Overblog Suivre ce blog
Administration Créer mon blog
20 avril 2017 4 20 /04 /avril /2017 22:44

Täpati 23 no Èperera 2017.

Taìàtä.

 

Ioane 20,19-31

Te färaa mai Ietu i ta na ra mau pipi

(Mät 28,16-20; Mär 16,14-18; Ruta èv 24,36-49)

19 E i te ahiahi o taua mahana mätamua o te hepetoma ra, ua putuputu mai ra te mau pipi, ua ôpanihia nä ôpani i te mataù i te âti-Iüta ra. Ua haere mai ra Ietu i reira ra, tià noa iho ra i röpü, ua parau mai ra ia rätou Ia ora na òutou 20 I nä reira mai o ia, e ua faaìte mai ra ia rätou i ta na rima e i ta na àoào. Òaòa aè ra te mau pipi i te ìteraa atu i to rätou Fatu ra. 21 Ua parau faahou mai ra Ietu ia rätou Ia ora na òutou Mai taù Metua hoì i tono mai ia ù nei ra, e tono atoà hoì au ia òutou na. 22 I nä reira mai ra o ia, e ua haapüaì mai ra i te aho i nià ia rätou ra, e ua parau mai ra A färii i te Värua Maitaì 23 Ta òutou i faaòre i ta rätou hara ra, ua faaòrehia ia e ta òutou hoì i vaiiho i ta rätou hara ra, ua vaiihohia ia.

To Toma ìte-roa-raa i te Fatu

24 E te hoê o te Àhuru mä piti ra, o Toma, o të parauhia ia, ia Titimo ra, aore rä ia ia rätou ra a tae mai ai Ietu ra. 25 Ua parau atu ra te mau pipi ra ia na Ua ìte aè nei mätou i te Fatu. Ua parau mai ra o ia ia rätou I òre au i ìte i te puta âuri i ta na rima ra, e aore i tuu i taù rima i taua puta âuri ra, e aore hoì taù rima i tuu i ta na àoào ra, e òre roa ia vau e faaroo. 26 E ruì varu aè ra, tei roto faahou atu ra te mau pipi i te fare, e o Toma atoà hoì, ua haere mai ra Ietu, ua ôpanihia nä ôpani, ua tià mai ra o ia i röpü, ua parau mai ra. Ia ora na òutou. 27 Ua färiu mai ra ia Toma, ua parau mai ra. A faatoro mai na to rima, e a hiò mai na hoì i taù rima nei; e a faatoro mai na hoì i to rima e fäfä i taù àoào. Eiaha e faaroo taìàtä, e faaroo rä. 28 Ua parau atu ra Toma ia na, nä ô atu ra. E taù Fatu, e taù Atua. 29 Ua parau mai ra Ietu ia na. No te mea te hiò mai nei òe ia ù, e Toma, i faaroo ai òe, E ao to te feiä aore i ìte ia ù a faaroo mai ai.

Tei ia na te Tamaiti ra, tei ia na ia taua ora ra

30 E rave rahi atu ä te täpaò a Ietu i rave i mua i te aro o ta na mau pipi ra, aore i päpaìhia i roto i teie nei puta. 31 O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa.

Manaò

E reo òaòa e te ora tei faaroohia i roto i te mau tiàhapa o te feiä parau-tià, te itoito rä tei te rima àtau o te Atua Nui Tumu Tahi. Na mahana e 8 mätamua i muri aè i te tiàfaahouraa to Ietu tiaìraa ia âmui ta na mau pipi i te vahi hoê ia tupu te òhipa a te Teitei. Ua ìritihia te mau ùputa parau-tià, e tomo te taata faaroo nä reira mä te haamaitaì i te Fatu. O te ùputa teie na te Fatu, e nä reira te feiä parau-tià i te tomo. I te mea te ôfaì i faaruèhia e te feiä i patu ra, tei riro iho nei ei ôfaì tihi. Te mahana teie i faaäuhia e òaòa tätou, e fänaò i teie nei mahana. Ia ora o tei haere mai mä te iòa o te Fatu te faaora nei ia tätou i te fare o te Fatu. O te Atua Nui Tumu Tahi tei haamäramarama mai ia tätou nei. I tià ai ia tätou i te parauraa e, O taù Atua Nui Tumu Tahi òe, e haamaitaì ä vau ia òe, o taù Atua òe, e faateitei ä vau ia òe. Mau päpü mäite ai tätou i ta te mau haapiiraa i fänaòhia e tätou ra, i te âmui-mäite-raa i te oraraa i rotopü i te huifaaroo. E roohia iho ra tätou i te mataù, i te mau täpaò i ravehia i na mahana hoê àhuru mä ono i te taime no Ietu i te färereiraa no haaputuputu i ta na mau pipi.

Te tiaìtururaa ora, Ia haamaitaìhia te Atua te Metua o to tätou Fatu ra o Ietu Metia, o tei haafänau faahou ia tätou no te rahi o to na ra aroha e te here, ia noaa te manaò ora i te tiàfaahouraa o Ietu Metia mai te pohe mai ra, ia noaa te tufaa ìno òre ra, e te viivii òre, e te maheàheà òre, o tei vaiihohia i nià i te raì no tätou. O tei tiaì-pare-hia e te mana o te Atua i te faaroo, ia noaa te ora ia ineine i te faaìte e tae noa atu i te tau hopeà. O ta tätou i hinaaro na, òre noa ai te ìte ia na o ta tätou e òaòa, i te òaòa eita e tià ia parau, e te î hoì i te maitaì, i te faarooraa, òre noa ai tätou i te hiò atu ia na i teie nei, mä te noaa hoì te hopeà o to tätou faaroo, oia te ora o to tätou mau värua.

Te färaa mai Ietu i ta na ra mau pipi, i te ahiahi o taua mahana mätamua o te hepetoma ra, ua putuputu mai ra te mau pipi, ua ôpanihia nä ôpani i te mataù i te âti-Iüta ra. Te reo mai ra o Ietu, Ia ora na òutou ua faaìte mai ra ia rätou i ta na rima e i ta na àoào. Òaòa aè ra te mau pipi i te ìteraa atu i to rätou Fatu ra. Parau faahou mai ra Ietu ia rätou Ia ora na òutou, Mai taù Metua hoì i tono mai ia ù nei ra, e tono atoà hoì au ia òutou na. Haapüaì mai ra i te aho i nià ia rätou ra, e ua parau mai ra A färii i te Värua Maitaì. Ta rätou òhipa e faaòre i te hara, e aore ra e vaiiho ua vaiihohia ia.

No Toma i òre i ìte i te òhipa i tupu, ua marumaru to na tiàturiraa i te mau faaìteraa a to na mau taeaè ia òre au i ìte i te puta âuri i ta na rima ra, e aore i tuu i taù rima i taua puta âuri ra, e aore hoì taù rima i tuu i ta na àoào ra, e òre roa ia vau e faaroo. Ua ôpanihia nä ôpani, ua tià mai ra o ia i röpü, ua parau mai ra. Ia ora na òutou. A faatoro mai na to rima, e a hiò mai na hoì i taù rima nei e a faatoro mai na hoì i to rima e fäfä i taù àoào. Eiaha e faaroo taìàtä, e faaroo rä. E taù Fatu, e taù Atua. Te hiò mai nei òe ia ù, e Toma, i faaroo ai òe, E ao to te feiä aore i ìte ia ù a faaroo mai ai. Oia hoì, Tei ia na te Tamaiti ra, tei ia na atoà taua ora ra E rave rahi atu ä te täpaò a Ietu i rave i mua i te aro o ta na mau pipi ra, aore i päpaìhia i roto i teie nei puta. O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa.

Taìàtä, o te tahi taò hinere teie no ta tätou taiòraa i teie reo o ta Ietu i parau i mua i te taata tei turori te tiàturiraa i te tiàfaahouraa. Te haafänau nei tei Tiàfaahou ta na mau pipi i roto i te ao no te Tiàfaahouraa, te ao no te tiaìtururaa ia òre ia Taìàtä te faaroo, e parau teie tei òre e mau i roto i te âau e märeva no, maite päpe i nià i te räuòre taro ia töpatahia e te ua.

Nä roto i te reo o teie mahana, teie ia to na faaäuraa te haapäpü ra te here i te Atua, te here i te taata, e te täatoàraa o te oraraa, ua hope i roto i teie parau. E ia hiò hoì tätou i te manaò e parauhia ra e Ietu, nä reira hoì te päpaìraa, aita atu mea ta Ietu e parau ra maori rä, tiàturi i te rahu a te Atua, tiàturi ia òe iho, te mea ia e päpü ai to òe mau haereà. Aita atu rä haapotoraa nehenehe roa aè maoti rä, teie ia reo to Ietu, E ao to te feiä aore i ìte ia ù a faaroo mai ai. Aita e parau, aita e faanahoraa, aita e faaheporaa, o òe e to òe Atua, tirä atu ai. E roaa ä ta te taata täpuniraa i muri mai i te ìte òre, e moè atoà o ia i muri mai i te faanahoraa, a tae atu ai i te faaheporaa, e ôtoheraa maitaì roa teie no te taata ei pärururaa ia na i te parauraa e, ta na i rave, eere na na i hinaaro. Aita atu ta te Atua tiaìraa ia òe maoti rä, ta òe haapäpüraa e, ua ìte ihoä òe i te mea maitaì, e ua ineine i te rave i te reira. I roto noa i teie parau, aita ä òe i faaìte i to òe tiàturiraa i te Atua, aita ä to òe vaha i hamama no te parau i to òe manaò, ua haapäpü ê mai na te Atua i to na tiàturiraa ia òe. Tano maitaì ai te reo o te Fatu e parau ra e E ao to te feiä aore i ìte ia ù a faaroo mai ai. E ia faatano tätou i teie parau i nià i te ôpuaraa a te Atua, teie ia to na faaäuraa O teie rä tei päpaìhia, ia faaroo òutou e, o Ietu te Metia te Tamaiti a te Atua, e ia noaa hoì to òutou ora i to na iòa i te faarooraa. O vai teie òutou. Te taata te reira ta ù e parau ra. E au te òutou no te âmuiraa taata, aore ra no te pupu taata, te nünaa. Mai te peu te parau âfaro mai ra Ietu i te taata, te tiaì atoà mai ra ia te Atua i te tahi pähonoraa âfaro, ei pähonoraa ihoä rä. Te Atua ihoä ia te Atua, e taata hoì te taata, te faariro nei rä te Atua i te taata ei täuaro no na. Te auraa, mai te peu te parau mai ra te Atua i te taata, no te haamanaò ia i te mea ta na e tiaì ra i te taata ia rave, e tano atoà te taata e parau i te Atua, no te faaìte i te mea ta na e tiaì ra i te Atua ia rave no na. Aita e mea toe tei òre i horoàhia i te taata, tei te taata ra te parau i teie nei. E tiàmäraa rahi roa teie ta te Atua e hinaaro nei i te taata ia faaòhipa. Te parau teie e tauturu ia na i te faaìteraa i te huru mau e te hinaaro hoì o te Atua i te taata, ia hanahana to na iòa moà.

 

Teraì òr. Faatura.

 

 

 

Repost 0
Published by Mapuanga terai - dans Aòraa
commenter cet article
14 avril 2017 5 14 /04 /avril /2017 00:01

Täpati 16 no Èperera 2017.

TIÀFAAHOURAA

ÔROÀ

Haere

Mätaio 28,1-10

Aita Ietu to roto i te menema

(Mär 16.1-8; Rut 24.1-11; Ioa 20.1, 11-18)

1 I muri aè i te täpati, i te âahiata i te mahana mätämua o te hepetoma, ua haere mai ra Märia i Matätara räua te tahi Märia e hiò i te menema. 2 E inaha, i rahi iho nei te âueue o te fenua, ua pou mai ra te merahi a te Fatu mai nià mai i te raì, e ua huri ê atu ra i te ôfaì, e pärahi iho ra i nià iho. 3 Mai te uira ra to na hohoà/huru, e to na àhu mai te hiona ia i te teatea; 4 rürütaina iho ra te mau tiaì i te mataù i te hiòraa atu ia na, riro atu ra mai te taata pohe ra te huru. 5 Ua parau mai ra rä te merahi i taua nau/nä vahine ra, Eiaha ôrua e mataù, ua ìte hoì au e te ìmi nei ôrua ia Ietu i faatataurohia aè nei. 6 Aore o ia i ô nei, ua tiàfaahou o ia, mai tä na i faaìte mai. A haere mai na, a hiò i te vähi i vaiihohia ai o ia. 7 A haere òiòi na ôrua a parau atu i ta na mau pipi: «E ua tiàfaahou o ia mai te pohe mai, e inaha, te haere atu ra o ia nä mua ia òutou i Tarirea, i reira òutou e ìte ai ia na.» Na reira ia, ua parau atu vau ia ôrua. 8 Faaruè òiòi mai ra räua i te menema i reira ra, mä te mataù e te òaòa rahi, horo atu ra e faaìte i taua parau âpï ra i ta na mau pipi. 9 E inaha, ua färerei mai ra Ietu ia räua, nä ô mai ra, Ia ora na Ua haafätata atu ra räua ia na, täpeà atu ra i ta na âvae, tähopu atu ra i mua ia na. 10 Ua parau mai ra Ietu ia räua, Eiaha e mataù. A haere a parau atu i to ù mau taeaè e haere i Tarirea, ei reira rätou e ìte mai ai ia ù.

Manaò

E te mau ùtuafare no Mäòhi Nui e, E haamaitaì i te Fatu, e maitaì hoì to na, e tià to na aroha i te vai-mäite-raa. Tätou i roohia e te àti ra, e tiàoro tätou i te Fatu, e ìte mai te Fatu ia tätou, i tuu ai ia tätou i te vähi au no te ora ra. Tei pïhaì iho te Fatu ia tätou ra, e òre tätou e mataù. Tei pïhaì iho te Fatu ia tätou ei tauturu mai ia tätou ra, e ìte ai tätou te hiàraa te feiä i riri mai ia tätou ra. E maitaì i te tiàturi i te Fatu, i te tiàturi i te i te mau faanahoraa tei faatea i te Fatu. E maitaì te tiàturi i te Fatu, i te tiàturi i te haavare. To tätou ètaèta e tätou mau himene no te Fatu ia, ua riro mai hoì ei ora no tätou. Te reo òaòa e te ora tei roto i te mau tiàhapa o te feiä parau-tià ra e räveà itoito tei te rima o te Fatu, E òre tätou e paruparu, e ora mau ä tätou, e parau faahou ä tätou i te òhipa a te Fatu. Ua aò hua mai ra te Fatu ia tätou, aita rä o ia i faaruè ia tätou ua faatiàfaahou ra. Ua ìriti ia tätou i te mau ùputa parau-tià ra, e tomo tätou nä reira mä te haamaitaì i te Fatu ra. E haamaitaì tätou i te Fatu, ia faaroo mai ia tätou, e ua riro ei ora no tätou. No te mea te ôfaì i faaruèhia e te feiä i patu ra, tei riro iho nei ei ôfaì tihi. Te mahana teie i faaäuhia e te Fatu e òaòa tätou, e fänaò i teie nei mahana i te mea e Atua te Atua Nui Tumu Tahi i ora ai tätou nei, o tei haamäramarama mai ia tätou nei.

Ia ìte tätou e òre te Atua e haapaò i te huru o te taata. O tei mataù rä ia na, e o tei rave i te parau-tià i te mau fenua atoà ra, o të ìtehia mai ia e ana. Ua ìte hoì tätou i te parau ta na i häpono mai i ta na mau tamarii ra, i te parau-haere-raa i te Parau Maitaì i te hau ra ia Ietu Metia tei tiàfaahou. Oia hoì ta te Atua i faatià aè nei i nià i te ruì toru ra, e ua faaìte ia na i te vähi ätea ra, eiaha rä i te taata atoà ra, i te feiä rä i haapaòhia e te Atua Nui Tumu Tahi ei ìte ra, oia hoì tätou nei, o tei àmu atoà e tei inu hoì e o ia atoà, i muri aè i ta na tiàraa mai te pohe mai ra. Eere ra to tätou i te faaahaaha i te mea maitaì. Aita tätou hoì i ìte e, e höpue te puèà atoà i te faahöpue iti haìhaì ra, o te mea te Metia hoì ta tätou Päta, e teie nei, e haapaò tätou i taua ôroà ra, eiaha mä te faahöpue tahito ra, eiaha atoà mä te faahöpue täiroiro e te ìno, mä te mäa faahöpue-òre-hia rä, o te haavare òre e te parau mau.

Aita o Ietu to roto i te menema i te mahana mätämua o te hepetoma e inaha, i rahi iho nei te âueue o te fenua, ua pou maite merahi a te Fatu mai nià mai i te raì, e ua huri ê atu ra i te ôfaì, e pärahi iho ra i nià iho. Mai te uira ra to na hohoà, e to na àhu mai te hiona ia i te teatea, ua rürütaina te mau tiaì i te mataù i te hiòraa atu ia na, riro atu ra mai te taata pohe ra te huru. Ua parau mai ra rä te merahi i taua nau vahine ra, Eiaha ôrua e mataù, ua ìte hoì au e te ìmi nei ôrua ia Ietu i faatataurohia aè nei, ua tiàfaahou o ia mai tä na i faaìte mai. A haere mai na, a hiò i te vähi i vaiihohia ai o ia. A haere òiòi na ôrua a parau atu i ta na mau pipi, E ua tiàfaahou o ia mai te pohe mai, e inaha, te haere atu ra o ia nä mua ia òutou i Tarirea, i reira òutou e ìte ai ia na. Faaruè òiòi mai ra räua i te menema i reira ra, mä te mataù e te òaòa rahi, horo atu ra e faaìte i taua parau âpï ra i ta na mau pipi. Färerei mai ra Ietu ia räua, nä ô mai ra, Ia ora na Ua haafätata atu ra räua ia na, täpeà atu ra i ta na âvae, tähopu atu ra i mua ia na. Parau mai ra Ietu ia räua, Eiaha e mataù. A haere a parau atu i to ù mau taeaè e haere i Tarirea, ei reira rätou e ìte mai ai ia ù.

Te parau nei te merahi i te pü o te fenua, A haere òiòi na ôrua a parau atu i ta na mau pipi, no te mea aita rätou i faaroo te âueue o te fenua ua òaòa te fenua i te haafänauraa i te ora mure òre, e te tuuraa te fenua i te märamarama o te parau tià.

A haere, e parau teie no èà, te Fatu e te òhipa ta te Atua e ani nei i te taata. Te mea e ìtehia i roto i teie parau, te rahi ia e te teiaha fäito òre o te òhipa e tuuhia mai nei i mua i te taata. Te vähi faufaa rä ta tätou e täpeà mai, te riroraa ia teie parau ei räveà haaferuriraa ia tätou i nià i ta tätou iho huru hiòraa i te parau a te Atua. Ua färerei pinepine noa mai na tätou i te fifi mai teie i mua i te mau parau a Ietu. Mea pinepine roa Ietu i te faahiti i te tahi mau parau, âreà te auraa, tei te tahi ia vähi ê atu.

Te manaò hau atu i roto i te èà, te mea ia e, eere teie i te tahi parau tupu âpï, e ia faaâfarohia, ia òre te fifi ta na e faatupu mai i te haere noa atu i te rahi. Te auraa, eere te âfaro noa terä e tïtauhia ra, te fifi atoà rä e riro i te nä muri mai terä e hinaarohia ra i te ärai. Te märamarama ra ia tätou e, te vai ra te tahi òhipa e hinaarohia ra i te taata ia òre o ia ia faatautau i te rave. No reira, ia vai noa to tätou märamaramaraa i te parau i nià i te haere, e riro ihoä ia te taata i te parau e, ei te tahi atu taime feruri atu ai. To na rä òiòi, aore ra to na taere, ua riro atoà ia ei faaòiòiraa, aore ra ei faataupupüraa i te tupuraa o te ôpuaraa a te Atua. No te taata tei òre i tiàturi i te Atua, aita to te reira parau e fifi, e eere te reira i te òhipa na na no te taata rä tei färii i te ôpuaraa a te Atua, e riro o ia i te hiò mai te mea ra, ua hara o ia i te Atua, no te mea ua ìte e aita i rave, aita i faatupu. Mea tano atoà paha ia haapäpühia i ô nei, mai te peu te hiò nei tätou i te òhipa ta te Atua i faataa na te taata, eere rä no te mea noa e taata o ia, i riro ai teie ei täpura òhipa na na. E parau teie no te feiä tei ìte i teie parau, e no te mea ua ìte rätou, e òre ai e tià ia rätou ia ora noa mai te mea ra aita e òhipa i tupu. Te päpü atoà ra ia tätou e, i mua i te Atua, eita e tià i te taata ia haavare faaroo òre, no te mea, te ôtohe, e haapäpüraa atoà te reira e, ua ìte te taata i te tahi parau, aita rä i färii, aita i hinaaro ia haapeàpeàhia to na hau, te mea ia o ia i ìmi ai i te räveà faataa ê mai ia na, ia òre taua parau ra ia haapeàpeà maoro noa atu ä ia na.

Mai te peu rä e haafifi te faa e te mouà i te mata i te ìteraa i te ätea, e au atoà ia te reira parau no te räau. Ia tae i te reira fäito, e tano maitaì ia te maa parau iti e faahitihia ra i te matahurahura o teie nei ao te vai ano noa ra te fenua, aore e faufaa. Te mea noa e toe ra e hoì faahou ai te fenua i to na huru hou te Parau, te pöuri ia. Aita rä te Atua e hinaaro nei e täpiri i te ùputa o teie nei ao, ta na noa mea e hinaaro nei, te âmui-atoà-raa mai ia i te taata i roto i teie täpura òhipa rahi, oia te ìritiraa i te ùputa ia òhie te haereà mai o te Fatu. I ìriti mai na te Atua i te ùputa o te märamarama e te ora, aita rä te taata i ìte e aita i färii i taua ora ta te fenua i faaìte noa na e inaa nei. I teie nei rä, i mua i te ùputa no te haereà mai o te Tamaiti, oia te märamarama o teie nei ao, te hinaaro nei te Atua e, ei tuhaa atoà aè ta te taata, ia òre o ia ia pärahi noa, tiaì noa ai i te ora, ia faaòhie atoà rä o ia i te òhipa a te Atua nä roto i te faaineineraa i te haereà mai o te Tamaiti, ia riro mau rä o ia ei tävini i te faariroraa i te hinaaro o te Atua ei täpura òhipa na na, ia ìte te taata atoà i te ôpuaraa faaora a te Atua.

 

Teraì òr. Faatura.

 

Repost 0
Published by Mapuanga terai - dans Aòraa
commenter cet article
11 avril 2017 2 11 /04 /avril /2017 20:54

 

 

 

 

 
  

 

 

 

Papeete, i te 07 no mäti 2017

 

 

 

 

Te Peretiteni,

 

 

VEÀ ÒROMETUA

 

 



I te mau taeaè e tuahine òrometua,

 

 


E hoa ino mä e, ia ora na roa i te aroha o te Atua.


Terä mai ta tätou Veà òrometua no teie mau ôroà e fatata mai nei. Te hinaaro nei au i te haamauruuru maitaì i te feiä atoà i faataa mai i to rätou taime no te faaineine mai i teie mau parau ei tautururaa ia tätou i roto i te reira mau ôroà.

 

Na tätou te reira e faanavaì maitaì atu i roto i ta tätou mau feruriraa ia riro mau ei tautururaa na tätou i to te Etärëtia i mua i te tïtauraa a te Atua.

 

Ia haamaitaì te Atua ia òutou atoà na e i to òutou mau ùtuafare, te mau âpooraa tiàtono e te mau päroita ta òutou e tävini na.

 

A färii mai te tätpaò no te aroha e te faatura ia òutou.

 

 

 

 

Taaroanui, Taarii a MARAEA òrometua

Repost 0
Published by Mapuanga terai - dans Aòraa
commenter cet article
11 avril 2017 2 11 /04 /avril /2017 20:52

Täpati 9 no Eperera 2017
Täpati no te mau amaà


Taiòraa : Mataio 21/1-11



Tatararaa manaò



E hoa here mä e, Iaorana i to tätou färereiraa i teie nei Täpati o tei parau hia ‘Te Täpati No te mau

Âmaa’ (Dimanche des Rameaux) e aore ia, ‘To Ietu Tomo Hanahanaraa i Ierutarema’ (L’Entrée Triomphale de Jésus à Jérusalem). Teie tätou e faahanahana faahou nei i teie nei Oroà Tumu i teie nei matahiti 2017 o te riro hoì ei hoê o te mau Oroà faufaa roa i roto i te oraraa o te mau Marù-metia no teie nei ao e ei hoê o te mau Oroà Tumu e hoì tamau noa mai nei i te mau matahiti atoà mai te

Oroà Pâta, te Oroà Fanauraa o te Metia etv… Mai te huru râ e, e hohoà no te hoê huira pereoo taataahi tei tuu hia te parahiraa i raro e te huira i nià e tei faaohu noa hia teie nei huira e aita e faaea ra i te ohu, e na ô ai tätou i te parau e, a hea râ teie huira pereoo taataahi e faaea ai i te ohu oia hoì, a hea râ tätou e faaea ai i te faahanahana i teie nei Ôroà e te mau Ôroà teretetiano atoà ? E na ô paha ia tätou i te pahono e, ia hoì roa mai to tätou Fatu i te Mahana Haavaraa, i reira teie nei huira e faaea ai i te ohu oia hoi, i reira’toa teie mau Oroà e faaea ai i te faahanahana hia. No teie nei râ taime, e hiò tätou eaha te tahi haapiiraa e roàa mai ia tätou i roto i teie nei faahanahanaraa na tätou

i teie nei Ôroà no te mau Âmaa i teie nei Täpati.


