atoà i roto i te ère e te veve.

E no reira, te tïtau mai nei teie parau TUTUU ia tätou ia faaitoito te huifaaroo i te ìmiraa i te mau raveà atoà, i te mau taime atoà ia àmui to na oraraa atoà i roto i te Atua no te mea o te puna te reira o to tätou ora. I roto i te manaò tumu no te àmuiraa atu i roto i te Atua, ia ìte atoà ia tätou e e tufaa ta na i na pae e piti, te pae o te Atua e i te pae o te taata. I to na pae, ua ìmi pinepine te Atua i te mau raveà no te àtiraa mai Ia na i roto i te oraraa o te taata o ta Ietu e haamanaò mai nei ia tätou i te parauraa e, Eita vau e vai iho òtare noa ia òutou.

Terai or.

Partager cet article

Repost 0
Published by Mapuanga terai
commenter cet article

commentaires

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens