Overblog Suivre ce blog
Administration Créer mon blog
24 mars 2017 5 24 /03 /mars /2017 01:02

Täpati 26 no Mati 2017.

O ia

Ioane 9, 1-41. 

Te faaora-raa-hia te hoê taata matapö mai te fänauraa mai ä.

1 E te haere noa ra o ia ra, e ìte atu ra o ia i te hoê taata matapö mai te fänauraa mai ä. 2 Ua ui mai ra ta na mau pipi ia na, nä ô mai ra E Rapi, nä vai te hara, na na iho änei, e na nä metua änei, i fänau matapö mai ai o ia 3 Ua parau atu ra Ietu Eere i to te hara a teie nei taata e te hara a nä metua ra, no te mea rä ia ìteä te òhipa a te Atua ia na nei. 4 E rave au i te òhipa a tei tono mai ia ù nei ra, òi vai aè te ao. Te fätata mai nei hoì te ruì, aore roa e taata e òhipa i reira. 5 Te pärahi nei au i te ao nei, o vau te märamarama o teie nei ao. 6 I nä reira atu ra o ia i te parauraa atu, e ua tufa iho ra i te huare i raro i te repo, ua oi iho ra i ta na huare i te repo; ua parai atu ra i te repo i te mata o taua taata matapö ra. 7 Ua parau atu ra ia na A haere, a horoi i to mata i te pape ra i Tiroama oia hoì «Tonohia. Haere atu ra o ia, horoi iho ra, e haere mai ra hoì mä te ìte. 8 Ua parau iho ra to reira iho, e te feiä i ìte ia na i mütaa iho i te vai-matapö-raa ra Eere änei teie i te taata i pärahi noa, ani ai i te taoà ra. 9 Ua parau mai ra vëtahi O ia hoì teie. Nä ô mai ra vëtahi Mai ia na mau nei ä hoì te huru. Ua parau mai ra o ia iho O vau hoì ia.10 Ua ui atu ra rätou ia na I aha tià to mata i àraàra ai.11 Ua parau mai ra o ia, nä ô mai ra I oihia te repo e te hoê taata o Ietu te iòa, e ua parai mai ra i taù mata, e nä ô mai ra ia ù A haere i te pape ra i Tiroama horoi ai i to mata», haere atu ra hoì au horoi iho ra, e ìte atu ra.12 Ua ui atu ra rätou ia na Tei hea taua taata ra Ua parau mai ra o ia Aore au i ìte.

Te tïtorotororaa a te mau Färitea.

13 Ua arataì atu ra rätou i te taata i matapö na i te mau Färitea ra. 14 E täpati te mahana i oi ai Ietu i te repo i te faaoraraa i ta na mata ra. 15 Ua ui atoà mai ra te mau Färitea ia na i te oraraa ta na mata ra. Ua parau atu ra o ia I parai mai o ia i te repo i taù mata; e horoi iho ra hoì au, e te ìte nei au.16 Ua nä ô aè ra te hoê pae o taua mau Färitea ra Eere teie taata i to te Atua, aore hoì o ia i haapaò i te täpati. Ua nä ô aè ra te tahi pae E aha e tià ai i te taata hara ia rave i te täpaò mai teie nei. Ua àmaha iho ra rätou. 17 Ua ui faahou mai ra rätou i taua taata matapö ra. E aha ta òe na parau ia na, o ia i faaora i to mata na. Ua parau atu ra o ia. E perofeta ia o ia.18 Aita rä te âti-Iüta i faaroo e e matapö to taua taata ra, e ua faaorahia hoì ta na mata, ia tii rä rätou i nä metua o taua taata i faaorahia te mata ra. 19 E ua ui atu ra rätou ia räua, nä ô atu ra. O ta òrua tamaiti teie i parau ra e, i fänau matapö mai o ia. E aha hoì o ia i ìte ai i teie nei. 20 Ua parau mai ra nä metua no na ra ia rätou, nä ô mai ra. Ua ìte mäua, na mäua mau teie nei tamaiti, e matapö mau o ia mai te fänauraa mai ai. 21 Âreà rä te mea i ìte ai o ia i teie nei, aore ia mäua i ìte, e tei faaora hoì i ta na mata, aore atoà ia mäua i ìte. A ui atu na ia na, ua paari hoì o ia iho e na na iho e parau mai. 22 I nä reira atu ra nä metua no na ra, no te mea te mataù ra räua i te âti-Iüta, ua faaau na hoì te âti-Iüta i ta rätou iho parau, e te taata i nä ô ra e o ia te Metia, e tuuhia ia i räpae i te tunato ra. 23 I parau atu ai nä metua no na ra e. Ua paari o ia, a ui atu na ia na iho. 24 Ua parau faahou atu ra rätou i taua taata matapö ra, nä ô atu ra ia na. E haamaitaì i te Atua. Ua ìte hoì mätou e, e taata hara teie nei taata. 25 Ua parau mai ra o ia, nä ô mai ra. Aore au i ìte e, e taata hara o ia. Hoê roa a ù parau i ìte, e matapö to ù i mütaa iho, e teie nei te ìte nei au.26 Ua parau faahou atu ra rätou ia na. I aha mai o ia ia òe. I nä hea o ia i te faaoraraa i to mata na. 27 Ua parau mai ra o ia ia rätou. Ua fäì atu hoì au ia òutou, aore òutou i faaroo. E aha rä hoì òutou i hinaaro faahou ai i te faaroo? Ei pipi änei òutou atoà na na. 28 Ua faaìno atu ra rätou ia na, nä ô atu ra. O òe ta na pipi, âreà mätou e pipi ia na Möte. 29 Ua ìte mätou e, ua parau mai te Atua ia Möte. Âreà teie nei taata, aore mätou i ìte i te vähi no reira mai o ia ra. 30 Ua parau mai ra taua taata ra ia rätou, nä ô mai ra. E mea huru ê hoì tënä aore òutou i ìte i te vähi no reira mai o ia, e inaha, ua faaora hoì o ia i taù mata nei. 31 Ua ìte hoì tätou e, e òre te Atua e faaroo i te feiä hara, o te taata rä e haamori i te Atua, e o tei haapaò i to na ra hinaaro, o ta na ia e faaroo. 32 Aore i ìteä te matapö fänau nei i te oraraa i te taata mai te mätamua mai ä o te fenua nei. 33 Ahiri teie nei taata eere i to ô i te Atua ra, eita roa ta na räveà e tià. 34 Ua parau atu ra rätou ia na, nä ô atu ra. I fänau mai òe mä te hara, e haapii mai hoì òe ia mätou. Ua tuu atu ra rätou ia na i räpaeàu.

Ua faaroo vau.

35 Ìte aè ra Ietu e ua tuuhia o ia e rätou i räpae, e färerei aè ra hoì o ia ia na, ua parau atu ra ia na. Ua faaroo òe i te Tamaiti a te Atua. 36 Ua parau mai ra o ia, nä ô mai ra. E te Fatu, o vai o ia ia faaroo atu vau ia na. 37 Ua parau atu ra Ietu ia na. Ua hiò hoì òe ia na, e o ia hoì teie e parau atu ia òe nei. 38 Ua parau mai ra o ia. E te Fatu, ua faaroo vau. E ua tïpapa iho ra i raro i mua i ta na aro. 39 Ua parau atu ra Ietu. I haere mai nei au i te ao nei ia tupu te parau-tià, ia ìte te feiä ìte òre ra, e ia riro te feiä ìte ra ei matapö. 40 Te faaroo mai ra e toofanu mau Färitea i reira atoà iho i taua parau ra, e ua parau mai ra ia na. E matapö atoà nei mätou nei. 41 Ua parau atu ra Ietu. Ahiri òutou e matapö ra, aita a òutou hara, te parau mai na rä òutou e. Ua ìte mätou, te vai na ia ta òutou hara.

 

Manaò.

Te Atua Nui Tumu Tahi to tätou tiaì, e òre roa tätou e ère. Te haamäha nei o ia i to tätou rohirohi i roto te mau àru heeuri ra, te arataì nei o ia ia tätou nä pïhaì iho i te mau ànavai atatià ra. E arataì o ia ia tätou nä te èà tïtïàifaro, no te hanahana o to na ra iòa. E òre tätou e mataù i te ìno, tei pïhaì-atoà-iho o ia ia tätou to räau e te tootoo tei haamähanahana mai ia mätou. E ia haere noa atu mätou nä te peho marumaru o te pöuri. Te faatävai nei òe i to mätou upoo e riro ä te maitaì e te aroha i te pee mai ia mätou i te mau mahana atoà o to mätou nei oraraa. E pärahi ä mätou i roto i te àru a te Atua Nui Tumu Tahi. Ua faanahonahohia e òe i te tahi àmuraa mäa na mätou i roto i ta òe rähu e mäoro noa atu to mätou puè mahana. E tere hau to tätou. E tere hau i haere mai ai tätou e hopoi i te haamaitaìraa i te Fatu, a faataa ai tätou i teie taime no te faahanahana, te parauhia nei tätou, A tià, ua faatävaihia tätou i te aroha e te here o te Atua Nui Tumu Tahi. E òre hoì ta te Fatu hiòraa e au i ta te taata, e hiò hoì te taata i te huru i räpae àu aè, âreà te Fatu, e hiò ia i to tätou âau.

I pöuri na hoì tätou i mütaa iho ra, i teie nei rä, ua märamarama tätou i te Fatu, ia au to tätou haereà i te tamarii märamarama. Ta te Värua i faatupu ra, oia te mau mea maitataì atoà ra, e te parau-tià, e te parau mau. Ia ìteä ia tätou te mea au i te Fatu ra. Ia märamarama te âmuiraa e parau faufaa òre nei i te mau raveà a te Fatu i roto i te pöuri ra. E mea haamä hoì ia parau noa atu i te mau mea i rave-huna-hia, Te mau mea atoà rä i ìteä ra, i ìteä ia te märamarama, o te märamarama hoì tei faaìte mai i te mau mea atoà nei. I parau mai ai te Värua ara mai na, e tërä ra taata taòto, a tià mai i nià, e tënä na pohe, e na te Metia e horoà mai i te märamarama ia òe.

Te parau ia e färereihia nei e tätou i teie mahana i ta Ioane papaìraa i te pene 9, i te mau ìrava 1 e tae i te 41 e tià ia parauhia e toru tuhaa.

1-Te faaora-raa-hia.

Te mau pipi ua faaea noa i roto i te faanahoraa o te hara ia tupu te maì i nià i te tino o te taata. Te ìriti nei o Ietu i te ùputa no te turäma te hara to te taata ia faateäraa i te Atua Nui Tumu Tahi, èita ra no te maì. Te tämaïti fänau mata pö ua òhipa i to na huare e te repo ua oi e ua parai i nià i te vahi te reira te maì. E ua rave o Ietu i te òhipa a tei tono mai ia na, òi vai aè te ao, o vau te märamarama o teie nei ao. Ua parau o Ietu a haere, a horoi i to mata i te pape ra i Tiroama oia hoì Tonohia, horoi iho ra, e haere mai ra hoì mä te ìte.

2-Te tïtorotororaa.

I mua i te mau faatere âti-Iüta, e faaìte teie tämaïti i te òhipa ravehia, mai ta na e parau ra aore au i ìte ia na. Ua àmaha iho ra rätou, E aha e tià ai i te taata hara ia rave i te täpaò mai teie nei, e haapäpü teie tämaïti i mua rätou E perofeta o ia. I mua i nä metua o taua taata i faaorahia te mata ra. E haapäpü na metua i fänau matapöhia. Ua paari o ia, a ui atu na ia na iho. Parau mai ra taua tämaïti ra, Aore au i ìte , e taata hara o ia, Hoê roa a ù parau i ìte, e matapö to ù i mütaa iho, e teie nei te ìte nei au. Ua fäì mai ra, aore òutou i faaroo.

3-Ua faaroo vau.

Ietu ua faaroo òe i te Tamaiti a te Atua. E te Fatu, o vai o ia ia faaroo atu vau ia na. Ua hiò hoì òe ia na, e o ia hoì teie e parau atu ia òe nei. E te Fatu, ua faaroo vau. E ua tïpapa iho ra i raro i mua i ta na aro. I haere mai nei au i te ao nei ia tupu te parau-tià, ia ìte te feiä ìte òre ra, e ia riro te feiä ìte ra ei matapö. I teie parauraa a Ietu te matapö te taata ia tei òre i ìte i ta na hara.

O vai O ia, ia faaroo Vau.

E reo teie no te taata tei na roto i te pöuri i roto i te märamarama, Te vähi faufaa ta tätou e täpeà mai i roto i te mau manaò i faahitihia te paraparauraa a teie tämaïti i nià i te märamarama e te pöuri, aore ra te ìte e te matapö, teie manaò e vai noa te parau i to na vairaa, o tätou të faatano i nià i te parau, ia au i te hiòraa no te mahana e te âvaè. I mua i teie hohoà, e tano tätou e parau e, aita e fifi to te hape, to te taata ätearaa, to na òreraa e tanohia i nià i te märamarama, aore ra to na òreraa e färii i taua märamarama ra, hau roa atu, e tano tätou e parau e, te tahi te reira tauturu no te taata, aore ra e noaa i te taata te maitaì no roto i taua hape no na ra, nä roto ihoä rä i te haamanaòraa ia na e, ua ätea o ia i te tano. Hiò na tätou i te hoê metua ia haapii i ta na tamarii i te òhipa, ia hape, aore ra ia òre ia tano ta te tamarii raveraa, te ani ra te metua ia na ia haamata âpï faahou, e tae roa atu i te taime e päpü roa ai to na rima. I reira noa te haapiiraa e haere ai i mua. Ia fati te metua i mua i te amuamu, te taì, aore ra te riri o te tamarii, eita teie tamarii e haere i mua, e aita atoà te metua e tauturu ra ia na. Te reira mau te huru o te taata haapii. Eiaha rä o ia e vare, i te manaòraa e, no te mea ua hamama to na vaha, ua märamarama ia te tamarii. Te mea hoì ta na i manaò e, mea märamarama, e riro e, mea taa ê rii ta te tamarii hiòraa mai i te reira parau. Ua ìte maitaì te feiä e rave nei i teie tiàraa e, e tïtauraa tuutuu òre te reira ia rätou ia hoì noa mai nä nià i te mea ta rätou i haapii, no te mea te tumu o ta rätou òhipa, oia hoì te haamataraa e te faahopeàraa o ta rätou òhipa, te faatupuraa ia i te märamarama i roto i te tamarii.

No reira, te feiä të òre e färii i te märamarama e te türamaraa e horoàhia ra e te fenua, aore ra tei faahua riri i mua i te reira parau ei hunaraa i to rätou färii òre, e matapö ia e arataì ra i te matapö. Tei òre i färii i te märamarama, no te mea ia te au ra i te pöuri, e tei pärahi i roto i te pöuri ra, e au ia i te matapö.

 

Teraì òr.Faatura.

 

 

Repost 0
Published by Mapuanga terai - dans Aòraa
commenter cet article
17 mars 2017 5 17 /03 /mars /2017 00:13

Täpati 19 no Mati 2017.

Parau, Päpe.

Taiòraa.

Ioane 4,5-42

5 E tae atu ra o ia i te hoê ôire i Tämäria, o Titara te iòa, tei pïhaì iho i te maa fenua a Iatöpa i horoà atu no ta na tamaiti ra no Iotëfa. 6 Tei reira te âpoo pape a Iatöpa ra. E rohirohi aè ra Ietu i te haereà, pärahi iho ra i te hiti i taua âpoo pape ra. Ua tae i te ono o te hora ra.7 Ua haere mai ra te hoê vahine Tämäria e huti i te pape; ua parau atu ra Ietu ia na Hö mai na e inu. 8 Ua reva atu ra hoì ta na mau pipi i roto i te ôire e hoo i te mäa. 9 Ua parau mai ra taua vahine Tämäria ra ia na E aha òe te âti-Iüta na i ani mai ai ia ù, i te vahine Tämäria nei, i te pape, Eita hoì te âti-Iüta e au maitaì atu i to Tämäria. 10 Ua parau atu ra Ietu ia na, nä ô atu ra Ahiri òe i ìte na i ta te Atua i horoà mai ra, e tei parau atu ia òe na e Hö mai na e inu, ua ani mai ia òe ia na, e ua horoà o ia i te pape ora no òe. 11 Ua parau mai ra taua vahine ra ia na E te Fatu, aita a òe pätete, e âpoo hohonu teie. I hea ta òe pape ora e noaa ai 12 E rahi änei òe ia Iatöpa i to mätou metua ra, o tei horoà mai na mätou i teie nei âpoo pape, e ua inu o ia iho, e ta na mau tamarii, e te mau puaa 13 Ua parau atu ra Ietu ia na, nä ô atu ra O të inu i tënä na pape, e poìhä faahou ä ia. 14 Âreà të inu i te pape e horoàhia atu e au nei, e òre roa ia o ia e poìhä faahou, e riro rä taua pape e horoàhia atu e au na na ra, ei pape pihaa i roto ia na iho, e tià i te pihaaraa e tae noa atu i te ora-mure-òre ra.15 Ua parau mai ra taua vahine ra ia na E te Fatu, hö mai na i taua pape ra na ù, ia òre roa vau ia poìhä faahou, e ia òre hoì ia haere mai i ô nei e huti.16 Ua parau atu ra Ietu ia na A haere, a tii i to täne, e a hoì mai ai. 17 Ua parau mai ra taua vahine ra, nä ô mai ra Aita a ù täne. Ua parau atu ra Ietu ia na E parau-tià ta òe i parau mai nei e Aita a ù täne. 18 A toopae aè nei hoì a òe täne, e tënä na ta òe e taòto na, eere ia i te täne na òe. E parau mau ta òe i parau mai nei.19 Ua parau mai ra taua vahine ra ia na E te Fatu, e perofeta òe nei, te ìte nei au. 20 I haamori na hoì to mätou hui-metua i nià i teie nei mouà, e te parau nei òutou, tei Ierutarëma te vähi e tià ai ia haamori te taata. 21 Ua parau atu ra Ietu ia na. A faaroo mai na, e teie nei vahine, ua fätata te hora e òre e tae mai ai òutou i teie nei mouà, e e òre hoì e haere i Ierutarëma, haamori ai i te Metua. 22 Aore òutou i ìte i ta òutou e haamori nei, ua ìte mätou i ta mätou e haamori nei, no te âti-Iüta mai te ora. 23 Ua fätata rä, e teie nei hoì taua hora, e haamori ai i te Metua te feiä haamori mau ra, mä te värua e te parau mau: o te huru ia o te feiä haamori ta te Metua e tïtau nei. 24 E Värua te Atua, e te feiä e haamori ia na ra, e haamori ia mä te Värua e te parau mau e tià ai. 25 Ua parau mai ra taua vahine ra ia na Ua ìte au e, te haere mai na te Metia (o tei Faatähinuhia ra ia. E ia tae mai o ia ra, na na ia e faaìte mai ia mätou i te mau parau atoà ra 26 Ua parau atu ra Ietu ia na O vau ia e parau atu ia òe na. 27 I reira te taeraa mai ta na mau pipi, e mäere noa iho ra, o ia i paraparau atu i taua vahine ra; aita rä te hoê i parau atu e: «E aha ta òe e ui na, e E aha òe i paraparau atu ai ia na 28 Vaiiho iho ra taua vahine ra i ta na färii pape, haere atu ra i roto i te ôire, ua parau atu ra i te taata: 29 Mai haere na e hiò i te taata i faaìte mai ia ù i ta ù mau peu atoà nei. Eere änei tërä aè te Metia 30 Haere atu ra rätou ia na ra, mai roto mai i te ôire ra. 31 Ua parau na ta na mau pipi ia na, nä ô atu ra E Rapi, a àmu 32 Ua parau mai ra o ia ia rätou E mäa ta ù ia àmu aita òutou i ìte. 33 Ua parau iho ra te mau pipi rätou rätou iho I hopoi mai änei te taata i te mäa na na 34 Ua parau mai ra Ietu ia rätou: Teie ta ù mäa, o të haapaò i to na hinaaro o to tei tono mai ia ù nei, e të faaoti i ta na òhipa. 35 Eere te parau nei òutou: «E maha märama toe e àuhune ai «Inaha, e parau atu vau ia òutou, e faateitei i to òutou mata, e hiò i te mau âua ra, ua teatea ia i teie nei ua àuhune. 36 E te taata e ôoti ra, e utuà ta na, e ua haaputu i te maitaì no te ora-mure-òre ra, ia òaòa âpipiti, o të ueue e o të ôoti. 37 Ua tupu iho nei hoì te maa parau ra e: «Na te hoê e ueue, e na te tahi ê e ôoti.» 38 E tono vau ia òutou ei ôoti i tei òre i òhipahia e òutou na, na vëtahi ê i òhipa, e te faaö atu nei òutou i roto i ta rätou òhipa.39 E rave rahi mai ra i taua ôire ra to Tämäria i faaroo ia na i te parau a te vahine i parau atu ra e: «Ua faaìte mai o ia ia ù i te mau peu atoà na ù nei.» 40 E tae mai ra to Tämäria ia na ra, ua täpeà mai ra rätou ia na e pärahi io rätou ra, ua pärahi iho ra o ia i reira ia piti ruì. 41 E rave rahi hoì tei faaroo i ta na iho parau. 42 Ua parau aè ra rätou i taua vahine ra Eere atu ra i to te parau ta òe i parau mai ra i faaroo ai mätou, ìte hua aè nei mätou ia na iho; ua ìte atu ra mätou e o te Ora mau teie o to te ao, o te Metia.

Manaò

Tätou e himene i te Fatu, ma te haere tätou i mua i ta na aro mä te haamaitaì, E Atua Nui Tumu Tahi hoì e arii nui i nià i te mau atua atoà ra. Tei ta na rima te vähi hohonu o te fenua nei, e te teiteiraa o te mau mouà e te mau ànavai o te àru e te moana nui a hiva. E haere mai tätou, e haamori mä te piò i raro, e tuu i to tätou turi i te aro o tei hämani ia tätou nei, i te Atua Nui Tumu Tahi. O ia hoì to tätou Atua, o tätou hoì te nana no ta na ra âua, te mau mämoe i ärataìhia e ta na rima. Ia tià ia tätou, i teie nei mahana i te faaroo i ta na reo. Eiaha e faaètaèta i to tätou âau mai te taura e ùmehia ra ia tö a mutu atu ai, a rere noa atu to tätou värua i te vahi täuraa òre i te mëtëpara ra. Ia òre tätou, ia àa i te Atua, ìte noa ai tätou i ta na ra mau òhipa.

Ia òre tätou ia poìhä, e ia òre ia amuamu i te ère, i te mea e arataì te Atua i to na nünaa i roto i te ora mai te tamarii e hiaai ra i to na metua. I tià ai ia tätou ia tiàoro i te Fatu, i te nä ô raa e, a turäma ia mätou i te faufaa no Aroha e te Here. E haere âmui tätou nä mua i te mau rahu, o òe te tahi pae a hopoi ai i te rämepa ora ia märamarama te èà e tae ai i te puna vai. E inaha, i Mäòhi Nui nei e vahi tupuraa no te ora i nià i te mau mato, te mau päpä i te mau vahi atoà e tiàhia e te Mäòhi. I mua i te Atua Nui Tumu Tahi na, te tiàturi nei tätou Na na i papaì i taua mau mato i tahe mai ai te pape no roto mai, e te mau âpoo pape i hopuna ai. Te mea ta teie parau e heheu mai nei, te rahi ia o te pape e täpoì ra i te fenua. Riro noa ai e, no te raì e te fenua te parau mätamua i faahitihia, ua riro rä te pape ei ùputa i parauhia ai to te raì e te fenua. Oia mau, hou te mau mea atoà, te vai ra te pape.

Te hau te reira a te Atua e tiàhia ai to tätou faaroo, e hau to tätou i te Atua ra, i to tätou Fatu i te Ietu Metia ra. No na hoì tätou i ö ai i roto i te faaroo i roto i te maitaì i pärahihia nei e tätou, e te òaòa nei i te tiaìraa i te maitaì a te Atua. Te òaòa atoà nei rä tätou i te mau àti nei ua ìte hoì tätou e, na te pohe e faatupu i te faaòromaì, e na te faaòromaì e faatupu i te ìte, na te ìte e faatupu i te tiaì. E òre hoì te tiaì e faahaamä mai, no te mea ua niniihia mai te hinaaro o te Atua i roto i to tätou âau e te Värua Maitaì i horoàhia mai ia tätou nei. To tätou vai-paruparu-raa ra hoì i pohe ai te Metia i te tau mau ra, no te feiä paieti-òre ra. E òre hoì te hoê e haapohe no te tahi taata parau-tià, e faaòromaì rä paha te hoê taata atu i te pohe no te taata maitaì. Ia faarahi rä te Atua i to na aroha ia tätou nei, i te mea te vai taata hara noa nei ä tätou, i pohe ai te Metia no tätou nei.

I teie mahana e taiòraa huru roa tei faanahohia mai no tätou, e o ta tätou i faaroo i te papaìraa a Ioane i te pene 4, i te mau ìrava 5 e tae i te 42 te âparauraa a Ietu e te vahine Tämäria i te âpoo pape a Iatöpa ra. E rohirohi to Ietu i te haereà, Ua tae i te àhuru mä piti i te avatea te taime veàveà mau te poiha te poia tei faatupu i te rohirohi. Te hoê vahine Tämäria tei haere mai e huti i te pape i teie taime te tupuraa te âparauraa.

Ietu e âti-Iüta, te vahine e Tämäria i vai na te peàpeà i tupu i roto i teie na ôpü.

Te âpoo päpe.

Ia taiò maitaì anaè tätou i teie tuhaa, e ìte tätou i te àravihi o Ioane i te päpaìraa te òhipa e tupu nei i roto i te hoê tau atea, te tau no Iatopa, te tau, no Iotëfa, te tau no Ietu, e tae mai i teie mahana. Te horoà mai nei o Ioane i te hoê hohoà ora, no te òhipa e tupu ra i te hiti no teie àpoo päpe. Te horoà nei teie àpoo päpe i te hau no tei poiha i roto i te mau taata atoà tei rohirohi, e tae noa atu i te mau ànimara. E teie àpoo päpe te vai noa mai ra e tae roa mai i teie mahana.

E rohirohi to Ietu i te haere-noa-raa i raro aè i te hoê mahana puai, mai te poìpoì o na e ta na mau pipi te haere-noa-raa, ua tae i te avatea, te taime puai o te mahana. Ua poìa rätou, ua poiha, èita e tano faahou ia haere i mua, e faaea rii rätou i reira, e aita ta rätou e pätete hutiraa i te päpe, e àpoo hohonu hoì teie tei naeàhia e 32 metera.

Teie mai nei te hoê vahine no taua vahi ra no Tämäria, ta na färii päpe i nià i ta na upoo, e ta na pätete e te taura i ta na rima. Ua mätau maitaì teie vahine i te haere i teie hora, te taime taata òre, e i taua mahana ra te vai ra te hoê taata i reira tei òre roa ò ia i mätau ia na. E taata âpï i roto i to na òire no Titara, tei äni atu ia na i te päpe.

Te haamoriraa

Eiaha tätou e manaò e, E pae tane ta teie vahine, e pae ra atua ta na e haamori nei. E mau atua teie no Atura, tei taìtaìhia mai, mai Päpuronia mai.

1) TUTOTA – PENOTA E atua teie no te mau fare o te mau pötii

2) TUTA - NERETARA Na atua ê atoà teie tei òre i päpü te auraa, te parauhia ra e na atua teie

3) HAMATA - ATIMA tiaì i te vahi o te pohe.

4) AVA - NIPEHATA Teie na atua hoê no te ruì, e hoê no te paruru….II Arii 17 : 24 – 31…

5) TARATATA Teie to mau tane ra a te Vahine Tämäria.

E tià ia parauhia 158 mätahiti te mäoro te vai-noa-raa to Tämäria mai teie te huru, i te au-òre-raa i te Àti Iuta. Te tumu no nià ia i te oraraa faaroo, ua tutuìhia te fare pureraa a to Tämäria i nià i te faaueraa a te mau tahuà no Ierutarëma, ia au te mau tuatäpaparaa. O Teretima te mouà i faatiàhia teie fare pure i te 332 mäahiti hou o Ietu Metia. E i te mätahiti 128 hou o Ietu Metia i tutuìhia ai. Na roto i teie mau ìrava 16 e faaea i te 26, ua mäheu te parau no te haamoriraa îtoro a te nunaa Tämäria, na roto i teie vahine. Ta rätou vahi haamoriraa i nià i te mouà, ua faa-òre-roa-hia, i te mea aita te reira i au i te mau tahuà no Ierutarëma.

Te maere o te mau pipi.

No te mau pipi te uiui nei ia rätou te òhipa a Ietu e rave nei. Te âparauraa i teie vahine èita i te mea tià ia au te faanahoraa a te peu âti-Iüta. Aita ra rätou i ui noa atu. No te vahine Tämäria ua vai iho ò ia i ta na pätete i pïhaì iho i te àpoo päpe, te mea ta na i mätau i te rave i te mau mahana atoà, ua hoì ò ia i te òire ma te pätete òre, tei roaa ra ia na te päpe ora noo mai i te Atua ra, te hoê päpe tei òre roa ò ia e mätau i te inu. E päpe tei faaora ia na, i tià ai ia na i te haere i te òire no te faaìte i ta na i ìte i roto ia Ietu, ma te parau e, E ÈRE ANEI TERA AÈ TE METIA ?

E òaòa i te rahi to te Vahine Tämäria to na ìteraa i to na hape, i roto i te mau parau ta Ietu i faaìte no na. E ua riro te reira èi parau òaòa. Pii haere atu ra ò ia i teie parau òaòa, MAI HAERE NAÈ E HIO I TE TAATA. Ua faaìte o Ietu i te mea tano no teie vahine, e ua färii ò ia, haere mai ra to Tämäria e hiò ia Ietu.

FÄÌRAA FAAROO.

Te mau tuatapaparaa ta tätou i hiò mai, aita aè i te hoê taataahiraa âvae o ta Ioane i haapou ia tätou i roto i teie àpoo päpe e 32 taahiraa. O ta Ietu i horoà ia tätou i te hoê òhipa maere rahi e te moè i mua i to tätou tiàturiraa. Te òhipa ra ta Ietu i rave te ìriti nei ò ia i mua i to Tämaria te hoê òhipa tei òre roa teie nunaa e ìte e, e tupu. Òia hoì to rätou ìteraa e o Ietu te Metia, tei ìte i roto i te hohonuraa o te âau o te taata, mai teie Vahine Tämaria. Eita ra i te faaìteraa a teie vahine i tiàturi ai to Tämaria, i to Ietu ra faaeraa i reira e piti ruì i tiàturi ai to Tämaria, teie Metia ta rätou e ìte nei, o te Fatu âpï ia noo roa mai i te Atua ra. Tei haapihaa i te päpe ora i roto i to rätou âau. E taua pihaa päpe ra ua tupu ia i roto i te âau o to Tämaria i te parauraa ia Ietu e, o te Ora mau teie o to te ao o te Metia. Te riro nei teie parau èi Fäìraa Faaroo âmui na te nunaa Tämaria. Hoê Fäìraa tei huri i te mau mea tahito i raro, teie Metia o ta rätou i faaìte hua i to rätou tiàturiraa, tei haapihaa i te ora âpï ia riro mau rätou èi ìte no te mau òhipa atoà a Ietu i rave e piti ruì i ropu ia rätou. Te vahi faahiahia i roto i teie nei Fäìraa Faaroo, aita to Tämaria i Fäì noa, no rätou, no to te ao atoà ra.

Ua horoà te Parau e te Päpe i te vahine Tämaria i te puai no te faatupu i te fäìraa faaroo âmui a to na nünaa, o Ietu, o te Ora mau teie o to te ao o te Metia.

E au ra ia hiòhia e, te faaìte-noa-hia mai ra te vähi i reira te Värua o te Atua e òhipa atu ai. Te òhipa mätamua

hoì ta te Atua i rave, te reira atoà rä te parau mätamua ta na i parau, te ìritiraa ia i te ùputa o te märamarama, te parau hoì tei faaìte mai e, te vai ra te Atua. Te auraa, no te mea i parau te Atua, i ìtehia ai e, te vai ra te Atua, e te tüàti noa ra hoì te parau o te Atua i te parau o te märamarama. Aita rä teie märamarama e türama noa ra i te ano o te fenua, ua faaìte atoà mai rä i te pape i te tiaìraa i te parau e matara ai te ùputa o te ora ta na e mau ra.

Ua fänau te nünaa Tämaria i te Päpe e te Parau mai te hoê àui ra te huru ia àtuàtuhia i te ora paruparu ta rätou e mau ra i pärahi ai o Ietu e piti ruì i pïhaì iho ia rätou. Oia atoà te fenua, riro noa ai ei puna no te ora, e hinaaro ä o ia i te pape ei haapäpüraa i te ora ta na e horoà tuutuu òre noa ra. Mai te metua hoì tei riro ta na tama ei òaòaraa na na, ua riro atoà ta na rahu ei òaòaraa no te Atua. E no te mea i roto i te parau o te pape e te fenua, te faahiti atoà nei tätou i te parau o te taata, e tano tätou e parau e, ua riro te taata ei haapotoraa no te parau o te fenua, oia te rahu a te Atua, e aita atu e vähi e märamarama ai tätou i to na Parau maoti rä, i roto i te Päpe.

 

Teraì òr. Faatura.

 

 

 

 

 

 

 

 

Repost 0
Published by Mapuanga terai - dans Aòraa
commenter cet article
10 mars 2017 5 10 /03 /mars /2017 11:51

Täpati 12 no Mati 2017.