1.Te vähi


Ia hiò tätou i te vähi i tupu ai teie nei parau, te haapapu ra te ìrava 1, ‘E fatata maira Ierutarema ia rätou, ia tae rätou i Betephage, i te mou’a ra o Oliveta…’ Te auraa, tei te oire no Betania, i te ‘Mou’a ra Oriveta,’ (Le Mont des Oliviers) te vairaa no te tuhaa iti o tei parau hia o ‘Betephage’ i reira te tupuraa ta tätou parau no teie nei poìpoì.

Ua horoà te tahi mau Taote Tuatapapa Tuatua i te auraa no teie nei ioà ‘Betephage’ na roto i te reo Hepera oia hoì, ‘E vähi e òre te tumu Tute e hotu’(Un lieu où les figues ne produisent point de fruits). Eita e òre, e tuati rii to teie nei vähi e te parau no te tumu Tute hotu òre o ta Ietu i faatià i te tahi taime i roto i te hoê no ta’na mau haapiiraa e o ta’na i faauê i ta’na mau Pipi ia tapù hia te tumu Tute e vai ra i mua ia’na ia òre roa’tu oia e horoà i te hotu. Teie ra i te tahi aè pae, te vai ra ia teie vähi e hotu rahi ai teie mäà Ôrive i parau hia ai taua mou’a ra ‘Te mouà no te mau Olive.’ Te auraa, ua maiti Ietu i teie nei vähi o Betephage, e vahi haere pinepine òre hia e te taata oia hoì, e vähi e òre ai e haaâpiapi hia te tonoraa i na puê Pipi toopiti no te haere e tii i te asini i nià i terâ manaò e, ia òre te ôpuaraa Faaora a te Atua ia faataupupu hia. Eere ia hoê huru ahiri na puê Pipi i tono hia i te hoê vähi e mea rahi te taata. Aita hoì to teie nei vähi o Betephage e parau rahi i roto i te tapura fenua no Paretetina. Aita atoà hoì e taata e haere tamau nei na teie nei vähi. Na roto râ ia Ietu oia hoì to’na tonoraa i na Pipi e piti, i parau hia ai to Betephage. E atutu ai e e parare atoà ai to’na parau no te mea, tei teie nei vähi to Ietu faanahoraa i to’na tere matamua e tere hopeà atoà i Ierutarema i nià i te

tua o te asini !


2. Te tonoraa i na puê Pipi e te tere i Ierutarema


Aita e mau parau haapapuraa no nià i na Pipi toopiti o ta Ietu i faauê no te haere e tii i te asini. Te mea papu, eere raua no roto mai i na Pipi 12 o ta Ietu i titau e i faaineine i roto i to’na mau tere. E nau taata Tarirea râ no roto mai i te pupu taata tei pee noa ia Ietu mai to’na tere mai Tarirea mai, haere mai ai rätou i Ierito, tere tia’tu ai i Betania i te tuhaa no Betephage. Tei roto i teie feia tei tamau i te pee ia’na, to Ietu maitiraa i na tino e piti. ‘E haere ôrua i terâ oire iti, e ìte ôrua i te hoê asini, ua fetii hia e te fanauà, E tatara ôrua e e puto mai !’ O te reo teie o Ietu i nià i na Pipi toopiti. E reo faauê ia raua no te tahi òhipa o ta te Fatu e hinaaro ra ia raua ia rave. O raua ta te Fatu i maiti no te faatupu i terâ faaueraa i ta’na. Ua tano hia raua i te mata o te Fatu o tei parau ia raua ia rave i te tahi òhipa no’na. Te auraa, èere te tano nei no na Pipi toopiti i roto i te maitiraa a te Fatu oia hoì, to raua riro atoà ra ei nau tino tei tauturu i te tupuraa no te Ôpuaraa Faaora a te Atua no teie nei ao na roto i teie nei tere no Ietu. Aita na Pipi toopiti i haamarirau. Aita to raua e manaoò aè i mua i te reo faauê o te Fatu maori ra, ua tià e ua haere. I to’na pae, ua haapapu Ietu ia raua i terâ mea e tiai maira ia raua. ‘E haere ôrua e ti’i i te asini e ua fetii hia i to’na fanauà, e tatara ôrua e e puto mai !’ Eita e òre raua i te manaò e, e tauhaa ta te Fatu e faauê ia raua e tii no te afaì mai ia’na ra. Èere roa’tu ia ! E ti’i râ raua i te hoê animara oia hoì te asini e to’na fanauà ei faurào no na no to’na tere i Ierutarema. O Mätaio Êvaneria anaè tei faahiti i te parau no te asini e to’na fanauà. Aita o Märeto Êväneria (Pene 11/1) e o Ruta (Pene 19/29). Ua faahiti noa na Èvëneria e piti nei i te parau no te asini. I mua i terâ faaueraa, ua tauturu atoà te Fatu ia raua i mua i te mau mea e fâ mai i mua ia raua ia au i te ìrava 3 : ‘Ia parau noa mai te hoê taata ia ôrua, e parau ôrua e, te hinaaro maira te Fatu !’
 


Ia hi’o hia, ua tupu mau ä te mau mea atoà ta Ietu i parau e mai te mea ra e, e tere faaineine âtea hia teie o ta te mau Perofeta no te Faaauraa Matamua i tohu e ua tupu mau ä taua mau parau ra. I ô nei, aita te parau no na Pipi toopiti e te parau no te Fatu o te asini i faaroo faahou hia. Eita e òre e, na terâ parau no te tiàraa Fatu o ta Ietu i parau, ‘Te hinaaro maira te Fatu’ i faahaehaa ia rätou. E mai te mea ra, ua mamù paatoà rätou i mua i terâ parau e i mua i teie nei ôpuaraa a Ietu no to’na tere i Ierutarema. Ia hiò hia, te âpiti atoà ra rätou na roto i te manaò faatura no te faaìte i te Fatu e, tei muri atoà rätou ia’na i roto i to’na tere. Na te ìrava 7 i te vähi ropu i haapapu mai ia tätou i taua manaò ra : ‘Ua tuu ihora i to raua ahu i nià i te asini.’ I te taime i tere ai o Ietu, te na ô atoà ra te ìrava 8 ‘E feia rahi tei horahora i to rätou ahu i te e’a tià…e ua vauvau te tahi pae i te mau âmaa raau.’Te auraa, èere noa o na Pipi toopiti, èere atoà o te Fatu o te asini anaè tei faaìte i te manaò faatura, o te nahoa rahi taata atoà râ oia hoì o te nünaa taatoà tei faaìte i to rätou manaò e âpiti ia Ietu i roto i to’na tere i Ierutarema.



3. Te manaò feàa o te hoê pae


Mai te peu e i roto i to’na tere ua faahotana te pae rahi o te nünaa ia Ietu ia au i te ìrava 9 : ‘Hosana te Tamaiti a Tavita, ia ora oia tei haere mai mä te ioà o te Fatu,’ area râ te hoê pae, tei roto ia i te faauiuiraa e te maere rahi atoà hoì ia au i te ìrava 10 : ‘O vai hoì teie ?’ Oia hoì, ‘Eaha teie mau òhipa e tupu nei ?’ Eere hoì rätou i te mea pinepine i te faaroo i te nünaa ia tuo mai ta rätou e na reira ra. Eeere atoà hoi terâ huru maniania i te mea pinepine i te faaroo hia maori ra, ia tae anaè i te taime no te faahanahanaraa i te mau Oroà rarahi mai te Oroà Pata. Te mea papu, ua huehue roa te aau o te taata na roto i te tere o Ietu i Ierutarema. No terâ feia tei ui maere, eere a tahi ra huru faauiuiraa a faaroo hia ai. I roto i te Evaneria a Ruta 4/22 oia hoì i te taime i ho’i ai Ietu i Natareta, te oire i paari ai oia e to’na haereraa i roto i te Tunato i reira to’na paraparauraa, te na ô ra te taata i te faauiui : ‘O vai hoì teie taata ? Eere änei hoì teie te tamaiti a Iotefa ?’ O to’na iho mau taata oia hoì, te feia fatata roa ia’na, to’na iho mau fetii teie e uiui maere nei. Te auraa, aita ihoa te hoê pae o te nünaa i farii ia Ietu noa’tu ia e, ua faarooroo noa na rätou i te mau òhipa maitatai o ta Ietu i rave, aita ihoa ra to rätou aau i tae i te fariiraa ia’na ei Tamaiti na te Atua e tae noa’tu i to’na tere i Ierutarema e i to’na pohe i nià i te tatauro. Eeere na Ietu i pahono i terâ mau faauiuiraa a te hoê pae o te nünaa, na te feia râ tei farii ia Ietu ei Metia ia au i te ìrava 11 : ‘O Ietu teie, te Perofeta no Natareta i Tarirea !’

 

 


4. Poro’iraa no tätou


I mua i teie nei mau manaò tei horoà hia’tu e i mua i ta tätou faahanahanaraa i teie Tapati i teie parau no to Ietu tomoraa ua hau i te 2000 matahiti i teie nei i roto i te ôire no Ierutarema, te pû no te haamoriraa a te nunaa Ati-Iuta, eaha te tahi mau parau e nehenehe e tapeà hia mai no tätou i roto i ta tätou täviniraa i to tätou Atua i teie tau hopeà nei ?


- A tahi, te parau no te TOMORAA : Te vaiihoraa tätou ia Ietu ia tomo mai oia i roto i to tätou oraraa utuafare e ia tomo pinepine mai oia no te ûeûe i te parau no te Aroha, te parau no te Here, no te Natiraa e te Firiraa i te mau mero o te ùtuafare i nià i taua parau ra no te Aroha. Te ìte noa ra tätou i te mau fifi rahi e tupu noa nei i roto i te oraraa o te mau ùtuafare Mäòhi no te mea ia e, aita e Aroha, aita e Faatura, aita e Auraro faahou.


-A piti, te parau no te FARIIRAA : I te taime i tomo ai Ietu i Ierutarema, e rave rahi atoà tei òre i farii i to tätou Fatu ia tomo oia i roto i te vähi Haamoriraa oia hoì te Hiero. No teie nei parau, te faahaamanaò maira te Apotetoro ra o Pauro e, ‘E Hiero to tätou tino no te Atua !’ Te auraa, te faaitoito maira ra teie nei parau ia tätou e, ia vaiiho tätou i te hoê tuhaa no to tätou oraraa no te Farii ia Ietu no te aratai ia tätou i te vähi e maitai ai tätou.


-A toru, te parau no te FAIRAA FAAROO : E faîraa nehenehe roa ta te hoê pae rahi o te nünaa ia Ietu na roto i terâ parauraa, ‘O Ietu teie, te Perofeta no Natareta.’ Ia na reira atoà tätou i te parau i teie nei Tapati faahanahanaraa i to Ietu tomoraa mai i roto i to tätou mau ùtuafare maori ra, ‘O Ietu teie, te Perofeta no Maohinui nei !’


IA MAITAI PAATOA TATOU I TEIE NEI TAPATI !

 


Gaston, Marama a TAUIRA òrometua

Repost 0
Published by Mapuanga terai - dans Aòraa
commenter cet article
11 avril 2017 2 11 /04 /avril /2017 20:50

Mönire 10 no Èperëra 2017

 

Taiòraa : Taramo 18/1-6

 

E te nünaa herehia e te Atua, a färii mai te täpaò no te Aroha e te Here o te Tumu o te ora, i to tätou nei färereiraa i teie pö matamua no te hepetoma haamanaòraa i te mau àti, te mau mauiui o te Fatu. Ia haamaitaìhia ra te Atua te Tumu o to tätou ora, ia haamaitaìhia te Metua o tei ìriti i te uputa o te parau ia märamarama te nünaa e ia färii o ia i te tomo i roto i taua märamarama. Ia haamaitaìhia te Tamaiti te faaora o tei faaìte mai i te ea hoìraa i te Metua. Ia haamaitaìhia te Värua Maitaì, to tätou tamahanahana e to tätou atoà àho o ta te Atua i tuu mai i roto ia tätou, i riro ai tätou ei mau tamarii na te Tumu.

Teie pö na teie Taramo e arataì i ta tätou parau, hoê ä atoà parau tona e tera e vai ra i roto i te Tämuera 2 i te pene 22. E himene haamaitaìraa teie na Tavita i te Atua, to na haamäuruururaa i te Atua i te ìteraa mai ia na i roto i to na àti. Òia hoì, to na ìteraa, i to te Atua faaoraraa ia na mai roto atu i te rima o to na mau enemi e hau roa atu i te rima o Taura.

E toru tuhaa e vai ra i roto i ta tätou taiòraa :

 

A Tahi, te hinaaro rahi to te taata ani i te Atua. I roto i teie himene ta Tavita te haapäpü maitaì nei o ia, to na hinaaro. Ua ìte Tavita i te maitaì i roto i te Atua, ua ìte o ia i te püaì o teie Atua. Haamanaò na tätou i te parau a te Fatu i nià i te tahi päpaì parau o tei haere mai i uiui ‘Tei hea na te parau rahi o te ture ra ?’ Teie ta na i pahono atu ‘E hinaaro òe i to Atua ma to aau atoà, ma to värua atoà, ma to manaò atoà e ma to püaì atoà.’ Te auraa, ua ìte Tavita o te täatoàraa o to na tino e to na aau tei täàmuhia i nià te Atua.

 

Te piti, te papa, te pare, te ora. E vähi paututuu, e vähi paari e niu no te mau mea atoà. No o te mau mea atoà i te haamataraa, oia hoì te ora. Ia hiò anaè tätou te papa, te pare e te fare teitei, e mau vähi tera e haamanaò mai nei ia tätou i te taime a taponi ai o Tavita. E haamoè nei o ia ia na i roto i te mau ana o te mau moua no Iuta. Ia òre o ia e noaa hia i te haru na to na mau enemi. E tano änei e parau, ua riro teie mau vähi ei haapäpüraa, na Tavita i to na tiàturiraa i te Atua, e te Here o te Atua ia na.

 

Noa atu te rahi o te tamataraa, te fifi aore ra te märamarama-òre-raa te parau a te tahi i nià atu i te tahi o tei riro ei fifi päpü e o ta te aau atoà i faatupu, e òre roa ra te Atua e hape na. Area ra tätou i te mau taime atoà ia.

 

Te Atua, te fare teitei. Hoê teie o te mau hiòraa o ta Tavita e faaìte maira. Ia ìte atoà tätou, no o mai te Atua to tätou tauturu o tei rahu i te raì e te fenua. E hiò tutonu tätou i nià i te raì. Ia päpü atoà ra ia tätou, i te hiò atoà i raro, te parau ta te Metua vahine oia hoì te fenua e haapii maira ia tätou.

 

Te toru o te tuhaa, ia hiò-anaè-hia hoê ä manaò e arataì ra, oia hoì :

-Te irava 3, ‘E tiaoro vau i te Atua…’

*Te irava 4, ‘Ua haaatihia vau e te mauiui o te pohe…’

*Te irava 5, ‘Ua haaatihia vau i te taura ra o hate…’

-Te irava 6, ‘Ua tiaoro vau i te Atua…’

 

Ua ìte mai nei o Tavita te mauiui pohe e teie atoà te taura o hate, o te pohe ia. Teie noa te pohe i mua i to na aro, te ìno o te taata. Mai te upea ra ia taora-anaè-hia i nià ia òe, e òre e matara vave aore ra e òre roa atu e matara. Imi noa ai òe i te räveà ia matara teie upea, ua mau roa te avae i roto. Te faaìte noa maira teie hohoà i te ìno e te teimaha o te ìno ta te taata e faatupu no te nounou. Ua vï te aau o Taura i te ìno, no te mea ua ìte o ia, ua mäìti te Atua i te hoê tävini âpï no te arataì i te nünaa.

 

Aita änei tera huru hiòraa, e haaferuri ia tätou i teie pö. I mua i teie rahiraa àti ta te vai puè i faatupu na, aita änei tätou e uiui ra, no te aha mai tera ai ? No te aha te mau òire rahi tei tämähia na te vai ? Te mea päpü, teie ta Tavita no te pohehae o Taura i fifihia ai o ia. To te Fatu, no te mea e Tamaiti o ia na te Atua ora. Area ra ta tätou, tei roto noa i te uiuiraa.

 

Te mea päpü, te tumu o Tavita i tiaoro ai i te Atua, no te mea ua ìte o ia na roto i tera reo haamaitaì to na i te Atua, e faaora te Atua ia na rau noa atu te huru o te fifi, e matara te reira i te Atua. Te auraa, te haapäpü ra o Tavita i to na tiàturiraa i roto i teie Atua. Ua faaroo te Atua i te aniraa a Tavita.

 

Teie pö, i mua i te huru ìno o te arii Taura, ua tae atoà tera huru i nià i te nünaa Mäòhi. Ua âuahaatihia te Mäòhi i te taparahiraa taata, te eiä, te hooraa aore ra te pupuhiraa i te mau avaava taèro atoà na te ara mai. E faaitoito tätou, ia matara te aau o to tätou nünaa i nià i to na huru oia hoì, e here o ia, e aroha o ia e faatura o ia, e ea òhie no te hoì i te Tumu.

 

 

Herenui, Rangihä v a TETARONIA òrometua

Repost 0
Published by Mapuanga terai - dans Aòraa
commenter cet article
11 avril 2017 2 11 /04 /avril /2017 20:49

Mahana Piti 11 no Eperera2017

 

Taramo 67

« E pure ia tupu te parau a te Atua.»

 

I haamaitaì na te nünaa i te Atua na roto i te färii hanahanaraa i te Tamaiti i te täpati o te mau âmaa ra. Aita ia e haamaitaìraa mai teie te huru i ravehia aè nei i nià i te tahi taata haìhaì roa e te haehaa. Ua ârue te nünaa i te Atua o te raì na roto i te reo pii, « Hotana te Tamaiti a Tavita, ia ora o ia o tei haere mai mä te iòa o te Fatu. Hotana i te raì teitei ra. » (Mataio 21 : 9)

E te reira òhipa i tupu eere i ta te taata, eere i ta te nünaa, eere i te hinaaro o te mau pipi, eere atoà i te hinaaro o te Fatu, ia tupu ra te parau a te Atua, oia hoi, te ôpuaraa faaora a te Atua no te mau taata atoà. Mai ta te Tamaiti i parau i nä pipi, ia na i faaue ia räua e tii i te na na âteni i te òire, mä te poroì atoà atu ia räua, ia parau noa mai te taata ia ôrua, e parau noa atu ia e, « Te hinaaro maira te Fatu, …Ia tupu te parau a te perofeta ra… » (Mataio 213-4 vm)

Te na ô ra te upoo parau o teie Taramo, « E pure ia tupu te parau a te Atua. » Te manaò tumu ia o teie taata Taramo, ia tupu te parau a te Atua. Haamanaò tätou, e pure teie, e te taata e pure i te Atua no te mea ia, a tahi, te vai ra ta te taata haamaitaìraa, haamauruururaa i te Atua i te ora. E te piti, no te mea, te vai ra te tahi ère, te tahi mea e toe ra, e àore ia, te tahi òhipa tei hinaarohia ia tupu i roto i te oraraa. Mai te huru ra e, tei roto teie taata i te tiaìraa i te tupuraa o te parau i te mau vähi atoà te reira te taata i te pärahiraa,.

E aita atu to na hinaaro ia haamaitaì atoà te mau taata atoà, tei pihaiiho ia na, tei te ätea ê, te mau nünaa atoà tei òre to na mata e ìte ra, ia haamaitaì anaè ia i te Atua te tumu ôtahi roa o te ora no te mea no te Atua te fenua e to na î e te mau nünaa atoà o te ao nei. E au atura paì e, te mea ta na e ìte ra io na iho, te mea atoà ia ta na e ìte ra i te ätea ê. Ia maitaì te tupuraa o te parau io na, mai te reira atoà ia i te tahi atu mau fenua. Ia òre ra te parau e tupu faahou ra io na, mai te reia atoà ia i te tahi atu mau vähi.

Te auraa, e tiàororaa teie, o ia tei ora mai i ta te Atua mau faaoraraa e ta na mau haamaitaìraa i roto i to na oraraa, ia na reira noa te mau nünaa atoà o te ao nei, i te haamaitaì i te Atua. No te mea, aita te Atua i faaea i te faatupu i ta na parau, te taata ra tera e òre ra e faatupu i ta na.. Aita ta te Atua faaoraraa i tera nünaa i taa ê atu i te mau faaoraraa a te Atua i to tätou nünaa. No reira, ia haamaitaì e ia himene te mau nünaa atoà o te ao nei i te iòa o te Atua Tumu Tahi, tei faatupu i ta na parau na roto i ta na ôpuaraa faaora no to te ao.

I teie mahana, mea ravaì tätou i te pure, mea ravaì tätou i te haamaitaìraa i te Atua, aita ia e mahana tuuä no te mau òhipa maere ta na e faatupu nei i roto i to tätou oraraa. Te mea ra e ìtehia ra, te rahi noa atoà atura ta te taata haafifiraa, te faaìnoraa i te maitaì e te hinaaro o te Atua. I mua i te mau òhipa ta tätou e ora nei, te mau fifi e te mau hamani ìno, te mata ê raa tätou ia tätou iho e te mäòhi, e te mau nünaa ê atoà e tià mai ra i mua ia tätou. I te tahi taime, ua naeà atoà hia tätou i tera feruriraa papaa, te faaau òre raa i tera taata no räpae mai tei tau-aro mai, no te mea, eere hoê ä peu, eere hoê ä hïroà. No te tïpee ra i te peu e te hïroà o vetahi ê, aita ia e nünaa mai teie to tätou i te hema i roto i ta vërä mä àpu, mai te reo papaa i nià i ta tätou mau tamarii, te huru, e te feruriraa papaa i roto i te faanahoraa e ta tätou mau faaìteraa, te mau mea atoà tei haapeu ia tätou.

Te peu i tanuhia i roto i teie nünaa riro atu ai ei peu tumu mäòhi, o te färiiraa ia i te taata eere ra i te tïpeeraa. Te aroharaa atu eere ra te mata ê raa i te tahi, te reira te tupuraa no te parau a te Atua. Haamanaò i te parau ta Tetunae i haapii i te mau tamarii o teie fenua o tei na ô mai e, « Eiaha òutou e hiò mata noa i te taata e haere nä to òutou pae fare, mai te pii òre atu e : täpae mai i te fare nei, e tämäa. » (ir 45) «Eiaha e mata-ê i te rätere tei haere nä mua i to ùputa. E tïtau ia na e tomo mai io òe, ia tüpaìhia ta òe puaa, ia îhia ta òe âuà i te mäa ta òe e püpü. » (ir 62)

I tupu na teie mau parau, i vai na teie parau maitaì i roto i te mau nünaa atoà no te mea te parahi ra te taata i roto i te uru maitaì. No te uru maitaì i tupu ai te manaò maitaì, te feruriraa maitaì, te tino pautuutu maitaì e te tahi Värua Maitaì. Ia tae ra i te tahi tau, aita teie mau parau maitaì i tupu faahou ia au te hinaaro o te Atua. Te hinaaro ia o te Taramo, ia tupu noa ä te parau a te Atua. Ia riro te taata ei tupuraa no te parau a te Atua, ia aahia e ia hotu. Tei haaparahi i te Atua i roto ia na, e färii ôhie noa o ia i te taata herehia e a na, e te taata no räpae mai ; te taata au roa hia e a na e te taata riri roa hia e a na.

I roto i te tau i haerehia mai e to tätou mau tupuna mäòhi, i vai na te parau, i tupu na te parau i roto ia na. Ua tae ra i te tahi tau, aita i tupu faahou. I riro ai Vaitä ei vaha parau no te Atua i roto i te nünaa mäòhi. No te mea ua ìte te Atua, aita ta na parau e tupu faahou ra i roto i te mäòhi. Aita te hinaaro tumu o te Atua e haapaò-faahou-hia ra. Aita ra te Atua i tiaì ia tae roa mai te mau veà tonohia mai no te faaìte i te Evaneria, no te faaìte aita te parau a te Atua e tupu ra i roto i te taata. Ua nämua o ia i te mäìti mai i te tahi mäòhi no te faaìte i te mäòhi i to na hahi. I parau ai o ia, « Te ìte nei au, tei mua ia ù nei te auraa o teie nei peu maere rahi. Tenä mai te fanauà ùnaùna a te Tumu, e haere a hiò i teie uru räau, i Taputapuätea nei. E tino ê to rätou, e tino ê to tätou, hoê anaè rä huru, no te Tumu mai. E riro teie nei fenua ia rätou, e mou teie haapaòraa tahito nei, e e tae mai te mau manu moà o te moana i te fenua, e haere mai e taìhaa i ta teie räau i motu, e haapii nei. »

Eiaha tätou e huna aita te parau a te Atua i tupu maitaì noa i roto i te mäòhi. Te tumu ia i faaìtehia ai ia Vaitä i te auraa o teie räau tei mutu àuru noa i Taputapuätea. Hoê ä to Vaitä manaò e ta te taata Taramo. I tupu na te parau, ua tae ra i te tahi tau, aita te parau tià e te parau mau a te Atua e tupu faahou ra i roto i te nünaa. Oaòa ra tätou eita te Atua e tuu faahou mai i te tïruvi i mua i te täiva o te taata, no te faaâpï i ta na i rahu na.