A tià

Mätaio 17,1-9

To Ietu faahuru-ê-raa-hia

(Mär 9.2-9; Rut 9.28-36)

1 E ruì ono aè ra, ua rave aè ra Ietu ia Pëtero, e ia Iatöpo, e ta na taeaè ia Ioane, e ua arataì atu ra ia rätou i nià i te hoê mouà teitei. 2 E faahuru-ê-hia iho ra o ia i mua ia rätou; ànaana aè ra ta na mata mai te mahana ra, e teatea aè ra to na àhu mai te märamarama ra. 3 E inaha, ua fä mai ra Möte räua o Èria ia rätou ra, e täuàparau anaè iho ra räua e o Ietu. 4 Ua parau atu ra Pëtero ia Ietu, nä ô atu ra E te Fatu, e mea maitaì ia pärahi tätou i ô nei. E ia tià ia òe ra, e faatià vau i ô nei e toru aè fare autä no òe te tahi, no Möte te tahi, no Èria hoì e tahi. 5 E te parau noa ra o ia, e inaha, täpoìhia mai ra rätou e te hoê ata ànaana e inaha, te hoê reo mai ra no roto i te ata, i te nä-ô-raa mai e O taù Tamaiti here teie, ua mauruüru roa vau ia na. A faaroo ia na 6 E ia faaroo aè ra te mau pipi i te reira, ua tïpapa iho ra rätou i raro, mä te mataù rahi. 7 Ua haafätata mai ra Ietu i pïhaì iho, faatiàià mai ra ia rätou, nä ô mai ra A tià, eiaha e mataù. 8 E ia nänä aè ra i to rätou mata i nià, aore roa e taata i ìteä e rätou, mäori rä o Ietu anaè ra. 9 E tei to rätou pouraa mai mai nià i te mouà, ua faaue mai ra Ietu ia rätou Eiaha roa atu òutou e faaìte i te taata i ta òutou i ìte aè nei, e tae noa atu i te taime e tiàfaahou mai ai te Tamaiti a te taata mai te pohe mai.

Manaò.

Teie märama ta tätou i àvari aè nei, märama tïtauraa tei faanahohia e ta tätou Ètärëtia Porotetani Mäòhi i roto i te tärena òhipa no te mätahiti. Teie piiraa no te ìteraa ia te faufaa e vai ra i roto i te mau tamarii tamaroa, mau tamarii tamahine e tià e färii i te faaineineraa i te mau hopoià e mauhia nei e ta tätou Ètärëtia. E toru tiàraa e vai nei, Tiàtono, Haapii Parau Maitaì, Òrometua. A faaroo mai na tätou i to te Atua Nui Tumu Tahi tïtauraa ia Âperäma i te päpaìraa a te Tenete pene 12 te ìrava 1 I parau mai hoì te Fatu ia Âperäma, E haere ê mai òe i to fenua na, i to fëtii, e te ùtuafare o to metua na, i te fenua na ù e faaìte atu ia òe na ìrava 2 e faariro hoì au ia òe ei nünaa rahi, e haamaitaì au ia òe, e faarahi atu vau i to òe iòa, e riro òe ei maitaì. Ìrava 3 e o tei haamaitaì ia òe ra, o ta ù ia e haamaitaì, e o tei faaìno ia òe ra, o ta ù ia e faaìno e ei ia òe e maitaì ai te mau fëtii atoà o te ao nei. Ìrava 4 Haere atu ra Âperäma i ta te Fatu i parau mai ia na ra; e haere atoà atu ra hoì Rota a hitu aè ra o Âperäma àhururaa i te mätahiti e pae tiàhapa, i reva atu ai o ia mai Harana atu.

Ia faaroo tätou i teie mau parau e tupu te òaòa i te Fatu, ma te haamaitaì na roto i te mau mauahaa ùpaùpa, e himene i te himene âpï, faaòto maitaì mä te òaòa e te au mäite. I te mea e parau-tià ta te Fatu, e te haavare òre. Hinaaro mau to te Atua Nui Tumu Tahi i te parau-tià e te au, ia î te fenua i te maitaì a te Fatu e tupu na roto i te hau e te òaòa. Na te parau a te Fatu i oti ai te mau raì, i te aho o to na vaha. I haaputu i te Moana Nui a Hiva te tai ei puèà, ma te vaiiho i te moana i roto i te fare vairaa. Ia mataù te mau fenua atoà i te Fatu, e ia höriri to te ao atoà nei ia na. E ao to te fenua, o te Atua Nui Tumu Tahi to rätou Fatu e te mau taata i mäìtihia e ana ei tufaa na na. O te Fatu tei hiò mai, i ta na mau tamarii atoà ma te Aroha e te Here. Ia haafäito i to rätou âau, e o ia tei hiòpoà mai i ta rätou mau räveà. No te mea Aore e nünaa i ora i te rahi o to na puai, aore e taata püai i ora i te rahi o te püai. E mea faufaa òre te mau raveà puai ei haapüraa, aore e taata e ora i to na püai rahi. Te mata o te Fatu tei nià i te nünaa tei mataù ia na, i nià i te feiä i tiàturi i to na ra aroha e te here, no te faaora ia rätou i te pohe. Te faahanahana nei to tätou värua i te Fatu; o to tätou ia tauturu, e to tätou ia päruru. Eiaha tätou e haamä i te parau o to tätou Fatu, e eiaha atoà e haamä i ta na tïtauraa. E färii tätou i te òhipa ta te Èvaneria i faanaho ia itoito i te faatupuraa i te iòa o te Atua ra. Tei faaora ia tätou nei, e ua parau ia tätou i te parauraa moà ra, eiaha no ta tätou òhipa, no to na iho rä hinaaro, e te aroha mau i horoàhia mai i te Metia ra ia Ietu no tätou, hou teie nei ao ra. Ua faaìte-hua-hia mai rä i teie nei i te färaa mai o to tätou ora o Ietu Metia, o tei faaòre i te pohe nei, e ua faaìte päpü mai i te ora mure òre i te Èvaneria nei ra.

O ta tätou ia i faaroo i te täiòraahia Mätaio i te pene 17, i te mau ìrava 1 e tae i te ìrava 9 To Ietu faahuru-ê-raa-hia i nià i te mouà teitei e toru taata Ietu i mäìti no teie òhipa te mau tià o te fenua, Pëtero, Iatöpo, Ioane, i nià i te mouà teitei faahuru-ê-hia iho ra o ia i mua ia rätou, ànaana aè ra ta na mata mai te mahana ra, e teatea aè ra to na àhu mai te märamarama ra. Fä mai ra Möte te tià o te Ture e o Èria te tià o te mau Perofeta tei tähitihia e te Atua i nià i te raì te täuàparau ia Ietu, i te òhipa e faatupu i roto i te taata o te ao nei. Te mau tià o te ao nei tei ìte i teie òhipa maere e te faahiahia. Ua piri te ùputa o to rätou tiàturiraa i te mau haapiiraa a Ietu no te parau o te ora no te mea e òre e Ture a te Atua e tähuti, e òre te mau tohu a te mau Perofeta e tähuti. Teie ra ta Pëtero e parau nei e faatià e toru fare autä no te tuu i te tähuti òre i roto, e te parau noa ra o ia, e inaha, täpoìhia mai ra rätou e te hoê ata ànaana, te hoê reo mai ra no roto i te ata, i te nä-ô-raa mai e O taù Tamaiti here teie, ua mauruüru roa vau ia na. A faaroo ia na, ia faaroo te mau pipi i teie mau parau , ua tïpapa iho ra rätou i raro, mä te mataù rahi, haafätata mai ra Ietu i pïhaì iho, faatiàià mai ra ia rätou, nä ô mai ra A tià, eiaha e mataù. E ia nänä aè ra i to rätou mata i nià, aore roa e taata i ìteä e rätou, mäori rä o Ietu anaè ra. Pou mai ra mai nià i te mouà, ua faaue mai ra Ietu ia rätou Eiaha roa atu òutou e faaìte i te taata i ta òutou i ìte aè nei, e tae noa atu i te taime e tiàfaahou mai ai te Tamaiti a te taata mai te pohe mai.

Òia mau, e Mäòhi Nui e A tià, eiaha e mataù ua ìte tätou te mea maitaì tei anoenoe i roto i to tätou âau no te pii e tero, tero, ia î to tätou nünaa i te Aroha e te Here o te Atua Nui Tumu Tahi. I roto i te hinaaro o ta Ietu e parau nei eiaha e mataù i te faaìte i te parau tià e tïtauraa teie, no te faatupuraa i te parau tià. No te mea rä eere teie i te tahi parau taa e te nahonaho maitaì, i te mau taime atoà, te tiaìhia ra te taata ia faaòhipa i to na tiàmäraa, to na feruriraa, to na paari, no te rave i te mea ta na e manaò ra e, mea tià ia rave, aore ra ia parau. Te auraa, aita te Atua e nä murimuri noa nei i te taata i te parauraa ia na e a rave i terä, eiaha e rave i terä. I te mau taime atoà rä, tei te taata te faaotiraa hopeà, i roto hoì i ta na e rave atu, te vai ra ia te tano, e te vai ra te hape. Te tumu, no te huru ihoä ia o te mataù. Ia ìte te taata te mea ta na e mataù ra, ua hope atoà te parau o te mataù. E inaha, te hinaaro o te Atua ia na àita i täôtiàhia i nià i te mea tei oti ia na i te rave, aore ra te mea tei noaa mai ia na, e tano ia parauhia e, e hinaaro tüatau to te Atua i te taata. Te tahi atoà fifi to te mataù, te mea ia e, ei mea faaära noa ia na, te vai ra hoì te taime e ara, te vai ra rä te taime, eita roa atu e ara aore ra, ua ara te mataù, eita rä te tino e pähono, oia hoì eita te reira mataù e riro mai ei òhipa.

Te tanoraa mau, te mataù, eere i te tahi òhipa ta ù e rave no ù iho, no te taata atoà rä ta ù i òre i hinaaro ia topa i roto i te peàpeà, nä roto i to ù huru, ta ù parau, e te òhipa ta ù e rave. E tano tätou e parau e, ia ìte òe i te mataù ia òe iho, e ìte atoà òe i te mataù i te täuaro, ia au i te manaò, ta òe i hinaaro ia ravehia no òe, te mea atoà ia e tano òe e rave atu no te tahi. Ia òre to òe âau ia riro mai te hiò hipa i reira e puta atoà ai te parau o te tahi, hape noa ai òe, te tano noa ra teie reo to Ietu A tià, eiaha e mataù, O vau ihoä te haamataraa o te mau mea atoà, ia täua rä e maitaì ai te oraraa, mai te òre e haamoè e, te vai atoà ra räua, nä reira hoì o rätou. Te haapii noa mai ra te reira e, i roto i te mau òhipa atoà ta tätou e rave, te reo ihoä te täviri i te ùputa o te märamarama. E maere änei hoì tätou, inaha na te Parau i ìriti i te ùputa o te märamarama e te ora.

 

Teraì òr Faatura.

 

 

 

Repost 0
Published by Mapuanga terai - dans Aòraa
commenter cet article
3 mars 2017 5 03 /03 /mars /2017 00:34

Tapati 05 no Mati 2017.

ÔROÀ

Fänau

Mätaio 4,1-11

To Ietu tämataraahia/faahemaraahia.

(Mär 1.12-13; Rut 4.1-13)

1 E ua ärataìhia atu ra Ietu e te Värua i te mëtëpara, ia tämatahia o ia e te tiàporo. 2 I muri aè i to na haapaeraa i te mäa e maha àhuru ao e maha hoì àhuru ruì, poìa iho ra o ia. 3 Ua haere mai ra te tämata/faahema, nä ô mai ra ia na E Tamaiti òe na te Atua ra, a faaue i teie nei mau ôfaì ia riro ei färaoa. 4 Ua pähono atu ra o ia Ua päpaìhia E òre te taata e ora i te färaoa anaè ra, i te mau parau atoà rä no roto mai i te vaha o te Atua. 5 Ua arataì atu ra te tiàporo ia na i roto i te ôire moà, tuu atu ra ia na i nià iho i te àuru o te hiero 6 e ua parau atu ra ia na E Tamaiti òe na te Atua ra, a haamaìri ia òe iho i raro ua päpaìhia hoì e, E faaue o ia i ta na mau merahi, e na rätou hoì e mau ia òe i to rätou rima, ia òre to âvae ia tiàìa noa atu i nià i te ôfaì. 7 Ua parau mai ra Ietu ia na Ua päpaì-atoà-hia e, Eiaha òe e àa i te Fatu to Atua. 8 Ua arataì faahou atu ra te tiàporo ia na i nià i te hoê mouà teitei roa, ua faaìte mai ra ia na i te mau hau atoà o te ao e to rätou hinuhinu. 9 Ua parau mai ra ia na E höroà atu vau i teie nei mau mea atoà no òe, ia tïpapa mai òe i raro i to ù pae âvae e ia haamori mai ia ù. 10 Ua parau atu ra Ietu E haere ê atu òe, e Tätani Ua päpaìhia hoì O te Fatu, to Atua, ta òe e haamori, e o ia anaè ra ta òe e tävini. 11 Faaruè iho ra te tiàporo ia na, e inaha, e mau merahi tei haere mai e ua täuaro mai ra ia na.

Manaò

I teie hepetoma tïtauraa, mea tià ia tätou e faahaèhaa i mua i te Atua Nui Tumu Tahi, i te mau maitaì e faanaòhia nei e tätou. I teie atoà mahana e haamanaò ai tätou a 220 mätahiti teie nei, faahanahanaraa tätou i teie mau òhipa i tupu na i Mäòhi Nui nei. I tià ai ia tätou i te parauraa e, e Aroha mai ia mätou e te Atua, i taua hämani maitaì no òe ra, e no te rahi o to òe ra hämani maitaì e parai òe i ta mätou nei mau hara. E horoi hua mai òe i to mätou nei mau ìno. Te fäì nei hoì mätou i ta mätou nei mau hara, e te vai noa nei ä to mätou ìno i pïhaì iho ia mätou. I mua i to aro, to òe anaè ra, i hara ai mätou nei, e i mua i to mata i rave ai mätou i teie nei ìno. Ia faatiàhia hoì ta òe parau, e eiaha e faahapahia ia parauhia ra. Ìnaha, i fänauhia mai mätou mä te hara, e i töhia mätou mä te ìno. Ìnaha, o te parau mau no roto i to òe mau hinaaro e itoito ai mätou. E haapii mai òe ia mätou i te haapaò maitaì i te mau vähi moè ra. E tämä mai òe ia mätou i te mau tiare no Mäòhi Nui nei e ia mä mätou, e ùoùo mätou maite tiare Maurua. Faaìte mai òe ia mätou i te òaòa e te reàreà, ia òaòa mätou i te ìteraa i te faufaa o te mau àru i Mäòhi Nui nei. E faahoì mai òe i te òaòa i te ora na òe ra, e ia täuturuhia mai mätou e te âau tiàmä ra. E i reira mätou e haapii ai i te maitaì o to Aroha, Ia ora mätou ia òe i te hara toto ra, e te Atua e, te Atua e ora ai mätou nei e na to mätou mau vaha e himene pii hua i to òe ra aroha. E vëvete na òe, e te Fatu, i to mätou mau vaha, e na to tätou mau vaha e ârue ia òe. I te mea ua hämani atoà òe ia mätou i te pü fenua te repo o Mäòhi Nui nei ua haapüaì noa na òe i to aho ora i roto i to mätou âpoo ihu, riro aè ra mätou èi taata Mäòhi ora. E ruperupe mau to Mäòhi Nui e te heeùri te mau räau maitataì ia hiò.

Ua faaäpiäpihia mätou e te mau faahemaraa o to mätou oraraa, ua rau te reira e puai rahi to te mau faatiäniäniraa te nehenehe ia hiò e ia faaroo, te rahiraa o te mau taime te hema nei mätou. Te mau faatiäniäniraa, i nià i te maa a vëra e ta tätou e au ra ia àmu, morohi aè ra ta tätou maa, e to tätou rave ra te huru o vëra e to na hohoà, morohi aè ra te huru te hohoà o te Mäòhi, àhu atoà atu ra tätou i te àhu o vëra, marau aè ra te àhu Mäòhi. I mua i teie mau parau te ìte nei tätou e te turu atoà ra tätou teie huru oraraa, tei parauhia te täpihooraa ôtià òre tei topahia tei iòa te faatupuraa òhipa, i teie huru faanahoraa te faateähia nei te taata Mäòhi i to na fenua, te fenua to na ora, ta na maa, to na hohoà, to na huru e to na àhu.