I tohu ai o ia « E mou teie haapaòraa tahito ». Te auraa, te mea i orahia mai e te mau tupuna eita te reira e tupu faahou. Ua mou i te haapaò-òre e te täiva o te mäòhi i te parau a to na Atua. Ua mou no te mea aita faahou te Atua i roto i ta tätou haapaòraa. Ua viivii roa te faanahoraa, e te iòa o te Atua i roto i te haapaòraa a te mäòhi. Ua hahi atoà te mäòhi i roto i to na oraraa faaroo na roto i te faa-atua-raa i te arii e te raveraa i ta na e hinaaro ; te hamani ìno raa i to na taata tupu ; te parau anei no te haapoheraa te taata ei tütia…evt. Eere faahou te reira i te tupuraa no te parau a te Atua.

No reira, ia tupu te parau no te tatarahapa e ia ora te mäòhi i to na faaroo ua parau mai te Atua na roto i to na tävini ia Vaitä, ia ìteä hia te tupuraa o te parau. Te na ô ra te ìrava 2 o teie Taramo « Ia ìtea to parau e àti noa aè teie nei ao ; e te ora na òe i te mau ètene atoà ra.» Ua ìteahia te tahi tupuraa no to na parau na roto i teie tohu ta Vaitä. Te auraa, eere no Vaitä te hinaaro ia mou no te Atua ra. No reira, te tahi òhipa aita faahou te Atua i roto e mou ihoä, eiaha ia e ìmi ia täpiti mai te Atua teie parau i nià ia tätou. No reira, eiaha tätou e àrahuta i teie parau, « mai te peu ia tae i te tahi mahana aita faahou te Etärëtia Porotetani Mäòhi, no te mea ia aita faahou te Atua i roto i ta na faanahoraa, ta na arataìraa, ta na mau faaotiraa, ua täiva i te parau a to na Fatu. »

E mou teie haapaòraa tahito no te mea te vai ra te tahi mea âpï ta te Atua e hinaaro e tanu ia tupu faahou mai te parau mau e te parau tià. Aita te Atua i haamou noa i te tahi òhipa mä te òre e faatupu mai i te tahi Tumu âpï no te faaora i teie nünaa. E teie mea e tupu mai, teie ia e na roto hia mai teie mau manu moà o te moana. Eere hoi teie parau i te hinaaro o Vaitä, eere atoà hoi no teie mau taata no räpae te hinaaro, no to te Atua ra ia tupu te parau e tià ai.

Teie mau taata no räpae mai tei haere mai e tanu i te parau no teie Tamaiti i roto i te âau o te mäòhi ia tupu te ôpuaraa faaora a te Atua no te mau nünaa atoà. « E mau te raì e te fenua, âreà ta ù parau e òre ia e mou. » Ia tupu te tatarahapa na roto i te faahoìraa te mäòhi i te hanahana i nià i te Atua eiaha ra i nià i te taata. Ia ìtehia te tupuraa no te parau a te Atua i roto i to na manaò, to na feruriraa, e te faanahoraa o to na oraraa. Ia ìtehia te tupuraa no te parau a te Atua i roto i ta na mau faaotiraa e ta na òhipa. Ia tupu te parau mau e te parau tià i roto i teie nei fenua mäòhi. Ia ìte-faahou-hia te tupuraa o te parau no te here e te aroha, te tura e te haehaa, ia mä-òhi faahou te rae e te âau o teie nünaa mai ta te Atua i faatupu i ta na parau i nià i teie vauvau. Te auraa, ia faaiti ta te taata e ia rahi aè ta te Atua.

No reira, eere teie parau no te àti Iuta anaè, eere atoà no te taata porotetani anaè, eere atoà no te mäòhi anaè, no te mau taata atoà ra, no te mea, no te Atua te fenua e to na î e te mau nünaa atoà. Ia riro te parau a te Atua ei mäa tumu na na i roto i to na oraraa. Mai tera ta na i faatupu mai te matahurahura o teie nei ao, ia riro te taata ei vähi faahoturaa i te parau no te here e te aroha o te Atua i roto i to na âau.

  1. tätou, ua tanu te Atua i te parau o teie Faaora, te Ora a te Atua, te Parau tei riro mai ei taata, i roto i te âau o teie nünaa ia tatarahapa e ia ora o ia i to na faaroo, mä te òre ra e haapae i to na mäòhiraa. Na roto i to na mäòhiraa ia faahotu mai teie nünaa i te here e te aroha o te Atua. No reira, e pure ia rahi te faaroo. E pure ia tupu noa ä te parau tià e te parau mau i roto i te Etärëtia Porotetani Mäòhi, te mau Etärëtia atoà io tätou, e i roto i te oraraa Porotita o teie fenua. E pure ia tupu faahou mai te parau no te faatura e te färiiraa te tahi ia au i to na huru e to na hohoà. E pure ia tupu faahou te mäòhi i roto i to na haehaa; e pure ia rahi mai te hau e te òaòa, e ia iti te tamaì e te âmahamaha i roto ia na. E pure ia tupu noa ä te hinaaro o te Atua ia tätou, e ia änoenoe noa mai te here e te aroha i roto te mäòhi.

 

 

Alain,Tetuanui a Maitere òrometua.

Repost 0
Published by Mapuanga terai - dans Aòraa
commenter cet article
11 avril 2017 2 11 /04 /avril /2017 20:47

Mahana toru 12 no Eperera 2017

 

 

Taiòraa : Ruta èvaneria : 23/13 – 25

 

"O vai ta òutou e hinaaro …"

 

Tei mua tätou i te faatere o te hau Roma, ia Pirato. Inaha, o ia atoà te tahi e tià i te horoà i te utuà no te taata. Te tumu ia o Ietu i arataìhia mai e te mau tahuà rarahi i reira. Ia rave te hau Roma i teie haavaraa, e ia au hoì i ta Pirato mau titorotororaa i nià ia Ietu no te mau tumu i faahapahia ai o Ia, aore roa e hara i ìtehia e a na.

 

Te auraa, aita noa aè e hape i noaa mai ia Pirato no te faautuà ia Ietu. E ia tapeà o ia ia Ietu ra, e utuà tano òre roa te reira i mua i te ture. Ia au ra i te peu a te Âti-Iuta, e mea tïtauhia i te mau taime no te ôroà päta, ia faaòrehia te utuà a te tahi taata. Ta Pirato ia e faaòhipa ra i teie taime ma te ui atu i te nünaa Âti Iuta : "O vai ta òutou e hinaaro ia tuu vau i roto i nä taata too piti nei, o Ietu aore ra o Parapa"

 

Ua püai roa ta rätou tuoraa no te faaite i to rätou manaò no Ietu, oia hoì : "E faatätauro atu, e faatätauro atu." E riri iti rahi to te nünaa, no to rätou taa òre anei, aore ra no te arataìraa änei a te mau faatere fenua e faaroo i terä tau tei faaturori i to rätou feruriraa e ta rätou haavaraa. Inaha, terä faahötanaraa ta te nünaa i te taime a tomo mai ai Ietu i Ierutarema, ua taui i teie nei. Eere i te faahötana faahouraa, o te faatätauroraa rä.

 

Tei hea roa te mau pipi, tei hea roa te feiä maì tei faaorahia, tei hea roa te feiä tei tämähia e teie Tamaiti, tei hea roa te mau piriòì tei haere faahou, tei hea roa te mau turi tei faaroo faahou, tei hea roa te mau matapö tei ìte faahou, tei hea roa terä 5000 taata tei faaàmu temeiohia, tei hea roa teie feiä i teie taime e hinaaro ai paha Ietu i ta rätou fäìraa. Aita, aita roa rätou i faaroohia, aita rätou e ìtehia ra. Te auraa o Ietu anaè i to na pae, aita e taata no te tauturu ia na. Aita e taata i tià mai i nià no te àro i terä òpuaraa a te nünaa. Ia haapohehia o Ia.

 

Ua tià te hinaaro o te taata, ua tiàma te taata òrure hau e te taparahi taata, e te tomo nei te taata hara òre i roto i te tuhaa no te mauiui rahi hou to na pohe, ia au i te haavaraa a te nunaa. Te auraa, o te ìno, te pohe, etv…ta te taata i maìti i te reira taime i mua i te aro o te faatereraa fenua e faaroo. Âreà te Parau a te Atua, te mau haapiiraa, te Here e te Aroha Metua, te Maramarama e arataì i te taata i te èà no te hoì i te ùtuafare Metua, te tuu hia nei i te hiti, i te vähi e moè roa ai to na parau.

 

I teie mahana, i muri aè i teie rahiraa taime tätou i te hiòraa i te huru faaotiraa a teie mau taata o terä tau, ua hau atu rä ânei tätou ia rätou, ua huru maramarama rii ra änei hoì tätou i te òhipa o ta tätou e rave nei, e aore ra ua hau atu to tätou âau i te ètaèta i te faaotiraa a terä mau taata. Te mea faufaa rä no tätou i teie mahana, eere ia i te hiòraa i te parau no te haavaraa o Ietu, no te mea e parau oti te reira, aita ia ta tätou faahou i reira. Te mea rä e hiò i teie mahana, to tätou iho ia haavaraa i te parau a te Atua i teie nünaa Mäòhi. Te tiàturi ra änei tätou e, e tupuraa atoà teie nünaa Mäòhi na te Atua, e aore ra, ua ineine roa tätou i te tuu atoà i te reira i te hiti no te haamoè atoà i to na parau.

 

I reo Mäòhi ai to teie nünaa, eere no te mea na teie nunaa i hinaaro e te reira aè to na reo, aita. O te Atua ra te tumu o te reira òhipa, no Na te reira hinaaro. Mai te reo Mäòhi, to na iho tumu, to na hiroà, ta na mäa, etv… o te Atua anaè te tumu o te reira mau òhipa ra. Oia hoì, te Atua te tumu i Mäòhi ai te nunaa Mäòhi. E mai teie nunaa to tätou, o ia atoà no te mau nunaa atoà e vai ra. E ere te na reira ra teie maa pehepehe iti ra e : « No te Atua Nui Tumu Tahi te fenua e te mau î atoà… »

 

Te auraa, e ara i ta tätou mau havaraa/mau faaotiraa e mau parau e faï nei i teie mahana, a riro atoà ai e raveà haafifiraa i te ôpuaraa ora a te Atua. I taua tau ra, ua vaiho te taata i ta te Atua no te tapeà mai te mea faufaa òre. No reira, e faaitoito tätou i te faarii e te here i te hinaaro o te Atua i teie nunaa. Ia tià ta Na ôpuaraa faaora i Mäòhi Nui nei. Ia òre, haamanaò na i teie maa parau iti e te Fatu e : Ta òutou i na reira i terä ... o Vau atoà ta òutou e na reira. Ia ora na.