No reira te taiòraa o teie mahana Mätaio pene 4, te mau ìrava 1 e tae i te 11 To Ietu tämataraahia e aore faahemaraahia, na te Värua i ärataì ia Ietu i te mëtëpara, ia tämatahia o ia e te tiàporo. E maha àhuru ao e maha hoì àhuru ruì haapaeraa i te mäa, ua poìa ua paruparu. I teie taime te tupuraa te òhipa a te tiàporo. E Tamaiti òe na te Atua ra, a faaue i teie nei mau ôfaì ia riro ei färaoa. Te pähonoraa Ietu Ua päpaìhia E òre te taata e ora i te färaoa anaè, i te mau parau atoà rä no roto mai i te vaha o te Atua. I roto i te ôire moà, tuu atu ra ia na i nià iho i te àuru o te hiero, E Tamaiti òe na te Atua ra, a haamaìri ia òe iho i raro, ua päpaìhia e, E faaue o ia i ta na mau merahi, e na rätou hoì e mau ia òe i to rätou rima, ia òre to âvae ia tiàìa noa atu i nià i te ôfaì. Parau mai ra Ietu Ua päpaì-atoà-hia e Eiaha òe e àa i te Fatu to Atua. I nià i te hoê mouà teitei roa, ua faaìte mai ra ia na i te mau hau atoà o te ao e to rätou hinuhinu. E höroà atu vau i teie nei mau mea atoà no òe, ia tïpapa mai òe i raro i to ù pae âvae e ia haamori mai ia ù. Ietu E haere ê atu òe, e Tätani Ua päpaìhia hoì O te Fatu, to Atua, ta òe e haamori, e o ia anaè ra ta òe e tävini. Faaruè iho ra te tiàporo ia na, e inaha, e mau merahi tei haere mai e ua täuaro mai ra ia na.

Te peàpeà o Ietu, no te mea ua topa te tiàporo i roto i te hoê faanahoraa tei haamoè i to na hiroà i roto i te pöuri no te teòteò, ua moè-atoà-hia ia na te haapaò i te òhipa a te Atua Nui Tumu Tahi. Mai te fenua e faaôteo mai i te räau rii ra, e mai te àru e faatupu i ta na huero, na te Fatu ra na Te Atua Nui Tumu Tahi atoà e faaôteo mai i te parau tià e te haamaitaì i te aro o te mau fenua atoà nei. Mai te Atua hoì e haapii nei i te taata i te ora nä roto i te fenua, e tiàturi atoà tätou e, nä roto i te fenua, e haapii ä te Atua ia tätou i të au ia tätou ia rave, ia tupu to na Hau i te fenua, ia hanahana to na iòa moà, e ia ìte faahou te nünaa mäòhi i te òaòa, te maitaì, e te hau. No reira, e haamanaò e te nünaa mäòhi e, o òe e te fenua, hoê ä ia, te fenua e te Atua, hoê ä ia. Mai te Atua tei ineine i te âpee ia tätou i roto i te ora, ua ineine atoà te fenua i te tautururaa ia tätou i te fänaòraa i te ora. Ia here òe ia òe, ia here òe i to òe fenua, ua here ia òe i te Atua ; e ua here hoì òe i te Atua ra, eita ia e moèhia ia òe te haapaò i te òhipa a Te Atua Nui Tumu Tahi, e te hiò i tei ravehia e tana rima, inaha to na te reira aroha e to na here ia tätou.

I mua i te mau fifi ta Ietu e haapii ra i te tiàporo, mea maitaì tätou ia hiò faahou i to tätou parau i roto i te ôpuaraa a te Atua. E aha mau te tumu e te auraa o te oraraa o te taata i roto i te ôpuaraa a te Atua, mai te peu e auraa faahou to teie parau no tätou i teie mahana. E fäìraa tumu na tätou e, e here te Atua. Aita atu ia e tumu, aita hoì e auraa to te rahu a te Atua maoti rä, te faaìteraa i to na here i te taata. E i te hämaniraa hoì te Atua i te taata ei täne, ei vahine, aita atu ia e tumu maoti rä, no te here, ia riro e, na räua e faatupu atu i te reira parau. Te reira atoà ia te tumu e te auraa o ta na haamaitaìraa ia räua a parau ai o ia e, Ia fänau òrua e ia rahi roa, e faaî i te fenua, e haavï iho. Te ìte ra tätou e, tei roto ihoä te fänau i ta te Atua ôpuaraa no te taata, ei fänau rä ta te täne e te vahine i faaoti âmui. Ia òre, tei hea ia te parau o te here. I roto rä i teie here ta te Atua i hinaaro na te täne e te vahine e faatupu atu, hoê mea faufaa roa tei moèhia i te taata, te haavï-atoà-raa i te here. Tatararaa : te haavïraa i te here, eere te hereraa nä roto i te haavï, te òreraa rä e vai iho i te here ia haere hänoa na nä te mau vähi atoà ta na i hinaaro, ia au i te nenevaraa o te taata. No reira e haavï ai i te here, oia hoì, i te mau taime atoà, e faahoì i te here i nià i te rëni ta te Atua i faanaho mai. Eere te here i te tahua haùtiraa e te tämatamataraa na te taata, e taime rä e faatupu ai te taata i te hinaaro o te Atua. Aita tätou e parau nei e, te tumu o te oraraa i roto i te ôpuaraa a te Atua, te fänau ia. Eere roa atu te reira. Eiaha rä te taata e haamoè e, tei roto atoà te fänau. Ua faaruè te tiàporo i te Fatu, ma te òre e färii i te haafänauraa a Ietu, na roto i te mau hinaaro o te parau a te Atua Nui Tumu Tahi.

 

Teraì òr. Faatura.

 

 

Repost 0
Published by Mapuanga terai - dans Aòraa
commenter cet article
23 février 2017 4 23 /02 /février /2017 23:50

Täpati 26 no Fëpuare 2017.

Mäìti.

Taiòraa.

Mätaio 6,24-34

Te Atua, e aore ra, te moni

(Rut 16.13)

24 E òre e tià i te taata ia tävini i nä fatu toopiti; e riro o ia i te au-òre atu i te hoê e te au atu i te tahi e aore ra, e riro o ia i te àti atu i te hoê e te tähitohito atu i te tahi. E òre e tià ia òutou ia tävini i te Atua e te Moni.

Te mau tapitapiraa

(Rut 12.22-31)

25 No reira, te parau atu nei au ia òutou eiaha e tapitapi i to òutou ora, i ta òutou e àmu e ta òutou e inu e no to òutou tino, i ta òutou e àhu. Eere änei mea faufaa aè te ora i te mäa, e te tino i te àhu? 26 A hiò na i te mau manu o te reva aore rätou e ueue, aore hoì e ôoti, aore a rätou fare puèraa/haaputuraa mäa na to òutou rä Metua i te raì e faaàmu ra ia rätou Eere änei mea faufaa aè òutou ia rätou? 27 E o vai hoì i roto ia òutou ia tapitapi ia na iho, e ia haamäoro i to na oraraa e ia hoê aè tüpiti i te roa? 28 E aha òutou i tapitapi ai i te àhu? A hiò na i te mau riri o te mau âua e te huru o to rätou tupuraa Aore hoì rätou e rave i te òhipa, aore hoì e nino. 29 E parau atu rä vau ia òutou: aita o Toromona iho, i roto i to na hanahana rahi, i faaàhuhia mai te hoê o teie mau riri. 30 I nä reira hoì te Atua i te faaùnaùna i te àihere e vai nei i teie mahana i roto i te mau âua e ànanahi e hurihia i roto i te auahi, eere änei e hau atu tä na e rave no òutou, e te feiä faaroo täpetepete. 31 No reira, eiaha ia òutou e tapitapi, mä te parau E aha ta tätou e àmu ? E aore ia, E aha ta tätou e inu e aore ia E aha ta tätou e àhu? 32 Te ìmi tämau nei hoì te mau êtene i taua mau mea atoà nei ua ìte hoì to òutou Metua i te raì ra e te hinaaro ra òutou i te reira. 33 E mata na rä òutou i te ìmi i te Hau o te Atua e ta na parau-tià, e höroà-atoà-hia mai taua mau mea ra ia òutou. 34 No reira, eiaha e tapitapi i to ànanahi, nä ànanahi e tapitapi i tä na iho. O te mahana o to na iho ìno.

Manaò

Te âmui nei tätou i teie taime faufaa no te haamoriraa i te Atua e no te faaroo i ta na parau. Te tiaì mau nei to tätou värua i te Atua, no na mai hoì to tätou ora. O ia anaè ra to tätou papa e to tätou ora tei faatià ia tätou, ia òre tätou e âueue hua. Te àua haaàtihia nei tätou e te mau ôpuaraa a te ìno i te taata nei e pohe anaè ai tätou, e riro hoì tätou mai te patu âueue ra, e mai te âua i pararï ra. Te fërurihia nei rä ia hurihia o ia i raro i to na ra vähi teitei, te hinaarohia ra i te haavare. Te haamaitaì nei to rätou vaha, te tupu ra te tuhi i roto i to rätou âau. Te parau nei ra tätou, i to tätou värua, o te Atua anaè ra ta òe e tiaì, tei ia na hoì to tätou manaòraa. O ia anaè to tätou papa e to tätou ora, e to tätou ora tei faatià ia tätou, e òre tätou e âueue hua. No ô i te Atua ra to tätou ora e to tätou hinuhinu. O to tätou pare e ètaèta ai to tätou haapüraa, o te Atua ia. E tiàturi tätou i te Atua Nui Tumu Tahi eiaha e faaea, e te mau taata e ninii hua i to tätou âau i mua ia na o te Atua anaè ra to tätou haapüraa. E mea faufaa òre te taata rii haèhaa, e te mau taata teitei ra, e haavare ia ia tuu-âpipiti-atoà-hia i roto i te fäito ra, e mämä rahi to rätou i to te faufaa òre ra. Eiaha e tiàturi i te hämani ìno, e eiaha e fänaò i tei haruhia ra. Te tupu ra i te rahi te taoà, eiaha e haamau i to òutou âau i reira. Hoê aè nei a te Atua parauraa, â piti aè nei o ù faarooraa E no te Atua te mana. Tei ia òe atoà, e te Fatu, te aroha, te tähoo mai ra òe i te taata atoà i ta na ra òhipa i rave ra.

No reira ia pärahi fatata noa tätou i pïhaì iho i te mau hinaaro o te Atua Nui Tumu Tahi ia òre tätou ia faaruèhia mai e te Fatu e ia manaò-noa-hia mai tätou. Ia òre tätou ia haamoè ia Mäòhi Nui to tätou Metua Vahine horoà ora i te nünaa Mäòhi ia faaroo tätou i teie parau i päpaìhia e Ìtaia i te pene 49 i te ìrava 15 te naò ra E moè änei te àiü i te metua vahine mau iho; e aita ä atu ra e ìte i te aroha i te tamaiti no to na iho ôpü. E, e moè ä ia ia na; eita rä òe e moè ia ù.

E teie nei, a manaò ai tätou e tävini anaè tätou no te Metia, e tïàau no te parau moè a te Atua Nui Tumu Tahi ra. E tïtauhia hoì te tïàau nei, ei taata haapaò mau. E mea iti haìhaì roa ia ta tätou e feruri nei, e i te mau manaò o te taata nei, e aita atoà hoì tätou i feruri no tätou iho. Aore hoì tätou nei i ìte i ta tätou nei hapa, eita rä tätou e tiàhia e te reira, o të hiòpoà mai rä ia tätou nei, o te Fatu ia. E teie nei, eiaha e faahapa ätea noa ia tae mai ä te Fatu, na na e tuu i te ätea i te mau mea pöuri hunahia nei, e faaìte hoì i te mau feruriraa o te âau taata nei, noaa iho ra i te taata atoà te haamaitaì no ô mai i te Atua ra i reira.

Teie mau manaò ta tätou i faaroo aè nei, e arataìraa ia ìte tätou i te hopoià ta Ietu e tïtau nei ia faaìte i te mau taata atoà tei tiàturi e tae noa atu tei òre e tiàturi. I to tätou faarooraa i ta tätou parau i te täiòraahia Mätaio i te pene 6, i te mau ìrava 24 e tae noa atu i te ìrava 34. E täiòraa no te parau o te tävini i mua i te mäìtiraa ta tätou i faaroo aè nei i teie mahana mai teie to na faanahoraa,

-Te Atua, te tävini.

-Te Atua, te moni

-Te vai, te tino

-Te maa, te tino

-Te manu, te fare

-Te àhu, te riri

-Te Atua, te àihere

Ia au i teie mau manaò, e piti uiraa e uihia nei i te ìrava 31 No reira, eiaha ia òutou e tapitapi ai, mä te parau E aha ta tätou e àmu ? Te piti E aore ia, E aha ta tätou e inu e aore ia E aha ta tätou e àhu?

I roto i teie na uiraa ta Ietu te haapäpühia nei e toru tumu no te oraraa o te taata, maa, vai, àhu, teie te huru o to tätou oraraa i te mau taime atoà. Na parau e toru nei o te tauàti ia i te taata i te òhipa e tupu nei i te haafaufaaraa i te ôpuaraa faaora a te Atua Nui Tumu Tahi.

Te ìriti nei o Ietu i te ùputa no na Fatu toopiti, ia au i te ìrava 24, ma te òre e haafaufaa òre i te moni, te hinaaro noa nei o Ietu e haapäpü e, te tävini o te Atua mea mäìtihia e te Atua, e ua tuu i to na Värua i nià ia na, eere ia no te hinaaro faanaìnaì i te tahi. I roto i te täviniraa, aita e parau to te rahi, aita e parau to te naìnaì, e hiòraa taata noa te reira, eere na te Atua te reira faanahoraa. Te mäìtiraa, eere te faanaìnaìraa, eere te haafaufaa-òre-raa i te feiä tei òre i mäìtihia, to te Atua rä te reira haapäpüraa i to na hinaaro i te tahi taata, i te tahi taime, no te rave i te tahi òhipa. Ua mäìti ihoä paha te Atua i te taata, eere rä te Atua i te Atua mäìtiìti i te taata. Ta Ietu ia e haapäpü ra ia nä ô mai o ia e, E òre e tià i te taata ia tävini i nä fatu toopiti; e riro o ia i te au-òre atu i te hoê e te au atu i te tahi e aore ra, e riro o ia i te àti atu i te hoê e te tähitohito atu i te tahi. Te tuu nei o Ietu i te taata i roto i te mäìtiraa te tiàmäraa ia o te Atua, aita rä te reira i faaòre i te tiàmäraa o te taata. No te mea e tiàraa faaora to te tävini i mua i te fifi e orahia ra e te nünaa, te huru hoì o te ôpuaraa faaora a te Atua, i mäìtihia mai ai te tahi e te Atua ei tävini e aore èi toa. Parau-noa-hia ai rätou e toa, eere hoê ä òhipa ta te tahi e te tahi, eere hoê ä hinaaro to te Atua i te tahi e te tahi.

 

Areà te parauraa o Ietu e, E òre e tià ia òutou ia tävini i te Atua e te Moni, eere no te mea eita te Värua o te Atua e au i te tahi pae, e nä ô rä tätou e, ua märamarama maitaì o ia i te mea ta te Atua e hinaaro ra ia na, e te reira atoà te mea e arataì ra ia na i roto i te òhipa ta na e rave atu. Ia haamata tätou i te manaò e, ua î te taata i mäìtihia i te Värua o te Atua, e òhie tätou i te manaò e, te Atua iho terä e òhipa ra i roto i te reira taata. Mai te àito, i mäìti ai te Atua i te tahi taata, eere no te mono ia na, i te faatupuraa i ta na òhipa nä roto i teie taata, na teie iho rä taata e rave i te òhipa no reira te Atua i mäìti ai ia na, na te Atua rä e tauturu ia na.

 

Te auraa, na teie ihoä taata e haere, to na ihoä te âvae e taahi i nià i te repo, aore ra to na iho te âvae e puta i te ôfaì, na te märamarama rä o te parau e faaòhie ia na i to na mau tuuraa âvae atoà. Eere no te mea ua mäìtihia te tahi taata no te rave i te tahi òhipa, i riro ai te mau mea atoà ei mea òhie no na, i mänina noa ai hoì to na èà, to na noa vähi hau, eiaha rä ia, to na rä vähi taa ê, te tiàturiraa ia ta te Atua i tuu i nià ia na. Te tanoraa mau, no te taata hoê te parau o te mäìtiraa, e no te mea na te Atua te mäìtiraa, te Atua anaè ia tei ìte i te tumu o ia i rave ai i te tahi taata, e i òre i rave ai i te tahi, te òhipa rä, te vai noa ra ia. Mai te taime rä te tahi mäìtihia ai, ua faaea atoà o ia i te ìmi i to na iho maitaì, te faatupu i to na iho hinaaro, e te parau hoì i te parau no na iho, mai ta Ietu e haapäpü ra ia parau mai o ia e, E òre e tià ia òutou ia tävini i te Atua e te Moni. Eiaha ra tätou e manaò te haafaufaa-òre nei o Ietu i te moni, te hinaaro nei ra o Ietu e haapäpü i te tiàraa tävini.

Ia ìte mai tätou, eita te parau o te täviniraa e tano e haapoto noa i roto i te parau no te raveraa i te òhipa, te vai ra te tahi mea hau atu të ìmi i roto i te auraa ta te Mäòhi i horoà i ta na iho òhipa, oia te faatupuraa i te ora, te raveraa i te òhipa no te maitaì o te taata, no te tatara i te taata i räpae i te fifi, aore ra te raveraa i te òhipa ia òre te taata, te ùtuafare ia topa i roto i te fifi. Te taata e rave i ta na òhipa, eiaha te òhipa i faauehia ia na e rave, te òhipa no reira o ia i àufauhia ai, te taata rä e faatupu i te värua o te òhipa, e tiàraa faaora to na.

Te ìrava 30 I nä reira hoì te Atua i te faaùnaùna i te àihere e vai nei i teie mahana i roto i te mau âua e ànanahi e hurihia i roto i te auahi, eere änei e hau atu tä na e rave no òutou, e te feiä faaroo täpetepete.

 

Ia Maitaì Mäòhi Nui.

 

Teraì òr. Faatura.

Repost 0
Published by Mapuanga terai - dans Aòraa
commenter cet article
16 février 2017 4 16 /02 /février /2017 21:41

Täpati 19 no Fëpuare 2017.

Anoenoe.

Taiòraa.

Mätaio 5,38-48

Te horoà

(Rut 6.29-30)

38 Ua faaroo hoì òutou e i parauhia na E mata ra, ei mata ia; e niho ra, ei niho ia. 39 Te parau atu nei rä vau ia òutou, eiaha e pätoì atu i te taata ìno o të moto mai i to päpärià àtau na, e färiu atoà atu i te tahi. 40 E ia tuu te hoê taata ia òe i te haaväraa no te rave i to àhu ôomo, e höroà atoà atu i to pereue. 41 E o të faahepo mai ia òe e haere hoê maire, e haere ôrua e piti aè. 42 E höroà atu i tei ani mai ia òe; e o të tïpee mai i ta òe ra, eiaha e huritua atu.

Te aroharaa ènemi

(Rut 6.27-28,32-36)

43 Ua faaroo hoì òutou e i parauhia na E aroha atu òe i to täuaro, e e riri atu i to ènemi. 44 Te parau atu nei rä vau ia òutou e aroha atu i to òutou mau ènemi e pure atu i tei hämani ìno mai ia òutou. 45 I reira ia òutou e riro ai ei tamarii na to òutou Metua i te mau raì ra; te faahiti nei hoì o ia i to na mahana i nià i te feiä ìno e te feiä maitaì, e te haamaìri mai nei o ia i te ua i nià i te feiä parau-tià e te feiä parau-tià òre. 46 Ia aroha òutou i tei aroha mai ia òutou e aha ia te utuà e noaa ia òutou i reira Eere änei te nä reira atoà nei te feiä òhi tute 47 E ia aroha noa hoì òutou i to òutou anaè ra mau taeaè e aha te mea faahiahia ta òutou i rave Eere änei te nä reira atoà nei te tahi mau nünaa. 48 Ia maitaì roa hoì òutou mai to òutou Metua i te raì e maitaì roa ra.

Manaò

Ìno

I roto i ta tätou taiòraa no teie mahana e piti parau e faaära nei i to tätou âau i te reo o Ietu, eiaha e pätoì atu i te taata ìno, e pure atu i tei hämani ìno mai ia òutou. No te ère tätou i te türamaraa o teie na manaò e haafatata rii na tätou i te taiòraa te Taramo 103 1 Na Tävita. E haamaitaì i te Fatu, e taù värua, e to roto ia ù nei, i to na ra iòa moà. 2 E haamaitaì i te Fatu, e taù värua e eiaha te hoê maitaì a ana i horoà mai ra e haamoèhia. 3 O ia tei faaòre i ta òe atoà ra mau hapa, e o tei faaora i to òe atoà ra mau maì, 4 o tei faaora ia òe i te pohe, o tei faatoröna ia òe i te hämani maitaì e te aroha, 5 o tei faaî i to vaha i te maitaì, ia faaâpï-faahou-hia òe mai te àeto ra. 6 Te rave ra te Fatu i te parau-tià e te au i te feiä atoà i hämani-ìno-hia ra. 7 Ua faaìte o ia i ta na haapaòraa ia Möte, e ta na òhipa i te tamarii a Ìteraèra. 8 E aroha e te hämani maitaì to te Fatu, e òre e riri vave, te rahi ra to na aroha. 9 E òre o ia e tämau i te aò mai ia tätou e òre hoì e vaiiho märô i to na riri e a muri noa atu. 10 Aita aè nei o ia i tähoo mai ia tätou e ia fäito i ta tätou mau hara, aore hoì i faautuà mai ia tätou e ia fäito i to tätou mau ìno. 11 Mai te teiteiraa o te mau raì i nià i te fenua nei, mai te reira te rahi o to na aroha i te feiä i mataù ia na ra. 12 Mai te hitià-o-te-rä e taa ê i te tooà-o-te-rä ra, o ta na ia faataa-ê-raa i ta tätou mau hara ia tätou nei. 13 Mai te aroha o te metua i ta na ra mau tamarii, o to te Fatu ia aroha i te feiä i mataù ia na ra. 14 Ua ìte hoì o ia i to tätou huru, te manaò ra o ia e, e repo tätou nei. 15 O te taata nei e au to na puè mahana i te àihere nei mai te tiare i roto i te aru ra to na ruperuperaa. 16 Ua farara anaè te mataì nä nià iho ra, ua mou ia, e to na vähi i tupu ai ra e òre e ìte faahou ia na. 17 Âreà te aroha o te Fatu mai tahito mai ia e a muri noa atu, i te feiä i mataù ia na ra, e ta na ra parau-tià i te tamarii a ta rätou ra mau tamarii, 18 i te feiä i haapaò i ta na ra faufaa, e tei haapaò i ta na ra parau e rave ra. 19 Ua haamau te Fatu i to na ra teröno i nià i te mau raì, e ua auraro te mau mea atoà nei i to na ra pätireia. 20 E haamaitaì i te Fatu, e to na ra mau merahi e, o tei hau i te püai, e ua haapaò i ta na faaueraa, i te faarooraa i ta na reo ia parau. 21 E haamaitaì i te Fatu, òutou atoà, o to na ra mau pupu, o to na ra mau tävini tei rave i to na ra hinaaro. 22 E haamaitaì i te Fatu, e ta na atoà ra mau òhipa, i te mau vähi atoà ra i to na ra hau. E haamaitaì i te Fatu, e taù värua e.

Hiòraa.

Aita, e òre e i to tätou faarooraa i teie Taramo ua tauturu i te tahi vahi e tià e türama ia tätou i ta Ietu parauraa i te taata ìno, e tei hämani ìno. Oia hoì, te hinaaro nei o Ietu i te taata no te ärai i teie mau faanahoraa au òre i mua i te tahi e te tahi, e tià änei te taata âau ìno e tauturu i te tahi taata ìno e te hämani ìno, e aha ia te fänau mai ? Te tauturu nei o Ietu ia tätou i te ìteraa i te ìno e vai ra i roto i to tätou âau, e parau teie no tätou ia òre tätou ia tähuti i mua i te ìno,

Të moto mai i to päpärià àtau na, e färiu atoà atu i te tahi, e parau teie no te moto ta Ietu e faahiti nei, e aha te manaò, na taata toopiti teie tei mua to raua aro hoê to na rima àtau tei te pae àui o te tahi, te rima àui tei te pae àtau o te tahi, oia atoà ia te päpärià èita e tano ia moto no te mea, mea tià noa raua ma te haùti òre, e färiu, e aha te färiu te faahouraa ia tei upoo e te tino i te vahi e tïtauhia ra i te hiò, e tano anei i te moto i te hoê taata na muri, maite mea e tano ua faufaa òre teie reo to Ietu, no te mea te tuu nei o Ietu ia ù, ia na i mua i te parau no te ärairaa i te ìno e te hämani ìno.

Te tuu ia òe i te haaväraa no te rave i to àhu ôomo, e höroà atoà atu i to pereue,

Te àhu ôomo, te àhu e piri i nià i te tino te àhu e ôomo na nià iho e pereue tähope e àhu àti Iuta teie, te manaò o Ietu i ù nei eiaha te taata horoà ia ìno, mai te taata i tuu ia òe i te haaväraa. Na te taata iho e ìmi nei i te faatupu i to na iho ìno.

Ia faahepohia e haere hoê maire, e haere ôrua e piti aè,

Te tätaì piti nei o Ietu i te parauraa no te mea ua rahi te tupu te ìno i ta te taata faatupuraa. No te mea ua tae roa te taata i te parauraa i te ìno e maitaì, e te maitaì ra e ìno. Te hinaaro nei o Ietu ia hau noa te maitaì i te ìno, te mea ra e ìtehia nei te ìno teie e na mua noa nei i te maitaì.

E höroà tei ani mai, tei tïpee mai, eiaha e huritua atu.

Te ìno i ù nei te huritua, ua horoà te Atua i te äniraa a te taata, e ua tïpeehia e te taata. Te huritua noa nei te taata i te mau hinaaro o te Atua, faaäuhia nei te mau fenua o Mäòhi Nui i te mau òna no te ära i te iòa no te òhipa, te täpïhoohia nei te Moana Nui a Hiva i te iòa o te òhipa. Àreà te mau òna o te fenua nei ua hurituahia. Eiaha ra ia äramoinahia te viivii âtömï ia haafänauhia i Mäòhi Nui nei.

E aroha atu i to òutou mau ènemi e pure atu i tei hämani ìno mai ia òutou.

Te mea faufaa i roto i teie ôpuaraa ta Ietu, eere te huru e te hohoà mata o te taata tätaì tahi, te huru rä e te hohoà o te Atua tei hinaarohia i te taata i roto i to rätou rauraa ia faaìte. Ia rau hoì te taata, e rau atoà ia ta rätou hiòraa i te Atua, e rau hoì te iòa ta rätou e horoà no te Atua, aita rä te reira e haafifi ra i te maitaì o te Atua, inaha e tupuraa te reira no to na hinaaro. Nä ô noa na tätou, te hereraa ia na iho, eere ia te òreraa e ìte, te òreraa hoì e färii i te tahi i roto i to na maitaì, to òe rä te reira haapäpüraa e, te mea e au no òe, e au atoà ia no te tahi ; e te mea hoì të òre e au no òe ra, eita atoà ia e au no te tahi.

Ia faaroo tätou i teie reo e faaìtehia nei e te Revitito i te pene 19, i te mau ìrava 17 Eiaha òe e riri i to taeaè i to âau; e aò rä òe i to taata-tupu, eiaha e vaiiho noa ia hara noa na. 18 Eiaha òe e tähoo, eiaha e täiroiro i to òutou iho na; e aroha rä òe i te taata-tupu mai to aroha ia òe iho na o vau o te Fatu.

Te ìte nei ia tätou i te puai no teie reo no Ietu e aroha i te ènemi, e pure tei hämani ìno mai te hinaaro tumu o Ietu ia tupu noa te hinaaro aroha, te here ei täutururaa i te ìno ia maitaì ia òre to tätou maitaì ia tähuti, ia tähuti e aha te mea e maitaì faahou ai.

Tumu.

Te hinaaro nei o Ietu ia faatumu tätou i to tätou tiàturiraa i nià i te mau raveà atoà ia riro te ìno èi maitaì, te ènemi èi taeaè, èi tuahine. No reira, te taata e pärahi tämau e tei faatumu i to na faaroo i te mau haapiiraa a Ietu e taata ia, tei riro ei òaòaraa tämau no na, te faatupuraa i te aroha. Eere no te mea ua faauehia i rave ai o ia i te tahi òhipa, mai te taata rä të òre e tiaì ia parauhia atu e huti i te aho no te huti i te aho, e taata teie tei anoenoe te aroha i roto ia na. E tano tätou e faaau i teie taata i te tahi räau ta te fenua i horoà i te ora, te tupu, e te hotu, nä roto rä i to na rau e to na hotu, te haamaitaì atoà ra teie räau i te fenua e haamaitaì ra i to na tupu. Te manaò hau e te faufaa ta teie taò anoenoe e faaö mai ra, teie ia manaò no te òaòa tei riro ei tumu, oia hoì ei haamataraa e ei faahopeàraa no te tupuraa o te parau o te aroha.

Te anoenoe noa nei o Ietu i parau ai teie mau manaò, ia aroha e ia maitaì.

 

Teraì òr. Faatura.

 

Repost 0
Published by Mapuanga terai - dans Aòraa
commenter cet article
9 février 2017 4 09 /02 /février /2017 22:39

Täpati 12 no Fëpuare 2017.

Ture

Mau taiòraa.

Teuteronomi 30 : 15 – 20 Te ora o te ture a Iehova.

Taramo 119 : 1 – 32 Te ture o te òaòaraa.

I Torinetia 2 : 6 – 10 Ta te Värua e haapii

Mataio 5 : 17 – 37 Te ture o te tätarahapa.

Taiòraa.

Mätaio 5,17-37

Ietu e te ture

17 Eiaha òutou e manaò e i haere mai au e faaòre i te ture e te mau perofeta. Aore au i haere mai e faaòre, e faatià rä. 18 Oia mau ta ù e parau atu ia òutou nei, e mou aè te raì e te fenua, i te hoê iota e te hoê vähi iti o te ture nei, eita ia e mou e ia hope roa te mau mea atoà i te tupu 19 E teie nei, o të faahapa e o të haapii ia vëtahi ê ia faahapa i te parau iti haìhaì roa i teie nei mau ture, e parauhia o ia i te iti roa i te Hau o te raì. Âreà të haapaò e ua haapii i taua mau ture ra, e parauhia o ia i te rahi i te Hau o te raì. 20 E faaìte atu rä vau ia òutou ia òre ta òutou parau-tià ia hau i te parau-tià a te mau päpaì parau e te mau Färitea ra, e òre roa òutou e ö i te Hau o te raì.

Te täparahiraa taata e te faahauraa

(Mär 11.25; Rut 12.57-59)

21 Ua faaroo hoì òutou e i parauhia i te feiä paari ra e. Eiaha òe e täparahi i te taata e o të täparahi i te taata ra, e au ia na te haaväraa. 22 Te parau atu nei rä vau ia òutou o te taata e riri noa atu i to na taeaè, e au atoà ia na te haaväraa; e o të parau atu i to na taeaè E Nëneva, e au ia ia na te Tuneteri/Tiripuna teitei; âreà o të parau atu e E Maamaa, e au ia na te auahi pohe òre. 23 E teie nei ia püpü òe i ta òe ö i te fata, e ua manaò iho ra òe i reira, e ua ìnoìno to taeaè ia òe; 24 e vaiiho atu i ta òe ö i mua i te fata, e mata na i te haere e faahau ia òe e to taeaè, a hoì mai ai e püpü i ta òe ö. 25 Haapeepee òe i te faaau i te parau i te taata tei faahapa mai, hähaere noa ai ôrua nä te äratià; o te tuu atu te taata tei faahapa mai ia òe i te haavä ra, e o te tuu hoì te haavä ia òe i te mutoì, e o të hurihia atu òe i roto i te täpeàraa. 26 Òia mau ta ù e parau atu ia òe nei e òre roa òe e tuua mai e tae noa atu i te peeraa ta òe tärahu.

Te faaturi e te faaturoriraa

(Mät 18.8-9; Mär 9.43, 47-48)

27 Ua faaroo hoì òutou, e i parauhia mai Eiaha òe e faaturi. 28 Te parau atu nei rä vau ia òutou: o të hiò noa atu i te hoê vahine no te faatupu i te hinaaro, ua faaturi ia ia na i roto i to na iho ra âau. 29 E te turori ra to mata àtau ia òe, e ôhiti e a faaruè ê atu i te ätea e mea maitaì aè òe ia ère òe i te hoê tuhaa i te täatoà o to tino ia hurihia i roto i te auahi pohe òre. 30 E ia turori to rima àtau ia òe, e täpü e a faaruè ê atu i te ätea e mea maitaì aè ia ère òe i te hoê tuhaa i te täatoà o to tino ia haere i roto i te auahi pohe òre.

Te faataaraa

(Mät 19.7-9; Mär 10.4-5,10-12; Rut 16.18)

31 I parau-atoà-hia hoì O të hinaaro i te haapae i ta na vahine, e tuu atu o ia i te tahi parau faataaraa ia na ra. 32 Te parau atu nei rä vau ia òutou o të haapae i ta na vahine, mai te peu e, mea na roto i te òhipa taiàta, ua faariro ia ia na ei faaturi e o të täati i te vahine tei haapaehia, ua faaturi atoà ia.