 

 

 

Nelson,Täuatiàu a HIOE òrometua

 

Repost 0
Published by Mapuanga terai - dans Aòraa
commenter cet article
11 avril 2017 2 11 /04 /avril /2017 20:45

Faraite 14 no Eperera 2017

 

Taiòraa : Ruta ev 23, 32-49

 

32 E o e toopiti hoi puè taata rave parau ìno tei arataì-atoà-hia e taparahi.33 E tae atu ra rätou i te vähi i parauhia ra, o Teranio, faatätauro iho ra rätou ia na i reira, e nä taata rave parau ìno ra, i te rima àtau e hoê, i te rima àui hoì e tahi. 34 Ua parau atu ra Ietu : E taù Metua, e faaòre mai i ta rätou hara, aore hoi rätou i ìte i ta rätou e rave nei. Ua tufa terero iho ra rätou i to na àhu. 35 Te tià noa ra te taata atoà i te hiò-noa-raa atu. Ua tähitohito atu ra te mau tävana e te taata atoà ia na, nä ô aè ra: Ua faaora hoì o ia ia vetahi ê, o te Metia o ia te here a te Atua ra, a faaora o ia ia na iho. 36 Ua tähitohito atoà atu ra te mau faèhau ia na, e haere atu ra, hopoi atu ra i te vineta na na, 37 nä ô atu ra: O te Arii oe o te ati Iuta ra, a faaora ia òe iho. 38 E päpaìhia iho ra te hoê parau i nià aè i ta na upoo, i te parau Hereni, te parau Röma, e ta te Hepera: O TE ARII TEIE O TE ATI IUTA. 39 Ua tähito atu ra hoì ia na te hoê i taua puè taata rave parau ìno i faatätauro-atoà-hia ra, nä ô atu ra: O te Metia òe ra, a faaora ia tätou. 40 Ua àvau mai ra rä te tahi, nä ô mai ra: Aita o oe mataù i te Atua tei pohe atoà hoi òe hoê ä huru? 41 E mea tià rä to täua pohe, o te utuà mau hoì teie i ta täua i rave ; àreà teie nei taata, aita roa a na e parau ìno. 42 Ua parau atu ra o ia ia Ietu: E te Fatu, e haamanaò mai òe ia ù ia tae òe i to òe ra pätireia. 43 Ua parau mai ra Ietu ia na: Ei parataito ia òe e o vau atoà i teie nei ä mahana, òia mau ta ù e parau atu ia òe nei. 44 E huru hora ono atu ra, o te pöuri iho ra i nià i taua fenua atoà ra e tae roa aè ra i te hora iva. 45 Haapöurihia iho ra te mahana, e mahae iho ra röpü i te päruru i te hiero ra. 46 Ua pii hua atu ra to Ietu reo, e muri aè ra, nä ô atu ra: E taù Metua, te tuu atu nei au i taù värua i to rima na ; e oti aè ra taua parau ra, pohe iho ra. 47 E ìte aè ra te raatira hanere i taua mea ra, haamaitaì atu ra i te Atua, nä ô atu ra: E taata parau-tia mau ä teie. 48 E taua feia atoa e rave rahi i haere mai e hiò ra, ìte aè ra i taua mea i ravehia ra, hoì anaè atu ra mä te papaì i to rätou òuma. 49 E te feiä i ìte ia na ra, e te mau vahine i pee mai ia na mai Tarirea mai ra, tià noa atu ra ia i te ätea ê i te hiò-noa-raa mai i taua mea ra.

 

Ia haamaitaìhia te Atua no to na here e to na aroha ia tätou.

Ia haamaitaìhia te Atua tei hinaaro ia tätoiu ei nünaa no na.

Ia haamaitaìhia te Fatu te Tamaiti a te Teitei tei hinaaro ia tätou ei mau tävini no na.

Ia haamaitaì mai te Atua i to tätou fenua, to tätou nünaa e ta tätou Etaretia.

 

Ta tätou parau i teie mahana tei te ìrava 34 e pure na te Fatu i te nä ôraa e: E taù Metua, e faaòre mai i ta rätou hara, aore hoi rätou i ìte i ta rätou e rave nei.

 

E tano e parau, e taime poto to te âti Iuta raveraa i te faaotiraa no teie òhipa peàpeà roa. Ua ìmi rätou i te mau räveà atoà e òiòi ai teie òhipa. Tera rä te taupupu nei to Ietu haereraa i te vähi faautuàraa no te teiaha o te tätauro. Haru atu ra rätou i te hoê taata no Turene o Timona te iòa. Tuu atu ra rätou i te tätauro i nià ia na ia vitiviti teie òhipa. Te vai atoà e toopiti èiä haru tei faautuàhia, te àfaì-atoà-ra räua i to räua tätauro. E faèhau to te tahi pae e to rätou raatira hänere. E e tiaa rahi tei pee atu ia rätou tootoru e te vahine atoà e rave rahi i te òtoraa i te Fatu.

 

 

Ua riro terä mahana ei mahana vahavahaharaa na te taata i te Metia. E tano e parau e taime teie no Tätane no te mea te haamäuiuihia ra to na arai o te Fatu ia. Eita e òre atoà te mau tëmoni i te òuàuà i te òaòa i te mea te àfaìhia ra te Tamaiti a te Teitei e pätiti i nià i te räau tärava . Ua hope roa ia te mau taata òhipa ìno e te mau teuteu o Tätane i te òaòa i teie huru tupuraa òhipa.

 

 

Ua riro o Ietu i taua mahana ra ei mätaìtaìraa na te taata. Ua pätitihia to na rima e to na âvae. Ua tufa terero te mau faèhau i to na àhu. Ua àfaì i te vineta na na e ua tähitohito ia na mä te parau e : O te arii òe o te âti Iuta ra a faaora ia òe iho. Ua nä reira atoà te mau tävana e ua parau: Ua faaora hoì o ia ia vetahi ê, o te Metia o ia te here a te Atua ra, a faaora o ia ia na iho.

 

Ia hiòhia te parau a teie mau taata i nià i te Fatu, e mau parau teimaha anaè ta rätou e parau ra i nià i te Fatu. E te parau atoà ra te tahi i pihaì iho i te Fatu o tei faatätauro-atoà-hia i te nä ôraa e: O te Metia òe ra a faaora ia tätou. Ia hiò-anaè-hia te taata i taua mahana ra e au rä aita hoê aè taata huru maitaì. Pauroa te tähitohito ra i te Fatu. Pauroa te faaìno ra i te Fatu. Mea ravaì te taata i te riri i te Fatu. E ua òa aita te Fatu i riri, aita atoà faaòa rätou i te òhipa i ravehia i nià i te Fatu.

 

E aha ta Ietu i rave i mua i te tähitohito, te faaìno e te tahi atu mau peu tiàòre a te taata. Ua pure te Fatu. E aha ta na pure. Te ani ra o ia i to na Metua i te maitaì o te mau taata e faaìno ra ia na : E taù metua e faaòre mai i ta rätou hara aore hoì rätou i ìte i ta rätou e rave nei. Te auraa, aita te Fatu i riri, aita i faahapa, aita atoà e faaìnoraa i matara mai roto mai i to na vaha. I roto i ta na pure i to na Metua, te haapäpü ra o ia i to na tiàturiraa i to na Metua e te ani ra o ia i to na Metua e faaòre i te hara a te feiä i hämani ìno mai ia na. Te parau atoà ra i to na Metua : Aita teie mau taata i ìte i te òhipa ta rätou e rave ra. Te auraa, ua moè ti rätou hiroà aore rä ua riro rätou i roto i te mau haavare a te feiä ôpuaraa ìno.

 

Ia hiòhia, aita te Fatu to nià i terä manaò ia faahoìhia te ìno i ravehia e teie mau taata i nià ia rätou. Aita te Fatu i hinaaro e ia upootià te ìno na roto i te faahoìraa i te ìno. No te mea aita hoê aè òhipa ìno ta na i rave, i ani ai o ia i to na Metua e faaòre mai i ta rätou hara. No te mea rä te here e te aroha ta na i haapii e ta na i faaìte i roto i te mau òhipa atoà ta na i rave eita ihoa o ia e tae i nià i te manaò tähoo i te ìno i ravehia i nià ia na.

 

Haere noa atu ai te mäuiui o Ietu i te rahiraa e tae roa atu i te pohe, eita ihoa o ia e tähoo i te ìno na roto i te ìno. Ua faaìte rä te poiri rahi i maìri i nià i te fenua i taua mahana ra, i to te Atua tüàtiòre i te òhipa ìno i ravehia e te taata i nià i ta na Tamaiti here.

 

Ia hiòhia te taata i taua mahana ra e au rä aita hoê aè taata huru maitaì. Te vai rä te tahi taata i pihaì iho ia Ietu i nià i te tätauro o te taata huru maitaì aè ia. Tei ìte e ua tano te faautuàraa i ravehia i nià ia na e to na hoa no te mea e òhipa ìno ihoa ta räua i rave. O Ietu rä, aita ta na e hara. Te auraa , eita e tano terä faautuàraa no Ietu e ia faatätaurohia o ia. Te faatätauroraa i te taata, e utuà terä no te feiä òhipa ìno. e aita hoì e òhipa ìno ta te Fatu i rave. Ia haamaitìhia te Atua no teie huru taata tei faaìte i te maitaì o te Fatu e tei fäì i ta na hara.

 

I roto i te ôpape rahi e huti ra i te taata i taua mahana ra i roto i te tähitohito, te faaìno e te hämani ìno i te Fatu, hoê terä taata maitaì e ìtehia ra. Eita e òre èere ihoa paha i te mea rahi te maitaì i taua mahana ra no te mea e mahana haapoheraa i te Tamaiti a te Teitei. Te vähi päpü tei pihaì iho te Atua i ta na Tamaiti, tei pihaì iho te feiä i fäì i ta rätou hara e to rätou faaroo i te Fatu. Ia haamaitaìhia te Atua no te reira.

Ia ora na.

 

Jean, Tehaapapa a TEURURAI òrometua

Repost 0
Published by Mapuanga terai - dans Aòraa
commenter cet article
11 avril 2017 2 11 /04 /avril /2017 20:42

Poroì no te mahana mäa 15 no êperera 2017

Hepetoma Moà

 

 

Taiòraa : Ruta èv 23, 50-56.

Taramo 16.

 

Poroì : Taramo 16, 9-10 : « I òaòa ai taù âau, e te òaòa nei taù värua ; e taòto atoà taù tino nei mä te tiaì. E òre hoì òe e vaiiho i taù värua i Häte, e òre hoì òe e tuu i te taata moà ra ia ìte i te tähuti ».

 

E hoa here mä,

 

I roto i teie taramo tei faataahia no teie färereiraa no tätou i teie mahana nei, mai te peu e, te pähono ra te Taramo 15 i terä uiraa : « O vai të pärahi i pïhaì iho i te Fatu ? », âreà te Taramo 16, te haapäpü noa mai ra ia i te tuhaa e noaa i te taata tei tuu i te täatoà o to na tiàturiraa i roto i te Atua. I roto i te Atua, e noaa ia na te hau i te taime no te oraraa e i te taime atoà no te poheraa. I roto i te Atua, e noaa ia na te òaòa mure òre. E mai terä e haamanaòhia mai ra e te Taramo 23, i ta te Fatu i tiaì, e òre o ia e ère i te maitaì e te ora. Teie te maitaì ta te Atua i faahei i to na nünaa i te taime no te fafauraa faufaa i roto i te Faaauraa Matamua. O ta te taata taramo ia e fänaò atoà ra i roto i teie taramo i ta tätou no teie mahana. Noa atu i mua i te parau o Häte, e òre te âau o te taata taramo e töàruàru.

 

Ua uihia i teie taramo te uiraa ta terä taata êtiopia i ui atu ia Firipa, i terä parau i faahitihia i roto i te Ìtaia 53 : « Nä te perofeta iho änei i faahiti i teie parau, e aore ia nä te tahi taata ê atu » (Òhipa 8, 34). Te pähonoraa, no Tävita iho te parau e faahitihia ra e teie taramo, eere rä i to te Metia. O Tävita iho teie tei âmui i te Atua, e o na iho teie e faateniteni i te maitaì rahi tei noaa ia na i roto i teie färereiraa, e te reira parau e ìtehia ia to na tupu-hope-raa i roto i ta te Atua i mäìti no te faatae i ta na ôpuaraa faaora no teie nei ao nä roto i ta na Tamaiti here ia Ietu Metia, terä Metia ta Iotëfa Ârimätaio i faataa i to na menema ei vairaa no te tino pohe o to na Fatu, ia au i terä taiòraa i roto i te Ruta èv 23, 50-56.

 

O te parau atoà ia ta Pëtero i haamanaò mai i roto ia ta na àoraa e faaìtehia ra i roto i te Puta Òhipa 2, 29-31 : « E hö mä, e te mau taeaè, e parau noa atu na vau ia òutou i te pätereareha ra ia Tävita, e ua pohe hoì o ia e ua tanuhia, e te vai noa nei ä to na menema io tätou nei e tae roa aè nei i teie nei mahana. No te mea rä e perofeta, ua ìte hoì o ia e, ua parau mai te Atua ia na mä te tapu, e faatià o ia i te Metia i to na ra huaai i te haapaòraa i te tino ra, ei pärahi i nià iho i to na ra teröno ; o ia rä i ìte ätea noa i te reira, i parau ai o ia i te tiàfaahouraa o te Metia ra : E eita to na värua e vaiihohia i Häte, e eita to na tino e vaiiho-noa-hia ia tähuti noa na ».