Te tapu

33 E ua faaroo hoì òutou e i parauhia na i te feiä paari ra Eiaha òe e ôfati i ta òe tapu, e faatupu rä i ta òe i tapu i te Fatu ra. 34 Te parau atu nei rä vau ia òutou eiaha roa atu e tapu eiaha i te raì ra, o to te Atua ia teröno; 35 eiaha atoà i te fenua nei, o to na ia taahiraa âvae eiaha ia Ierutarëma, o te ôire ia o te Arii nui. 36 eiaha atoà e tapu i to òe iho upoo, eita hoì e tià ia òe ia faaèreere e ia faateatea i te hoê ìo rouru. 37 Ia riro rä ta òutou «ê» ei «ê», e ta òutou « aita» ei «aita» ; te parau i faaravaìhia mai, no ô mai ia i te ìno ra.

 

Ei manaò mätamua.

Te uiraa e tià ia parau i ù nei, mauti ra ia, E nahea tätou i te faatupuraa i te hinaaro o te ture ? Te mäìti ra nei tätou i te ora ?

E ao to te taata tei ture a te Atua, to na âau i te vairaa.

Oia mau, te mau parau ia e faahitihia nei e Ietu i roto i te Mataio i te pene 5 mai te ìrava 17 e faaea i te ìrava 37. Te hinaarohia nei e faaìte i te faufaa o te ture, e ia pärahi fatata noa te taata i pïhaìiho mai te hoê rämepa ra te huru tei türama i te èà. Ia ìtehia te faufaa no te mau faaueraa e tïtauhia ra no te ora, o te mau taata tei noaa ia rätou i te faatura, àreà tei òre ra e faahapahia ia. Te tïtauraa ra e horoàhia nei, ia haapaò te taata i te ture e tià ai, o te reira te niu o te oraraa no te hoê nünaa.

Tei mua tätou i te mau manaò o Ietu, no nià i te ture. Te haapäpü nei O ia i te reira i te ìrava 17. Eiaha e manaò e, i haere mai au e faaòre i te Ture, e te mau Perofeta, aore au i haere mai e faaòre, e faatià ra. E here to Ietu i te Ture, ma te ìte atoà e, o te reni ia e tià ia rave. Ia òre te ture, eita e tià ia faanaho i te hoê oraraa i roto i te hoê nünaa, O ta Ietu ia e hinaaro nei ia ìte te mau taata atoà, e mea faufaa te ture. Oia hoì, aita te Ture i hämanihia e te Atua ia riro ei faaìnoraa i te taata, e aore ra ei òpanipaniraa i te taata ia ora ; ua hämanihia te ture ei haamaitaìraa, e, ei ìritiraa i te taata i nià i to na tiàmaraa. Ia hapa ra te taata i te Ture a te Atua, e faahapahia ia o ia i te faahaparaa tià, ta na utuà ra o te tätarahapa ia. E òaòa to te raì i te taata hoê ia tätarahapa.

Ia taiò maitaì anaè tätou i teie parau i päpaìhia e Mataio i te pene 5 i te ìrava 17 e faaea i te ìrava 37, e ìte tätou e aita o Ietu e faahiti âmui nei te parauraa, te faahiti tätaì tahi nei ra O ia i te parauraa e o OE………

E taata hoê teie ta Ietu e tïtau nei e, e ara i te faahapa a te Ture, te manaò tumu ra o Ietu ra no te mau taata atoà ia i putuputu mai i taua mahana ra, e tià ia parauhia i roto i teie mau faaäuraa a Ietu, ia ìte te taata i te here i te Ture a te Atua.

Ta tuhaaraa i te pene parau Mataio 5 : 17 – 37.

1-Ietu e te ture

E faaìte o Ietu i te puai o te ture tei tïàau maitehia e te mau Perofeta no te mea e na mua noa Rätou i te parau i te hinaaro o te Atua, te Ture e Parau e parau no Aroha e te Here o Te Atua Nui Tumu Tahi, e mou aè te raì e te fenua, i te hoê iota e piapa naìnaì roa aè teie i roto i te reo Herëni e te hoê vähi iti o te ture nei, eita ia e mou e ia hope roa te mau mea atoà i te tupu. No reira o tei haapii no te faahapa e faaïti-roa-hia ia i te Hau o te raì. Tei haapaò ra e tei haapii ma te parau tià i taua mau ture ra, e parauhia rätou i te rahi i te Hau o te raì. Teie ra ia itoito i te faaìteraa i te parau tià no te Aroha e te Here o te Atua Nui Tumu Tahi.

2-Te täparahiraa taata e te faahauraa

Te haavahia nei te taata no te täparahi taata, teie ra te faaìte nei o Ietu te òhipa e tupu ai te täparahiraa taata, teie taua mau parau ra, te taata e riri i to na taeaè, e au ia te haaväraa, tei parau i to na taeaè to na tuahine e Nëneva, e au ia ia na te Tiripuna teitei, tei parau atu e Maamaa, e au ia na te auahi pohe òre. I mau i teie mau parau e turaì ä o Ietu i te manaò i mua i te tiàturiraa i te Atua Nui Tumu Tahi, te parau ia no te pupuraa ö, hou teie òhipa e faahau te ìnoìno o te âau, e te faahapa a te mau taeaè, e te mau tuahine ia matara te mau taura e natinati ra teie mau peu tià òre tei faatea i te ture parau tià a te Atua Nui Tumu Tahi. I reira noa e tià ai i te haamori i te Atua, e mau parau faaära teie o ta Ietu e tïtau nei i te mau taata atoà ia tute teie mau peu tei faataupupü i te oraraa vaamataèinaa o te nünaa. No te aha teie mau òhipa i tupu ai, no te paruparu o te âau i te färii i te hinaaro faatupu ora ta te àià e horoà noa ra.

3-Te faaturi e te faaturoriraa

(Mät 18.8-9; Mär 9.43, 47-48)

Tei roto tätou i te tahi tuhaa o te taiòraa, no te mea e tuu o Ietu i te parau i nià i te vahi mai reira mai te tupu te faaturi, e te faaturori. O hiò noa atu i te hoê vahine no te faatupu i te hinaaro, ua faaturi ia ia na i roto i to na iho ra âau. Ia turori ra to mata àtau ia, e ôhiti e a faaruè ê atu i te ätea e mea maitaì hoê tuhaa i te täatoà o to tino ia hurihia i roto i te auahi pohe òre. Ia turori to rima àtau, e täpü e a faaruè ê maitaì aè ia ère i te hoê tuhaa i te täatoà o to tino ia haere i roto i te auahi pohe òre. Te haamanaò mai nei o Ietu i ù nei te faufaa o te vahine i ta te Atua Nui Tumu Tahi parauraa e Tauturu Au, ia ìtehia teie tuhaa i roto i te vahine ia tià te parau i faahitihia e te Taramo te täno noa nei tau mata i te Atua Nui Tumu Tahi. Aita o Ietu e faaue mai ra e ôhiti e täpü ia tano i te hiòraa i te maitaì a te Atua Nui Tumu Tahi.

4-Te faataaraa

(Mät 19.7-9; Mär 10.4-5,10-12; Rut 16.18)

E parau pae piti teie no te tane e te vahine ia haapae te tahi i te tahi no te taiàta i te mea ua täatihia, tei haapae ra ua faaturi atoà. Te parau o te taata i roto i te ôpuaraa a te Atua, èita mai teie te huru e faaìtehia nei. Oia mau, no te mea aita ä te taata i haamata i te tävini i te Atua, ua faahei ê na te Atua ia na i te hinuhinu e te tura. E aha paì ia teie ta te taata e peàpeà nei, e ta na e ìmi nei i te räveà ia ìtehia o ia, ia faufaahia o ia i mua i te mata o te taata, inaha ua ìte ê na te Atua ia na, ua rahi ê na to na parau i mua i te aro o te Atua. Ia au i teie fäìraa ta te päpaì taramo, mai te mau merahi tei riro ei mau tävini no te Atua, te reira atoà te tiàraa ta te Atua i hinaaro i te taata ia rave atu. Ia topa te taata i roto i teie mau peu tià òre, te taime mau te reira e haapäpü ai o ia e, ua moè ia na te Atua e to na mau hinaaro atoà, aore ra ua tatä ê na o ia i te Atua i räpae i to na oraraa. Eere rä te reira anaè, te täatoàraa o te òhipa a te Atua, aita o ia e haapaò nei, te òhipa ta te Atua i rahu e ta na i hämani, aita atoà o ia i täuà faahou atu. E inaha, te mau mea atoà ta te Atua i faatupu i te mana o ta na parau e te püai o to na here, ua mäìti o ia i te taata ei tïàau i te reira. Eiaha ra i te haapaeraa i te tahi no te mea e tävini raua no te faatupu i te ôpuaraa faaora e ìò teie no to ù ìò, e ivi no to ù ivi.

5-Te tapu

E parau tara toru faahoì teie, te Atua Nui Tumu Tahi, te taata, te fenua, ia ìte i te faaoti i te E, e te Aita ia òre ia fati te tapu. Te òhipa a te Atua Nui Tumu Tahi ta te taata e òre e täuà faahou nei, ta na ia täpura òhipa ta te Atua i horoà na na. Mea tano aè rä paha tätou e parau e, ua haamoèhia, aore ra ua huna i te mea ta to na tiàraa e tïtau ra ia na. Nä ô na tätou i te ui, E aha te faufaa o te tahi tiàraa aore o na e mana faatere ; e aha te faufaa o te tahi tävini të òre e rave i te òhipa no te maitaì o to na fatu ; e aha te faufaa o te parau, mai te peu aita e tarià no te haru mai i te mea i parauhia. Te Tapu ua riro ia mai te tahi ture ta te taata i haamau, i te parauraa e, i te vähi e haamata atu ai to te tahi mana. I ô nei rä hoì, te taata iho teie e täpeà nei i te mana o te Atua, no te mea to na terä haamataraa. Aita ta te Atua e parau faahou ia na, eere atoà ra te òhipa na na te haapaòraa i te parau a te Atua, e tae noa atu i te tiàturi , e te here o te Atua ia na i te püpüraa mai i ta na òhipa i roto i to na rima na na e haapaò.

I mua i teie mau parau teie te faaìteraa a te Teuteronomi i te pene 30 I te ìrava 16 o ia hoì teie ta ù e parau atu ia òe i teie nei mahana, ia hinaaro òe i to Atua ra i te Fatu, mä te haere mäite na ta na ra mau èà, e te haapaò i tä na parau, e ta na ra mau haapaòraa, e ta na ra mau ture, e ora òe, e e rahi roa òe, i nià i te fenua ta òe e haere e rave nei ei pärahiraa.

Te parau

Te manaò tumu rä i roto i teie parau no te ture, te tahi ia mau arataìraa manaò e faanaho ra i te oraraa âmui o te taata, tei ìtehia e tei färiihia e te täatoà, te mea atoà te reira e horoà i to na püai e to na mana. Te auraa, te maitaì o te ture, aita to roto i te mau faanahoraa ta na e faataa ra, tei roto rä i te mea ta na e tïtau ra, oia te oraraa maitaì, te òaòa, e te hau no te täatoà. Ta na räveà, te faautuàraa ia i te feiä tei òre i auraro i te mau faanahoraa ta na i haamau, no te mea te taòto rii noa ra i roto i te taata atoà te manaò täviri i te ture. Te tanoraa mau, no te täatoà te ture, e eita te ture e mäìti i te huru o te taata. Mai te peu rä te ìmi noa nei te taata i te räveà ruriraa i te ture, te ìte-atoà-hia nei te feiä i tiàturihia e, na rätou e ara i te haapaò-mäite-raahia te ture, i te täpöraa i te mata i mua i te hara a te feiä taoà, te feiä teitei, âreà te taata rii ra, aita ia e hapa rii iho tei òre i huaìhia i mua i te mata o te taata atoà, ia riro ei hiòraa. Te mea ia ta Ietu e faaära nei, i te ìrava 18 Oia mau ta ù e parau atu ia òutou nei, e mou aè te raì e te fenua, i te hoê iota e te hoê vähi iti o te ture nei, eita ia e mou e ia hope roa te mau mea atoà i te tupu.

Faaitoito

Torinetia 1 i te pene 2 i te ìrava 9 O tei päpaìhia ra e O te mau mea aore i hiòhia e te mata ra, aore i faaroohia e te tarià ra, aore hoì i ö i roto i te âau o te taata ra, o ta te Atua ia i vaiiho no te feiä i hinaaro ia na ra. Ìrava 10 Ua faaìte mai rä te Atua ia tätou i taua mau mea ra i to na Värua; e ìmi hoì te Värua i te mau mea atoà nei, e te mau mea hohonu atoà a te Atua ra.

 

Ia ora na.

 

Terai or. Faatura.

Repost 0
Published by Mapuanga terai - dans Aòraa
commenter cet article
2 février 2017 4 02 /02 /février /2017 11:43

Täpati 5 no Fëpuare 2017.

ÔROÀ

Òutou

Taiòraa.

Mätaio 5,13-16

Te miti e te märamarama

(Mär 9.50; 4.21; Rut 14.34-35; 8.16; 11.33)

13 O òutou te miti no te fenua. Âreà ia mäàro te miti ra, e aha te mea e àvaàva faahou ai. Ua riro ia ei mea faufaa òre, e faaruèhia e taataahihia e te âvae taata. 14 O òutou te märamarama o teie nei ao. E ôire tei faatiàhia i nià i te mouà ra, eita ia e moè. 15 E òre hoì te taata nei e tütuì i te rämepa a tuu ai i raro aè i te färii, ei nià rä i te vairaa ia märamarama to te fare atoà ra. 16 Oia atoà to òutou märamarama, ia ànaana ia i mua i te aro o te taata, ia ìte rätou i ta òutou mau òhipa maitataì, e ia faahanahana rätou i to òutou Metua i te mau raì ra.

Manaò

Àtuàtu

E Mäòhi Nui e, e ao to te taata i tuu i to na manaò, to na värua i roto i te Atua Nui Tumu Tahi ra, e riro roa to na âau i ta na parau. E mana hoì to na huaai i te fenua nei, e maitaì hoì te mau tamarii, e àtuàtu tei to na fare e te itoito, e tià hoì to na faaroo i te vai-mäite-raa. E hiti mai te märamarama i nià i te pöuri no te turäma i te parau tià, te hämani maitaì, te aroha, te piò-òre. No te hämani maitaì i te nünaa, mä te haapaò, mä te rave ia tupu maite te ora ia manaò-tämau-hia te feiä parau-tià, e a täuàhiti noa atu. E ätea te mataù i te roo ìno ra, ua itoito to na âau i te tiàturiraa i te Atua Nui Tumu Tahi. No te mea ua puai to na âau, e òre e mataù, e tupu mau ra te itoito ia tae te märamarama i te mau vahi tei haaapiapihia e te rupehu o te ìno.

Hiti

No te mea ua faaapiapi faufaa-òre-hia te mau vahi e paìa ai te nünaa, to na ùtuafare ua paèpaèhia ia ätea te âvae i te mähanahana o te fenua, e ia rumaruma te türamaraa a te àià, te àià ra te mori poito e arataì i te nünaa i te ùtuafare o te Atua Nui Tumu Tahi e ia ìte te nünaa i to na veve, ia faaàhuhia i te märamarama ia püroro noa mai i te mau poìpoì e nä mua hoì te parau-tià i te nünaa i te haere, e te hanahana o te Atua Nui Tumu Tahi e pee tämau ia i te nünaa. I reira te nünaa e parau ai e nä te Fatu e parau mai, na te nünaa e tiàoro, e nä te Atua Nui Tumu Tahi e parau mai, Inaha, teie Au. Ia faaruè te nünaa i te mau vahi tei vai mävaèvaè noa i te töhuraa a te rima, e te parau ìno ra. Ei reira te märamarama e hiti mai ai i roto i te pöuri, e te pöuri o te nünaa, e riro mai ia mai te avatea ra.

Èvaneria

Na te riri e haamohimohi nei te türamaraa a te hau i faaìtehia ai te Metia i faatataurohia, e aù mau taeaè, mau tuahine, e Mäòhi Nui e, aore to tätou haereraa mä te parau ahaaha e te ètaèta, i te parauraa i te Èvaneria o te Atua. Ua ôpua mäite tätou, no te faaìte i te parau o Ietu Metia e o ia i faatataurohia ra. E paruparu to tätou, e te mataù, e te rürütaina. E ere hoì ta tätou parau i te parau àihamu no te paari o te taata nei, i parau ai tätou no te faaìte päpü ra te Värua e te mana ia òre to tätou faaroo ia faatumuhia i te paari o te taata nei, i te mana rä o te Atua.

Òutou

Oia mau te Mana o te Atua Nui Tumu Tahi, tei roto i te Parau o te matahurahura ia o te ao nei, tei faatupu i te miti e te märamarama. Te päpaìraa ia a Mätaio i te reo o te Metia i te pene 5 i te mau ìrava 13 e tae i te 16 O òutou te miti no te fenua. Âreà ia mäàro te miti ra, e aha te mea e àvaàva faahou ai. Ua riro ia ei mea faufaa òre, e faaruèhia e taataahihia e te âvae taata. O òutou te märamarama o teie nei ao. E ôire tei faatiàhia i nià i te mouà ra, eita ia e moè. E òre hoì te taata nei e tütuì i te rämepa a tuu ai i raro aè i te färii, ei nià rä i te vairaa ia märamarama to te fare atoà ra. Oia atoà to òutou märamarama, ia ànaana ia i mua i te aro o te taata, ia ìte rätou i ta òutou mau òhipa maitataì, e ia faahanahana rätou i to òutou Metua i te mau raì ra.

I to tätou faaroo faahouraa i te taiòraa,

Te haamanaò mai nei te reira ia tätou te huru e hinaarohia i te taata i mua i te fenua. Te òhipa o ta na e rave i nià i te fenua, e ère no te faatupu i to na hinaaro, no te haamataratara ra te maitaì ta te Atua i haapäpü, te parauraa e, mea maitaì.

Ietu, i roto i ta na mau haapiiraa, e rave rahi mau hohoà o ta na e rave, no te faaòhie i te faaharuraa i te manaò i te hinaaro e tïtauhia ra. Te mau hohoà- iho-ra matarohia e te taata i roto i te ùtuafare. E tei ìtehia i te mau mahana atoà, täpeàhia e te rima, e aore ra tei faahiò- noa – hia. Te tumu o Ietu i rave ai teie mau hohoà, no te faaìte ia, e ia òhipa te taata te mau maitaì e vai ra i mua ia na, e i roto i to na oraraa, no te faanavaì. Te tahi ra mau taime, e rave nei o Ietu te mau hohoà ìte- òre – hia e te mata taata, e tei òre te rima e täpeà mai to na iho patireia, tei faaau- noa- hia e au te patireia o te Atua i tera faufaa e tera faufaa. Teie huru ra, aita ia e faaòhie nei te feruriraa, te faatiàturi nei ra o Ietu i te taata ia ìte. Mai te tahi mau parapore, haapunihia te auraa o te parau, i muri mai i te hohoà e faahitihia ra. E na te taata taiò ia e ìmi e aha te tahi auraa. I roto i te mau faahitiraa parau e ravehia nei e Ietu, mea pinepine roa O ia i te faahiti te parau no te ora e te pohe, te märamarama e te pöuri, te patireia e o häte, ei faaìteraa ia haapaò mai te, i te mea aita te faaìno e atea nei i te haamaitaì.

O te auraa ia no te parau ta Ietu e faahiti nei, ÒUTOU TE MITI O TE FENUA, te miti e auahi tei ìritihia mai roto mai i te pape no te moana uriuri, tei àua haaàti i te mau fenua atoà, e aita to na e hopeàraa. Tei na poro e maha o te ao nei to na vairaa. Mea paruparu, e mea puai, mea purehu, e mea paari. Tei täpeà i te maitai ia òre ia ìno, e tei òre i täpeà no te horoà i te ìno. I te vahi no te maitaì ua maitaì ia, te vahi no te ìno ra ua ìno ia.

Te tïtauraa ra a Ietu i te mau pîpî no te miti no te haamaitaì ia. Ia òre e taataahihia e te âvae taata i te mea ua òre te maitaì. Te àanoraa teie, te òhipa ta te mau pîpî e rave no te Atua, i te mea ua î, te tahi mau vahi o te ao nei i te ènemi.

ÒUTOU TE MARAMARAMA O TE AO NEI, e parau maere teie ta Ietu, i te mea o ia iho te märamarama o te ao. Oia tei ànaana i roto i te mau vahi pöuri. Teie rä, e riro te mau pipi ei märamarama ànaana na roto i te Metia. Te àve pitihia nei e Ietu te miti e te märamarama, no te aha, e aha te tumu ? Teie ia, tei raro aè te mau pîpî i te maru pererau o te Atua i te vairaa. Oia hoì i reira e faatumu ai te mana o te Atua, i reira atoà te tauturu e noaa ai. No te òhipa i te miti i te vahi aita e miti, te märamarama i te vahi aita e turämahia ra. Tei reira te faaìteraahia te feia tei piihia e Ietu Metia.

O ‘’ÒUTOU’’ O vai teie ÒUTOU ? Te parau ia a Ietu, o vai te tià e färii i teie parau mai te hoê faaueraa ra te huru, tei òhipa i te mau vahi aita e ìtehia nei te hanahana o te Atua. O te pähonoraa e tano ia parau te taata tätaì tahi, O VAU teie, oia hoì èi faaìteraa ua tae mai taua reo ra, e ua faaroohia, e ua òhipahia. I taua taime ra, te noaa ra ia i te taata, i te tuu ia na i mua i te parau no te miti, e te märamarama. Ia tae te taata i nià i teie faanahoraa, te o ra rä ia tätou i roto i te òpuaraa ta Èvaneria e tïtau mai nei ia tätou.

Te faufaa o te tumu parau.

No te aha te miti ?

Ia ânoìhia i roto i te maa èi horoàraa i te âminamina ia àmu, e täpeà atoà o ia i te iò maa ia òre ia tähuti. Te mau faanahoraa mätauhia e tätou i te òhipa i roto i to tätou oraraa. Teie te huru no te faaìteraa a te faufaa tahito i te miti.

  1. No te faatupu ia i te hoê parau tütuu i ropu i na taata toopiti, ma te àmu i te miti. No te haapäpü maitaìraa i to raua täamuraa te tahi i ta tahi. E aore ra i te Atua.

(Numera 18 : 19 ).

  1. E pipihia te tutia i te miti, ei faaìteraa i to na maitaì. Ta te Revitito ia e faaìte ra i te pene 2 i te ìrava 13, e haamiti atoà òe i te mau tutia, i ta òe tutia àmu.
  2. E ânoìhia te miti i roto i te mau haaputuraa noànoà ra èi faaìte i to na maitaì e to na moà.( Etoto 30 : 35 ).
  3. Te mau ôroà i te fare pure, e rave – atoà - hia te miti èi täpaò no te tähuti òre o tei tuuhia i roto i te mau haapuèraa maa. (Etera 7 : 22).
  4. E taurumihia te àiü fänau àpi i te miti, eiaha èi faaìteraa no te mä, èi faaìteraa ra i te hoê peu tei ravehia e te nünaa o te Atua ia au te faaìteraa a Etetiera.
  5. E faaora te miti i te puna pape, te òhipa ia ta Erïtaia i rave i te pihaa i Ierito. Mau Arii piti pene 2 ìrava 20 e te 21. E hopoi mai i te tahi päni àpi a tuu ai te miti i roto, ua haere atu ra o ia i te pihaa o taua pape ra, e ua huri atu ra te miti i roto, e ua na o aè ra, te na o mai ra o Iehova, ua faaorahia e au teie nei pape.
  6. Ia tupu ia te àroraa, e aore ra te tamaìraa, te ôire e hià, e ueuehia te miti i nià iho ei faaìteraa e aita e ènemi faahou to reira. Mau Tävana pene 9 i te ìrava 45, haaparari atu ra i te ôire i raro, e ua ueue atu ra hoì i te miti.

Te faaìteraa teie na te faufaa tahito, i na faanahoraa e 7 o te miti. No reira aita tätou e maere nei te tumu o Ietu i faariro ai ia tätou èi miti no te fenua nei. Tei roto ia i tera manaò e, e noaa i te taata, te paari, i te îraa i te mau faanahoraa a te Atua, e te mä ei faaìteraa i te tiàmaraa no te mau tamarii a te Atua. O te hiòraa ia teie a te faufaa àpi, te miti e täpaò ia no te paari, e te îraa i te maitaì a te Atua.

 

Ia ânoìhia te miti i roto i te mau maitaì no te tino, eita e ìtehia o te au noa ra te haapoupouhia e te taata e färii ra, tei tano i to na hinaaro. To na auraa ra te miti, e horoà ia oia i te au i te mea au òre, te maitaì i te mea tähuti, te ora i te vahi pohe. Ia rahi anaè te miti, eita ia no te miti te hape no te taata faatano ia te hape, i te tano òre ta na fäito

ÒUTOU TE MARAMARAMA O TE AO NEI.

Te faaìteraa a te Tenete pene 1 i te ìrava 3 e faaea i te 5 o te òhipa mätamua ia ta te Atua i Parau, te märamarama. E ua maìri O ia i to na iòa i te ao. E i roto i te Ioane pene 8 i te ìrava 12, te parau nei o Ietu e o vau te märamarama o teie nei ao, o tei pee mai ia ù ra e märamarama ora ia to na. Ia au i teie reo no Ietu, te haafaufaa nei O ia i te taata tätaì tahi, i te märamarama e vai i roto i tera e tera. To na auraa ra aita roa te hoê i ère i teie faufaa, mai te mea ua ère te hoê i teie faufaa, eita ia na te Atua i hämani ia na.

Ia au i na parau e piti nei, e tià roa ia parauhia te tumu no te märamarama mai roto mai ia i te faanahoraa a te Atua. O ta Ietu i òhipa èi arataìraa i te taata i nià i te faanahoraa o te ora. O te pure ia a Tavita, o Iehova to ù märamarama, e to ù ora. (Taramo 27 : 1). To na auraa ra te tumu o te märamarama ra noo mai ia i te Atua ra. Na teie märamarama e faaìte i te maitaì o te ao nei, o tei òre roa e tià i te tahi atu mau faanahoraa ia faaö mai i roto. I te mea o te Atua teie e türama nei i teie ao. Eiaha noa ra na roto i te ànaana o te mahana, e te nehenehe o te âvaè e te mau fetià. Na roto atoà ra i te märamarama o ta na ture, tei tae roa to na hihi i te mau vahi haamoriraa a to na nünaa i te fare pure. No reira te ture a te Atua o te rämepa ia tei türama i to na fare, òire faatiàhia i nià i te mouà. Tei haamäramarama i te fenua, tei rapaauhia e te miti, ia ora to te ao.

 

 

 

Terai or. Faatura.

 

 

 

Repost 0
Published by Mapuanga terai - dans Aòraa
commenter cet article
27 janvier 2017 5 27 /01 /janvier /2017 02:45

Täpati 29 no Tënuare 2017.

Hamama

Taiòraa

Mätaio 5,1-12

Te aòraa i nià i te mouà

(Mär 3.13; Rut 6.12-13,20)

1 E ìte atu ra Ietu i te tiàa rahi, haere atu ra o ia i nià i te mouà, pärahi iho ra i raro, e ua haere mai ra ta na mau pipi ia na ra. 2 Hamama aè ta na vaha, haapii atu ra ia rätou, nä ô atu ra:

E ao

(Rut 6.20-26)

3 «E ao to tei haèhaa te âau, no rätou hoì te Hau o te raì

4 E ao to tei òto, e faaòaòahia hoì rätou

5 E ao to tei marü; e riro hoì ia rätou te fenua

6 E ao to tei hiaai e tei poìhä i te parau-tià, e faaîhia hoì rätou

7 E ao to tei aroha ia vëtahi ê ra, e aroha-atoà-hia hoì mai rätou

8 E ao to tei mä te âau, e ìte hoì rätou i te Atua

9 E ao to tei faatupu i te parau hau ra, e parauhia hoì rätou i te tamarii na te Atua

10 E ao to tei hämani-ìno-hia no te parau-tià ra, no rätou hoì te Hau o te raì

11 E ao to òutou ia faaìno mai, e ia hämani ìno mai, e ia pari haavare noa mai te taata ia òutou i te mau huru ìno atoà nei, no ù. 12 A òaòa, e ia ôuàuà noa i te òaòa; e utuà rahi hoì ta òutou i te mau raì ra: i nä reira hoì rätou i te hämani ìno i te mau perofeta tei nä mua ia òutou.

Manaò

Haamaitaì tätou i te Atua Nui Tumu Tahi ma to tätou värua, òi vai aè to tätou ora e himene òi vai aè tätou nei. To tätou ora no te faatupu i te mau ôpuaraa faaora i te mea e ao to tätou tei te Atua to tätou tauturu to tätou ia tiàturiraa. O tei hämani i te mau raì e te fenua, te tai e te mau mea atoà i roto ra; o tei haapaò i te parau mau e a muri noa atu. O tei faatià mai i te feiä i hämani-ìno-hia, e ua horoà mai i te mäa na tei poìa ra. Na te Atua Nui Tumu Tahi e tätara ia tätou i te mau täpeà tei haafifi i te ao o tei rahuhia, tei faaàraàra i to tätou mata tei faatià tei faahaèhaahia ra, e tei hinaaro i te feiä parau-tià ra.

Te tïtauraa ia i te tätarahapa, ia haaputuputu te fenua hinaaro-òre-hia ra, no te mea te pee noa nei te mahana mai te ota ra, eiaha tätou ia roohia mai e te riri a no mai te Fatu ra, e aore ä i tae mai te mahana i riri ai te Fatu ra. Te ìmi nei te Fatu, i te feiä i haèhaa i nià i te fenua nei, o tei faatupu i te parau au na na ra e ìmi i te parau-tià, e ìmi i te haèhaa peneiaè tätou i te faatäpunihia ia tae i te mahana e riri ai te Fatu ra.

Te vai-iho-hia nei i roto ia tätou i te feiä haèhaa e te veve, ia tiàturi tätou i te iòa o te Fatu. I te mea e òre te ìno, e òre te haavare, e òre hoì e arero-haavare-hia to roto i to tätou vaha e àmu noa hoì tätou e ua taòto, e òre hoì te hoê e haamataùtaù mai.

Te ìte na hoì tätou, e aù mau taeaè, e aù mau tuahine i to tätou parau-raa-hia, e aita reà e taata paari i te haapaòraa i te tino, aita reà e taata mana, aita reà e taata teitei fänau i parauhia. I te mea Ua mäìti te Atua i te mau mea maamaa o te ao nei, ei faahaamä atu i te feiä paari e ua mäìti hoì te Atua i te mea paruparu o te ao nei, ei faahaamäraa atu i te feiä püai. E te mau mea haèhaa o te ao nei, e te mau mea i vahavahahia ra, e te mau mea aore ra, o tei mäìtihia ia e te Atua, ei faaòre i te mau mea e vai nei. Ia òre roa te taata nei ia teòteò i mua ia na. E teie nei, tei roto tätou i te Metia ra ia Ietu, o tei faarirohia e te Atua ei paari e ei parau-tià, ei maitaì e ei ora no tätou ia au i tei päpaìhia ra e O të òaòa ra, e òaòa o ia i te Fatu.

Te aòraa i nià i te mouà i te päpaìraa a Mätaio i te pene 5, i te mau ìrava 1 e tae i te 12

Hamama aè ta na vaha, haapii atu ra ia rätou, nä ô atu ra:

3 «E ao to tei haèhaa te âau, no rätou hoì te Hau o te raì

4 E ao to tei òto, e faaòaòahia hoì rätou

5 E ao to tei marü; e riro hoì ia rätou te fenua

6 E ao to tei hiaai e tei poìhä i te parau-tià, e faaîhia hoì rätou

7 E ao to tei aroha ia vëtahi ê ra, e aroha-atoà-hia hoì mai rätou

8 E ao to tei mä te âau, e ìte hoì rätou i te Atua

9 E ao to tei faatupu i te parau hau ra, e parauhia hoì rätou i te tamarii na te Atua

10 E ao to tei hämani-ìno-hia no te parau-tià ra, no rätou hoì te Hau o te raì

11 E ao to òutou ia faaìno mai, e ia hämani ìno mai, e ia pari haavare noa mai te taata ia òutou i te mau huru ìno atoà nei, no ù. 12 A òaòa, e ia ôuàuà noa i te òaòa; e utuà rahi hoì ta òutou i te mau raì ra: i nä reira hoì rätou i te hämani ìno i te mau perofeta tei nä mua ia òutou

Te faaìte nei na ìrava mätamua ia tätou i to Ietu haereraa i nià i te hoê mouà ma ta na atoà Mau pîpî, Hamama atu ra ta na vaha no te haapii i te feiä atoà i pee mai ia na, e ua maìrihia taua haapiiraa ra, i te aòraa na Ietu i nià i te mouà. Te ômua nei o Ietu i ta na haapiiraa na roto i te ìritiraa mai i te hoê parau òaòa, e teie taua parau òaòa ra, E Ao……… O vai ma ta na e parau nei e. E Ao to Òutou ? O te hoê ia mau taata ta tätou i ìte e, eita teie parau e tano no rätou, o ia hoì o te feiä veve ia, te feiä òto noa, te feiä tei aroha noa, te feiä tei faatupu i te hau, te feiä âau maru, te feiä tei hämani - ìno- noa- hia, e tae noa atu i te feiä tei faaìnohia, e tei pari haavarehia.

 

I taua feia ra, na roto i ta Ietu hiòraa, no rätou mau te patireia o te ao. O vai ma taua mau taata ra ? È ère ia i te feiä moà e te hara òre, e feiä hara atoà hoì e te mau pîpî. Taua feiä ra ua pupu ia, ia rätou i te Atua ra, tei auraro ia Ietu e o tei tiaì noa i te hoìraa mai o te Fatu ra o te Metia. Ua ìte päpü rätou e, i reira ra, e faa- òre- hia ai te òto, e horoàhia ia rätou te fenua na roto ia Ietu, faa- òre- hia hoì to rätou hiaairaa, e parauhia rätou i te mau tamarii na te Atua na roto ia Ietu no te mea ua riro rätou i teie nei ia Ietu.

 

No reira ia faaroohia te mau parau ta Ietu i faahiti, ia ìte te taata atoà te patireia o te Atua o Ietu iho ia, e na roto ia na e mana ai te Atua i nià i te fenua nei. Te parau nei o Ietu e, E Ao to òutou, E aore e Ao to rätou, eiaha te feiä tei rave i te mau òhipa maitaì na mua, to te feiä ra tei färii i ta na mau parau òaòa. E piti tuhaa i roto i teie nei aòraa na Ietu.

 

Ei tuatapaparaa.

 

  1. Mai i te ìrava 3 e tae i te 6, ua faaìtehia i reira te maitaì tei fafauhia i te feiä âau haehaa, i te feiä tei òto, e i te feiä tei poia e tei poiha i te parau tià, oia hoì i te feiä tei toe te hoê mea ia rätou o tei vai noa i roto i te tiaìraa.

 

  1. Mai te ìrava 7 e tae i te ìr 10, te horoà atoà nei te faufaa no taua mau maitaì ra i te feiä tei ìte i te aroha ia vëtahi ê, i te feia âau mä, i te feiä tei faatupu i te parau hau, e i te feiä tei hämani- ìno- hia i te parau tià. Te faaìte nei te reira te tatuhaaraahia na tumu parau e vaù nei, tei haamanaò mai ia tätou e, teie nei Mau parau, e tano ia no te taata hoê, e i nià i te mau taata. E mea tià roa ra ia feruri âmuihia teie nei Mau parau, oia hoì na huru e vaù no te taata faaroo Mau, e na huru e vaù no te maitaì e noaa mai ia na.

 

  1. Te ìrava 11 ia, o te 9 ia te parau ta Ietu e faahiti nei, ei hiò âmuiraa i te mau manaò atoà o ta na i parau, ia noaa i te maitaì i te mau taata e faaroo nei, e tiàturi nei Ia na. Ma te haapäpü e, e ao to òutou ia faaìno mai, e ia hämani – ìno – mai, e ia pari haavare noa mai te taata ia òutou i te mau ìno atoà nei, no ù.

 

  1. Te ìrava 12, e faaitoitoraa teie na Ietu i te fëia atoà tei faaroo i teie mau parau, tei täpeà èi faufaa i roto i te àau, ua maitaì ia te reira taata i te aroha o te Atua. A òaòa, e ia òuàòuà noa i te òaòa, e utuà rahi hoì ta òutou i te ao rä i na reira hoì rätou i te hämani – ìno i te mau perofeta rä, o mua ia, ia òutou.

 

Èi tatararaa.

I muri aè i na parau e iva, te horoà faahou nei Ietu i te hoê parau âpï i ta na mau pîpî, E miti no te fenua e märamarama no teie nei ao. Taua miti e taua märamarama ra, o te mau pîpî ia na Ietu, è ère ra o rätou anaè, o te feiä atoà ra tei ìte e tei faaroo ia Ietu, o te mau ìte ia no Ietu no te mau ànotau atoà, tei haapiihia, tei tae te Evaneria a Ietu i roto i to rätou âau, e tei fäì hua e, o Ietu Metia te Fatu e hanahana ai te Atua Metua. Ia riro taua mau ìte no Ietu i te fenua atoà i ta rätou mau parau maitaì e ia haamaitaìhia te Atua. Ua parau hoì Ietu e, O vau te märamarama no teie nei ao, e o te haere mai ia ù ra e òre e haere noa na te pöuri, e märamarama ora ia to na (Ioane 8 : 12). O Ietu mau te märamarama, e ua riro te fëia faaroo èi mau hihi no taua märamarama ra, e o taua mau hihi ra ta Ietu e parau nei e eiaha ia tuuhia i raro aè i te färii, oia hoì eiaha ia hunahia, ia faaìtehia ra te reira e tià ai.

  • ta Ietu ia e faaitoito mai nei ia tätou i teie täpati, E A TO ÒUTOU, ia haapaò i teie mau hinaaro, tei riro èi reni ärataì i to tätou àau, ia tupu hau o te Atua, i ropu i ta na mau tamarii i te fenua nei.
  1. hamama atoà to tätou mau vaha ia hanahana te Atua.

 

Teraì òr. Faatura.

 

 

 

Repost 0
Published by Mapuanga terai - dans Aòraa
commenter cet article
20 janvier 2017 5 20 /01 /janvier /2017 11:58

Täpati 22 no Tënuare 2017.

Tïtau

Taiòraa.

Mätaio 4,12-23

To Ietu haapaìraa i Tarirea

(Mär 1.14-15; Rut 4.14-15)

12 E faaroo aè ra o ia e ua täpeàhia o Ioane, haapaì atu o ia ra i Tarirea. 13 Faaruè iho ra i Nätareta, haere atu ra e pärahi i Täperenaumi, i te hiti roto, i te pae fenua o Tepuruna e Nafatari, 14 ia tupu tei parauhia mai e te perofeta e Ìtaia 15 E te fenua o Tepuruna e, e te fenua o Nafatari e, i te hiti roto, i ô mai i Iörïtäna, e Tarirea o te mau êtene e 16 Te feiä i pärahi i roto i te pöuri ra ua ìte ia i te märamarama rahi E i nià i te feiä i pärahi i roto i te marupohe, e märamarama tei hiti mai. 17 I reira to Ietu haamataraa i te aò, i te nä-ô-raa e A tätarahapa, te fätata mai nei hoì te Hau o te raì. Te tïtauraa i te mau pipi mätämua

(Mär 1.16-20; Rut 5.1-11)

18 E te haere noa ra Ietu nä te hiti roto i Tarirea, ìte atu ra o ia i nä taeaè toopiti, o Timona, tei parauhia o Pëtero, e to na taeaè o Âneterea, te tuu ra i te ùpeà i roto i te miti, e ravaai hoì räua. 19 Ua parau atu ra o ia ia räua: «A pee mai ia ù, e faariro vau ia ôrua ei ravaai taata. 20 Faaruè iho ra räua i ta räua ùpeà i reira ra, e ua pee atu ra ia na. 21 E ia haere atu o ia, i pïhaì rii atu, ìte atu ra e piti ä taeaè, o Iatöpo a Tepetaio ra e to na taeaè o Ioane, tei nià i te poti e to räua metua täne o Tepetaio, te ène ra i ta rätou mau ùpeà. Ua pii atu ra o ia ia räua. 22 Faaruè iho ra räua i te poti i reira ra e to räua metua täne, e ua pee atu ra ia na. Ietu e te mau taata e rave rahi

(Mär 1.39; Rut 4.44; 6.17-18)

23 Haere atu ra o ia nä Tarirea atoà e àti aè, i te haapiiraa i roto i to rätou mau tunato ra, te pororaa i te parau maitaì o te Hau e te faaoraraa i te mau maì e te mau haapepa atoà i roto i te nünaa.

Manaò

Te märamarama e faanaòhia nei e tätou, o to tätou ia ora tei turäma i te mau vahi e mataùhia nei e tätou, O te Atua Nui Tumu Tahi to tätou Fatu të tià ia tätou ia rautï te mataù e ïri mai i nià ia tätou. I mua te haereà mai o te mau peu tià òre ra, to tätou mau ènemi e tei riri mai ia tätou, ia tiàma tätou i mua i te mau faaturoriraa rau tei faatupu ia hià tätou, ia mau maite rä tätou ia òre to tätou âau e mataù. Te hinaaro nei tätou i te Fatu, ia pärahi tätou i roto i to na aroha to na here e hope roa aè to tätou puè mahana, ia ìte tätou i te maitaì o te Fatu e ia ui mäite tätou i roto i to tätou âau i te faufaa rahi o to na aroha e to na here. Ia roohia tätou e te àti ra e huna o ia ia tätou i roto i to na tiàhapa e faatäpuni o ia ia tätou i roto i te vähi moè i to na ra Hau, a tuu ai ia tätou i te vähi teitei ra. Ei teie nei e faateitei o ia i to tätou upoo, i mua i to tätou mau ènemi e àti noa aè, ia hopoi tätou i to na ra hanahana i te vahi òaòa, e himene hoì tätou e himene haamaitaì i te Atua Nui Tumu Tahi. E haapaò mai, e te Atua Nui Tumu Tahi, i to mätou reo, ia tiàoro atu mätou, e aroha mai, e faaroo mai ia mätou. Ia parau mai òe, E ìmi mai òutou i taù mata E ìmi ia mätou i to mata, e te Fatu. Eiaha òe e huna ê atu i to mata ia mätou nei, eiaha to mau tävini e haapae-riri-noa-hia ua tauturu mai hoì òe ia mätou, eiaha mätou e faaruè-ê-hia, eiaha òe e täiva ia mätou, e te Atua Nui Tumu Tahi, to mätou Ora. Faaruè noa ä to mätou metua täne e to mätou metua vahine ia mätou, ei reira te Fatu e rave mai ai ia tätou. E haapii mai òe, e te Fatu, i to òe ra èà, e arataì ia tätou nä te èà manina, no to tätou nei mau ènemi. Eiaha òe e horoà ia mätou i te hinaaro o to mätou mau ènemi ìte haavare anaè tei tià mai e märô ia mätou, e te ûàna mai ra to rätou riri ia mätou. Te manaò nei rä mätou, e noaa ia mätou te maitaì o te Fatu i te fenua nei. Tei tiaì i te Fatu e faaitoito, e na na e faaitoito mai i to tätou âau, e tiaì ä tätou i te Fatu.

Ia faatupu i te hoê âàhiata no te hoê faatereraa hau ia òre ia ârehurehu te mau fenua ra i roohia e te àti i mütaa iho ra mai ia na hoì i faahaèhaa i mütaa iho ra taua mau fenua ra no Mäòhi Nui ia tae rä i te taime hopeà ra, e faanehenehehia o ia i te haereà na tähatai, na te pae o te Moana Nui a Hiva.

Te fänauraa teie no te feiä i haere noa na te pöuri ra e märamarama rahi tei ìteä ia rätou te feiä i pärahi i roto i te maru pohe, ua ànaana mai te märamarama i nià ia rätou. Ua faarahi te Atua Nui Tumu Tahi i taua fenua ra, e ua faarahi i to rätou òaòa, te òaòa ra tätou i mua i te Atua Nui Tumu Tahi mai te òaòa i te àuhuneraa ra mai te òaòa o te feiä i turämahia i te ànaana o te ora mur òre. O te hopoià teie ia mauhia no te ôfati i te mau hämani ìno e tupu nei i te mau vahi atoà o te fenua i Mäòhi Nui nei.

Mätamua roa, te âmahamaharaa i roto i te Ètärëtia, te nünaa faatiàmähia e te Metia, E teie nei, e aù mau taeaè, e aù mau tuahine te aòraa i aòhia ia tätou i te iòa i o to tätou Fatu ra o Ietu Metia, e ei parau hoê ta tätou atoà na, e eiaha ia àmahamaha i roto ia tätou ia àti mäite rä tätou mä te âau hoê e te manaò hoê. Ua faaìtehia mai te reira ia tätou. Te haamaitaì nei tätou i te Atua i te mea aore tätou i päpetitohia i te iòa o te haapaòraa i te iòa ra o te Toru Tahi. O te tahi tuhaa teie no ta tätou hopoià, eiaha ra te pororaa, e te haapiiraa i te Èvaneria ia paremo i roto i te vai no te päpetitoraa, eiaha atoà rä mä te paari o te parau, o te riro hoì te tätauro o te Metia ra ei mea faufaa òre.

Ia faaroo o Ietu ua täpeàhia o Ioane, haapaì atu ra, oia hoì täui atu ra o ia i to na èà na Tarirea atu ra i te haere. No te faatupu tei parauhia e te perofeta e Ìtaia i te ìrava 15 E te fenua o Tepuruna, e te fenua o Nafatari, i te hiti roto, i ô mai i Iörïtäna, e Tarirea o te mau êtene, ìrava16 Te feiä i pärahi i roto i te pöuri ra ua ìte ia i te märamarama rahi e i nià i te feiä i pärahi i roto i te marupohe, e märamarama tei hiti mai. Ìrava17 I reira to Ietu haamataraa i te aò, i te nä-ô-raa e A tätarahapa, te fätata mai nei hoì te Hau o te raì.

No teie täpura òhipa, te tïtau nei o Ietu i te mau pipi mätämua, o Timona, tei parauhia o Pëtero, e to na taeaè o Âneterea, e ravaai hoì ta räua òhipa. Ma te parau ia räua A pee mai ia ù, e faariro vau ia ôrua ei ravaai taata. Ìte atu ra e piti ä taeaè, o Iatöpo a Tepetaio ra e to na taeaè o Ioane, te ène ra i ta rätou mau ùpeà pii atu ra o Ietu räua. Na Tarirea atu ra rätou i te haere, i te haapiiraa i roto i to rätou mau tunato ra, te pororaa i te parau maitaì o te Hau e te faaoraraa i te mau maì e te mau haapepa atoà i roto i te nünaa.

Te vähi faufaa i roto i teie tïtauraa a Ietu te mea ia e, na Ietu iho i faariro ia rätou èi ravaai taata. Te ravaai taata ra, e taata ia tei faaineinehia no te haere i nià i te tahua pororaa ; e ia faahiti hoì tätou i te pororaa, no te mea ia te vai ra te òhipa, oia hoì te tahi taata tei hinaaro i te ìte. Eiaha tätou e manaò e, te vai ra te tahi faaineineraa taa ê ta Ietu e rave no ta na i tïtau. Teie noa te haapäpüraa ta Ietu e horoà nei, A pee mai ia ù, e faariro vau ia ôrua ei ravaai taata. Te mea teie tei ineine ia Ietu i te rave no to na mau pipi, oia te haapäpüraa i to na manaò i nià i te òhipa e hinaarohia ra i te mau pipi, mai te ìte maitaì atoà i te tiàturiraa o Ietu i nià i te hopeàraa maitaì o te òhipa i horoàhia e rave. Nä ô noa na tätou, ia parau tätou i te tahi taata e, faaitoito, aita e òhipa ta tätou i rave, ìtehia atu ai te tahi tauiraa rahi, riro mai ai o ia ei taata itoito. Ua ìmi noa tätou i te räveà ia faaära teie taata i te itoito e vai ra i roto ia na. Ia au i teie manaò, ia paruparu te taata, eere no te mea e püai aè te ènemi, no te mea rä ua haaparuparu ê na teie taata ia na iho, ua hiò ê na ia na i roto i te pau, e aita i haamanaò faahou e, na te Atua te òhipa ta na e rave ra, tei pïhaì noa ia te Atua ia na. Ua tuu ihoä paha te Atua i to na Värua i nià i teie taata, mai te peu rä ua apiapi ê na to na âau i te mataù, nä hea ia te Värua o te Atua e òhipa ai i roto ia na. Mai terä rii faaäraraa ta te Atua ia Ieremia, Eiaha òe e taiä i to rätou mata, o te vai iho noa atu vau ia òe ia maheàheà ia rätou (Ieremia 1, 17). Teie te faaäuraa o teie parau Hinaaro òe na te mataù e arataì ia òe i te pororaa ; pärahi iho ia ; hinaaro òe na ù e arataì ia òe, a tuu ia i te mataù i räpae. Ia märamarama maitaì mai tätou i teie vähi, eere na te pipi teie pororaa, ia au i te parau e pee mai ia ù, eere atoà na te Atua, hinaaro rä te Atua i te taata ta na i mäìti ia tauturu ia na i te faatupuraa i to na hinaaro. Ia ìte atoà rä o ia e, te hanahana o te òhipa, eere no na, no te Atua rä. E taata noa ihoä paha te taata, te taata rä i haapaò i te hinaaro o te Atua, ua riro ia ei teòteòraa no te Atua, te auraa ia o teie reo to Ietu, A pee mai ia ù.

 

Ia ora Mäòhi Nui.

 

Teraì òr. Faatura.

 

Repost 0
Published by Mapuanga terai - dans Aòraa
commenter cet article

Présentation

  • : Le blog de Mapuanga terai
  • Le blog de Mapuanga terai
  • : E parau no te faaìte i te mau tïtauraa e hinaarohia ra i te taata ia noaa i te tiàturiraa i te Atua te Vai Nei Au O vau e Vai nei. Te mau manaò i päpaìhia no te turaì ia i te mau feruri ia tià i te taatoàraa i horoà i te faufaa e vai i roto i te reira e te reira, no te mea te vai nei te turämaraa no te tautururaa i te mau faanahoraa e au no te faaaàno te parau.
  • Contact

Recherche

Liens