E « piti » tau tuhaa rarahi e arataì ra i teie taramo i ta tätou. A tahi : Te tuhaa maitaì e noaa i te taata tei tiàturi i te Atua (16, 1-6), e a piti : Te mau òhipa e tupu i roto i te mäìtiraa a Tävita (16, 7-11). O ta tätou ia e hiò mai i teie nei.

 

Te tuhaa maitaì e noaa i te taata tei tiàturi i te Atua (16, 1-6) :

 

I roto i teie tuhaa matamua no teie taramo i ta tätou (16, 1-6), te faaara nei te taata taramo e, o te Atua iho te tuhaa maitaì e noaa i te taata tei tiàturi i te Atua. E i te taime e ü ai o ia i te mau fifi e rave rahi o te oraraa, e horo o ia i roto i te Atua, e mohi o ia i roto i te Atua. I roto i te Atua, eita to na oraraa e putaputa i te ihe taèro a te ènemi. No reira te taata taramo i faatae ai i teie parau i te feiä moà, oia hoì i te feiä atoà tei « faataahia / tei tuuhia i te hiti » no te òhipa a te Atua, mai tä na iho i ani i te Atua ia rave nö na. Te päpü atoà ra ia ia tätou e, teie feiä moà ta te taata taramo e faahiti nei, o te nünaa Ìteraèra ia nä mua roa, te nünaa ta te Atua i mäìti e i faataa, te nünaa ta te Atua i faariro ei « tamaiti na nä » (Êtoto 19, 6).

Nä roto i teie taramo, te ani nei Tävita ia rätou, ia haapaò päpü i teie parau no to rätou mäìtiraahia, no te mea e feiä maitataì rätou i te tahi atu pae. E te hanahana e noaa ia rätou, te faahoì noa ra ia te reira i te ànaàna no te hanahana o te Atua. Eita te tahi hiò-hipa tei repohia e faahoì mai i te ànaàna. Te auraa, te huru e te hohoà o te Atua tei taraihia e te Atua iho i nià i te taata, ia òre anaè ia tämä-noa-hia, eita te reira e faahoì i te hanahana i te Atua ra, noa atu ia e aha te huru àma no te hanahana o te Atua e ànaàna ra i nià i te taata. Te reira te mea e haapeàpeà ra i te âau o te taata taramo, i te ìteraa e, te vai ra te tahi pae, ua ìmi i te maitaì i te tahi atu vähi (ìr 4).

 

Ua taui rätou i te Atua, ua färiu i terä mau atua, e mata to rätou eita rä e ìte, e vaha to rätou eita e parau, e tarià to rätou eita e faaroo. Terä ta tätou e parau e, e mau îtoro, e mau atua taraihia e te feruriraa e te manaò o te taata. Te tauturu noa ta te taata taramo e tiaì ra i te feiä moà, terä ia manaò ta Pauro i faahiti e i faatae i te Ètärëtia i to Firipi : « O taua mau mea taoà nä ù ra, o tä ù ia i faariro ei mea faufaa òre i te Metia nei. Oia mau ia e mea faufaa òre atoà te mau mea atoà nei ia ù, i te maitaì rahi ra i te ìte i te Metia i taù Fatu ra ia Ietu : e faaruè ai au i te mau mea atoà ra, e e äua / pehu ia ia ù, ia noaa ia ù te Metia. Ia riro vau ei taata no na, eiaha mä te parau-tià nä ù iho i te ture ra, o tei noaa mai rä i te faaroo o te Metia ra, o te parau-tià a te Atua i te faaroo ra : ia ìte hoì au ia na, e te püai o to na tiàfaahouraa, e te âpiti-atoà-raa atu i to na mau àti, i te faaauraa atu i to na ra pohe » (Firipi 3, 7-10).

 

I muri aè i teie mau parau ta tätou i faahiti iho nei, te fäì faahou ra te taata taramo e, hoê noa iòa ta na i ìte « te iòa o te Fatu », tä na te reira tufaa maitaì, tä na te reira âuà (ìr 5), eiaha rä te tahi atu mau âuà. O te Atua ta na tufaa maitaì, o te Atua ta na âuà. E àmu o ia e e inu o ia i te aroha e te here o te Atua. E te reira tuhaa, mai terä ta Ietu i parau ia Märeta, no to na tuahine ia Märia : « Hoê roa rä mea tià, e ua rave iho nei Märia i taua mea tià ra, e òre roa hoì tä na e riro ê » (Ruta èv 10, 42). Te manaò atoà ia e vai ra i roto i te ìrava 6 : « Ua maìri aè nei to ù terero i te vähi maitaì ; e te maitaì nei au i ta ù nei tufaa ».

 

Te mau òhipa e tupu i roto i te mäìtiraa a Tävita (16, 7-11) :

 

I roto i te piti o te tuhaa no teie taramo i ta tätou (16, 7-11), te ani nei te taata taramo, oia hoì o Tävita, i te taata ia haapaò maitaì i tä na e mäìti i roto i to na oraraa, ia òre ia hape i te mäìtiraa, e ia òre o ia ia tätarahapa i te òhipa i ravehia. No te mea, te tuu atoà mai ra te ìno i tä na i mua i te mäìtiraa a te taata. Ia òre anaè te mäìtiraa a te taata ia türamahia e te Parau a te Atua, päpü maitaì e haru te taata i ta te ènemi i tuu i mua ia na. I ô nei, te haamanaò noa mai ra te taata taramo e, i roto i to na oraraa e ta na täviniraa, nä te Atua e tauturu ra ia na, nä te Atua e höroà ra, e o te Atua iho te tuhaa maitaì (héritage). O tä na ia e faahoì noa ra i te haamaitaìraa i te Atua ra, no te mea te taata i roto i to na täatoàraa (to na âau, to na ìte, to na värua e to na tino), e fänaò o ia i te ora i roto anaè i te Atua, teie Atua tei ìriti i to na taahiraa âvae i te märei a te ìmi manu, oia hoì te ôpuaraa ìno a Häte.

 

Teie tiàturiraa e teie tiaìtururaa o te taata taramo, ua niuhia ia i te tiàfaahouraa o te Metia, te tamaiti a Tävita. E te feiä atoà e tiàturi ia na, e ora ia. Aita e parau e aita e mana to Häte i reira. Terä ia e haamanaòhia mai ra e te ìrava 9-10 no teie taramo i ta tätou : « I òaòa ai taù âau, e te òaòa nei taù värua ; e taòto atoà taù tino nei mä te tiaì. E òre hoì òe e vaiiho i taù värua i Häte, e òre hoì òe e tuu i te taata moà ra ia ìte i te tähuti ». No te mea, o te Atua anaè te tumu o te ora, nä na e faaora ia tätou, nä na e arataì ia tätou mai te pohe mai e tae atu i te ora, e mai terä e haamanaò-atoà-hia mai ra e te Puta Òhipa 2, 27 : « I òaòa ai taù âau, e ua òaòa hoì taù vaha ; e e taòto atoà hoì taù tino mä te tiaì ; e òre hoì òe e vaiiho i taù värua i Häte, e òre hoì òe e tuu i to mea moà ra ia tähuti noa na ».

 

E nä teie Metia ta tätou i haamanaò mai i to na parau i te roaraa o teie hepetoma, e faahoì mai i te hau e te òaòa i roto i te mau menema o to tätou oraraa, ia òre te ôpuaraa a te ènemi ia riro ei haapeàpeàraa nä tätou, i te mau taime e i te mau vähi atoà, e porohia ai te parau o te Metia tei ora i te märei a Häte.

 

Ei te Atua anaè ra te tura e te hanahana.

 

 

 

Julien, Iotua MAHAA òrometua

Repost 0
Published by Mapuanga terai - dans Aòraa
commenter cet article
11 avril 2017 2 11 /04 /avril /2017 20:39

Täpati no te Tià-faahou-raa / Ôroà Päta : 16/04/2017

Òhipa 10/34-43 ; 1 Törïnetia 5/6-8 ; Mätaio 28/1-10 ; Taramo 118/1-20

 

Te Ôroà Päta marumetia i naùanei

 

« E i teie nei, a tämä na i te faahöpue tahito ra, ia riro òutou ei puèà âpï, ia òre te faahöpue ia òutou na : o te Metia hoì ta tätou Päta, i taparahihia ia na tätou » (1 Törïnetia 5/7).

 

E to te hui faaroo e, ia ora na roa i te Aroha o te Fatu i te färereiraa i teie nei Täpati Ôroà Päta !

I te mea e maha a tätou nei taiòraa, ua mäìtihia mai te tahi maa tiàororaa a Pauro ei haamatara i te haapüòiraa o nä puè parau pïpïria nei no te Tià-faahou-raa o te Metia : « E i teie nei, a tämä na i te faahöpue tahito ra, ia riro òutou ei puèà âpï, ia òre te faahöpue ia òutou na : o te Metia hoì ta tätou Päta, i taparahihia ia na tätou » (1 Törïnetia 5/7).

Eiaha roa atu rä tätou e manaò e, e teie anaè nei te ìrava e tano maitaì no te ìte i te tüàtiàtiraa e te rauraa o nä faaìteraa e maha. O tahi rä teie türamaraa i rotopü i te àuhuneraa o te mau türamaraa e vai nei no te faaitoito ia tätou i te ora i to tätou faaroo marumetia i naùanei, io tätou nei, e i te mau vähi atoà ei reira te Fatu i te tonoraa ia tätou ei mau Tiàtiàveà no te haafäite ia tätou e te Atua Metua mä te Metia e te Värua Raa nä roto i te faaroo anaè. Tei tätou rä i te tütonu tätaìtahi e te haafaufaa âmui i nä puè parau pïpïria nei tei heheu mai i te tahi tuhaa no te täviniraa àpotetoro a Pauro, Pëtero, Mätaio, Ruta Päpaì Èvaneria, e oia atoà te ârueraa a te Taramo 118 no « te tià vai-mäite-raa o te Aroha o te Fatu » e tae noa atu i te taime e hope roa mai ai te faaâpïraa a te Pätireia o te Atua.

No tätou nei, e maha parau tei täpaòhia mai, e na tätou te reira e faaravaì mäite atu. A tahi, « o te Metia ta tätou Päta » ; a piti, « to tätou haereà faaroo mä teie Päta » ; a toru, « ta tätou faaìteraa i teie Päta », e a maha, « ta tätou täviniraa mä teie Päta ». Mai te paeraa o te parau e tae noa atu ai i te rauraa, tei tätou ra ia te reira mau oho o te faaroo marumetia o tei tià roa ia ôpere-mäite-hia no te oraraa âmui o te Ètärëtia i mua i te Fatu e nä te ao nei.

 

1. O te Metia ta tätou Päta

I te mea e parau äraaraa te Ôroà Päta no te mau Âti-Iuta e ora purutia ra nä Törïnetia mä, te ìte maitaì atoà atu ra o Pauro i to rätou matara òre i mua i te parau no te Metia i faatataurohia e tei faatià-faahou-hia mai te pohe mai ei Faaora e ei Fatu no te taata atoà e färii na ei ö-faatau-aroha no te oraraa âpï mä te faaroo marumetia. E au atoà teie matara òre o te tahi mau Âti-Iuta no te mau Herëni, te mau Rätere, e tae noa atu atoà i te tahi mau marumetia e noho ra i teie pae fenua.

E inaha, aita teie matara òre i vaivai noa mai i roto anaè i ta rätou mau feruriraa e mau haaferuriraa, ua päiraira roa atoà rä i roto i to rätou oraraa no te mahana tätaìtahi. Te ùme atu ra te Âti-Iuta i te taata no te ora ia au i ta rätou faa-âti-iuta-raa mä te täiroiro e e parau faaturori taata te Tatauro o te Metia. Te huti atu ra hoì te Herëni i te taata no te ora ia au i ta rätou faa-herëni-raa mä te faatiàturi e e parau haamaamaa taata te Tatauro o te Metia. Te mau òhipa rä e ìtehia atu ra i roto i ta rätou arataìraa i te oraraa faaroo e te oraraa vaamataèinaa i Törïnetia, o te ûàna-haere-raa ia te mau taupupüraa taata tätaìtahi, ùtuafare, e oraraa âmui.

I mua i te reira mau arataìraa faaroo e vaamataèinaa, aita o Pauro i hema no te pari i te tahi e i te tahi, no te mea eere o ia i te haavä, e « tiàtiàveà » rä, e e « àpotetoro » na te Metia e no te Metia i rotopü i te hui faaroo tei püpühia e te Fatu ia âpee àpotetoro o ia. No reira, a Âti-Iuta noa atu ai te tahi pae, a Herëni noa atu ai vëtahi pae, a « Ètene » noa atu ai vëtaìtahi pae, te « tiàoro » nei Pauro i te mau marumetia no Törïnetia ia au i to rätou tiàraa « mataèinaa » tätaìtahi e faatäipehia nei e ana nä roto i te parau no te « faahöpue » e te « puèà ».

Te poroì a Pauro i ô nei, mai teie rii ia : I mua na, e « èinaa » noa òutou (Ètoto 2/5), e pee hänoa òutou i te taata e fatu ra ia òutou. I naùanei rä, i teie nei, e « mataèinaa » òutou, ua faaâpïhia e ua faatiàmähia òutou nä roto i te pohe tatauro e te tià-faahou-raa o te Metia, « ta tätou Päta ».

 

2. To tätou haereà faaroo mä teie Päta

Te « Päta », to na auraa âti-iuta e marumetia, o te haereraa ia mai te tahi pae e tae roa atu ai i te tahi atu pae, mai te tahi ôtià e tae atu i te tahi atu ôtià, mai te tahi ao tahito e tae atu i te tahi ao âpï tei reria te oraraa tiàmä i mua i te Atua, e i rotopü i te nünaa o te Atua.

Te tiàoro nei ia Pauro ia haere te taata mai to na tiàraa « èinaa » e tae atu ai o ia i to na tiàraa âpï, oia te tiàraa « mataèinaa ». Oia hoì eiaha te taata nei ia faaea « èinaa » noa, « tïtï » noa, ia ora mau rä o ia ei « mataèinaa » mä te ôtahiraa no te parau faatävai i maìrihia mai no na mai roto roa mai i te hoê Parau faaora e te faatiàmä. E taua Parau ra, o te Metia ia te Atua Metua no tätou nei. I ô nei, na te Atua Metua e « arataì päta » i te « èinaa » e täpae roa atu ia o ia ei « mataèinaa ». E haereà teie nä roto i te pohe tatauro o te Metia e « mäpiha » atu ai i te ora âpï o te tià-faahou-raa o te Metia !

O te Parau Âpï Òaòa atoà ia e haafaufaahia ra e Pëtero i roto i ta na aòraa : « […] o të faaroo ia [Ietu Metia] ra, e matara ia ta rätou hara i to na ra iòa » (Òhipa 10/43). E fäìraa faaroo teie na te mau marumetia matamua o tei niuhia i nià i te « Metia tei rïhia i nià i te räau tärava e te taata nei, e te faatià-faahou-hia e te Aroha o te Atua Metua ei Faaora e ei Fatu no ta na mau tamarii tävai ».

Te tahi maa uiuiraa i ô nei : I naùanei, i teie mahana, e « èinaa » te taata nei na vai e no vai ? E àroraa tämau teie na te Reforomätio-Porotetani io tätou nei e nä te ao nei, no te faatiàmä i te « èinaa » ei « mataèinaa » ia vaivai aè te « vaamataèinaa » i te mau vähi atoà e pupu taata to reira. Mai ia Pauro räua o Pëtero, e tae noa atu ia Ruta Päpaì Èvaneria, te vaiara atoà nei te Reforomätio-Porotetani no mua ra e no naùanei, i te huru färii àtä o te tahi mau « èinaa » ia rätou ei « mataèinaa », no te mea te au noa ra rätou i to rätou oraraa « èinaa » a pee hänoa ai i to rätou fatu.

A taa noa atu ai te reira ôtiàtiàraa tuatau, aita atoà rä te Reforomätio-Porotetani e tütau nei i ta na tautooraa i nià anaè i te tiàmäraa e te tura o te « mataèinaa » e te « vaamataèinaa », inaha mai ia Pauro mä, te tiàoro nei ia färii te « mataèinaa » ia na ei « tama faatävai na te Atua Metua mä te Metia e te Värua Raa » no te rohi hua ia riro teie nei ao ei « Rahu na te Atua » mä te tiaìturu i te tupu-hope-roa-raa mai te faaâpïraa a te « Pätireia o te Atua ». O to tätou mau ia haereà faaroo i naùanei, i teie mahana, mä te Päta, ei püòiraa i te orahia mai na e te Reforomätio-Porotetani mä te tiaìturu e te ineine mai ra te mau « ono », te mau « mono » tiàtiàveà e àpotetoro no te muriatau e fä mai ra.

 

3. Ta tätou faaìteraa i teie Päta

I te mea e faufaa rahi to te tuatua o Ìteraèra, to te Metia e tana mau pipi e mau àpotetoro, e to te mau hui faaroo marumetia matamua roa mai ta Ruta Èvaneria räua o Mätaio e faahiroà faahou mai ra. Manaò mäite rä hoì tätou mä te haamanaò atoà e e mau puna parau pïpïria teie no te tauturu mäite mai ia tätou i te ora i ta tätou faaìtera i te Päta marumetia i teie ànotau. E eiaha hoì ia moèhia ia tätou e e faaìteraa « Ruta Päpaì Èvaneria » ta te tahi, e e faaìteraa « Mätaio » hoì ta te tahi.

Aita änei o Mätaio, a taa noa atu ai te tahi mäpuhiraa aho âpï roa e vai nei i roto i ta na Pene 28, i faa-âti-iuta roa ia Ietu Metia ? Inaha, ia faaau-anaè-hia o Möte e te Ture ia Ietu Metia e te Èvaneria, ua huru Möte roa o Ietu Metia i roto i te rahiraa o ta na mau ìrava, e ua huru Ture roa te Èvaneria i roto i te rahiraa o ta na mau pene !

E o Ruta Päpaì Èvaneria hoì ? Aita änei o ia, a taa noa atu ai to na mau mau-päpü-raa i te parauatua a Pauro, i faarahi ûàna roa i te mau « û » no te faahinuhinu ànaàna maitaì i ta na faaìteraa ia Ietu Metia mai to na fänauraahia mai e tae noa atu te mau uì faaroo marumetia matamua roa ! E mau « û » änei teie tei ravehia mai roto mai i te « mau û o te änuanua » ia paò roa i roto i te taata taiò te haafäiteraa a te Atua Metua nä roto i ta na Metia e to na Värua Raa ?

E a tae ai hoì o Pauro e ta na huru päpaìraa ! E tià roa ia Pauro ia faaâpï täère roa i te papa e te arataìraa no te reo herëni ia äraaraa maitaì mai ta na faaìteraa. Eita te mau àivänaa reo herëni e rata i ta na mau päpaìraa. E e mea huru manaònaò atoà rä hoì te feiä e taiò nei i ta na mau èpitetore ! O Pauro rä ia e ta na faaìteraa èvaneria e parauatua no te Tatauro.

E ta tätou mau faaìteraa i te Päta marumetia i naùanei ? Na tätou e heheu faahou ä i te mau faaìteraa rau i orahia mai na mai te tau o te mau Tiàtiàveà Papaâ e Mäòhi matamua io tätou nei e tae roa mai i teie mahana. No teie heheuraa faufaa rahi o tei haamatahia mai e vëtahi o tätou nei, e tae noa atu ia vëtahi nä te ara, e tià roa ia faanaho faahou ä i te tahi mau mauhaa heheu, eiaha no te hämani faanehenehe noa i te tahi parau faaìteraa no te mirimiri haere nä terä mau vähi e au navenave roa ai te mau « èinaa » ! E ua ara maitaì hoì e e aniraa tuatau te reira na te « èinaa ». Eiaha atoà no te tarai hänoa i te tahi paparau faaìteraa no te tähitohito haere nä terä mau vähi e paruparuhia ra e te mau « mataèinaa » ! E ua araara maitaì atoà hoì tätou e te ìmi nei, te mäìmi nei, te päìmi nei, te ìmiìmi nei te « mataèinaa » ia tiàmä e ia tura o ia e vëtaìtahi atu « mataèinaa », ia tiàmä e ia tura o ia e te « vaamataèinaa » e vëtaìtahi atu mau « vaamataèinaa » !

Te auraa ra, te reira mauhaa heheu i to na päutuuturaa e to na ôtià (Ruta Päpaì Èvaneria) ; te reira mauhaa heheu i to na ètaètaraa e to na mötià (Mätaio) ; te reira mauhaa heheu i to na maa püai iti e to na metià (Pauro e o Pëtero) !

 

4. Ta tätou täviniraa mä teie Päta

Oia mau, te reira faaìteraa e ta na täviniraa, e ta na hoì mau oho e hotu mai ! Eere i te àhopa na tätou i te faatià i ta te hoê e te tötövä hoì i ta te tahi. Eere atoà i te òhipa na tätou i te faahapa i ta te hoê e te paèpaè auhoa hoì i ta te tahi. Te iti e aore ia te rahi o ta tätou òhipa täviniraa, aita atu ia tätou fä, maoti rä ia fänaò te taata nei i te Päta marumetia, ia fano o ia mai te pohe tatauro o te Metia e täpae atu i te tià-faahou-raa o te Metia ; oia hoì ia fänaò o ia i te haafäiteraa a te Atua Metua mä te Metia e te Värua Raa nä roto i te faaroo anaè ia au i te tumu parau no te Hoêraa o te mau Marumetia i orahia mai e tätou i te ùputa o teie matahiti âpï.

Manaò atoà rä tätou mä te haamanaò i te pehepehe a te Taramo 118 ! Ia manuia anaè ta tätou täviniraa, e tuu ia i te reira manuiaraa i roto i te « pure ârue e haamaitaì » i te Fatu, inaha « e tià to na aroha i te vai-mäite-raa » ! E ia päoa anaè hoì ra ta tätou täviniraa, e tuu ia i te reira päoaraa i roto i te « pure ani e ärai » i te Fatu, inaha « e tià to na aroha i te vai-mäite-raa » !

Eiaha roa te manuiaraa ia riro ei teòteòraa na tätou, i te mea e te rohi atoà nei te Värua o te Fatu ! Eiaha roa atoà hoì te päoaraa ia haaparuparu roa ia tätou, i te mea e aita te parau no te « èinaaraa », te « mataèinaaraa », e te « vaamataèinaraa » o te taata nei ia tätou nei, tei te reira rä taata e te reira nünaa ! E aita atoà hoì te parau no te färiiraa i te Fatu ia tätou nei anaè ra, tei te reira atoà rä taeaè e te reira tuahine ! Mä te ara tämau, e vaivai mai ä te « mea tahito » e ora âpipiti nei i te « mea âpï » i roto i te faaroo marumetia !

Te tahi rä parau faufaa rahi e tià ia haamanaòhia, o to tätou ia ârueraa, haamaitaìraa e ùmereraa i te Fatu no te mau täviniraa rau atoà tei tauturu maitaì mai i te Ètärëtia Porotetani Mäòhi mä to na Òitümeneraa, to tätou Vaamataèinaa mä to na Aunünaaraa, to tätou mau taeaè e mau tuahine mä to rätou mau àti, mau ahoaho io tätou e nä te ao nei.

 

5. Ei faaitoitoraa ia tätou i naùanei

No te püòiraa i ta tätou parau, manaò atoà rä tätou mä te haamanaò e, ia au i to tätou Reforomätioraa e Porotetaniraa, Mataèinaraa e Vaamataèinaraa, e parau rahi roa to te âpeeraa i te hui faaroo no te ora i te mau Ôroà Tumu Ètärëtia, mai teie Ôroà Päta marumetia, oia te « Ôroà Fanoraa no te Metia mai te pohe tatauro e täpae atu ai o ia i te tiàfaahouraa ». Te fänaò nei te marumetia i teie fanoraa nä roto i te Ôroà no to na Päpetitoraa mä to na Faaroo. E te haufaufaa atoà nei hoì tätou i te fanoraa nä te èà o to tätou haereà faaroo, e ta tätou mau faanahoraa Ùtuafare, Âmuiraa, Päroita, Fenua, Tuhaa, Âmaa Òhipa, Faatereraa Ètärëtia, Oraraa Ètärëtia Òitümene e Täuàparauraa Haapaòraa, Oraraa Auvaamataèinaa e Aunünaa.

Te fä o teie mau tautooraa, aita atu ia, maoti rä ia fänaò te hui faaroo i te mau vähi e te mau taime i naùanei, i teie mahana, ei reira te mau marumetia e ora ai i te Faaroo mä te pure ârue e te pure ärai, mä te faaìteraa e te täviniraa i te Fatu ; e te reira, i roto ia i te fäìraa faaroo e te fano atu ra tätou i te Pätireia i fano mai na io tätou nei, e te tiaìtururaa e e fano hope roa mai te Pätireia mä te täatoàraa o ta na faaâpïraa.

 

I te Fatu ä tätou i teie Ôroà Päta, teie Ôroà Fanoraa ! Âmene.

 

 

Antonino, Tihiri Lucas Òrometua

 

Repost 0
Published by Mapuanga terai - dans Aòraa
commenter cet article

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens